() କୃଷି ଭିତ୍ତିକ ବୌଦ୍ଧ ଜିଲ୍ଲାରେ ଧାନ ପରେ କପା ହେଉଛି ଅର୍ଥକାରୀ ଫସଲ । ଗତ ଦଶ ବର୍ଷ ମଧ୍ୟରେ ଜିଲ୍ଲାରେ ଧୀରେ ଧୀରେ କପା ଚାଷର ମାତ୍ରା ବୃଦ୍ଧି ହେଉଥିବା ବେଳେ ଉତ୍ପାଦନ ମଧ୍ୟ ବେଶ ଭଲ ହେଉଛି। ହେଲେ ଉତ୍ପାଦିତ କପାର ବିକ୍ରି ପାଇଁ ଜିଲ୍ଲାରେ ନାହିଁ କପାମଣ୍ଡି । ଫଳରେ ବିକ୍ରି ପାଇଁ ନାହିଁ ନଥିବା ଅସୁବିଧାରେ ସମୁଖୀନ ହେଉଛନ୍ତି ଚାଷୀ ।
ବିଭିନ୍ନ ଅର୍ଥକାରୀ ଫସଲ ମଧ୍ୟରେ ଅନ୍ୟତମ ହେଉଛି କପା ଚାଷ । ପଶ୍ଚିମ ଓଡ଼ିଶାରେ କପା ଚାଷ ବହୁଳ ମାତ୍ରାରେ ହେଉଥିବା ବେଳେ, ବୌଦ୍ଧ ଜିଲ୍ଲାରେ ହେଉଥିବା କପାର ଏକ ସ୍ୱତନ୍ତ୍ର ପରିଚୟ ରହିଛି। ତେଣୁ ଜିଲ୍ଲାର ବୌଦ୍ଧ ଓ କଣ୍ଟାମାଳ ବ୍ଲକରେ ବହୁଳ ଭାବରେ କପା ଚାଷ ହୁଏ । ବଘିଆପଡା ,ଶଗଡା, ଗୁଣ୍ଡୁଲିଆ, ଲୁଣିବାହାଲ, କଣ୍ଟାମାଳ ଆଦି ଅଞ୍ଚଳରେ ଏକର ଏକର ଜମିରେ ଚାଷୀମାନେ କପା ଚାଷ କରିଛନ୍ତି । ଏହା ଏକ ଲାଭ ଜନକ ଫସଲ ହୋଇଥିବାରୁ ବିଗତ ୧୦ବର୍ଷ ମଧ୍ୟରେ ଅଞ୍ଚଳରେ ବଢ଼ିଛି କପା ଚାଷ । ଚଳିତ ବର୍ଷ ଭଲ ବର୍ଷା ପାଇଁ କପାଚାଷ ମଧ୍ୟ ଭଲ ହୋଇଥିବା ବେଳେ ଅମଳ ମଧ୍ୟ ଭଲ ହୋଇଛି ବୋଲି ଚାଷୀମାନେ କହିଛନ୍ତି ।
ସାଧାରଣ ଜୁନ, ଜୁଲାଇରୁ ଚାଷୀ କପା ଚାଷ ଆରମ୍ଭ କରିଥିବା ବେଳେ ଡିସେମ୍ବର ଜାନୁଆରୀ ମାସରେ ଅମଳ କରିଥାନ୍ତି । ଜିଲ୍ଲାରେ କପା ଚାଷ ବଢିଥିଲେ ବି ଅମଳ ପରେ ବିକ୍ରି ପାଇଁ ନାହିଁ ବଜାର ସୁବିଧା । ଫଳରେ ଉତ୍ପାଦିତ କପାକୁ ବିକ୍ରି ପାଇଁ ଚାଷୀମାନେ ବାଧ୍ୟହୋଇ ବର୍ଷ ଯାକର ପରିଶ୍ରମକୁ କମ ଦରରେ ଦଲାଲ ହାତକୁ ଟେକି ଦିଅନ୍ତି । ଆଉ ରାଜ୍ୟ ବାହାର ଦଲାଲ କପାକୁ ଶାଗମାଛ ଦରରେ କିଣି ନେଉଥିବା ଦେଖିବାକୁ ମିଳୁଛି । ଯଦି ପ୍ରଶାସନ କିମ୍ବା ରାଜ୍ୟ ସରକାରଙ୍କ ତରଫରୁ କପା ଚାଷ ପାଇଁ ପ୍ରୋତ୍ସାହନ ରାଶି ସହ ବଜାର ଓ ମଣ୍ଡିର ବ୍ୟବସ୍ଥା କରାଗଲେ ଜିଲ୍ଲା କପାଚାଷ ର ହବ ହେବା ସହ ଚାଷୀମାନେ ଭଲ ଦୁଇ ପଇସା ଲାଭ ପାଆନ୍ତେ ବୋଲି ବୁଦ୍ଧିଜୀବୀ କହିଛନ୍ତି।
Naxatra News is now on Whatsapp
Join and get latest news update delivered to you via whatsapp
Join Now
