ଭୁବନେଶ୍ବର: ପାର୍ବଣରେ ବର୍ଷା । ଆଗାମୀ ୩ଦିନ ପର୍ଯ୍ୟନ୍ତ ଉପକୂଳ ଓଡିଶା ସମେତ ପାର୍ଶ୍ଵବର୍ତ୍ତୀ ଅଞ୍ଚଳରେ ବିଜୁଳି ଘଡ଼ଘଡ଼ି ସହ ବର୍ଷା । ପୁଣି ୧ ତାରିଖରେ ବଙ୍ଗୋପସାଗରକୁ ପ୍ରବେଶ କରିବ ଆଉ ଏକ ଘୁର୍ଣ୍ଣିବଳୟ ଫଳରେ ୨ ଓ ୩ ତାରିଖରେ ରାଜ୍ୟରେ ବଢିବ ବର୍ଷା ।
ପ୍ରଶାନ୍ତ ମହାସାଗରରେ ଥିବା ବାତ୍ୟାର ଅବଶିଷ୍ଟାଂଶ ୧ତାରିଖ ବେଳକୁ ପୂର୍ବକେନ୍ଦ୍ରୀୟ ଓ ଉତ୍ତର ପଶ୍ଚିମ ବଙ୍ଗୋପସାଗର ଅଞ୍ଚଳକୁ ପ୍ରବେଶ କରିବ । ୧ ତାରିଖ ବେଳକୁ ସୃଷ୍ଟି ହେବ ଆଉ ଏକ ଘୁର୍ଣ୍ଣିବଳୟ । ଫଳରେ ୨ ତାରିଖ ୩ ତାରିଖ ରେ ରାଜ୍ୟରେ ବଢିବ ବର୍ଷା । ପୂର୍ବରୁ ସୃଷ୍ଟି ହୋଇଥିବା ଘୁର୍ଣ୍ଣିବଳୟ ଉତ୍ତର ପଶ୍ଚିମ ଓ ପଶ୍ଚିମକେନ୍ଦ୍ରୀୟ ଅଞ୍ଚଳରେ ସକ୍ରିୟ ରହିଛି । ଫଳରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜାରି ରହିଛି । ୨୭ ତାରିଖରେ ଉପକୂଳ ସମେତ ୨୦ ଜିଲ୍ଲାରେ ବିଜୁଳି ଘଡଘଡି ସହିତ ବର୍ଷା ହେବାର ଆକଳନ କରାଯାଇଛି । ସେହିପରି ୨୮ ତାରିଖରେ ମୟୁରଭଞ୍ଜ, ବାଲେଶ୍ୱର, କନ୍ଧମାଳ, ଗଞ୍ଜାମ ରେ ବିଜୁଳି ଘଡଘଡି ସହିତ ପ୍ରବଳ ବର୍ଷା ଓ ୨୯ ତାରିଖରେ ଗଜପତି, ମାଲକାନଗିରି, କୋରାପୁଟ ରେ ବିଜୁଳି ଘଡଘଡି ସହିତ ବର୍ଷା ହେବା ନେଇ ପୂର୍ବାନୁମାନ କରିଛି ପାଣିପାଗକେନ୍ଦ୍ର ।
ସେପଟେ ଦୁଇ ବର୍ଷର କଟକଣା ଏଥର ପୂଜାକୁ ବେଶ ଧୁମଧାମରେ ପାଳିବାକୁ ମନସ୍ତ କରିଥିବା ଲୋକ ପାଗର ମିଜାଜ୍ ଦେଖି ପ୍ରମାଦ ଗଣିଲେଣି। ଏଥର ପୂଜା ଫିକା ପଡ଼ିଯିବନି ତ ବୋଲି ଭାଳେଣି ପଡ଼ିଲାଣି ସମସ୍ତଙ୍କ ମନରେ। ଅଚାନକ ପାଗ ଶୁଖିଲା ଆଉ ତା ପର ମୂହୂର୍ତ୍ତରେ ପ୍ରବଳ ବର୍ଷା ଲାଗି ଲୋକଙ୍କ ଭିତରେ ପୂଜାକୁ ନେଇ ଥିବା ସରସତା ମଉଳିବାରେ ଲାଗିଲାଣି।ତଥାପି ପୂଜାକୁ ସମସ୍ତେ ଜାକଜମକରେ ପାଳିବା ପାଇଁ ପ୍ରସ୍ତୁତି ଚଳାଇଛନ୍ତି।
ରାଜ୍ୟରେ ଜୁନ ୧ରୁ ୨୭ ସେପ୍ଟେମ୍ବର ସୁଦ୍ଧା ୧୧୭୭.୭ମିମି ବର୍ଷା ରେକର୍ଡ କରାଯାଇଛି । ଯାହା ସ୍ୱାଭାବିକ ୧୧୩୫.୧ମିମି ତୁଳନାରେ ୪% ଅଧିକ । ଅନ୍ୟପଟେ ଗଜପତି, କୋରାପୁଟ ଓ ବୌଦ୍ଧରେ ସ୍ୱାଭାବିକ ବର୍ଷା ଠୁ ଅଧିକ ବର୍ଷା ରେକର୍ଡ କରାଯାଇଛି ।
ସିମ୍ପୁଲ ନାୟକଙ୍କ ରିପୋର୍ଟ
