bihar

  • тАШрмПрмирмбрм┐рмПтАЩрм░рнЗ рмпрнЛрмЧ рмжрнЗрмм рмХрм┐ тАШрмПрм▓рмЬрнЗрмкрм┐тАЩ ?

    рммрм┐рм╣рм╛рм░: тАЬрм▓рнЛрмХ рмЬрмирм╢рмХрнНрмдрм┐ рмкрм╛рм░рнНрмЯрм┐тАЭ рм░ рмЕрмзрнНрнЯрмХрнНрм╖ рмЪрм┐рм░рм╛рмЧ рмкрм╛рм╕рнНтАМрн▒рм╛рми рмПрмирнНтАМрмбрм┐рмПрм░рнЗ рмпрнЛрмЧ рмжрнЗрммрм╛ рмирнЗрмЗ рмЕрмирнЗрмХ рмЪрм░рнНрмЪрнНрмЪрм╛ рмнрм┐рмдрм░рнЗ рмЖрмЬрм┐ рммрм┐рм╣рм╛рм░рм░ рмХрнЗрмирнНрмжрнНрм░рнАрнЯ рмЧрнГрм╣рм░рм╛рмЬрнНрнЯ рмормирнНрмдрнНрм░рнА рмирм┐рмдрнНрнЯрм╛рмирмирнНрмж рм░рм╛рнЯрмЩрнНрмХрнБ рмкрм╛рмЯрмирм╛рм░рнЗ рм╕рм╛рмХрнНрм╖рм╛рмд рмХрм░рм┐рмЫрмирнНрмдрм┐ рмЪрм┐рм░рм╛рмЧ ред рмдрнЗрмгрнБ рмЖрм╢рмЩрнНрмХрм╛ рмХрм░рм╛рмпрм╛рмЙрмЫрм┐ рмХрм┐ рмдрм╛рмЩрнНрмХрнБ рмХрнЗрмирнНрмжрнНрм░ рмХрнНрнЯрм╛рммрм┐рмирнЗрмЯрм░рнЗ рмпрнЛрмЧ рмХрм░рм╛рмпрм╛рмЗрмкрм╛рм░рнЗ ред рмдрнЗрммрнЗ рмПрм╣рм╛ рмЙрмкрм░рнЗ рмирм┐рмдрнНрнЯрм╛рмирмирнНрмж рм░рм╛рнЯ рмХрм╣рм┐рмЫрмирнНрмдрм┐ рмпрнЗ рмХрм┐ тАЬ рмПрм╣рм╛ рмЖрморм░ рмкрнБрм░рнБрмгрм╛ рмШрм░ ред рмпрнЗрммрнЗ рмЖрморнЗ рмкрм░рм╕рнНрмкрм░рмХрнБ рмнрнЗрмЯрнБ рм╕рммрнБрммрнЗрм│рнЗ рмнрм▓ рм▓рм╛рмЧрнЗ ред рм░рм╛рмо рммрм┐рм│рм╛рм╕ рмкрм╛рм╕рн▒рм╛рми рмУ рммрм┐рмЬрнЗрмкрм┐ рм▓рнЛрмХрмЩрнНрмХ рмХрм▓рнНрнЯрм╛рмг рмкрм╛рмЗрмБ рм╣рм┐рмБ рмХрм╛рмо рмХрм░рм┐рмерм╛рмП редтАЭ
    рм╕рнЗрмкрмЯрнЗ, рмЪрм┐рм░рм╛рмЧ рмкрм╛рм╕рн▒рм╛рмирнНтАМ рммрм┐ рмЖрмЬрм┐ рмкрм╛рмЯрмирм╛ рмХрм╛рм░рнНрмпрнНрнЯрм╛рм│рнЯрм░рнЗ рмЬрм╛рмдрнАрнЯ рмУ рм░рм╛рмЬрнНрнЯ рмХрм╛рм░рнНрмпрнНрнЯрмирм┐рм░рнНрммрм╛рм╣рнАрмЩрнНрмХрм░ рмПрмХ рмЧрнБрм░рнБрмдрнНрммрмкрнВрм░рнНрмгрнНрмг рммрнИрмармХ рмбрмХрм╛рмЗрмЫрмирнНрмдрм┐ред рмЧрмгрморм╛рмзрнНрнЯрмормХрнБ рм╕рнЗ рмХрм╣рм┐рмЫрмирнНрмдрм┐ рмпрнЗ, рмЖрмЧрм╛рморнА рм▓рнЛрмХрм╕рмнрм╛ рмирм┐рм░рнНрммрм╛рмЪрми рмирм┐рмормирнНрмдрнЗ рморнЗрмгрнНрмЯ рм╕рмВрмХрнНрм░рм╛рмирнНрмдрм░рнЗ рмЖрм▓рнЛрмЪрмирм╛ рм╣рнЗрммред рмЬрнБрм▓рм╛рмЗ рнзрно рмдрм╛рм░рм┐рмЦ рмжрм┐рми тАШрммрм┐рмЬрнЗрмкрм┐тАЩ рмирнЗрмдрнГрмдрнНрммрм╛рмзрнАрми тАШрмПрмирнНтАМрмбрм┐рмПтАЩ рмЖрнЯрнЛрмЬрми рмХрм░рм┐рммрм╛рмХрнБ рмерм┐рммрм╛ рммрнИрмармХрм░рнЗ рммрм┐ рмдрм╛рмЩрнНрмХ рмжрм│ рмпрнЛрмЧрмжрнЗрммред

  • рммрм┐рм╣рм╛рм░рм░рнЗ рммрм╛рм▓рм┐ рморм╛рмлрм┐рмЖрмЩрнНрмХ рмжрм╛рмжрм╛рмЧрм┐рм░рм┐

    MAFIA ATTACK OFFICER..PKG

    ()рмкрм╛рмЯрмирм╛:  рммрм┐рм╣рм╛рм░рм░рнЗ рммрм╛рм▓рм┐ рморм╛рмлрм┐рмЖрмЩрнНрмХ рмжрм╛рмжрм╛рмЧрм┐рм░рм┐ред рммрнЗрмЖрмЗрми рммрм╛рм▓рм┐ рмЦрмирми рмУ рмЪрнЛрм░рм╛ рмЪрм╛рм▓рм╛рмг рм░рнЛрмХрм┐рммрм╛рмХрнБ рмпрм╛рмЗ рмЬрмгрнЗ рморм╣рм┐рм│рм╛ рмЕрмзрм┐рмХрм╛рм░рнА рммрм╛рм▓рм┐ рморм╛рмлрм┐рмЖрмЩрнНрмХ рм╕рмВрмШрммрмжрнНрмз рмЖрмХрнНрм░рмормгрм░ рм╢рнАрмХрм╛рм░ рм╣рнЛрмЗрмЫрмирнНрмдрм┐ред рморм╣рм┐рм│рм╛ рмЕрмзрм┐рмХрм╛рм░рнАрмЩрнНрмХ рмЪрнБрмЯрм┐рмХрнБ рмШрнЛрм╖рм╛рм░рм┐ рмпрнЗрмнрм│рм┐ рм╕рмВрмШрммрмжрнНрмз рмЖрмХрнНрм░рмормг рмХрм░рм┐рмЫрмирнНрмдрм┐ рморм╛рмлрм┐рмЖ, рмдрм╛рм╣рм╛ рмжрнЗрмЦрм┐рм▓рнЗ рм▓рнЛрмо рмЯрм╛рмЩрнНрмХрнБрм░рм┐ рмпрм┐рммред рммрм┐рм╣рм╛рм░рм░рнЗ рмормж рморм╛рмлрм┐рмЖрмЩрнНрмХ рм▓рм╛рмЧрм┐ рммрм┐рм╖рм╛рмХрнНрмд рмормжрм░рнЗ рморнЛрмдрм┐рм╣рм╛рм░рм┐рм░рнЗ рморнГрмдрнНрнЯрнБ рм╕рмВрмЦрнНрнЯрм╛ рмХрнНрм░рморм╛рмЧрмд рммрмврм╝рнБрмерм┐рм▓рм╛ рммрнЗрм│рнЗ рмкрм╛рмЯрмирм╛рм░ рммрм┐рм╣рмЯрм╛рм░рнЗ рммрм╛рм▓рм┐ рморм╛рмлрм┐рмЖрмЩрнНрмХ рмПрмнрм│рм┐ рмЖрмХрнНрм░рмормгрмХрнБ рмирнЗрмЗ рммрм┐рм╣рм╛рм░ рм░рм╛рмЬрмирнАрмдрм┐ рмкрнБрмгрм┐ рмШрморм╛рм╕рм╛рми рм╣рнЛрмЗрмЫрм┐ред

    рмЧрнЛрмбрм╝рм╛рмЗ рмЧрнЛрмбрм╝рм╛рмЗ рмЖрмХрнНрм░рмормгред рморм╣рм┐рм│рм╛ рмЕрмзрм┐рмХрм╛рм░рнАрмЩрнНрмХ рмЪрнБрмЯрм┐ рмШрнЛрм╖рм╛рмбрм╝рм┐рм▓рнЗред рмдрм│рнЗ рмкрмХрм╛рмЗ рмпрм┐рмП рмЪрм╛рм╣рм┐рмБрм▓рм╛ рморм╛рмбрм╝ рморм╛рм░рм┐рм▓рм╛ред рмЧрм╛рм│рм┐рмЧрнБрм▓рмЬ рмХрм▓рнЗ, рмЧрнЛрмЗрмарм╛ рморм╛рм░рм┐рм▓рнЗред рмЖрмЙ рм▓рнЛрмХрмЩрнНрмХ рм╕рмВрмШрммрмжрнНрмз рмЖрмХрнНрм░рмормгрм░рнЗ рм▓рм╣рнБ рм▓рнБрм╣рм╛рмг рм╣рнЛрмЗрмЧрм▓рнЗ рморм╣рм┐рм│рм╛ рмЕрмзрм┐рмХрм╛рм░рнАред рммрм┐рм╣рм╛рм░ рмкрм╛рмЯрмирм╛рм░ рммрм┐рм╣рмЯрм╛ рмЕрмЮрнНрмЪрм│рм░рнБ рмПрмнрм│рм┐ рмЕрмнрм╛рммрмирнАрнЯ рмжрнГрм╢рнНрнЯ рмЖрм╕рм┐рмЫрм┐ред рмЖрмХрнНрм░рмормг рммрнЗрм│рм░ рмнрм┐рмбрм╝рм┐рмУ рмЬрнЛрм░рмжрм╛рм░ рмнрм╛рмЗрм░рм╛рм▓ рм╣рнЗрммрм╛рм░рнЗ рм▓рм╛рмЧрм┐рмЫрм┐ред рмЖрмХрнНрм░рмормгрмХрм╛рм░рнА рм╣рнЗрм▓рнЗ рммрм╛рм▓рм┐ рморм╛рмлрм┐рмЖред рмкрм░рнЗрмУ рмЧрм╛рмБрм░рнЗ рммрнЗрмЖрмЗрми рммрм╛рм▓рм┐ рмЦрмирми рмУ рммрм╛рм▓рм┐ рмЪрнЛрм░рм╛ рмЪрм╛рм▓рм╛рмгрмХрнБ рм░рнЛрмХрм┐рммрм╛рмХрнБ рмпрм╛рмЗ рмПрморм┐рмдрм┐ рмЖрмХрнНрм░рмормгрм░ рм╢рнАрмХрм╛рм░ рм╣рнЛрмЗрмЫрмирнНрмдрм┐ рморм╣рм┐рм│рм╛ рмЕрмзрм┐рмХрм╛рм░рнАред рмЕрммрнИрмз рммрм╛рм▓рм┐ рмЦрмирмирмХрнБ рм░рнЛрмХрм┐рммрм╛рмХрнБ рмпрм╛рмЗрмерм┐рм▓рнЗ рмЦрмгрм┐ рммрм┐рмнрм╛рмЧрм░ рмПрм╣рм┐ рморм╣рм┐рм│рм╛ рмЕрмзрм┐рмХрм╛рм░рнА рмЬрмгрмХред рмЖрмХрнНрм░рмормг рмХрм░рм┐рмерм┐рммрм╛ рнкрнк рмЬрмгрмЩрнНрмХрнБ рмкрнБрм▓рм┐рм╕ рмЧрм┐рм░рмл рмХрм░рм┐рмЫрм┐ред рмП рм╕рмирнНрмжрм░рнНрмнрм░рнЗ рмдрм┐рмирнЛрмЯрм┐ рмПрмдрм▓рм╛ рммрм┐ рм░рнБрмЬрнБ рм╣рнЛрмЗрмЫрм┐ред рморм╣рм┐рм│рм╛ рмЕрмзрм┐рмХрм╛рм░рнАрмЩрнНрмХрнБ рмпрнЗрмЙрмБ рмЕрм╕рм╛рморм╛рмЬрм┐рмд рмдрмдрнНрмдрнНрн▒ рм╕рнЗрмдрнЗрммрнЗрм│рнЗ рмШрнЗрм░рм┐рмпрм╛рмЗрмерм┐рм▓рнЗред рмпрнЗрмдрнЗрммрнЗрм│рнЗ рмЕрмзрм┐рмХрм╛рм░рнА рмЬрмгрмХ рммрм╛рм▓рм┐ рмЦрмирми рм╕рморнНрн▒рмирнНрмзрм┐рмд рмЕрмнрм┐рмпрм╛рмирмХрнБ рм╕рм╛рмХрм╛рм░ рм░рнВрмк рмжрнЗрммрм╛рмХрнБ рмЪрнЗрм╖рнНрмЯрм┐рмд рмерм┐рм▓рнЗред рморм╣рм┐рм│рм╛ рмЕрмзрм┐рмХрм╛рм░рнАрмЩрнНрмХрнБ рмЖрмХрнНрм░рмормг рм╕рм╣ рмЬрм┐рм▓рнНрм▓рм╛ рмЦрмирми рмЕрмзрм┐рмХрм╛рм░рнА рмУ рни рмЬрмг рм░рм╛рмЬрм╕рнНрн▒ рмирм┐рм░рнАрмХрнНрм╖рмХ рммрм┐ рмЧрнБрм░рнБрмдрм░ рмЖрм╣рмд рм╣рнЛрмЗрмЫрмирнНрмдрм┐ред

    рморм╣рм┐рм│рм╛ рмЕрмзрм┐рмХрм╛рм░рнА рмЬрмгрмХ рмЬрнАрммрми рммрм┐рмХрм│рм░рнЗ рмжрнМрмбрм╝рм┐рмерм┐рм▓рнЗред рм╣рнЗрм▓рнЗ рмирм┐рм░рнНрмжрнЯ рммрм╛рм▓рм┐ рморм╛рмлрм┐рмЖ рмдрм╛рмЩрнНрмХрнБ рмЫрм╛рмбрм╝рм┐рмирмерм┐рм▓рнЗред рмдрм╛рмЩрнНрмХ рмЙрмкрм░рмХрнБ рмкрмерм░ рмлрм┐рмЩрнНрмЧрм┐рммрм╛ рм╕рм╣ рммрм╛рмбрм╝рм┐рм░рнЗ рммрм╛рмбрм╝рнЗрмЗ рмЪрм╛рм▓рм┐рмерм┐рм▓рнЗред рм╕рнЛрморммрм╛рм░ рмЕрмкрм░рм╛рм╣рнНрмирм░ рмШрмЯрмгрм╛ред рмкрнНрм░рм╛рнЯ рм╕рм╛рмврнЗ рнйрмЯрм╛ рммрнЗрм│рнЗ рмЬрм┐рм▓рнНрм▓рм╛ рмЦрмгрм┐ рмЕрмзрм┐рмХрм╛рм░рнА, рмЬрм┐рм▓рнНрм▓рм╛ рмкрм░рм┐рммрм╣рми рмЕрмзрм┐рмХрм╛рм░рнА рмУ рмжрм╛рмирмкрнБрм░ рмПрмбрм┐рмПрмо рмкрнБрм░рм╛ рмЯрм┐рморнН рм╕рм╣ рмХрнЛрмЗрм▓рмУрнНрн▒рм╛рм░рм╛ рмкрнЛрм▓ рмдрм│рнЗ рмЪрм╛рм▓рм┐рмерм┐рммрм╛ рммрнЗрмЖрмЗрми рммрм╛рм▓рм┐ рмЦрмирми рмЙрмкрм░рнЗ рм░рнЗрмбрнН рмХрм░рм┐рмерм┐рм▓рнЗред рмХрм┐рмирнНрмдрнБ рмЕрмЪрм╛рмирмХ рморм╛рмлрм┐рмЖ рм╕рмВрмШрммрмжрнНрмз рмЖрмХрнНрм░рмормг рмЖрм░рморнНрмн рмХрм░рм┐рмжрнЗрмЗрмерм┐рм▓рнЗред рмПрмерм┐рм░рнЗ рмЦрмгрм┐ рмЕрмзрм┐рмХрм╛рм░рнА рмХрнБрморм╛рм░ рмЧрнМрм░рмм, рмжрнБрмЗ рмЬрмг рморм╛рмЗрмирм┐рмВ рмЗрмирнНрм╕рмкрнЗрмХрнНрмЯрм░ рм╕рнЯрнЗрмж рмлрм░рм╣рм┐рмирнН, рмЕрморнНрнЯрм╛ рмХрнБрморм╛рм░рнА рмЖрмХрнНрм░рмормгрм░рнЗ рмЖрм╣рмд рм╣рнЛрмЗрмЫрмирнНрмдрм┐ред рмШрмЯрмгрм╛ рммрм╛рммрмжрм░рнЗ рм╕рнВрмЪрмирм╛ рмкрм╛рмЗрммрм╛ рмкрм░рнЗ рмдрнБрм░рмирнНрмд рмЕрмзрм┐рмХ рмкрнБрм▓рм┐рм╕ рмлрнЛрм░рнНрм╕ рмШрмЯрмгрм╛ рм╕рнНрмерм│рм░рнЗ рмкрм╣рмЮрнНрмЪрм┐ рмкрм░рм┐рм╕рнНрмерм┐рмдрм┐рмХрнБ рмирм┐рнЯрмирнНрмдрнНрм░рмг рмХрм░рм┐рмерм┐рм▓рнЗред рнлрнжрм░рнБ рмЕрмзрм┐рмХ рмЧрм╛рмбрм╝рм┐ рмЬрммрмд рмХрм░рм╛рмпрм╛рмЗрмЫрм┐ред рмЧрнЛрмЯрм┐рмП рмХрм│рм╛ рм╕рнНрмХрм░рнНрмкрм┐рмУ рмпрнЗрмЙрмБрмерм┐рм░рнЗ рмУрнНрн▒рм╛рнЯрм╛рм░рм▓рнЗрм╕ рм╕рнЗрмЯрнН рм▓рм╛рмЧрм┐рмерм┐рм▓рм╛, рм╕рнЗ рмЧрм╛рмбрм╝рм┐рмХрнБ рммрм┐ рмЬрммрмд рм╣рнЛрмЗрмЫрм┐ред рмП рмкрнБрм░рм╛ рмШрмЯрмгрм╛рм░ рморм╛рм╖рнНрмЯрм░рморм╛рмЗрмгрнНрмбрмХрнБ рмдрнБрм░рмирнНрмд рмЪрм┐рм╣рнНрмирмЯ рмХрм░рм┐ рмЧрм┐рм░рмл рмХрм░рм╛рмпрм┐рмм рммрнЛрм▓рм┐ рмкрнБрм▓рм┐рм╕ рмХрм╣рм┐рмЫрм┐ред

    рморм╛рмлрм┐рмЖрмЩрнНрмХ рмжрнМрм░рм╛рмдрнНрморнНрнЯрмХрнБ рмирнЗрмЗ рмирнАрмдрм┐рм╢ рм╕рм░рмХрм╛рм░рмЩрнНрмХрнБ рмШрнЗрм░рм┐рмЫрмирнНрмдрм┐ рммрм┐рм░рнЛрмзрнАред рммрм┐рм░рнЛрмзрнА рмжрм│ рмирнЗрмдрм╛ рммрм┐рмЬрнЯ рм╕рм┐рм╣рнНрмирм╛ рмХрм╣рм┐рмЫрмирнНрмдрм┐, рммрм┐рм╣рм╛рм░рм░рнЗ рмЧрнБрмгрнНрмбрм╛рм░рм╛рмЬ рмлрнЗрм░рм┐рмЫрм┐ред рммрм┐рм╣рмЯрм╛рм░рнЗ рмШрмЯрм┐рмерм┐рммрм╛ рмПрм╣рм┐ рмЕрморм╛рмирнБрм╖рм┐рмХ рмШрмЯрмгрм╛ рмЧрнБрмгрнНрмбрм╛рм░рм╛рмЬрм░ рм╕рммрнБ рм╕рнАрморм╛ рмкрм╛рм░рнН рмХрм░рм┐рмжрнЗрм▓рм╛ред рморм╣рм┐рм│рм╛ рмЕрмзрм┐рмХрм╛рм░рнАрмЩрнНрмХрнБ рмШрнЛрм╖рм╛рмбрм╝рм┐ рморм╛рмлрм┐рмЖ рмпрнЗрмнрм│рм┐ рморм░рмгрм╛рмирнНрмдрмХ рмЖрмХрнНрм░рмормг рмХрм▓рнЗ, рмдрм╛рм╣рм╛ рм╕рммрнБрмарнБ рмирм┐рмирнНрмжрмирнАрнЯред рморнБрмЦрнНрнЯрмормирнНрмдрнНрм░рнАрмЩрнНрмХрнБ рмПрм╣рм╛рм░ рмЬрммрм╛рмм рмжрнЗрммрм╛рмХрнБ рмкрмбрм╝рм┐рммред рм╕рм░рмХрм╛рм░ рмХрм╣рм┐рмЫрмирнНрмдрм┐, рмХрнМрмгрм╕рм┐ рморм╛рмлрм┐рмЖ рмУ рмЖрмХрнНрм░рмормгрмХрм╛рм░рнА рмЖрмЗрми рмЖрмЦрм┐рм░рнБ рммрм░рнНрмдрнНрмдрм┐рмкрм╛рм░рм┐рммрнЗрмирм┐ред

    рмЧрм▓рм╛ рмжрнБрмЗ рммрм░рнНрм╖ рмнрм┐рмдрм░рнЗ рморм╛рмлрм┐рмЖрмЩрнНрмХ рмЖрмХрнНрм░рмормг рмУ рморм╛рмлрм┐рмЖ рмЧрнЛрм╖рнНрмарнА рмнрм┐рмдрм░рнЗ рм╕рмВрмШрм░рнНрм╖рм░рнБ рммрм┐рм╣рм╛рм░рм░рнЗ рмкрнНрм░рм╛рнЯ рнирно рмЬрмгрмЩрнНрмХ рмЬрнАрммрми рмЧрм▓рм╛рмгрм┐ рммрнЛрм▓рм┐ рм╕рнВрмЪрмирм╛ рморм┐рм│рнБрмЫрм┐ред рммрм┐рм╢рнЗрм╖ рмХрм░рм┐ рммрм╛рм▓рм┐,рмЦрмгрм┐ рморм╛рмлрм┐рмЖрмЩрнНрмХ рмжрнМрм░рм╛рмдрнНрморнНрнЯ рммрмврм╝рм┐рммрм╛рм░рнЗ рм▓рм╛рмЧрм┐рмЫрм┐ред рмЧрм▓рм╛ рммрм░рнНрм╖ рм╕рнЗрмкрнНрмЯрнЗрморнНрн▒рм░ рнирнп рм░рнЗ рммрм┐рм╣рмЯрм╛ рммрнНрм▓рмХ рмЕрмирнНрмдрм░рнНрмЧрмд рмжрм┐рмЖрм░рм╛ рмУ рморм╛рмирнЗрм░рм░рнЗ рммрнЗрмЖрмЗрми рммрм╛рм▓рм┐ рмЦрмирмирмХрнБ рмХрнЗрмирнНрмжрнНрм░ рмХрм░рм┐ рнк рмЬрмг рм▓рнЛрмХрмЩрнНрмХрнБ рмЧрнБрм│рм┐ рмХрм░рм┐ рморм╛рм░рм┐рмжрм┐рмЖрмпрм╛рмЗрмерм┐рм▓рм╛ред рмирмнрнЗрморнНрн▒рм░ рнй,рнирнжрнирнирм░рнЗ рмЬрморнБрмЗ рмЬрм┐рм▓рнНрм▓рм╛рм░рнЗ рм░рнЗрмбрнН рммрнЗрм│рнЗ рмЬрмгрнЗ рморм╛рмЬрм┐рм╖рнНрмЯрнНрм░рнЗрмЯ рмУ рнй рмкрнБрм▓рм┐рм╕ рмХрм░рнНрморнАрмЩрнНрмХрнБ рммрм╛рм▓рм┐ рморм╛рмлрм┐рмЖ рмЖрмХрнНрм░рмормг рмХрм░рм┐ рмЧрнБрм░рнБрмдрм░ рмХрм░рм┐рмжрнЗрмЗрмерм┐рм▓рнЗред рмлрнЗрммрнГрмЖрм░рнА рнирнй, рнирнжрнирнйрм░рнЗ рм╢рм░рмг рмЬрм┐рм▓рнНрм▓рм╛рм░рнЗ рморм╛рмЗрмирм┐рмВ рмЗрмирнНрм╕рмкрнЗрмХрнНрмЯрм░рмЩрнНрмХрнБ рмЬрнАрмЕрмирнНрмдрм╛ рмЬрм╛рм│рм┐рмжрнЗрммрм╛рмХрнБ рмЙрмжрнНрнЯрмо рмХрм░рм┐рмерм┐рм▓рнЗ рморм╛рмлрм┐рмЖред рм╕рнЛрмирмкрнБрм░ рмкрм╛рмЦрм░рнЗ рммрм╛рм▓рм┐ рморм╛рмлрм┐рмЖрмЩрнНрмХ рмЯрнНрм░рмХрнН рмЬрммрмд рмХрм░рм┐рммрм╛рмХрнБ рмЧрм▓рм╛рммрнЗрм│рнЗ рмЕрмЪрм╛рмирмХ рмПрмнрм│рм┐ рморм░рмгрм╛рмирнНрмдрмХ рмЖрмХрнНрм░рмормгрм░ рм╢рнАрмХрм╛рм░ рм╣рнЛрмЗрмерм┐рм▓рнЗ рмЕрмзрм┐рмХрм╛рм░рнАред рморм╛рм░рнНрмЪрнНрмЪ рнирнм, рнирнжрнирнйрм░рнЗ рмЧрнЯрм╛рм░рнЗ рмкрнБрм▓рм┐рм╕ рмЯрм┐рморнН рмЙрмкрм░рмХрнБ рм╕рмВрмШрммрмжрнНрмз рмЖрмХрнНрм░рмормг рмХрм░рм┐рмерм┐рм▓рнЗ рммрм╛рм▓рм┐ рморм╛рмлрм┐рмЖред рмЬрммрмд рмЬрнЗрм╕рм┐рммрм┐рмХрнБ рмЬрммрм░рмжрм╕рнНрмд рмЫрмбрм╝рм╛рмЗ рмирнЗрмЗрмерм┐рм▓рнЗред рммрм┐рм╣рм╛рм░рм░рнЗ рммрм╛рм▓рм┐ рморм╛рмкрм┐рмЖрмЩрнНрмХ рмжрнМрм░рм╛рмдрнНрморнНрнЯрм░рнЗ рм░рнЛрмХрнН рм▓рмЧрм╛рмЗрммрм╛рмХрнБ рм╕рм░рмХрм╛рм░ рм╕рнЗрмнрм│рм┐ рмЖрмЦрм┐рмжрнГрм╢рм┐рмЖ рмкрмжрмХрнНрм╖рнЗрмк рмирнЗрмЗрмкрм╛рм░рм┐рмирм╛рм╣рм╛рмирнНрмдрм┐ рммрнЛрм▓рм┐ рмирнАрмдрм┐рм╢ рм╕рм░рмХрм╛рм░рмЩрнНрмХрнБ рм╕рммрнБрммрнЗрм│рнЗ рм╕рморм╛рм▓рнЛрмЪрм┐рмд рм╣рнЗрммрм╛рмХрнБ рмкрмбрм╝рнЗред

    рммрнНрнЯрнБрм░рнЛ рм░рм┐рмкрнЛрм░рнНрмЯ рмирмХрнНрм╖рмдрнНрм░ рмирнНрнЯрнБрмЬрнН

  •  рм╕рнНрмдрнНрм░рнА рмЕрмжрм│ рммрмжрм│рмХрнБ рмирнЗрмЗ рмЪрм░рнНрмЪрнНрмЪрм╛

    рммрм┐рм╣рм╛рм░: рмкрнНрм░рмдрм┐рм╢рнЛрмз рмирнЗрммрм╛ рмкрм╛рмЗрмБ рмирм┐рмЬ рм╕рнНрмдрнНрм░рнАрмЩрнНрмХ рмкрнНрм░рнЗрморм┐рмХрм░ рм╕рнНрмдрнНрм░рнАрмХрнБ рммрм┐рммрм╛рм╣ рмХрм▓рнЗ рммрнНрнЯрмХрнНрмдрм┐ ред рмПрмкрм░рм┐ рмЦрммрм░рмХрнБ рмирнЗрмЗ рмЪрм╛рм▓рм┐рмЫрм┐ рмЪрм░рнНрмЪрнНрмЪрм╛ред рммрм┐рм╣рм╛рм░рм░ рмЦрм╛рмЧрм░рм┐рмЖ рмЬрм┐рм▓рнНрм▓рм╛ рмЪрмЙрмдрнНрмдрмо рммрнНрм▓рмХ рм░ рм╣рм╛рм░рнНрмбрм┐рмЖ рмЧрнНрм░рм╛рморм░рнБ рмЖрм╕рм┐рмЫрм┐ рмПрморм┐рмдрм┐ рмЦрммрм░ ред  рмЬрмгрнЗ рм╕рнНрмдрнНрм░рнА рммрм┐рммрм╛рм╣рм░ рмжрнАрм░рнНрмШ  рммрм░рнНрм╖ рмкрм░рнЗ рмирм┐рмЬ рмкрнНрм░рнЗрморм┐рмХ рм╕рм╣ рмЪрм╛рм▓рм┐рмпрм┐рммрм╛рм░рнБ рм╕рнНрн▒рм╛рморнА рмЬрмгрмХ рмирм┐рмЬ рмЖрм╢рм╛ рм╣рм░рм╛рмЗрмерм┐рм▓рнЗ ред рмкрм░рнЗ рмХрм┐рмирнНрмдрнБ рм╕рнНрмдрнНрм░рнАрмЩрнНрмХ рмкрнНрм░рнЗрморм┐рмХрмЩрнНрмХ рмкрмдрнНрмирнАрмЩрнНрмХрнБ рмкрнНрм░рмдрм┐рм╢рнЛрмз рмкрм░рм╛рнЯрмг рм╣рнЛрмЗ рммрм┐рммрм╛рм╣ рмХрм░рм┐рмЫрмирнНрмдрм┐ред   

    рморм┐рм│рм┐рмерм┐рммрм╛ рм╕рнВрмЪрмирм╛ рмЕрмирнБрмпрм╛рнЯрнА рмирнАрм░рмЬ рмПрммрмВ рм░рнБрммрм┐ 2009рм░рнЗ рммрм┐рммрм╛рм╣ рмХрм░рм┐рмерм┐рм▓рнЗ рмПрммрмВ рм╕рнЗрморм╛рмирмЩрнНрмХрм░ рмЪрм╛рм░рм┐ рм╕рмирнНрмдрм╛рми рмормзрнНрнЯ рмерм┐рм▓рм╛ ред рмХрм┐рмирнНрмдрнБ 2023 рмлрнЗрммрнГрмЖрм░рнА рморм╛рм╕рм░рнЗ рм░рнБрммрм┐ рмдрм╛рмЩрнНрмХ рмкрнВрм░рнНрммрмдрми рмкрнНрм░рнЗрморм┐рмХ рморнБрмХрнЗрм╢ рм╕рм╣ рм▓рнБрмЪрм┐ рмкрм│рм╛рмЗрмпрм╛рмЗрмерм┐рм▓рнЗред рмПрм╣рм╛ рмкрм░рнЗ рмирнАрм░рмЬ рмЬрм╛рмгрм┐рммрм╛рмХрнБ рмкрм╛рмЗрмерм┐рм▓рнЗ рмХрм┐ рмдрм╛рмЩрнНрмХ рм╕рнНрмдрнНрм░рнАрмЩрнНрмХ рмкрм╛рм╢рм░рм╛ рмЧрнНрм░рм╛рморм░ рморнБрмХрнЗрм╢ рм╕рм╣ рмкрнНрм░рнЗрмо рм╕рморнНрмкрм░рнНрмХ рммрм┐рммрм╛рм╣ рмкрнВрм░рнНрммрм░рнБ рмерм┐рм▓рм╛ред рм╕рнЗрморм╛рмирмЩрнНрмХ рммрм┐рммрм╛рм╣ рмкрм░рнЗ рморнБрмХрнЗрм╢ рмормзрнНрнЯ рм░рнБрммрм┐ рмирм╛рмормХ рмЬрмгрнЗ рмпрнБрммрмдрнАрмЩрнНрмХрнБ рммрм┐рммрм╛рм╣ рмХрм░рм┐рмерм┐рм▓рнЗ рмУ рмЙрмнрнЯрмЩрнНрмХрм░ рмдрм┐рмирнЛрмЯрм┐ рм╕рмирнНрмдрм╛рми рмЕрмЫрмирнНрмдрм┐ред

    рмП рм╕рморнНрн▒рмирнНрмзрм░рнЗ рмЬрм╛рмгрм┐ рмирнАрм░рмЬ рмкрм╛рм╢рм░рм╛ рмерм╛рмирм╛рм░рнЗ рмЕрмнрм┐рмпрнЛрмЧ рмХрм░рм┐рмерм┐рм▓рнЗред рмХрм┐рмирнНрмдрнБ рм╕рнЗрмарм╛рм░рнЗ рмХрм┐рмЫрм┐ рм╕рнБрмлрм│ рморм┐рм│рм┐ рми рмерм┐рм▓рм╛ ред рмПрм╣рм╛рмХрнБ рмирнЗрмЗ рмирнАрм░рмЬ рмкрнНрм░рмдрм┐рм╢рнЛрмз рмкрм░рм╛рнЯрмг рм╣рнЛрмЗрмЙрмарм┐рмерм┐рм▓рнЗред рморнЛ рм╕рнНрмдрнНрм░рнАрмХрнБ рмдрнБ рмирнЗрмЗрмЫрнБ рмд рмдрнЛ рм╕рнНрмдрнНрм░рнАрмХрнБ рморнБрмБ рмирнЗрммрм┐ рмПрм╣рм┐ рмирнНрнЯрм╛рнЯрм░рнЗ рморнБрмХрнЗрм╢рмЩрнНрмХ рм╕рнНрмдрнНрм░рнА рм░рнБрммрм┐ рм╕рм╣ рм╕рморнНрмкрм░рнНрмХ рм╕рнНрмерм╛рмкрми рмХрм░рм┐рмерм┐рм▓рнЗ рмУ рмкрм░рнЗ рм╕рнЗрморм╛рмирнЗ рмормзрнНрнЯ рмПрмХ рмормирнНрмжрм┐рм░рм░рнЗ рммрм┐рммрм╛рм╣ рмХрм░рм┐рмерм┐рм▓рнЗ ред рммрм┐рммрм╛рм╣ рмкрм░рм┐ рмЕрмирнБрм╖рнНрмарм╛рмирм░рнЗ  рмПрм╣рм┐ рмЕрмнрм┐рмирмм рмкрнНрм░рмдрм┐рм╢рнЛрмз рмирнВрмЖ рммрнЛрм▓рм┐ рм╕рм╛рмзрм╛рм░рмг рмЬрмирмдрм╛рм░рнЗ рмЪрм░рнНрмЪрнНрмЪрм╛рм░ рммрм┐рм╖рнЯ рмкрм╛рм▓рмЯрм┐рмЫрм┐ ред рмПрммрнЗ рмирнАрм░рмЬрм░ рмШрм░ рм▓рнЛрмХ рмормзрнНрнЯ рмжрнНрммрм┐рмдрнАрнЯ рм░рнБрммрм┐рмХрнБ рмирм┐рмЬ рммрнЛрм╣рнВ рм╣рм┐рм╕рм╛рммрм░рнЗ рмЧрнНрм░рм╣рмг рмХрм░рм┐рмЫрмирнНрмдрм┐ ред

  • рмирм╛рм│рмирнНрмжрм╛ рмирм┐рмХрмЯрм░рнБ рнзрнирм╢рм╣ рммрм░рнНрм╖ рмкрнБрм░рнБрмгрм╛ рмжрнБрмЗ рмкрмерм░ рморнВрм░рнНрмдрнНрмдрм┐ рмЙрмжрнНрмзрм╛рм░

    рмкрм╛рмЯрмирм╛: рмирм╛рм│рмирнНрмжрм╛ рмирм┐рмХрмЯрммрм░рнНрмдрнНрмдрнА  рмПрмХ рмкрнЛрмЦрм░рнАрм░рнБ рморм┐рм│рм┐рмЫрм┐ рнзрнирм╢рм╣ рммрм░рнНрм╖ рмкрнБрм░рнБрмгрм╛ рмкрмерм░рм░ рморнВрм░рнНрмдрнНрмдрм┐ред рмкрнЛрмЦрм░рнАрм░ рмкрнБрмирм░рнБрмжрнНрмзрм╛рм░ рм╕рморнЯрм░рнЗ рм╕рнНрмерм╛рмирнАрнЯ рм▓рнЛрмХрмЩрнНрмХрнБ рмжрнБрмЗрмЯрм┐ рмкрнБрм░рнБрмгрм╛ рмкрмерм░ рморнВрм░рнНрмдрнНрмдрм┐ рморм┐рм│рм┐рмерм┐рммрм╛ рм╕рнВрмЪрмирм╛ рмжрнЗрмЗрмЫрмирнНрмдрм┐ рмнрм╛рм░рмдрнАрнЯ рмкрнБрм░рм╛рмдрмдрнНрмм рм╕рм░рнНрммрнЗрмХрнНрм╖рмг рмЕрмзрм┐рмХрм╛рм░рнАред

    рм╕рнВрмЪрмирм╛ рмЕрмирнБрмпрм╛рнЯрнА, рмирм╛рм│рмирнНрмжрм╛ рмирм┐рмХрмЯрммрм░рнНрмдрнНрмдрнА рм╕рм╛рм░рнНрм▓рм┐рмЪрм╛рмХ рмЧрм╛рмБ рмирм┐рмХрмЯ рмдрм╛рм░рнНрм╕рм┐рмирнНрм╣ рмкрнЛрмЦрм░рнАрм░рнБ рмПрм╣рм┐ рмжрнБрмЗ рмкрнБрм░рм╛рмдрми рморнВрм░рнНрмдрнНрмдрм┐ рмЪрм│рм┐рмд рм╕рмкрнНрмдрм╛рм╣рм░ рмкрнНрм░рм╛рм░рморнНрмнрм░рнЗ рмЙрмжрнНрмзрм╛рм░ рмХрм░рм╛рмпрм╛рмЗрмерм┐рм▓рм╛ред рммрм┐рм╢рнНрмм рмРрмдрм┐рм╣рнНрнЯ рмирм╛рм│рмирнНрмжрм╛ рмарм╛рм░рнБ рнорно рмХрм┐рм▓рнЛрморм┐рмЯрм░ рмжрнВрм░рнЗ рмерм┐рммрм╛ рм╕рм╛рм░рнНрм▓рм┐рмЪрм╛рмХ рмЧрм╛рмБ рмкрнЛрмЦрм░рнАрмХрнБ рммрм┐рм╣рм╛рм░ рм╕рм░рмХрм╛рм░рм░ рмЬрм│ рмЬрнАрммрми рм╣рм░рм┐рнЯрм╛рм▓рм┐ рмпрнЛрмЬрмирм╛рм░рнЗ рмкрнБрмирм░рнБрмжрнНрмзрм╛рм░ рмХрм░рм┐рммрм╛ рммрнЗрм│рнЗ рморнВрм░рнНрмдрнНрмдрм┐ рморм┐рм│рм┐рмЫрм┐ред рморнВрм░рнНрмдрнНрмдрм┐ рморм┐рм│рм┐рммрм╛ рмкрм░рнЗ рм╕рнНтАМрмерм╛рмирнАрнЯ рм▓рнЛрмХрнЗ рм╕рнЗрм╕рммрнБрмХрнБ рмПрмХ рмормирнНрмжрм┐рм░ рмХрм░рм┐ рмкрнВрмЬрм╛ рмХрм░рм┐рммрм╛рмХрнБ рмпрнЛрмЬрмирм╛ рмХрм░рм┐рмерм┐рм▓рнЗред рмХрм┐рмирнНрмдрнБ рмПрм╕рморнНрмкрм░рнНрмХрм░рнЗ рм╕рнВрмЪрмирм╛ рморм┐рм│рм┐рммрм╛ рмкрм░рнЗ рмПрмПрм╕рмЖрмЗ рмЕрмзрм┐рмХрм╛рм░рнА рм╕рнНрмерм╛рмирнАрнЯ рмкрнБрм▓рм┐рм╕рмХрнБ рмЬрмгрм╛рмЗрмерм┐рм▓рнЗред рмкрнБрм▓рм┐рм╕ рм╕рнЗрм╕рммрнБ рмЙрмжрнНрмзрм╛рм░ рмХрм░рм┐рмерм┐рм▓рм╛ред рмкрм░рнАрмХрнНрм╖рм╛ рмкрм░рнЗ рм╕рнЗрм╣рм┐ рмжрнБрмЗ рмкрмерм░ рморнВрм░рнНрмдрнНрмдрм┐ рнзрнирм╢рм╣ рммрм░рнНрм╖ рмкрнБрм░рнБрмгрм╛ рмерм┐рммрм╛ рмЬрмгрм╛рмкрмбрм┐рмерм┐рммрм╛ рмПрмПрм╕рмЖрмЗ рмЕрмзрм┐рмХрм╛рм░рнА рмЧрнМрмдрморнА рмнрмЯрнНрмЯрм╛рмЪрм╛рм░рнНрмпрнНрнЯ рм╕рнВрмЪрмирм╛ рмжрнЗрмЗрмЫрмирнНрмдрм┐ред

    рм╕рнЗ рмЖрм╣рнБрм░рм┐ рмХрм╣рм┐рмЫрмирнНрмдрм┐, рмЖрморнЗ рм╕рнЗрм╕рммрнБрмХрнБ рмирм╛рм│рмирнНрмжрм╛ рморнНрнЯрнБрмЬрм┐рнЯрморм░рнЗ рм╕рнНрмерм╛рмкрми рмХрм░рм┐рммрм╛рмХрнБ рмЪрм╛рм╣рм┐рмБрмЫрнБред рмдрнЗрмгрнБ рм░рм╛рмЬрнНрнЯ рм╕рм░рмХрм╛рм░рмХрнБ рмдрнБрм░рмирнНрмд рм╕рнЗрм╕рммрнБрмХрнБ  рмЗрмгрнНрмбрм┐рмЖрми рмЯрнНрм░рнЗрмЬрнЗрм░ рмЯрнНрм░рнЛрмн рмЖрмХрнНрмЯ рнзрнорннрно рмЕрмирнБрмпрм╛рнЯрнА рмПрмПрм╕рмЖрмЗрмХрнБ рм╣рм╕рнНрмдрм╛рмирнНрмдрм░ рмХрм░рм┐рммрм╛рмХрнБ рмХрнБрм╣рм╛рмпрм╛рмЗрмЫрм┐ред

    рмдрнЗрммрнЗ рмПрм╣рм╛ рмкрнВрм░рнНрммрм░рнБ рмПрмХ рммрм░рнНрм╖ рмкрнВрм░рнНрммрнЗ рм╕рморм╛рми рмкрнЛрмЦрм░рнАрм░рнБ рнзрнйрм╢рм╣ рммрм░рнНрм╖ рмкрнБрм░рнБрмгрм╛ рмирм╛рмЧ рмжрнЗрммрнА рморнВрм░рнНрмдрнНрмдрм┐ рмЙрмжрнНрмзрм╛рм░ рмХрм░рм╛рмпрм╛рмЗрмерм┐рм▓рм╛ред рм╕рнЗрм╣рм┐ рморнВрм░рнНрмдрнНрмдрм┐ рмкрм╛рм▓рм╛ рм╢рм╛рм╕рми рмХрм╛рм│рм░ рмерм┐рммрм╛ рмЬрмгрм╛рмкрмбрм┐рмерм┐рм▓рм╛ред  

  • рмжрморнНрмкрмдрм┐рмЩрнНрмХ рмирм┐рм░рнНрмормо рмнрм╛рммрнЗ рм╣рмдрнНрнЯрм╛

    () рммрм┐рм╣рм╛рм░рм░рнЗ рмЕрммрм╕рм░рмкрнНрм░рм╛рмкрнНрмд рмжрморнНрмкрмдрм┐рмЩрнНрмХ рморнГрмдрмжрнЗрм╣ рмарм╛рмм ред рм╕рнЛрморммрм╛рм░ рмнрнЛрмЬрмкрнБрм░ рмЬрм┐рм▓рнНрм▓рм╛рм░ рмЖрм░рм╣рм╛ рм╕рм╣рм░рм░рнЗ рмЕрммрм╕рм░рмкрнНрм░рм╛рмкрнНрмд рмжрморнНрмкрмдрнНрмдрм┐рмЩрнНрмХ рморнГрмдрмжрнЗрм╣ рмдрм╛рмЩрнНрмХ рммрм╛рм╕рмнрммрмирм░рнБ рморм┐рм│рм┐рмерм┐рм▓рм╛ ред рм╕рнЛрморммрм╛рм░ рм░рм╛рмдрм┐рм░рнЗ рм╕рнЗрморм╛рмирмЩрнНрмХ рморм░ рм╢рм░рнАрм░ рмкрнЛрм▓рм┐рм╕рмХрнБ рморм┐рм│рм┐рмерм┐рм▓рм╛рммрнЗрм│рнЗ рмжрморнНрмкрмдрм┐рмЩрнНрмХ рмжрнЗрм╣рм░рнЗ рмЕрмирнЗрмХ рмЖрмШрм╛рмд рмжрнЗрмЦрм┐рммрм╛рмХрнБ рморм┐рм│рм┐рмерм┐рм▓рм╛ ред рмкрнНрм░рм╛рмерморм┐рмХ рмдрмжрмирнНрмдрм░рнБ рмкрнБрм▓рм┐рм╕рмХрнБ рм╕рмирнНрмжрнЗрм╣ рмХрм┐, рмЙрмХрнНрмд рмжрморнНрмкрмдрм┐рмЩрнНрмХрнБ рмкрнНрм░рмерморнЗ рморнБрмгрнНрмбрмХрнБ рмЖрмХрнНрм░рмормг рмХрм░рм╛рмпрм╛рмЗрмерм┐рм▓рм╛ рмУ рмкрм░рнЗ рмдрнАрмХрнНрм╖рнНрмг рм╣рмдрм┐рмЖрм░рм░рнЗ рм╕рнЗрморм╛рмирмЩрнНрмХрнБ рм╣рмдрнНрнЯрм╛ рмХрм░рм╛рмпрм╛рмЗрмерм╛рмЗрмкрм╛рм░рнЗ ред

    рморнГрмд рммрнНрнЯрмХрнНрмдрм┐ рмЬрмгрмХ рм╣рнЗрмЙрмЫрмирнНрмдрм┐ рморм╣рнЗрмирнНрмжрнНрм░ рм╕рм┐рмВ (70) рмУ рмдрм╛рмЩрнНрмХ 65 рммрм░рнНрм╖рм┐рнЯрм╛ рмкрмдрнНрмирнА рмкрнБрм╖рнНрмкрм╛ рм╕рм┐рмВред рмЙрмнрнЯ рмкрмдрм┐ рмУ рмкрмдрнНрмирнА рм░рнЛрм╣рмдрм╛рм╕ рмЬрм┐рм▓рнНрм▓рм╛рм░ рмирм╛рм╕рм┐рм░рм┐рмЧрмЮрнНрмЬ рмкрнЛрм▓рм┐рм╕ рм╖рнНрмЯрнЗрм╕рми рмЕрмзрнАрмирм░рнЗ рмерм┐рммрм╛ рмЕрмЧрнНрмирм┐ рмЧрм╛рмБрм░рнЗ рм░рм╣рнБрмерм┐рм▓рнЗ рмПрммрмВ рмЕрммрм╕рм░ рмкрм░рнЗ рмХрмдрм┐рм░рм╛ рмЕрмЮрнНрмЪрм│рм░рнЗ рмерм┐рммрм╛ рмШрм░рнЗ рмПрмХрнБрмЯрм┐рмЖ рм░рм╣рнБрмерм┐рм▓рнЗ рммрнЛрм▓рм┐ рмкрнЛрм▓рм┐рм╕ рм╕рнВрмЪрмирм╛рм░рнБ рморм┐рм│рм┐рмЫрм┐ ред рморм╣рнЗрмирнНрмжрнНрм░ рм╕рм┐рмВ рммрнАрм░ рмХрмирн▒рм░ рм╕рм┐рмВ рммрм┐рм╢рнНрн▒рммрм┐рмжрнНрнЯрм╛рм│рнЯрм░рнЗ рмбрм┐рмирнН рмнрм╛рммрнЗ рмЕрммрм╕рм░ рмирнЗрмЗрмерм┐рммрм╛ рммрнЗрм│рнЗ рмдрм╛рмЩрнНрмХ рмкрмдрнНрмирнА рмЬрмгрнЗ рморм╣рм┐рм│рм╛ рмХрм▓рнЗрмЬрм░ рмЕрммрм╕рм░рмкрнНрм░рм╛рмкрнНрмд рмормирнЛрммрм┐рмЬрнНрмЮрм╛рми рмкрнНрм░рмлрнЗрм╕рм░ рмерм┐рм▓рнЗ ред рмЙрмХрнНрмд рмШрмЯрмгрм╛рм░ рмдрмжрмирнНрмд рмХрм░рм┐ рм╣рмдрнНрнЯрм╛рмХрм╛рм░рнАрмХрнБ рмЪрм┐рм╣рнНрмирмЯ рмХрм░рм┐рммрм╛ рмУ рм╣рмдрнНрнЯрм╛ рмкрмЫрм░ рмХрм╛рм░рмг рмЦрнЛрмЬрм┐рммрм╛рм░ рмкрнНрм░рнЯрм╛рм╕ рмХрм░рнБрмЫрм┐ рмкрнЛрм▓рм┐рм╕рм┐ ред

    рмЦрммрм░ рмкрм╛рмЗрммрм╛ рмкрм░рнЗ рмнрнЛрмЬрмкрнБрм░ рм╕рнБрмкрм░рм┐рмЯрнЗрмгрнНрмбрнЗрмЯ рмкрнНрм░рморнЛрмж рмХрнБрморм╛рм░ рмпрм╛рмжрмм рмПрммрмВ рм╕рм╣рмХрм╛рм░рнА рмкрнЛрм▓рм┐рм╕ рм╕рнБрмкрм░рм┐рмЯрнЗрмгрнНрмбрнЗрмгрнНрмЯ рм╣рм┐рморм╛рм╢рнБрмВрмЩрнНрмХ рмЕрмзрнНрнЯрмХрнНрм╖рмдрм╛рм░рнЗ рмПрмХ рмкрнЛрм▓рм┐рм╕ рмЯрм┐рморнН рмЧрмармирмХрм░рм┐ рмирм╛рммрм╛рмбрм╛ рмкрнЛрм▓рм┐рм╕ рм╖рнНрмЯрнЗрм╕рми рмЕрмзрнАрми рмШрм░рнЗ рмкрм╣рмЮрнНрмЪрм┐ рмдрмжрмирнНрмд рмЖрм░рморнНрмн рмХрм░рм┐рмЫрм┐ ред рмкрнЛрм▓рм┐рм╕ рмХрнНрм░рм╛рмЗрмо рм╕рнНрмкрмЯрмХрнБ рм╕рм┐рм▓ рмХрм░рм┐ рмкрм╛рмЯрмгрм╛рм░рнБ рмПрмХ рмлрм░рнЗрмирм╕рм┐рмХрнН рмЯрм┐рмормХрнБ рмбрм╛рмХрм┐ рмдрмжрмирнНрмд рмЖрм░рморнНрмн рмХрм░рм┐рмЫрм┐ ред

    рмкрнЛрм▓рм┐рм╕ рмбрммрм▓ рм╣рмдрнНрнЯрм╛ рморм╛рморм▓рм╛рм░ рм╕рморм╛рмзрм╛рми рмХрм░рм┐рммрм╛ рмкрм╛рмЗрмБ рморнГрмдрмХрмЩрнНрмХ рморнЛрммрм╛рмЗрм▓ рмпрм╛рмЮрнНрмЪ рмХрм░рм┐рммрм╛ рм╕рм╣ рм╕рнЗрм╣рм┐ рмЕрмЮрнНрмЪрм│рм░ рм╕рм┐рм╕рм┐рмЯрм┐рмнрм┐ рмлрнБрмЯрнЗрмЬ рмпрм╛рмЮрнНрмЪ рмХрм░рнБрмЫрм┐ ред рморнГрмдрмХрмЩрнНрмХ рм╕рм╛рмирмнрм╛рмЗ рм╣рнАрм░рм╛ рм╕рм┐рмВ рмХрм╣рм┐рмЫрмирнНрмдрм┐ рморнБрмБ рморнЛ рмнрм╛рмЗ рморм╣рнЗрмирнНрмжрнНрм░ рм╕рм┐рмВрмЩрнНрмХрнБ рмЬрм╛рмирнБрмЖрм░рнА 26 рмдрм╛рм░рм┐рмЦрм░рнЗ рмдрм╛рмЩрнНрмХ рмШрм░рнЗ рмнрнЗрмЯрм┐рмерм┐рм▓рм┐ ред рм╕рнЗ рмормдрнЗ рмЖрмЬрм┐ рмХрм▓ рмХрм░рм┐ рмбрм╛рмХрм┐рмерм┐рм▓рнЗ рмУ рмХрм╣рм┐рмерм┐рм▓рнЗ рмдрм╛рмЩрнНрмХ рмкрнБрмЕ рмУ рммрнЛрм╣рнВрмЩрнНрмХ рморнЛрммрм╛рмЗрм▓ рмирморнНрммрм░ рмХрм╛рм▓рм┐рмарм╛рм░рнБ рм▓рм╛рмЧрнБрмирм┐ ред рм╕рнЗ рмЖрмЬрм┐ рмдрм╛рмЩрнНрмХ рмнрм╛рмЗрмЩрнНрмХ рмШрм░рнЗ рмкрм╣рмЮрнНрмЪрм┐рммрм╛ рмкрм░рнЗ рмПрм╣рм┐ рм╣рмдрнНрнЯрм╛рмХрм╛рмгрнНрмб рммрм┐рм╖рнЯрм░рнЗ рмЬрм╛рмгрм┐рммрм╛рмХрнБ рмкрм╛рмЗрмерм┐рм▓рнЗред

    рмнрнЛрмЬрмкрнБрм░ рмкрнЛрм▓рм┐рм╕ рм╕рнБрмкрм░рм┐рмЯрнЗрмгрнНрмбрнЗрмгрнНрмЯ рмкрнНрм░рморнЛрмж рмХрнБрморм╛рм░ рмпрм╛рмжрмм рмЬрм╛рмдрнАрнЯ рмЧрмгрморм╛рмзрнНрнЯрмормХрнБ рмХрм╣рм┐рмЫрмирнНрмдрм┐ рмЕрммрм╕рм░рмкрнНрм░рм╛рмкрнНрмд рмжрморнНрмкрмдрм┐рмЩрнНрмХрнБ рмдрм╛рмЩрнНрмХ рмШрм░ рмнрм┐рмдрм░рнЗ рмкрм╢рм┐ рмХрнМрмгрм╕рм┐ рмЕрмЬрмгрм╛ рм╣рмдрнНрнЯрм╛рмХрм╛рм░рнА рм╣рмдрнНрнЯрм╛ рмХрм░рм┐рмерм╛рмЗрмкрм╛рм░рнЗ ред рм╕рм╛рмЗрмгрнНрмЯрм┐рмлрм┐рмХрнН рмЯрм┐рморнН рм╕рм╛рм╣рм╛рмпрнНрнЯрм░рнЗ рмкрнЛрм▓рм┐рм╕ рмЙрмХрнНрмд рмШрмЯрмгрм╛рм░ рмдрмжрмирнНрмд рмЖрм░рморнНрмн рмХрм░рм┐рмЫрм┐  ред рм╣рмдрнНрнЯрм╛рмХрм╛рмгрнНрмбрм░ рмХрм╛рм░рмг рмПрмкрм░рнНрмпрнНрнЯрмирнНрмд рм╕рнНрмкрм╖рнНрмЯ рм╣рнЛрмЗрмирм╛рм╣рм┐рмБ |  рмХрм┐рмирнНрмдрнБ рмЦрнБрммрнН рм╢рнАрмШрнНрм░ рмПрмерм┐рм░рнЗ рм╕рморнНрмкрнГрмХрнНрмд рмЕрмкрм░рм╛рмзрнАрмЩрнНрмХрнБ рмЪрм┐рм╣рнНрмирмЯ рмХрм░рм╛рмпрм╛рмЗ рмЧрм┐рм░рмл рмХрм░рм╛рмпрм┐рмм рммрнЛрм▓рм┐ рмкрнНрм░рморнЛрмж рмХрнБрморм╛рм░ рмХрм╣рм┐рмЫрмирнНрмдрм┐ ред рмЖрм╣рнБрм░рм┐ рмормзрнНрнЯ рмХрм╣рм┐рмЫрмирнНрмдрм┐ рмЙрмХрнНрмд рмШрмЯрмгрм╛ рм╕рнНрмерм│рмХрнБ рмЖрморнЗ рм╕рм┐рм▓ рмХрм░рм┐рммрм╛ рм╕рм╣ рморм░ рм╢рм░рнАрм░ рмкрнЛрм╖рнНрмЯрморнЛрм░рнНрмЯрмо рмкрм╛рмЗрмБ рмкрмарм╛рмЗ рмжрм┐рмЖрмпрм╛рмЗрмЫрм┐ред

  • рмЦрмЬрнБрм░рнНрммрм╛рмирм┐ рмкрм╛рмЗрмБ рмд рм╕рм╛рм░рми рмкрм╛рмЗрмБ рмХрм╛рм╣рм┐рмБ рмирнБрм╣рнЗрмБ: рм╕рнБрм╢рнАрм▓

    рмирнВрмЖрмжрм┐рм▓рнНрм▓рнА: рммрм┐рмЬрнЗрмкрм┐ рм╕рм╛рмВрм╕рмж рм╕рнБрм╢рнАрм▓ рморнЛрмжрм┐рмЩрнНрмХ рммрм┐рм╣рм╛рм░ рм╕рм░рмХрм╛рм░ рмЙрмкрм░рнЗ рмЖрмХрнНрм░рмормгред рм╕рм╛рм░рмирм░ рмЫрм╛рмкрнНрм░рм╛ рммрм┐рм╖рм╛рмХрнНрмд рмормж рморнГрмдрнНрнЯрнБ рмЙрмкрм░рнЗ рмирнАрмдрм┐рм╢рмЩрнНрмХ рмЕрмирнБрмХрморнНрмкрм╛рмХрнБ рмирнЗрмЗ рммрнЯрм╛рми рмЙрмкрм░рнЗ рм╕рнБрм╢рнАрм▓ рморнБрмЦрнНрнЯрмормирнНрмдрнНрм░рнАрмЩрнНрмХрнБ рмЯрм╛рм░рнНрмЧрнЗрмЯ рмХрм░рм┐рмЫрмирнНрмдрм┐ред рммрм┐рм╣рм╛рм░рм░ рмкрнВрм░рнНрммрмдрми рмЙрмкрморнБрмЦрнНрнЯрмормирнНрмдрнНрм░рнА рморнЛрмжрм┐ рмХрм╣рм┐рмЫрмирнНрмдрм┐, рнирнжрнзрно рмЦрмЬрнБрм░рнНрммрм╛рмирм┐ рмормж рморнГрмдрнНрнЯрнБрм░рнЗ рмЕрмирнБрмХрморнНрмкрм╛ рмжрм┐рмЖрмпрм╛рмЗрмерм┐рммрм╛ рммрнЗрм│рнЗ рм╕рм╛рм░рми рмкрм╛рмЗрмБ рмХрм╛рм╣рм┐рмБ рмирнБрм╣рнЗрмБред

    рморнЛрмжрм┐ рмХрм╣рм┐рмерм┐рм▓рнЗ, рнирнжрнзрнорм░ рморм┐рмбрм┐рмЖ рм░рм┐рмкрнЛрм░рнНрмЯ рмЕрмирнБрмпрм╛рнЯрнА рморнБрмЦрнНрнЯрмормирнНрмдрнНрм░рнА рмирм┐рмдрм┐рм╢ рмХрнБрморм╛рм░ рмХрм╣рм┐рмерм┐рм▓рнЗ рмХрм┐, рмпрмжрм┐ рмормж рмкрм┐рмЗ рморнГрмдрнНрнЯрнБ рм╣рнЛрмЗрмерм┐рммрм╛ рмкрнНрм░рморм╛рмгрм┐рмд рм╣рнБрмП рмдрнЗрммрнЗ рмЕрмирнБрмХрморнНрмкрм╛ рмпрнЛрмЧрм╛рмЗ рмжрнЗрммрнЗред рм╕рнЗрмдрнЗрммрнЗрм│рнЗ рм╕рнЗ рмЦрмЬрнБрм░рнНрммрм╛рмирм┐ рмормж рморнГрмдрнНрнЯрнБ рмкрм╛рмЗрмБ рмкрнНрм░рмдрм┐ рморнГрмдрмХрмЩрнНрмХ рмкрм┐рмЫрм╛ рнк рм▓рмХрнНрм╖ рмЯрмЩрнНрмХрм╛ рмШрнЛрм╖рмгрм╛ рмХрм░рм┐рмерм┐рм▓рнЗред рмПрммрнЗ рмХрм╛рм╣рм┐рмБрмХрм┐ рмирнБрм╣рнЗрмБ рммрнЛрм▓рм┐ рмкрнНрм░рм╢рнНрми рмХрм░рм┐рмЫрмирнНрмдрм┐ рм╕рнБрм╢рнАрм▓ред рм╕рнЗ рмЖрм╣рнБрм░рм┐ рмХрм╣рм┐рмЫрмирнНрмдрм┐ рмХрм┐, рмпрмжрм┐ рмЖрмо рм╕рм░рмХрм╛рм░ рмерм╛рмирнНрмдрм╛ рмдрнЗрммрнЗ рмПрм╣рм┐ рммрм┐рмкрмж рмХрм╛рм│рм░рнЗ рморнГрмдрмХрмЩрнНрмХ рмкрм░рм┐рммрм╛рм░рмХрнБ рмЖрм░рнНрмерм┐рмХ рм╕рм╣рм╛рнЯрмдрм╛ рмпрнЛрмЧрм╛рмЗ рмжрнЗрмЗрмерм╛рмирнНрмдрм╛ред рмирм┐рнЯрмо рмЕрмирнБрмпрм╛рнЯрнА рмирм┐рмдрм┐рм╢ рм╕рм╛рм░рми рмормдрммрм┐рмнрнАрм╖рм┐рмХрм╛рм░ рмкрнАрмбрм┐рмдрмЩрнНрмХрнБ рмЕрмирнБрмХрморнНрмкрм╛ рмпрнЛрмЧрм╛рмЗрмжрм╛рммрм╛ рмХрмерм╛ред

    рмЫрм╛рмкрнНрм░рм╛ рмормж рморнГрмдрнНрнЯрмЙрмХрнБ рмирнЗрмЗ рмирм┐рмдрм┐рм╢ рмХрнБрморм╛рм░ рмормж рмкрм┐рмЗ рморнГрмдрнНрнЯрнБрммрм░рмг рмХрм░рм┐рммрм╛ рм▓рнЛрмХрмЩрнНрмХ рмкрм░рм┐рммрм╛рм░рмХрнБ рмЕрмирнБрмХрморнНрмкрм╛ рмжрм┐рмЖрмпрм┐рмм рмирм╛рм╣рм┐рмБ рммрнЛрм▓рм┐ рмХрм╣рм┐рмерм┐рм▓рнЗред рмПрм╣рм╛рмХрнБ рмХрм╛рмЙрмгрнНрмЯрм░ рмХрм░рм┐ рммрм┐рм╣рм╛рм░рм░ рмкрнВрм░рнНрммрмдрми рмЙрмкрморнБрмЦрнНрнЯрмормирнНрмдрнНрм░рнА рм╕рнБрм╢рнАрм▓ рмХрнБрморм╛рм░ рмирм┐рмдрм┐рм╢рмЩрнНрмХрнБ рмШрнЗрм░рм┐рммрм╛рмХрнБ рмЪрнЗрм╖рнНрмЯрм╛ рмХрм░рм┐рмЫрмирнНрмдрм┐ред

  • рмпрм┐рмП рмормж рмкрм┐рмЗрмм, рм╕рнЗ рморм░рм┐рмм

    рмкрм╛рмЯрмирм╛: рммрм┐рм╣рм╛рм░рм░ рмЫрмкрм░рм╛рм░рнЗ рммрм┐рм╖рм╛рмХрнНрмд рмормж рмкрм┐рмЗ рморм░рм┐рмерм┐рммрм╛ рм▓рнЛрмХрмЩрнНрмХ рм╕рмВрмЦрнНрнЯрм╛ рнйрнжрмХрнБ рммрнГрмжрнНрмзрм┐ рмкрм╛рмЗрмЫрм┐ред рмПрммрнЗ рмормзрнНрнЯ рммрм╣рнБ рм▓рнЛрмХ рм╣рм╕рнНрмкрм┐рмЯрм╛рм▓рм░рнЗ рмЪрм┐рмХрм┐рмдрнНрм╕рм┐рмд рм╣рнЗрмЙрмЫрмирнНрмдрм┐ред рмХрм┐рмЫрм┐ рм▓рнЛрмХ рмормзрнНрнЯ рмЧрнБрмкрнНрмдрм░рнЗ рмШрм░рнЛрмЗ рм╣рм╕рнНрмкрм┐рмЯрм╛рм▓рм░рнЗ рмЪрм┐рмХрм┐рмдрнНрм╕рм╛ рмХрм░рм╛рмЙрмЫрмирнНрмдрм┐ред рмПрм╣рм╛рмХрнБ рмирнЗрмЗ рммрм┐рм╣рм╛рм░рм░рнЗ рм░рм╛рмЬрмирнАрмдрм┐ рмдрнАрммрнНрм░ рм╣рнЗрммрм╛рм░рнЗ рм▓рм╛рмЧрм┐рмЫрм┐ред рммрм┐рмЬрнЗрмкрм┐ рмУ рмирнАрмдрм┐рм╢ рм╕рм░рмХрм╛рм░ рмкрм░рм╕рнНрмкрм░рмХрнБ рмЖрмХрнНрм░рмормг рмкрнНрм░рмдрм┐ рмЖрмХрнНрм░рмормг рмХрм░рм┐рммрм╛рм░рнЗ рм▓рм╛рмЧрм┐рмЫрмирнНрмдрм┐ред

    рммрм┐рм╖рм╛рмХрнНрмд рмормж рмкрм┐рмЗ рм╣рнЛрмЗрмерм┐рммрм╛ рморнГрмдрнНрнЯрнБ рмШрмЯрмгрм╛рм░рнЗ  рморнБрмЦрнНрнЯрмормирнНрмдрнНрм░рнА рмирнАрмдрм┐рм╢ рмХрм╣рм┐рмЫрмирнНрмдрм┐, рммрм┐рмЬрнЗрмкрм┐ рм╕рм░рмХрм╛рм░рм░рнБ рммрм╛рм╣рм╛рм░рм┐ рмпрм╛рмЗрмЫрм┐ рмдрнЗрмгрнБ рмПрмдрнЗ рмЖрмХрнНрм░рм╛рмормХ рм╣рнЗрмЙрмЫрм┐ред рм╕рм╛рм░рм╛ рмжрнЗрм╢рм░рнЗ рммрм┐рм╖рм╛рмХрнНрмд рмормжрм░рнЗ рм▓рнЛрмХ рморм░рнБрмЫрмирнНрмдрм┐ред рммрм┐рм╣рм╛рм░рм░рнЗ рмормж рмирм┐рм╖рнЗрмжрнНрмз рм╣рнЗрммрм╛ рмкрнВрм░рнНрммрм░рнБ рмормзрнНрнЯ рм▓рнЛрмХрнЗ рморм░рм┐рмЫрмирнНрмдрм┐ рмормж рмкрм┐рмЗред рмпрм┐рмП рмормж рмкрм┐рмЗрмм, рм╕рнЗ рморм░рм┐рммред

    рммрм┐рм╣рм╛рм░ рммрм┐рмЬрнЗрмкрм┐ рмЕрмзрнНрнЯрмХрнНрм╖ рм╕рмЮрнНрмЬрнЯ рмЬрнЯрм╕рммрм╛рм▓  рмХрм╣рм┐рмЫрмирнНрмдрм┐ рмХрм┐, рмпрнЗрмдрнЗ рмкрм░рнНрмпрнНрнЯрмирнНрмд рмкрнБрм▓рм┐рм╕ рмЙрмкрм░рнЗ рмХрм╛рм░рнНрмпрнНрнЯрм╛рмирнБрм╖рнНрмарм╛рми рми рм╣рнЗрмм, рм╕рнЗрмкрм░рнНрмпрнНрнЯрмирнНрмд рмормжрмХрнБ рм╕рморнНрмкрнВрм░рнНрмгрнНрмг рммрмирнНрмж рмХрм░рм╛рмпрм╛рмЗ рмкрм╛рм░рм┐рмм рмирм╛рм╣рм┐рмБред рмПрм╣рм╛ рмкрмЫрм░рнЗ рмирнАрмдрм┐рм╢ рмХрнБрморм╛рм░рмЩрнНрмХрм░ рм╕рнНрммрм╛рм░рнНрме рмирм┐рм╣рм┐рмд рмерм┐рммрм╛ рмХрм╣рм┐рмЫрмирнНрмдрм┐ рм╕рмЮрнНрмЬрнЯред рмкрнВрм░рнНрммрм░рнБ рмормзрнНрнЯ рмормж рмкрм╛рмЗрмБ рм▓рнЛрмХрмЩрнНрмХ рморнГрмдрнНрнЯрнБ рм╣рнЛрмЗрмЫрм┐ рмУ рмЖрмдрнНрморм░рмХрнНрм╖рм╛ рмкрм╛рмЗрмБ рмХрнЗрммрм│ рмЫрнЛрмЯ рмХрм░рнНрмормЪрм╛рм░рнАрмЩрнНрмХ рмЙрмкрм░рнЗ рмХрм╛рм░рнНрмпрнНрнЯрм╛рмирнБрм╖рнНрмарм╛рми рм╣рнЛрмЗрмЖрм╕рм┐рмЫрм┐ред рмирнАрмдрм┐рм╢рмЩрнНрмХ рморм╛рмирм╕рм┐рмХ рм╕рмирнНрмдрнБрм│рми рммрм┐рмЧрм┐рмбрм┐ рмпрм╛рмЗрмЫрм┐ред рмпрмжрм┐ рм╕рнЗ рмжрм┐рм▓рнНрм▓рнА рмЖрм╕рм┐рммрнЗ рмЖрморнЗ рмдрм╛рмЩрнНрмХ рмЪрм┐рмХрм┐рмдрнНрм╕рм╛ рмХрм░рм┐рмЗрмкрм╛рм░рм┐рммрнБ рммрнЛрм▓рм┐ рмХрнЗрм╣рм┐рмЫрмирнНрмдрм┐ рммрм┐рм╣рм╛рм░ рммрм┐рмЬрнЗрмкрм┐ рмЕрмзрнНрнЯрмХрнНрм╖ред

    рм╕рнЗрмкрмЯрнЗ рмЬрнЗрмбрм┐рнЯрнБ рмУ рммрм┐рмЬрнЗрмкрм┐рм░ рмкрм░рм╕рнНрмкрм░рмХрнБ рмХрм╛рмжрнБрмЕ рмлрнЛрмкрмбрм╛ рмлрнЛрмкрмбрм┐ рмнрм┐рмдрм░рнЗ рмЖрм░рмЬрнЗрмбрм┐рм░ рммрм░рм┐рм╖рнНрма рмирнЗрмдрм╛ рм╢рм┐рммрм╛рмирмирнНрмж рмдрм┐рн▒рм╛рм░рнА рмХрм╣рм┐рмЫрмирнНрмдрм┐ рмХрм┐, рм╕рмдрнНрмдрм╛рм░рнБ рммрм┐рмжрм╛ рм╣рнЗрммрм╛ рмкрм░рнЗ рммрм┐рмЬрнЗрмкрм┐ рммрм┐рмЪрм│рм┐рмд рм╣рнЛрмЗ рмкрмбрм┐рмЫрм┐ред рмормжрмХрнБ рмирнЗрмЗ рмЬрм╛рмдрнАрнЯрм╕рнНрмдрм░рм░рнЗ рмПрмХ рмирнАрмдрм┐ рм╣рнЗрммрм╛ рмЖрммрм╢рнНрнЯрмХред рмЧрнБрмЬрнБрм░рм╛рмЯрм░рнЗ рмормж рмирм┐рм╖рм┐рмжрнНрмз рм╣рнЛрмЗрмЫрм┐, рмХрм┐рмирнНрмдрнБ рм╕рнЗрмарм╛рм░рнЗ рмПрм╣рм╛рм░ рм╣рнЛрмо рмбрнЗрм▓рм┐рмнрм░рнА рм╣рнЗрмЙрмЫрм┐ред рмЪрм│рм┐рмд рммрм░рнНрм╖ рмЬрнБрм▓рм╛рмЗрм░рнЗ рмЧрнБрмЬрнБрм░рм╛рмЯрм░рнЗ  рммрм┐рм╖рм╛рмХрнНрмд рмормж рмкрм┐рмЗ рнлрнн рм▓рнЛрмХрмЩрнНрмХ рморнГрмдрнНрнЯрнБ рм╣рнЛрмЗрмерм┐рм▓рм╛, рмпрнЗрмдрнЗрммрнЗрм│рнЗ рм▓рнЛрмХрнЗ рмкрнБрм▓рм┐рм╕ рмирм┐рмХрмЯрм░рнЗ рмЕрммрнИрмз рмормж рммрм┐рмХрм┐рнНрм░ рм╕рморнНрмкрм░рнНрмХрм░рнЗ рмЕрмнрм┐рмпрнЛрмЧ рмХрм░рм┐рмерм┐рм▓рнЗред рмХрм┐рмирнНрмдрнБ рмХрм╛рм░рнНрмпрнНрнЯрм╛рмирнБрм╖рнНрмарм╛рми рм╢рнВрмирнНрнЯ рмерм┐рм▓рм╛ред

  • рмЬрнЗрмбрм┐рнЯрнБ рмкрнНрм░рммрмХрнНрмдрм╛ рмирм┐рмЦрм┐рм│ рмормгрнНрмбрм│рмЩрнНрмХ рмЗрм╕рнНрмдрмлрм╛

    рмкрм╛рмЯрмирм╛: рмЬрнЗрмбрм┐рнЯрнБ рмУ┬а рмЖрм░рмЬрнЗрмбрм┐ рм╕рм╣ рморнЛрмЯ рнн рмжрм│рмХрнБ рмирнЗрмЗ рморм╣рм╛ рморнЗрмгрнНрмЯрмХрнБ рмирнЗрмЗ рммрм┐рм╣рм╛рм░рм░рнЗ рм╕рм░рмХрм╛рм░ рмЧрмарми рмХрм░рм┐рмЫрмирнНрмдрм┐ рмирнАрмдрм┐рм╢ рмХрнБрморм╛рм░ред рмХрм┐рмирнНрмдрнБ рмХрнБрморм╛рм░рмЩрнНрмХ рм╕рм░рмХрм╛рм░ рмЧрмармирм░ рмжрм┐рми рмХрнЗрмЗрмЯрм╛рм░рнЗ рмЬрнЗрмбрм┐рнЯрнБ рмкрнНрм░рммрмХрнНрмдрм╛ рмирм┐рмЦрм┐рм│ рмормгрнНрмбрм│ рм╕рнЛрморммрм╛рм░ рмирм┐рмЬ рмкрмжрм░рнБ рмжрнЗрмЗрмЫрмирнНрмдрм┐ рмЗрм╕рнНрмдрмлрм╛ред рмПрм╣рм┐ рмЗрм╕рнНрмдрмлрм╛ рм╕рнЗ рммрнНрнЯрмХрнНрмдрм┐рмЧрмд рмХрм╛рм░рмгрм░рнБ рмжрнЗрмЗрмерм┐рммрм╛ рмХрм╣рм┐рмЫрмирнНрмдрм┐ред

    рмЬрнЗрмбрм┐рнЯрнБ рмкрнНрм░рммрмХрнНрмдрм╛ рмирм┐рмЦрм┐рм│ рмормгрнНрмбрм│ рмкрмжрм░рнБ рмЗрм╕рнНрмдрмлрм╛ рмжрнЗрммрм╛ рм╕рм╣ рмПрм╣рм╛рмХрнБ рммрнНрнЯрмХрнНрмдрм┐рмЧрмд рмХрм╛рм░рмг рмХрм╣рнБрмерм┐рммрм╛ рммрнЗрм│рнЗ рмХрм┐рмирнНрмдрнБ рм░рм╛рмЬрмирнИрмдрм┐рмХ рммрм┐рм╢рнЗрм╖рмЬрнНрмЮ рмПрм╣рм╛рм░ рмнрм┐рмирнНрми рмЖрмХрм│рми рмХрм░рнБрмЫрмирнНрмдрм┐ред рмЬрнЗрмбрм┐рнЯрнБ рмУ рмЖрм░рмЬрнЗрмбрм┐ рм╣рм╛рмд рморм┐рм│рм╛рмЗрммрм╛ рмкрм░рнЗ рм░рм╛рмЬрнНрнЯрм░ рм░рм╛рмЬрмирнИрмдрм┐рмХ рм╕рморнАрмХрм░рмг рммрмжрм│рм┐рммрм╛ рмкрм░рм┐ рмормирнЗ рм╣рнЗрмЙрмЫрм┐ред рмормгрнНрмбрм│ рмЖрм░рмЬрнЗрмбрм┐ рм╕рнБрмкрнНрм░рм┐рморнЛ рм▓рм╛рм▓рнБ рмпрм╛рмжрмм рмУ рмдрм╛рмЩрнНрмХ рмкрнБрмЕ рмдрнЗрмЬрм╕рнНрммрнА рмпрм╛рмжрммрмЩрнНрмХ рмЬрмгрнЗ рммрмб рм╕рморм╛рм▓рнЛрмЪрмХ рм░рм╣рм┐рмЖрм╕рм┐рмЫрмирнНрмдрм┐ред рмПрммрнЗ рм╕рм░рмХрм╛рм░рм░рнЗ рмЖрмЬрнЗрмбрм┐рм░ рм╕рморнНрмкрнГрмХрнНрмдрм┐ рмкрм░рнЗ рм▓рм╛рм▓рнБ рм╕рм░рмХрм╛рм░ рмХрм╛рм│рнАрми рмУ рмкрм░рм┐рммрм╛рм░рм░ рмжрнБрм░рнНрмирнАрмдрм┐рмХрнБ рмШрмгрнНрмЯ рмШрнЛрмбрм╛рмЗрммрм╛рмХрнБ рм╣рнБрмПрмд рм╕рнЗ рмирм┐рмЬрмХрнБ рмЕрм╕рм╣рмЬ рмормирнЗ рмХрм░рнБрмЫрмирнНрмдрм┐ред

    рмПрм╣рм╛ рммрнНрнЯрмдрнАрмд рмЕрмирнБрморм╛рми рмХрм░рм╛рмпрм╛рмЙрмЫрм┐ рмХрм┐, рм╣рнБрмПрмд рмормгрнНрмбрм│рмЩрнНрмХрнБ рмЕрмирнБрмнрнВрмд рм╣рнЛрмЗрмерм┐рм▓рм╛ рмХрм┐ рнирнжрнирнл рмирм┐рм░рнНрммрм╛рмЪрмирм░рнЗ рмдрм╛рмЩрнНрмХрнБ рмЯрм┐рмХрнЗрмЯ рморм┐рм│рм┐рмм рмирм╛рм╣рм┐рмБред рм╣рнЗрм▓рнЗ рнирнжрнирнкрм░рнЗ рмормзрнЗрмкрнБрм░рм░рнБ рм▓рнЛрмХрм╕рмнрм╛ рмирм┐рм░рнНрммрм╛рмЪрми рм▓рмврм┐рммрм╛рм░ рм╕рморнНрмнрм╛рммрмирм╛ рм░рм╣рм┐рмЫрм┐ред рнирнжрнирнжрм░рнЗ рмирм┐рмЦрм┐рм│ рмормгрнНрмбрм│ рмормзрнЗрмкрнБрм░рм╛рм░рнБ рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрми рм▓рмврм┐рмерм┐рм▓рнЗред рмПрм╣рм┐ рмирм┐рм░рнНрммрм╛рмЪрмирм░рнЗ рм╕рнЗ рмЖрм░рмЬрнЗрмбрм┐рм░ рмб. рмЪрмирнНрмжрнНрм░рм╢рнЗрмЦрм░рмЩрнНрмХрмарм╛рм░рнБ рмкрм░рм╛рмЬрнЯ рммрм░рмг рмХрм░рм┐рмерм┐рм▓рнЗред рмЪрмирнНрмжрнНрм░рм╢рнЗрмЦрм░ рммрм░рнНрмдрнНрмдрморм╛рми рм╕рм░рмХрм╛рм░рм░рнЗ рм╢рм┐рмХрнНрм╖рм╛рмормирнНрмдрнНрм░рнА рм╣рнЛрмЗрмЫрмирнНрмдрм┐ред

    рм╕рнВрмЪрмирм╛ рморнБрмдрм╛рммрмХ, рмормгрнНрмбрм│ рмЧрмд рмХрм┐рмЫрм┐ рморм╛рм╕ рм╣рнЗрмм рмирм┐рмЬ рмирм┐рм░рнНрммрм╛рмЪрми рмормгрнНрмбрм│рнАрмХрнБ рммрм╛рм░рморнНрммрм╛рм░ рмЧрм╕рнНрмд рмХрм░рнБрмЫрмирнНрмдрм┐, рмпрм╛рм╣рм╛рмХрнБ рмирнЗрмЗ рмЖрмХрм│рми рмХрм░рм╛рмпрм╛рмЙрмЫрм┐ рмХрм┐, рм╕рнЗ рнирнжрнирнкрм░рнЗ рмормзрнЗрмкрнБрм░рм╛рм░рнБ рм▓рнЛрмХрм╕рмнрм╛ рмирм┐рм░рнНрммрм╛рмЪрмирмХрнБ рмУрм╣рнНрм▓рм╛рмЗ рмкрм╛рм░рмирнНрмдрм┐ред

  • рмЖрм░рмЬрнЗрмбрм┐ рмирнЗрмдрм╛рмЩрнНрмХ рмШрм░рнЗ рм╕рм┐рммрм┐рмЖрмЗ рм░рнЗрмбрнН

    рмкрм╛рмЯрмгрм╛: рммрм┐рм╣рм╛рм░рм░рнЗ рм╕рм┐рммрм┐рмЖрмЗ рм░рнЗрмбрнНред рмирнАрмдрм┐рм╢ рм╕рм░рмХрм╛рм░ рм╕рмВрмЦрнНрнЯрм╛ рмЧрм░рм┐рм╖рнНрмармдрм╛рм░ рмкрнНрм░рморм╛рмг рмжрнЗрммрм╛ рмжрм┐рми рм╣рм┐рмБ рмЖрм░рмЬрнЗрмбрм┐ рмирнЗрмдрм╛рмЩрнНрмХ рмШрм░рнЗ рм╕рм┐рммрм┐рмЖрмЗ рм░рнЗрмбрнН рм╣рнЛрмЗрмЫрм┐ред рмпрм╛рм╣рм╛рмХрнБ рмирнЗрмЗ рммрм┐рм╣рм╛рм░ рм░рм╛рмЬрмирнАрмдрм┐рмХ рм╣рмЯрмЪрмормЯ рмЬрнЛрм░ рмзрм░рм┐рмЫрм┐ред рмЖрм░рмЬрнЗрмбрм┐ рммрм┐рмзрм╛рнЯрмХ рм╕рнБрмирнАрм▓ рм╕рм┐рмВ рмУ рмдрм┐рмирм┐ рмЬрмг рм╕рм╛рмВрм╕рмж рмЖрм░рмПрм╕ рмЕрм╕рмлрм╛рмХрнН рмХрм░рм┐рмормЩрнНрмХ, рмлрнЯрм╛рмЬрнН рмЕрм╣рморнНрмормж рмУ рм╕рнБрммрнЛрмз рм░рм╛рнЯрмЩрнНрмХ рмШрм░рнЗ рмУ рмЕрмлрм┐рм╕рм░рнЗ рм╕рм┐рммрм┐рмЖрмЗ рм░рнЗрмбрнН рмирнЗрмЗ рммрм┐рмЬрнЗрмкрм┐ рмУ рморм╣рм╛рмЧрмарммрмирнНрмзрми рм╕рм░рмХрм╛рм░ рморнБрм╣рм╛рмБрморнБрм╣рм┐рмБ рм╣рнЛрмЗрмЫрмирнНрмдрм┐ред

    рмЪрм╛рмХрм┐рм░рнА рмкрм╛рмЗрмБ рмЬрморм┐ рмжрнБрм░рнНрмирнАрмдрм┐рм░ рмкрнБрм░рнБрмгрм╛ рмЪрм┐рмарм╛ рмкрнБрмгрм┐ рмЦрнЛрм▓рм┐рмЫрм┐ рм╕рм┐рммрм┐рмЖрмЗред рмЖрм░рмЬрнЗрмбрм┐ рммрм┐рмзрм╛рмирмкрм░рм┐рм╖рмж рм╕рмжрм╕рнНрнЯ рм╕рнБрмирнАрм▓ рм╕рм┐рмВ рмУ рмдрм┐рмирм┐ рмЬрмг рм╕рм╛рмВрм╕рмж рмЕрм╕рмлрм╛рмХрнН рмХрм░рм┐рморнН, рмлрнЯрм╛рмЬрнН рмЕрм╣рморнНрмормж рмУ рм╕рнБрммрнЛрмз рм░рм╛рнЯрмЩрнНрмХ рмШрм░ рмУ рмЕрмлрм┐рм╕ рмЙрмкрм░рнЗ рм╕рм┐рммрм┐рмЖрмЗ рм░рнЗрмбрнН рмХрм░рм┐рмЫрм┐ред рмдрнЗрммрнЗ рмПрм╣рм┐ рм╕рморнЯ рм╕рмВрмпрнЛрмЧ рмирм╛ рмЖрмЙ рмХрм┐рмЫрм┐ рммрнЛрм▓рм┐ рмЪрм░рнНрмЪрнНрмЪрм╛ рммрм┐ рм╣рнЗрмЙрмЫрм┐ред рмХрм╛рм░рмг рмирнАрмдрм┐рм╢ рм╕рм░рмХрм╛рм░ рмирм┐рмЬ рм╕рмВрмЦрнНрнЯрм╛рмЧрм░рм┐рм╖рнНрмармдрм╛рм░ рмкрнНрм░рморм╛рмг рмжрнЗрммрм╛рм░ рмжрм┐рми рмерм┐рм▓рм╛ред рмЖрмЙ рмПрмдрм┐рмХрм┐рммрнЗрм│рнЗ рм╕рм┐рммрм┐рмЖрмЗ рмЖрм░рмЬрнЗрмбрм┐ рмирнЗрмдрм╛рмЩрнНрмХ рмШрм░рнЗ рмЫрм╛рмкрм╛ рморм╛рм░рм┐рммрм╛рмХрнБ рмирнЗрмЗ рморм╣рм╛рмЧрмарммрмирнНрмзрми рм╕рм░рмХрм╛рм░ рм╕рм╣рмЬрм░рнЗ рмЧрнНрм░рм╣рмг рмХрм░рм┐рмкрм╛рм░рнБрмирм┐ред рмПрм╣рм╛ рмЙрмжрнНрмжрнЗрм╢рнНрнЯрморнВрм│рмХ рмнрм╛рммрнЗ рмХрм░рм╛рмпрм╛рмЙрмерм┐рммрм╛ рмХрм╣рм┐рмЫрм┐ рмЖрм░рмЬрнЗрмбрм┐ред рмПрм╣рм┐ рм░рнЗрмбрнН рм░ рмХрнМрмгрм╕рм┐ рморм╛рмПрмирм╛ рмирм╛рм╣рм┐рмБред рммрм┐рмЬрнЗрмкрм┐ рмнрм╛рммрнБрмЫрм┐, рм╕рм┐рммрм┐рмЖрмЗрмХрнБ рмкрмЫрм░рнЗ рм▓рмЧрм╛рмЗрмжрнЗрм▓рнЗ рммрм┐рмзрм╛рнЯрмХрморм╛рмирнЗ рмнрнЯрмнрнАрмд рм╣рнЛрмЗрмпрм┐рммрнЗред рмЖрмЙ рм╕рнЗрморм╛рмирмЩрнНрмХ рмкрмЯрмХрнБ рмврм│рм┐рммрнЗред рмПрм╣рм╛ рм╕рнЗрморм╛рмирмЩрнНрмХ рмжрм┐рммрм╛рм╕рнНрн▒рмкрнНрми рммрнЛрм▓рм┐ рмХрм╣рм┐рмЫрмирнНрмдрм┐ рмЖрм░рмЬрнЗрмбрм┐ рмПрмормПрм▓рм╕рм┐ рмдрмерм╛ рммрм┐рм╣рм╛рм░ рм░рм╛рмЬрнНрнЯ рмХрнЛрмкрм░рнЗрмЯрм┐рмнрнН рморм╛рм░рнНрмХрнЗрмЯрм┐рмВ рнЯрнБрмирм┐рмЕрмирм░ рмЕрмзрнНрнЯрмХрнНрм╖ рм╕рнБрмирнАрм▓ рм╕рм┐рмВред

    рмЖрм░рмЬрнЗрмбрм┐ рм╕рм╛рмВрм╕рмж рмормирнЛрмЬ рмЭрм╛ рмХрм╣рм┐рмЫрмирнНрмдрм┐, рмПрм╣рм╛ рмХрнМрмгрм╕рм┐ рм╕рм┐рммрм┐рмЖрмЗ, рмЗрмбрм┐ рмХрм┐ рмЖрмЗрмЯрм┐рм░ рм░рнЗрмбрнН рммрнЛрм▓рм┐ рмХрнБрм╣рм╛рмпрм┐рммрм╛ рм╕рморнАрмЪрм┐рми рм╣рнЗрммрмирм┐ред рммрм░рмВ рмПрм╣рм┐ рм░рнЗрмбрнН рммрм┐рмЬрнЗрмкрм┐ рмХрм░рм┐рмЫрм┐ рммрнЛрм▓рм┐ рмХрм╣рм┐рммрм╛ рмЙрмЪрм┐рмдрнН рм╣рнЗрммред рм╕рм┐рммрм┐рмЖрмЗ рмПрммрнЗ рммрм┐рмЬрнЗрмкрм┐ рмЕрмзрнАрмирм░рнЗ рмХрм╛рмо рмХрм░рнБрмЫрм┐ред рм╕рм┐рммрм┐рмЖрмЗ рмЕрмлрм┐рм╕ рммрм┐рмЬрнЗрмкрм┐рм░ рм╕рнНрмХрнНрм░рм┐рмкрнНрмЯрм░рнЗ рмЪрм╛рм▓рнБрмЫрм┐ред рмпрнЗрмЙрмБрмжрм┐рми рморм╣рм╛рмЧрмарммрмирнНрмзрми рм╕рм░рмХрм╛рм░рм░ рмлрнНрм▓рнЛрм░-рмЯрнЗрм╖рнНрмЯ рм╕рнЗрмжрм┐рми рмПрмнрм│рм┐ рм░рнЗрмбрнН рмЖрмЙ рмХрмЕрмг рммрм╛рм░рнНрмдрнНрмдрм╛ рмжрнЗрмЙрмЫрм┐, рмПрм╣рм╛ рммрнБрмЭрм┐рммрм╛рмХрнБ рммрм╛рмХрм┐ рмирм╛рм╣рм┐рмБред рмПрммрнЗрмХрм╛рм░ рморнЗрмгрнНрмЯ рм╕рм░рмХрм╛рм░ рмЬрмирмдрм╛рм░ рммрм┐рмХрм╛рм╢ рмкрм╛рмЗрмБ рмЙрмжрнНрмжрм┐рм╖рнНрмЯред рм╕рм░рмХрм╛рм░ рмХрмЕрмг рмдрм╛рмЩрнНрмХ рмЗрмЩрнНрмЧрм┐рмдрм░рнЗ рмЪрм╛рм▓рм┐рмм рммрнЛрм▓рм┐ рмнрм╛рммрнБрмЫрм┐ рмХрм┐ рммрм┐рмЬрнЗрмкрм┐ред рмЖрмЙ рмХрнЗрм╣рм┐ рмХрм╣рм┐рм▓рнЗрмгрм┐, рммрм┐рм╣рм╛рм░ рмЧрмгрмдрмирнНрмдрнНрм░рм░ рморм╛рмЯрм┐ред рмПрмарм┐ рмпрнЗрмдрнЗ рмдрмжрмирнНрмдрмХрм╛рм░рнА рмПрмЬрнЗрмирнНрм╕рм┐ рмкрмарм╛рмЗрм▓рнЗ рммрм┐, рмХрнЗрм╣рм┐ рморм╣рм╛рмЧрмарммрмирнНрмзрми рм╕рм░рмХрм╛рм░ рмЙрмкрм░рнЗ рмЪрм╛рмк рмкрмХрм╛рмЗрмкрм╛рм░рм┐рммрнЗрмирм┐ред рм▓рм╛рм▓рнБрмЩрнНрмХ рмкрмдрнНрмирнА рмдрмерм╛ рмкрнВрм░рнНрммрмдрми рморнБрмЦрнНрнЯрмормирнНрмдрнНрм░рнА рм░рм╛рммрнНрм░рм┐ рмжрнЗрммрнА рмХрм╣рм┐рмЫрмирнНрмдрм┐, рмЧрнЛрмЯрм┐рмП рмирнВрмЖ рм╕рм░рмХрм╛рм░ рмЧрмарми рм╣рнЛрмЗрмЫрм┐ред рммрм┐рмЬрнЗрмкрм┐рмХрнБ рмЫрм╛рмбрм╝рм┐рмжрнЗрм▓рнЗ рммрм╛рмХрм┐ рм╕рммрнБ рмжрм│ рмЖрмо рм╕рм╣ рмЕрмЫрм┐ред рм╕рмВрмЦрнНрнЯрм╛рмЧрм░рм┐рм╖рнНрмармдрм╛ рмерм┐рммрм╛рм░рнБ рм╕рм┐рммрм┐рмЖрмЗ рмЪрмврм╛рмЙ рмХрм░рм┐ рмЖрмормХрнБ рмнрнЯрмнрнАрмд рмХрм░рм┐рммрм╛рмХрнБ рмЪрнЗрм╖рнНрмЯрм╛ рм╣рнЗрмЙрмЫрм┐ред рмХрм┐рмирнНрмдрнБ рмЖрморнЗ рмнрнЯрмнрнАрмд рмирнЛрм╣рнБрмБред рмХрм╛рм░рмг рмПрм╣рм╛ рмкрнНрм░рмермо рмерм░ рм╣рнЗрмЙрмирм┐ред

    рм░рнЗрм│рммрм╛рмЗрм░рнЗ рмЪрм╛рмХрм┐рм░рнА рмкрм╛рмЗрмБ рмЬрморм┐ рмкрнНрм░рм╕рмЩрнНрмЧрм░рнЗ рм▓рм╛рм▓рнБ рмпрм╛рмжрмм, рмдрм╛рмЩрнНрмХ рмкрмдрнНрмирнА рмУ рмЭрм┐рмЕрмЩрнНрмХ рм╕рморнЗрмд рмЕрмирнЗрмХрмЩрнНрмХрнБ рмЕрмнрм┐рмпрнБрмХрнНрмд рмжрм░рнНрм╢рм╛рмЗ рм╕рм┐рммрм┐рмЖрмЗ рмЧрм▓рм╛ рморнЗ рморм╛рм╕рм░рнЗ рнзрннрмЯрм┐ рмЬрм╛рмЧрм╛рм░рнЗ рм░рнЗрмбрнН рмХрм░рм┐рмерм┐рм▓рм╛ред рмЬрнБрм▓рм╛рмЗрм░рнЗ рм▓рм╛рм▓рнБ рмпрм╛рмжрммрмЩрнНрмХ рмЕрмлрм┐рм╕рм░рнЗ рмУрмПрм╕рмбрм┐ рмнрм╛рммрнЗ рмХрм╛рмо рмХрм░рнБрмерм┐рммрм╛ рмнрнЛрм│рм╛ рмпрм╛рмжрммрмЩрнНрмХрнБ рмЧрм┐рм░рмл рмХрм░рм┐рмерм┐рм▓рм╛ рм╕рм┐рммрм┐рмЖрмЗред рм▓рм╛рм▓рнБ рм░рнЗрм│ рмормирнНрмдрнНрм░рнА рмерм┐рм▓рм╛ рммрнЗрм│рнЗ рмнрнЛрм│рм╛ рмУрмПрм╕рмбрм┐ рмерм┐рм▓рнЗред рнирнжрнжрнкрм░рнБ рнирнжрнжрнп рмпрм╛рмП рм▓рм╛рм▓рнБ рм░рнЗрм│рмормирнНрмдрнНрм░рнА рмерм┐рм▓рм╛ рммрнЗрм│рнЗ рм░рнЗрм│рммрм╛рмЗрм░рнЗ рмЪрм╛рмХрм┐рм░рнА рмкрм╛рмЗрммрм╛рмХрнБ рм╣рнЗрм▓рнЗ рм▓рм╛рм▓рнБ рм▓рнЛрмХрмЩрнНрмХрмарнБ рмХрм╛рм░рм╕рм╛рмжрм┐ рмХрм░рм┐ рмЬрморм┐ рмирнЗрмЙрмерм┐рммрм╛ рмЕрмнрм┐рмпрнЛрмЧ рм╣рнЛрмЗрмерм┐рм▓рм╛ред

  • рмЖрмЬрм┐ рмлрнНрм▓рнЛрм░ рмЯрнЗрм╖рнНрмЯ

    рмкрм╛рмЯрмгрм╛: рмЖрмЬрм┐ рмлрнНрм▓рнЛрм░ рмЯрнЗрм╖рнНрмЯред рммрм┐рм╣рм╛рм░ рммрм┐рмзрм╛рмирм╕рмнрм╛рм░рнЗ рмЖрмЬрм┐ рммрм╣рнБрмормд рмкрм░рнАрмХрнНрм╖рм╛ рмжрнЗрммрнЗ рмирнАрмдрм┐рм╢- рмдрнЗрмЬрм╕рнНрн▒рнА рморм╣рм╛рморнЗрмгрнНрмЯ рм╕рм░рмХрм╛рм░ред рмдрм╛ рмкрнВрм░рнНрммрм░рнБ рмЖрмЬрм┐ рм╕рмХрм╛рм│рнБ рм╕рмХрм╛рм│рнБ рмкрм╛рмЯрмирм╛рм░рнЗ рмХрнЗрмирнНрмжрнНрм░рнАрнЯ рмпрм╛рмЮрнНрмЪ рмПрмЬрнЗрмирнНрм╕рм┐рмВ рм╕рм┐рммрм┐рмЖрмЗрм░ рм░рнЗрмбрнН ред рмЧрмарммрмирнНрмзрми рм╕рм░рмХрм╛рм░рм░рнЗ рмерм┐рммрм╛ рм░рм╛рм╖рнНрмЯрнНрм░рнАрнЯ рмЬрмирмдрм╛ рмжрм│ рмЖрм░рмЬрнЗрмбрм┐рм░ рммрм┐рмзрм╛рми рмкрм░рм┐рм╖рмж рм╕рмжрм╕рнНрнЯ рм╕рнБрмирнАрм▓ рм╕рм┐рмВрм╣рмЩрнНрмХ рмШрм░рнЗ рм░рнЗрмбрнН рмХрм░рм┐рмЫрм┐ ред рм╕рнБрмирнАрм▓ рм╕рм┐рмВрм╣ рмЖрм░рмЬрнЗрмбрм┐ рм╕рнБрмкрнНрм░рм┐рморнЛ рм▓рм╛рм▓рнБ рмкрнНрм░рм╕рм╛рмж рмпрм╛рмжрммрмЩрнНрмХ рмЕрмдрм┐ рмШрмирм┐рм╖рнНрма рммрнЛрм▓рм┐ рмХрнБрм╣рм╛рмпрм╛рмЙрмЫрм┐ред рм░рнЗрм▓рн▒рнЗрм░рнЗ рмирм┐рмпрнБрмХрнНрмдрм┐ рмПрммрмВ рмЬрморм┐ рмЬрм╛рм▓рм┐рмЖрмдрм┐ рморм╛рморм▓рм╛рм░рнЗ рм╕рм┐рммрм┐рмЖрмЗ рм░рнЗрмбрнН рмХрм░рнБрмЫрм┐ ред рмЙрмжрнНрмжрнЗрм╢рнНрнЯрморнВрм│рмХ рмнрм╛рммрнЗ рм╕рм┐рммрм┐рмЖрмЗ рм░рнЗрмбрнН рмХрм░рм┐рмЫрм┐ред рмЖрм░рмЬрнЗрмбрм┐ рммрм┐рмзрм╛рнЯрмХрмЩрнНрмХрнБ рмЬрм╛рмгрм┐рм╢рнБрмгрм┐ рм╣рмЗрм░рм╛рмг рм╣рм░рмХрмд рмПрммрмВ рмбрм░рм╛рмЗрммрм╛ рмкрм╛рмЗрмБ рмПрм╣рм┐ рмХрм╛рм░рнНрмпрнНрнЯрм╛рмирнБрм╖рнНрмарм╛рми рмЧрнНрм░рм╣рмг рмХрм░рм╛рмпрм╛рмЙрмЫрм┐ рммрнЛрм▓рм┐ рмХрм╣рм┐рмЫрмирнНрмдрм┐ рм╕рнБрмирнАрм▓ рм╕рм┐рмВрм╣ред┬а

Back to top button