SUICIDE

  • ଅକ୍ଷମ ବ୍ୟକ୍ତିଙ୍କ ଆତ୍ମହତ୍ୟା

    ବୌଦ୍ଧ: ଭିନ୍ନକ୍ଷମ ବ୍ୟକ୍ତିଙ୍କ ଆତ୍ମହତ୍ୟା ଘଟଣା । ପାରବାରିକ ଝଗଡା ପରେ ଏପରି ହୋଇଥିବା ଜଣାପଡିଛି । ଗାଁ ମୁଣ୍ଡରେ ଏକ ଗଛରେ ଦଉଡି ଲଗାଇ କରିଛନ୍ତି ଆତ୍ମହତ୍ୟା । ଘଟଣା ସ୍ଥଳରେ ପୋଲସି ପହଞ୍ଚି ଆରମ୍ଭ କରିଛି ତଦନ୍ତ ।

    ଏପରି ଅଭାବନୀୟ ଘଟଣା ଘଟିଛି ବୌଦ୍ଧ ଜିଲ୍ଲା ମନମୁଣ୍ଡା ଥାନା ଅଧୀନ ରୁଗୁଡିପାଲି ଗ୍ରାମରେ । ଆତ୍ମହତ୍ୟା କରିଥିବା ଯୁବକ ହେଉଛନ୍ତି ରିକେଶ ରଣା ସେ ଜଣେ ମାନଶିକ ଅକ୍ଷମ ରୋଗୀ ଥିଲେ । ଶନିବାରେ କୌଣସି କାରଣରୁ ନିଜ ପରିବାର ସହ ତାଙ୍କର ଝଗଡା ହୋଇଥିଲା । ସେଥିରେ ସେ ରାଗିଯାଇ ନିଜ ଗ୍ରାମ ମୁଣ୍ଡରେ ଏକ ଗଛରେ ଦଉଡି ଲଗାଇ ଆତ୍ମହତ୍ୟା କରିଥିଲେ । ଏହାକୁ ଦେଖି ଲୋକେ ମନମୁଣ୍ଡା ପୋଲିସ ଷ୍ଟେସନଙ୍କୁ ଜଣାଇଥିଲେ ।  ପୋଲିସ ଘଟଣା ସ୍ଥଳରେ ପହଞ୍ଚି ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ଡାକ୍ତରଖାନା ପଠାଇଛି ।

    ତେବେ ରିକେଶଙ୍କ ମୃତ୍ୟୁ କେଉଁ କାରଣରୁ ହୋଇଛି । ସେନେଇ ପୋଲିସ ଆରମ୍ଭ କରିଛି ତଦନ୍ତ ।

  • ନଅ ବର୍ଷୀୟା ନାବାଳିକାଙ୍କ ଚରମ ପଦକ୍ଷେପ

    ଚେନ୍ନାଇ: ବାପା ପାଠ ପଢିବାକୁ ତାଗିତ କରିବାରୁ କଲେ ଆତ୍ମହତ୍ୟା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ତାମିଲନାଡୁର  ପେରିୟାକୁପ୍ପମ୍ ଠାରେ । ଜଣେ ନଅ ବର୍ଷର ନାବାଳିକା ନେଇଛନ୍ତି ଏପରି ପଦକ୍ଷେପ । ମୃତ ନାବାଳିକାଙ୍କ ହେଉଛନ୍ତି ପ୍ରତୀକ୍ଷା ।

    ମିଳିଥିବା ସୂଚନା ମୁତାବକ ମୃତ ପ୍ରତୀକ୍ଷା ବୁଧୁବାର ତାଙ୍କ ସାଙ୍ଗମାନଙ୍କ ସହ ଘର ନିକଟରେ ଖେଳୁଥିଲେ । ତାଙ୍କ ବାପା ଏଥିରେ ବିରକ୍ତ ହୋଇ ଘରକୁ ଯାଇ ପାଠ ପଢିବାକୁ କହିଥିଲେ । ନାବାଳିକା ଜଣକ ଏଥିରେ ରାଗିଯାଇ ଘରକୁ ଫେରି ଏକ ଟାୱେଲକୁ ପଙ୍ଖାରେ ଲଗାଇ ଝୁଲି ପଡିଥିଲେ । ତେବେ ଘଟଣା ସମୟରେ ପ୍ରତୀକ୍ଷାଙ୍କ ବାପା ବଜାର ଯାଇଥିବା ବେଳେ ସେ ଘରେ ଏକୁଟିଆ ଥିବାରୁ କେହି ଏସମ୍ପର୍କରେ କିଛି ଜାଣିପାରିନଥିଲେ ।

    ମୃତକଙ୍କ ବାପା କୃଷ୍ଣମୂର୍ତ୍ତି ଘରକୁ ଫେରି କବାଟ ବାଡେଇବାରୁ ଝିଅ ପ୍ରତୀକ୍ଷା ଆଉ କବାଟ ଖୋଲିନଥିଲେ । କୃଷ୍ଣମୂର୍ତ୍ତି ଏଥିରେ ସନ୍ଦେହ କରି ଝରକା ପଟେ ଦେଖିବାରୁ ତାଙ୍କ ପାଦ ତଳୁ ସତେ କି ମାଟି ଖସି ଯାଇଥିଲା। କାହିଁକି ନା ସେତେବେଳେ ଆଉ ଝିଅ ପ୍ରତୀକ୍ଷା ଏ ଦୁନିଆରେ ନଥିଲା । ପ୍ରତୀକ୍ଷା ଇନଷ୍ଟାଗ୍ରାମରେ ଭିଡିଓ କରୁଥିବାରୁ ସେ ସେହି ଅଞ୍ଚଳରେ ଇନଷ୍ଟା କୁଇନ  ଭାବେ ବେଶ ଜଣାଶୁଣା ଥିଲେ ।

    ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶବକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ଓ  ତଦନ୍ତ ଆରମ୍ଭ କରିଛି ।  ପ୍ରତୀକ୍ଷାର ମୃତ୍ୟୁ ଖବରରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି  ।

  • ଛାତ୍ରୀଙ୍କ ଆତ୍ମହତ୍ୟା: ରାଗିଂ ଅଭିଯୋଗ

    ଯାଜପୁର: ଯାଜପୁର ଜିଲ୍ଲା କୋରାଇ ଥାନା ରଗଡ଼ି ସରକାରୀ ପଲିଟେକନିକ କଲେଜର ଇଲେକ୍ଟ୍ରିକାଲ ଷ୍ଟ୍ରିମର ୩ୟ ବର୍ଷ ଛାତ୍ରୀ ଆତ୍ମହତ୍ୟା ଘଟଣା। ମୃତ ଦେହ ଜବତ କରି ଶବ ବ୍ୟବଚ୍ଛେଦ ପାଇଁ ପଠାଇଛି କୋରାଇ ପୋଲିସ। ଗୋଟିଏ ପଟେ ରାଗିଙ୍ଗ ପାଇଁ ଝିଅର ଜୀବନ ଯାଇଥିବା ପରିବାର ଲୋକେ ଅଭିଯୋଗ କରୁଥିବା ବେଳେ ତଦନ୍ତ ପରେ କାରଣ ସ୍ପଷ୍ଟ ହେବା ନେଇ ପୋଲିସ ସୂଚନା ଦେଇଛି।

    ବେକରେ ଓଢ଼ଣୀ  ଲଗାଇ ଆତ୍ମହତ୍ୟା କରିଛନ୍ତି ଯାଜପୁର ଜିଲ୍ଲା କୋରାଇ ଥାନା ରଗଡି ପଲିଟେକନିକର  ଇଲେକ୍ଟ୍ରିକାଲର ୩ୟ ବର୍ଷ ଛାତ୍ରୀ ରୋଜାଲିନ ପାତ୍ର। ମୃତା ଛାତ୍ରୀ ଜଣକ ଜେନାପୁର ଥାନା ଷେଣ୍ଢପୁର ଗ୍ରାମର ଅମୂଲ୍ୟ ପାତ୍ରଙ୍କ ଝିଅ। କାହିଁକି ରୋଜାଲିନ ଏଭଳି ଚରମ ନିଷ୍ପତ୍ତି ନେଲେ ସେ ନେଇ କୌଣସି ସ୍ପଷ୍ଟ ସୂଚନା ମିଳିନଥିବା ବେଳେ ପରିବାର ଲୋକଙ୍କ ଅଭିଯୋଗ ରାଗିଂ ନେଇଗଲା ଝିଅର ଜୀବନ। ଝିଅକୁ ସାଙ୍ଗସାଥି ସବୁବେଳେ ରାଗିଂ କରୁଥିବା ନେଇ ସେ ଫୋନରେ ବାରମ୍ବାର ପରିବାର ଲୋକଙ୍କୁ ଜଣାଥିଲେ।

    ପରିବାର ଲୋକେ ତାଙ୍କ ରୋଜାଲୀନଙ୍କ ୩ ବନ୍ଧୁ ବିଭୂଦତ୍ତ ସାହୁ, ଅର୍ପିତା ଦଳାଇ ଓ ପିଙ୍କି ପଣ୍ଡା ଙ୍କ ନାଁରେ ଅଭିଯୋଗ ଆଣିଛନ୍ତି। ଅନ୍ୟପଟେ ଏହି  ଅଭିଯୋଗକୁ ଖଣ୍ଡନ କରିଛନ୍ତି କଲେଜ ଅଧ୍ୟକ୍ଷ ।

    ଅନ୍ୟପଟେ ମୃତା ଛାତ୍ରୀ ରୋଜାଲିନ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣା ପଡିଥିବା ସ୍ପଷ୍ଟ କରିଛନ୍ତି ଯାଜପୁର ରୋଡ଼ ଏସଡିପିଓ। ସେହିଭଳି  ଛାତ୍ରୀଙ୍କ ମୃତ ଦେହ ନିକଟରୁ ହାତଲେଖା ଚିଠି ହସ୍ତଗତ ହୋଇଥିବା ଏସଡିପିଓ ସୂଚନା ଦେଇଛନ୍ତି । ହଷ୍ଟେଲ ୱାର୍ଡନଙ୍କ କହିବାନୁଯାୟୀ ରୋଜାଲିନ ସନ୍ଧ୍ୟାରୁ କବାଟ ବନ୍ଦ କରି ହଷ୍ଟେଲ ରୁମରେ ଥିଲେ । ରାତି ଖାଇବା ମଧ୍ୟ ଖାଇ ନଥିଲେ କି ବିଳମ୍ବିତ ରାତି ପର୍ଯ୍ୟନ୍ତ ରୁମର କବାଟ ଖୋଲି ନଥିଲେ।ଯାହାଫଳରେ ତାଙ୍କ ସହପାଠୀ ମାନେ  ଅନ୍ୟଏକ ରୁମରେ ରାତିରେ ଶୋଇଥିଲେ। ସକାଳୁ ପ୍ରାର୍ଥନା କରିବାକୁ ନଆସିବାରୁ ହଷ୍ଟେଲ ୱାର୍ଡନ କବାଟ ବାଡେଇ ଥିଲେ । ସେ କବାଟ ନଖୋଲିବାରୁ ଅନ୍ୟ ଛାତ୍ରୀଙ୍କ ଉପସ୍ଥିତିରେ କବାଟ ଭଙ୍ଗାଯିବା ପରେ ଘଟଣା ସାମ୍ନାକୁ ଆସିଥିଲା।

    କଲେଜ ଗୁଡିକରେ ରାଗିଙ୍ଗ ପାଇଁ ଛାତ୍ରଛାତ୍ରୀ ମୃତ୍ୟୁ ଘଟଣା ନୂଆ ନୁହେଁ। ବାରମ୍ବାର ଏଭଳି ଅଭାବନୀୟ ଚିତ୍ର ରାଜ୍ୟର କୋଣ ଅନୁକୋଣରୁ ଆସୁଥିବା ବେଳେ ଏହା ବିରୁଦ୍ଧରେ ଆଖିଦୃଶିଆ ପଦକ୍ଷେପ ନେବା ଜରୁରୀ ହୋଇ ପଡିଛି।

    ହିମାଂଶୁ କୁମାର ପାଢ଼ୀଙ୍କ ରିପୋର୍ଟ

  • ଯୌତୁକ ନିର୍ଯାତନା ସହିନପାରି ଆତ୍ମହତ୍ୟା

    ପୁରୀ: ଯୌତୁକ ନିର୍ଯାତନା ସହିନପାରି ବୋହୂ କଲା  ଆତ୍ମହତ୍ୟା । ପରିବାର ଲୋକେ ଆଣିଲେ ହତ୍ୟାର ଅଭିଯୋଗ । ଏପରି ଏକ ଲଜ୍ଜାଜନକ ଘଟଣା ଘଟିଛି ପୁରୀ ଜିଲ୍ଲା ସାଖିଗୋପାଳ ଥାନା ଅଧୀନ ଗୋକେନ୍ ଗ୍ରାମରେ । ମୃତକ ମହିଳା ଜଣକ ହେଲେ ରଶ୍ମିତା ମଲ୍ଲିକ ।

    ଅଭିଯୋଗ ଅନୁଯାୟୀ, କୁମାର ପଡାର ରଶ୍ନିତା ଗୋକେନ ଗ୍ରାମର ପ୍ରଶାନ୍ତ ମଲ୍ଲିକକୁ ବୈଦିକ ବିବାହ କରିଥିଲେ। ବିବାହର କିଛିଦିନ ଯାଏଁ ସବୁକିଛି ଠିକ ଥିଲା। କିନ୍ତୁ ସମୟ ଗଡିବା ସହ ରଶ୍ମିତାଙ୍କ ଉପରେ ଆରମ୍ଭ ହୋଇଥିଲା ଶଶୁର ଘର ନିର୍ଯାତନା । ବିବାହରେ କାହିଁକି ଜ୍ୱାଇଁକୁ  ସୁନା ଚେନ ଦେଲେନି ଏକଥାକୁ ନେଇ ବାରମ୍ବାର ବୋହୂକୁ ଶୁଣାଉଥିଲେ ବିଭିନ୍ନ କଥା ।

    ଇତି ମଧ୍ୟରେ ରଶ୍ମିତାଙ୍କ ଝିଅଟିଏ ହୋଇଥିଲା । ଝିଅ ହେବା ପରେ ସବୁକିଛି ଠିକ୍ ହେଇଯିବା ଭାବି ରଶ୍ମିତା ଚୁପ ରହିଥିଲେ କିନ୍ତୁ ଏହା ପରେ ମଧ୍ୟ ତାଙ୍କ ନିର୍ଯାତନା କମିନଥିଲା । ଶେଷରେ ନିର୍ଯାତନା ସହିନପାରି ସେ ଦୁଇ ଦିନ ପୂର୍ବରୁ ବିଷ ପିଇ ଆତ୍ମହତ୍ୟା କରିଥିଲେ । ଏହି କଥା ଜାଣି ଶଶୁର ଘର ଲୋକେ ରଶ୍ମିତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରି ରଶ୍ମିତାଙ୍କ ବାପଘରକୁ ଫୋନ ଜରିଆରେ ଜଣାଇଥିଲେ ।

    ଡାକ୍ତରଖାନାରେ ରଶ୍ମିତାଙ୍କ ମୃତ୍ୟୁ ଘଟିଥିବା ବେଳେ ଶାଶୁ ଘର ଲୋକେ ରଶ୍ମିତାଙ୍କ ମୃତଦେହ ଛାଡି ସେଠାରୁ ଚାଲିଯାଇଥିବା କଥା ଅଭିଯୋଗରେ ଉଲ୍ଲେଖ କରାଯାଇଛି । ପରେ ମୃତକଙ୍କ ପରିବାର ଲୋକେ ସେଠାରେ ପହଞ୍ଚି ତାଙ୍କ ଝିଅର ମର ଶରୀର  ନିଜ ଘରକୁ ନେଇଥିଲେ ।

    ଏବିଷୟରେ ପରିବାର ଲୋକେ ପିପିଲି ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ କୌଣସି କାର୍ଯ୍ୟନୁଷ୍ଠାନ ଗ୍ରହଣ କରିନଥିବା କଥା ଜଣା ପଡିଛି । ତେବେ ରଶ୍ମିତାଙ୍କ ଶଶୁର ଘର ପକ୍ଷରୁ ଏପର୍ଯ୍ୟନ୍ତ କିଛି ପ୍ରତିକ୍ରିୟା ମିଳିନାହିଁ ।

  • ଝିଅ ମୃତ୍ୟୁର ଦୁଇ ମାସରେ ବାପା ମାଙ୍କ ଆତ୍ମହତ୍ୟା

    (ବରଗଡ) ବରଗଡ଼ ଜିଲ୍ଲା ଭଟଲି ଥାନା ଭଡିଗାଁରେ ସ୍ୱାମୀ ସ୍ତ୍ରୀଙ୍କ ଆତ୍ମହତ୍ୟା । ଘର ଭିତରୁ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କଲା ପୋଲିସ । ମୃତ ଦମ୍ପତି ହେଲେ ରଘୁ ଭୁଏ ଓ ପ୍ରତିଷ୍ଟା ଭୁଏ । ଗତ ବର୍ଷ ଡିସେମ୍ବରରେ ଏକମାତ୍ର ଝିଅର ମୃତ୍ୟୁ ପରେ ଭାଙ୍ଗି ପଡ଼ିଥିଲେ ବାପା ମା । ଆଜି ଘର ଭିତରୁ ସ୍ୱାମୀ ସ୍ତ୍ରୀଙ୍କ ଝୁଲନ୍ତା ମୃତ ଦେହ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ହସ୍ପିଟାଲକୁ ପଠାଇଛି ଭଟଲି ପୋଲିସ ।

    ଝିଅର ମୃତ୍ୟୁରେ ଚାପଗ୍ରସ୍ତ ହୋଇ ଆତ୍ମହତ୍ୟା କଲେ ବାପା ମା । ଏପରି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି ବରଗଡ ଜିଲ୍ଲା ଭଟଲି ଥାନା ଅନ୍ତର୍ଗତ ଭଡିଗାଁରେ । ମୃତ ଦମ୍ପତି ହେଲେ ଭଡିଗାଁର ରଘୁ ଭୁଏ ଓ ପ୍ରତିଷ୍ଟା ଭୁଏ । ଗତ ବର୍ଷ ଡିସେମ୍ବର 2 ତାରିଖ ଦିନ ମୃତ ଦମ୍ପତିଙ୍କ ଏକମାତ୍ର ଝିଅ ସସ୍ମିତା ଭୂଏକୁ ଗାଁର ଅଜିତ ବରିହା ଟାଙ୍ଗିଆରେ ହାଣି ହତ୍ୟା କରିଥିଲା । ଏକମାତ୍ର ଝିଅକୁ ହରାଇ ମାନସିକ ଓ ଶାରୀରିକ ଭାବେ ଭାଙ୍ଗି ପଡ଼ିଥିଲେ  ସସ୍ମିତାଙ୍କ ମା ବାପା । ଝିଅ ଚାଲି ଯିବାର  ବିରହ ବେଦନା ସହି ନପାରି  ଶେଷରେ ଘର ଭିତରେ ଝୁଲିପଡିଲେ ଦମ୍ପତି । ଏଭଳି ଏକ ହୃଦୟ ବିଦାରକ ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଥିବା ବେଳେ ଗାଁରେ ସୃଷ୍ଟି ହୋଇଛି ଶୋକାକୁଳ ପରିବେଶ ।

    ପ୍ରଥମେ ଝିଅ  ପରେ  ମା ବାପା ଚାଲିଯିବା ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଥିବା ବେଳେ ଜେଲ ଭିତରେ ଥିବା ସସ୍ମିତା ହତ୍ୟା ଘଟଣାର ଅଭିଯୁକ୍ତକୁ କଠୋରରୁ କଠୋର ଦଣ୍ଡବିଧାନ ପାଇଁ ଗ୍ରାମବାସୀ ଦାବି କରିଛନ୍ତି ।

    ପତ୍ନୀ ଓ ଝିଅକୁ ନେଇ ରଘୁଙ୍କ ପରିବାର । ଝିଅ ସସ୍ମିତାର ବାହାଘର ପାଇଁ  ମଧ୍ୟ ପ୍ରସ୍ତୁତ ଥିଲେ ଦମ୍ପତି । ହେଲେ କୌଣସି କାରଣକୁ ନେଇ ସସ୍ମିତାକୁ ଗାଁର ଅଜିତ ବରିହା ଟାଙ୍ଗିଆରେ ହାଣି କରିଥିଲା ହତ୍ୟା । ଝିଅକୁ ହରାଇ ମାନସିକ ଚାପଗ୍ରସ୍ତରେ ଜୀବନ ହାରିଛନ୍ତି ବାପା ମା ।

     ଧୃବ କର୍ମୀଙ୍କ ରିପୋର୍ଟ

  • ଆର୍ଥିକ ଦୁରାବସ୍ଥା: ପୁଅକୁ ମାରି ବାପା ମାଙ୍କ ଆତ୍ମହତ୍ୟା

    ଭଦୋଦରା: ଦୁଇ ଆତ୍ମହତ୍ୟା ଓ ହତ୍ୟା ଘଟଣା । ଏପରି ଏକ ଲୋମଟାଙ୍କୁରା ଦୃଶ୍ୟ ଦେଖିବାକୁ ମଳିଛି ଗୁଜୁରାଟର ଭଦୋଦରା ଠାରେ । ସୋମବାର ଦିନ ଭଦୋଦରାର ଏକ ଭଡାଘରେ  ୩ଟି ମୃତଦେହ ଠାବ ହୋଇଛି । ସ୍ୱାମୀ, ପତ୍ନୀ ଓ ପୁତ୍ରଙ୍କ ମୃତ ଶରୀର ମିଳିଥିଲା। ପ୍ରାଥମିକ ତଦନ୍ତରୁ ଦୁଇଟି ଆତ୍ମହତ୍ୟା ଓ ଗୋଟିଏ ହତ୍ୟା ବୋଲି ଅନୁମାନ କରିଛି ପୋଲିସ ।

    ପାନିଗେଟ୍ ପୋଲିସ ଷ୍ଟେସନର ଇନ୍ସପେକ୍ଟର ଏସ୍ଏ ଗୋହିଲ କହିଛନ୍ତି, ସ୍ୱାମୀଙ୍କ ମୃତଦେହ ପଙ୍ଖାରେ ଝୁଲିଥିଲାବେଳେ , ପତ୍ନୀ ସ୍ନେହାଲ(32) ଓ ସାତ ବର୍ଷର ପୁଅର ମୃତଦେହ ଯଥାକ୍ରମେ ଫ୍ଲୋର ଏବଂ ବେଡରୁ ମଳିଥିଲା ।

    କାନ୍ଥରେ ଥିବା ଏକ ଲେଖାରୁ ଜଣାପଡିଛି ଯେ ଆତ୍ମହତ୍ୟା କରିଥିବା ପରିବାରର ମାଲିକ ପ୍ରୀତେଶ ଆର୍ଥିକ ସମସ୍ୟାର ସମ୍ମୁଖୀନ ହୋଇ ବ୍ୟାଙ୍କ ଏବଂ ଅଣବ୍ୟାଙ୍କିଙ୍ଗ୍ ଆର୍ଥିକ କମ୍ପାନୀରୁ ଲୋନ୍ ନେଇଥିଲେ । ଯାହା ସେ ପରିଶୋଧ କରିବାରେ ଅସମର୍ଥ ଥିଲେ । ଫଳସ୍ୱରୁପ ଏପରି ଚରମ ପଦକ୍ଷେପ ନେବାକୁ ସେ ବାଧ୍ୟ ହୋଇଥିଲେ ବୋଲି କାନ୍ଥରେ ଥିବା ଲେଖାରୁ ଜଣାପଡିଛି ।

    ପ୍ରାଥମିକ ତଦନ୍ତରୁ ଏହା ଜଣାପଡିଛି ଯେ, ପ୍ରଥମେ ପୁରୁଷ ଓ ମହିଳା ମିଶି ତାଙ୍କ ପୁଅକୁ ହତ୍ୟା କରିଥିଲେ ଓ ପରେ ଉଭୟ ଆତ୍ମହତ୍ୟା କରିଥିଲେ । ମହିଳାଙ୍କ ବେକରେ ରଶିର ଚିହ୍ନ ଥିବାରୁ ସେ ମଧ୍ୟ ଫାଶି ଦେଇଥିବା ଜଣାପଡିଛି । ତେବେ ପୋଷ୍ଟମୋର୍ଟମ ରିପୋର୍ଟ ମିଳିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଗୋହିଲ କହିଛନ୍ତି ।

     ଡେପୁଟି କମିଶନର ପୋଲିସ ୟସପାଲ ଯଗନିଆ ସକାଳେ ସାମ୍ବାଦିକମାନଙ୍କୁ ସୂଚନା ଦେଇଥିଲେ କି, ପ୍ରୀତେଶ କେଉଁ କମ୍ପାନୀରୁ କେତେ ଲୋନ୍ ନେଇଥିଲେ ତାହା ତଦନ୍ତ କରାଯିବ। ସେ ଆହୁରି କହିଛନ୍ତି ଯେ, ସକାଳେ ଏ ସମ୍ପର୍କରେ ପୋଲିସକୁ ସୂଚନା ମିଳିଥିଲା । ପୋଷ୍ଟମୋର୍ଟମ ପରେ ମୃତ୍ୟୁର ପ୍ରକୃତ ସମୟ ଜଣାପଡିବ । ସେ ଆହୁରି ମଧ୍ୟ କହିଛନ୍ତି ଫରେନସିକ୍ ସାଇନ୍ସ ଲାବରୋଟେରୀ (ଏଫ ସି ଏଲ) ର ସହାୟତାରେ ସେମାନଙ୍କ ମୋବାଇଲ ଯାଞ୍ଚ କରାଯାଇ ଅଧିକ ତଥ୍ୟ ହାସଲ କରାଯିବ ବୋଲି ସୂଚନା ଦେଇଛନ୍ତି ଡିସିପି।

  • ଦେଶରେ ଆତ୍ମହତ୍ୟା ସଂଖ୍ୟାରେ ୧୮ ପ୍ରତିଶତ ବୃଦ୍ଧି

    ନୂଆଦିଲ୍ଲୀ: ଭାରତରେ ଆତ୍ମହତ୍ୟା ସଂଖ୍ୟା ୨୦୧୯ରୁ ୨୦୨୧ ମଧ୍ୟରେ ବୃଦ୍ଧି ଘଟିଛି। ଲୋକସଭାରେ ଶ୍ରମ ଓ ରୋଜଗାର ମନ୍ତ୍ରୀ ରାମେଶ୍ବର ତେଲି ଦେଶରେ ବୃଦ୍ଧିପାଇଥିବା ଆତ୍ମହତ୍ୟାର ବର୍ଦ୍ଧିତ ସଂଖ୍ୟା ଉପସ୍ଥାପନ କରି କହିଛନ୍ତି କି,  ଦେଶରେ ୨୦୧୯ ତୁଳନାରେ ୨୦୨୧ରେ ସୁଇସାଇଡ ମାମଲାରେ ୧୮ ପ୍ରତିଶତ  ବୃଦ୍ଧି ଘଟିଛି।

    ରାଜ୍ୟସଭାରେ ସୋମବାର ଦିନ ବିରୋଧୀ ସାଂସଦ ଯୁବ ଓ କୃଷକ ଆତ୍ମହତ୍ୟାର ପ୍ରସଙ୍ଗ ଉଠାଇ ସରକାରକୁ ହସ୍ତକ୍ଷେପ କରିବାକୁ ଦାବି କରିଥିଲେ। ଲୋକସାରେ ସାଂସଦ ଡା ଟି ଆର ପରିଭେନ୍ଦର କହିଛନ୍ତି କି,  ଦେଶରେ ଆତ୍ମହତ୍ୟା କରୁଥିବା ଲୋକଙ୍‌କ ସଂଖ୍ୟା ବୃଦ୍ଧି ପାଇ ଚାଲିଥିବାରୁ ଏହା ଚିନ୍ତାର କାରଣ ହୋଇଛି।

    ସାଂସଦଙ୍କ ପ୍ରଶ୍ନର ଉତ୍ତରରେ ମନ୍ତ୍ରୀ ଏନସିଆରବିର ସଂଖ୍ୟା ଉପସ୍ଥାପନ କରି କହିଛନ୍ତି କି, ୨୦୧୯ରେ ଦେଶରେ ମୋଟ ୧,୩୯, ୧୨୩ ଆତ୍ମହତ୍ୟା କରିଥିଲେ।  ସେହିପରି ୨୦୨୦ରେ ଦେଶରେ ଆତ୍ମହତ୍ୟା ସଂଖ୍ୟା ବୃଦ୍ଧି ପାଇ ୧,୫୩, ୦୫୨ ହୋଇଥିଲା  ଓ ଏହି ସଂଖ୍ୟା ୨୦୨୧ରେ ୧,୬୪,୦୩୩ ହୋଇଥିଲା।

    ସେ ଆହୁରି କହିଛନ୍ତି କି, ୨୦୨୧ରେ ୨୨,୨୦୭ ନମ୍ବର ସହ ମହାରାଷ୍ଟ୍ରରେ ସବୁଠାରୁ ଅଧିକ ଆତ୍ମହତ୍ୟା ମାମଲା ରେକର୍ଡ କରାଯାଇଥିଲା। ମୁଖ୍ୟତଃ ରୋଜଗାର ଏହି ଆତ୍ମହତ୍ୟା ବୃଦ୍ଧିର କାରଣ ହୋଇଥିବାରୁ ସରକାର ସରକାରୀ ଯୋଜନା ମାଧ୍ୟମରେ ରୋଜଗାର ଯୋଗାଇ ଦେବାକୁ ପ୍ରୟାସ କରିଛନ୍ତି।

    ରାଜ୍ୟସଭାରେ ଆପ ସାଂସଦ ସନ୍ତ ବଲବୀର ସିଂହ କୃଷକ ଓ ଜମିହୀନ ଶ୍ରମିକଙ୍କ ବର୍ଦ୍ଧିତ ଆର୍ଥିକ ସଂକଟକୁ ଉଠାଇଥିଲେ। ସେ କହିଥିଲେ ଆର୍ଥିକ ସଂକଟ କାରଣରୁ ଏହି ଦୁଇ ଶ୍ରେଣୀରେ ଆତ୍ମହତ୍ୟା ବଢୁଛି। ସରକାରଙ୍କୁ ପୀଡିତ କୃଷକଙ୍କୁ କ୍ଷତିପୂଣ ଦେବାର ଆବଶ୍ୟକତା ରହିଛି।

  • ମମିତା ମେହେର ହତ୍ୟା ଘଟଣା: ଗୋବିନ୍ଦର ଆତ୍ମହତ୍ୟା

    ବଲାଙ୍ଗିର: ବହୁ ଚର୍ଚ୍ଚିତ ମମିତା ମେହେର ହତ୍ୟାର ମୁଖ୍ୟ  ଅଭିଯୁକ୍ତ ଗୋବିନ୍ଦ ସାହୁର ଆତ୍ମହତ୍ୟା। ମଙ୍ଗଳବାର ସକାଳେ ସେ ବଲାଙ୍ଗିର ଜିଲ୍ଲା ଅନ୍ତର୍ଗତ କଣ୍ଟାବାଂଜୀ ଜେଲ୍ ପରିସରରେ ଥିବା ଏକ ଗଛରେ ଫାଶି ଦେଇ ଆତ୍ମହତ୍ୟା ଉଦ୍ୟମ କରିଥିଲବା ବେଳେ ଜେଲ କର୍ତ୍ତୃପକ୍ଷ ତାକୁ ଉଦ୍ଧାର କରି ମେଡିକାଲ ନେଇଥିଲେ। କିନ୍ତୁ ସେଠାରେ ଡାକ୍ତର ମୃତ ଘୋଷଣା କରିଥିଲେ

    ମଙ୍ଗଳବାର ଗୋବିନ୍ଦକୁ  କୋର୍ଟରେ ହାଜର ହେବାର ଥିଲା। ଗୋବିନ୍ଦ ଆବେଦନ କରିଥିବା ଜାମିନ୍ ଆବେଦନ କୋର୍ଟରେ ଖାରଜ ହୋଇଯାଇଥିଲା। ମାମଲାରେ ପ୍ରାୟ ସମସ୍ତ ପକ୍ଷର ସାକ୍ଷ୍ୟ ସରିଛି। ମମିତାଙ୍କ ପରିବାର ଲୋକେ ମଧ୍ୟ ସାକ୍ଷ୍ୟ ଦେଇସାରିଛନ୍ତି। କୋର୍ଟରେ ହାଜର ପୂର୍ବରୁ ସକାଳୁ ସକାଳୁ ଗୋବିନ୍ଦ ଆତ୍ମହତ୍ୟା କରିଛି।

    ତେବେ ଗୋବିନ୍ଦ ଆତ୍ମହତ୍ୟା କରିନାହିଁ ତାକୁ ହତ୍ୟା କରାଯାଇଥିବା ଅଭିଯୋଗ ଆଣିଛି ବିଜେପି। ବିଜେପି ମହିଳା ମୋର୍ଚ୍ଚା ସଭାପତି ସ୍ମୃତି ପଟ୍ଟନାୟକ ଆଜି ରାଜ୍ୟ ବିଜେପି କାର୍ଯ୍ୟାଳୟରେ ପ୍ରେସ୍ ମିଟ୍ କରି ଏହି ଅଭିଯୋଗ କରିଛନ୍ତି। ମମିତା ମେହେର ହତ୍ୟା ମାମଲା ଓ ଗୋବିନ୍ଦ ସାହୁ ମୃତ୍ୟୁ ମାମଲାର ତଦନ୍ତ କରାଯାଇ ଉପଯୁକ୍ତ କାର୍ଯ୍ୟାନୁଷ୍ଠାନ ହେଉ ବୋଲି ସେ ଦାବି କରିଛନ୍ତି।

    ଶିକ୍ଷୟିତ୍ରୀ ମମିତା ମେହେରଙ୍କୁ ଗତବର୍ଷ ଅକ୍ଟୋବର ୮ତାରିଖରେ ହତ୍ୟା କରାଯାଇଥିଲା। ଏହହି ହତ୍ୟା ଘଟଣା ସେହି ସମୟରେ ହଇଚଇ ସୃଷ୍ଟି କରିଥିଲା ସାରା ରାଜ୍ୟରେ। ମାମଲାରେ ତତ୍କାଳୀନ ଗୃହରାଷ୍ଟ୍ରମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତିକୁ ନେଇ ବିରୋଧୀ ସରକାରକୁ ଘେରିଥିଲେ। ଦିବ୍ୟଶଙ୍କରଙ୍କୁ ମନ୍ତ୍ରୀମଣ୍ଡଳରୁ ବହିଷ୍କାର କରିବା ସହ ତାଙ୍କୁ ଗିରଫ କରିବାକୁ ଦାବି ହୋଇଥିଲା।

  • ଅଭିନେତ୍ରୀ ବୈଶୀଳୀ ଠାକ୍କରେ ଆତ୍ମହତ୍ୟା ଘଟଣା

    ଆରପାରିରେ ଲୋକପ୍ରିୟ ଟିଭି ସିରିଏଲ୍ ଅଭିନେତ୍ରୀ ବୈଶାଳୀ ଠାକ୍କରେ। ଇନ୍ଦୋର ସ୍ଥିତ ସାଇ ବାଗ୍ ଫ୍ଲାଟରୁ ବୈଶାଳୀଙ୍କ ମୃତ ଦେହ ଉଦ୍ଧାର କରିଛି ପୋଲିସ। ବେକରେ ରଶି ଲଗାଇ ଆତ୍ମହତ୍ୟା କରିଥିବା ପୋଲସି ସୂଚନା ଦେଇଛି। ତାଙ୍କର ଏଭଳି ମୃତ୍ୟୁ ଖବର ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଛି। ତେବେ ୩୦ ବର୍ଷ ବୟସରେ ତାଙ୍କର ମୃତ୍ୟୁ ଘଟିଛି। ତେବେ ଆତ୍ମହତ୍ୟା କରିବା ପଛର ରହସ୍ୟ କଣ ରହିଛି ତାକୁ ନେଇ ପୋଲିସ ତଦନ୍ତ ଜାରି ରଖିଛି। ତେବେ କେଉଁ କାରଣରୁ ବୈଶାଳୀ ବେକରେ ଫାସି ଦେଇ ଆତ୍ମହତ୍ୟା କରିଛନ୍ତି ତାହା ଏବେ ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି।

    ଏନେଇ ପୋଲିସ ଛାନଭିନ ଜାରି ରଖିଥିବା ବେଳେ ପୋଲିସ ହାତରେ ଏକ ପ୍ରମାଣ ଲାଗିଛି। ଯାହାକୁ ନେଇ ଆତ୍ମହତ୍ୟାର ଗୁମର ଖୋଲୁଛି। ବୈଶାଳୀର ଡାଇରୀ ପୋଲିସ ହାତରେ ହସ୍ତକ୍ଷେପ ହୋଇଛି। ଯେଉଁଥିରେ ଏକ ସୁଇଶାଇଡ୍ ନୋଟ୍ ଲେଖା ହୋଇଛି। ଏହି ନୋଟରେ ଜଣେ ବ୍ୟକ୍ତିଙ୍କ ନାଁ ଉଲ୍ଲେଖ ହୋଇଛି। ଯିଏ କି ବୈଶାଳୀଙ୍କୁ ଆତ୍ମହତ୍ୟା କରିବା ପାଇଁ ପ୍ରବର୍ତ୍ତାଇ ଥିଲେ।

    ବୈଶାଳୀ ଠାକ୍କରେଙ୍କ ସୁସାଇଡ୍ ନୋଟରେ ରାହୁଲ ନାମକ ଜଣେ ବ୍ୟକ୍ତିଙ୍କ ନାଁ ରହିଛି। ରାହୁଲ ବୈଶାଳୀଙ୍କୁ ମାନସୀକ ଏବଂ ଶାରୀରିକ ଭାବେ ନିର୍ଯାତନା ଦେଉଥିବା ନୋଟରେ ଉଲ୍ଲେଖ ରହିଛି। ଏବଂ ଏହି ନୋଟରେ ବୈଶାଳୀ ତାଙ୍କ ମା ବାପାଙ୍କୁ କ୍ଷମା ମାଗିବା ସହ ମୁଁ ଜଣେ ଭଲ ଝିଅ ହୋଇପାରିଲି ନାହିଁ ବୋଲି ଲେଖା ହୋଇଛି। ଡାଇରୀରେ ରାହୁଲ ଓ ଦିଶା ନାମକ ଜଣେ ମହିଳାଙ୍କ ନାମ ମଧ୍ୟ ଉଲ୍ଲେଖ ରହିଛି। ପୋଲିସ ସୂଚନା ଅନୁଯାୟୀ, ଡାଇରୀରେ ଯାହା ସବୁ ଲେଖା ହୋଇଛି ସେଥିରୁ ଜାଣିବାକୁ ମିଳିଛି ଯେ, ବୈଶାଳୀ ମାନସୀକ ଚାପରେ ରହିଥିଲେ। ତାଙ୍କୁ ଗତ କିଛି ମାସ ହେବ ମଧ୍ୟ କାମ ମିଳୁନଥିଲା। ଆତ୍ମହତ୍ୟାର ଠୋସ୍ ପ୍ରମାଣ ପୋଲିସକୁ ଏଯାଏଁ ମିଳିନାହିଁ। ଏନେଇ ପୋଲିସ ପକ୍ଷରୁ ତଦନ୍ତ ଜାରି ରହିଛି।

  • ‘ଆତ୍ମହତ୍ୟା’ ସମାଧାନ ନୁହେଁ

    ସ୍ୱତନ୍ତ୍ର ରିପୋର୍ଟ: ସୁପ୍ରିୟା ଦାଶ

     () ସଦ୍ୟ ପ୍ରକାଶିତ ଏନସିଆରବି ରିପୋର୍ଟ କହୁଛି, ଦେଶରେ ୨୦୨୧ରେ ବଢିଛି ଆତ୍ମହତ୍ୟା। ବର୍ଷକ ମଧ୍ୟରେ ୧ଲକ୍ଷ ୬୪ ହଜାର ୩୩ ଜଣ ଆତ୍ମହତ୍ୟା କରିଛନ୍ତି । ତାର ଅର୍ଥ ଦିନକୁ ୪୫୦ ଜଣ ଏବଂ ପ୍ରତି ଘଣ୍ଟାରେ ୧୮ ଜଣ ଦେଶରେ ଆତ୍ମହତ୍ୟା କରିଛନ୍ତି । ସରକାରୀ ତଥ୍ୟ ଅନୁସାରେ ଏହା ପୂର୍ବର ସବୁ ରେକର୍ଡକୁ ଭାଙ୍ଗିଛି ଯାହା କେଉଁ ମାନସିକ ସ୍ଥିତିରେ ଲୋକମାନେ ଅଛନ୍ତି ତାହାର ସୂଚନା ଦେଇଛି । ସେ ମଧ୍ୟରେ ୧ଲକ୍ଷ ୧୯ ହଜାର ପୁରୁଷ, ୪୫ହଜାର୨୬ ମହିଳା ଏବଂ ୨୮ ଟ୍ରାନ୍ସଜେଣ୍ଡର ଅଛନ୍ତି । ତେବେ ୨୦୨୦ରେ ୧ଲକ୍ଷ ୫୩ହଜାର, ୨୦୧୯ରେ ୧ ଲକ୍ଷ ୩୯ ହଜାର, ୨୦୧୮ ରେ ୧ଲକ୍ଷ ୩୪ ହଜାର, ୨୦୧୭ରେ ୧ଲକ୍ଷ ୨୯ ହଜାର ଆତ୍ମହତ୍ୟା ମୃତ୍ୟୁ ହୋଇଥିଲା । ୧୯୬୭ ପରଠାରୁ ଏହି ଆତ୍ମହତ୍ୟା ପରିସଂଖ୍ୟାନର ତଥ୍ୟ ସାମ୍ନାକୁ ଅଣାଯାଉଛି । ସେହି ବର୍ଷ ୩୮ହଜାର ୮୨୯ ଜଣ ଦେଶରେ ଆତ୍ମହତ୍ୟା କରିଥିଲେ । ୧୯୮୪ ପରେ ପ୍ରଥମ କରି ୫୦ ହଜାର ଟପିଥିଲା ଏବଂ ୧୯୯୧ ପରେ ୭୫ହଜାର ପାର କରିଥିଲା ଆତ୍ମହତ୍ୟା ସଂଖ୍ୟା । ୧୯୯୮ ପରେ ୧ଲକ୍ଷ ଟପିଥିଲା ଆତ୍ମହତ୍ୟା କରିଥିବା ଲୋକଙ୍କ ସଂଖ୍ୟା ।

    () ତେବେ ଆତ୍ମହତ୍ୟାର ବହୁ କାରଣ ମଧ୍ୟରୁ ପାରିବାରିକ କଳହ, ଅସୁସ୍ଥତା, ବୃତ୍ତି ଓ ପେସାଗତ ସମସ୍ୟା, ମାନସିକ ରୋଗ, ନିଶା ସେବନ, ଆର୍ଥୀକ ଦୁଃସ୍ଥିତି ମୂଳତଃ ଚିନ୍ତାଜନକ ହୋଇଛି । ଯାହା ସମୟ ସହ ବିଭିନ୍ନ ବର୍ଗର ଲୋକଙ୍କୁ ଆହୁରି ପ୍ରଭାବିତ କରୁଛି । ଏନସିଆରବି ତଥ୍ୟ କହୁଛି, ଦେଶରେ ୨୦୨୦ ତୁଳନାରେ ୨୦୨୧ରେ ୭.୨% ଆତ୍ମହତ୍ୟା ବଢିଛି । ସେ ଦୃଷ୍ଟିରୁ ଓଡ଼ିଶାର ସ୍ଥିତି ଉଦବେଗଜନକ ରହିଛି । ଜାତୀୟ ସ୍ତରରେ ଏକ ଲକ୍ଷ ଜନ ସଂଖ୍ୟାରେ ୧୨ଜଣ ଆତ୍ମହତ୍ୟା କରୁଥିବା ବେଳେ ଆମ ରାଜ୍ୟରେ ଦିନକୁ ୧୫ ଜଣ ଭିନ୍ନ ଭିନ୍ନ କାରଣରେ ଆତ୍ମହତ୍ୟା କରୁଛନ୍ତି। କରୋନା ପରବର୍ତ୍ତୀ ଆର୍ଥୀକ ଦୁଃସ୍ଥିତି ଓ ନିଯୁକ୍ତି କ୍ଷେତ୍ର ସଙ୍କୁଚିତ ହୋଇଥିବା ବେଳେ ଦିନ ମଜୁରିଆଙ୍କ ଆତ୍ମହତ୍ୟା ସର୍ବାଧିକ ୨୫.୬% ଓ ଆତ୍ମ ନିଯୁକ୍ତି ଧାରୀଙ୍କ ୧୨.୩% ଆତ୍ମହତ୍ୟା ରିପୋର୍ଟ ପ୍ରସଙ୍ଗର ଗମ୍ଭୀରତା ଦର୍ଶାଇଛି । ବର୍ଷକରେ ୪୨ ହଜାର୪ ଜଣ ଦିନ ମଜୁରିଆ ଆତ୍ମହତ୍ୟା କରିଥିବା କୁହାଯାଉଛି । ଏପରିକି ପାରିବାରିକ ସମସ୍ୟା ରେ ଆତ୍ମହତ୍ୟା କରିବା ତାଲିକାରେ ଓଡ଼ିଶାର ସ୍ଥିତି ଗମ୍ଭୀର । ସରକାରୀ ହିସାବରେ ୨୦୨୧ରେ ଓଡ଼ିଶାରେ ମୋଟ ଆତ୍ମହତ୍ୟା ସଂଖ୍ୟା ୫ହଜାର ୬୫୧ ଯାହା ପୂର୍ବ ବର୍ଷ ତୁଳନାରେ ୨% ଅଧିକ । ଆତ୍ମହତ୍ୟା କରିଥିବା ଲୋକଙ୍କ ମଧ୍ୟରୁ ୪ହଜାର୪୧୨ ଜଣ ପୁରୁଷ ଓ ୧ହଜାର ୨୩୯ ମହିଳା ଅଛନ୍ତି । ତେବେ ବାସ୍ତବ ସଂଖ୍ୟା ଢେର ଅଧିକ ହେବ ବୋଲି ବିଶେଷଜ୍ଞ ମତ ଦିଅନ୍ତି । ବିଭିନ୍ନ ଆତ୍ମହତ୍ୟା କାରଣର ବର୍ଗୀକରଣ ମଧ୍ୟ ଭ୍ରମାତ୍ମକ ବୋଲି କୁହାଯାଉଛି । ରାଜ୍ୟମାନେ ସଂଖ୍ୟା ଲୁଚାଇଲେ ଓ ଆତ୍ମହତ୍ୟାର କାରଣ ଲୁଚାଇଲେ ଏନସିଆରବି ରିପୋର୍ଟ ବାସ୍ତବତା ଠାରୁ ଦୂରେଇ ଯିବ ବୋଲି ଅଭିଯୋଗ ହୁଏ ।

    () ଅନ୍ୟପଟେ ଆଜି ମଧ୍ୟ ଆତ୍ମହତ୍ୟାକୁ ମାନସିକ ସ୍ୱାସ୍ଥ୍ୟର ଚରମ ପରିଣତି ବୋଲି ସ୍ୱୀକାର କରାଯାଇନି । ତେଣୁ ସମାଜ ଆତ୍ମହତ୍ୟା କରୁଥିବା ଲୋକକୁ ଭିନ୍ନ ଦୃଷ୍ଟିରେ ଦେଖେ । ତାର ମୃତ୍ୟୁ ପରେ ମଧ୍ୟ ଘର ପରିବାର ସେ ଅପବାଦକୁ ସହେ । ତେଣୁ ଅନେକ ସମୟରେ ଆତ୍ମହତ୍ୟା ମୃତ୍ୟୁର ସଠିକ୍ ରିପୋର୍ଟିଂ ମଧ୍ୟ ହୁଏନାହିଁ । ପରିବାର ଲୋକ ଆତ୍ମହତ୍ୟାକୁ ଲୁଚାଇବାର ଉଦ୍ୟମ କରନ୍ତି । ପରିଜନର ମୃତ୍ୟୁର ଦୁଃଖ ସହ ପୁଲିସର ତନାଘନା, କୋର୍ଟ କଚେରୀର ଝାମେଲା ପରିବାର ଲୋକଙ୍କୁ ବ୍ୟତିବ୍ୟସ୍ତ କରେ । ଅନ୍ୟପଟେ ଯେଉଁ ବୟସର ଲୋକ ଆତ୍ମହତ୍ୟା ଅଧିକ କରୁଛନ୍ତି ସେଠି ଜୀବିକା ଓ ପ୍ରେମ ସମ୍ପର୍କରେ ବିଫଳତା ମୂଳ କାରଣ ହେଉଛି । ବିଫଳତାକୁ ଗ୍ରହଣ କରିବାର ମାନସିକ ବଳର ଅଭାବ ତା ସାଙ୍ଗକୁ ସାଙ୍ଗସାଥୀ କ’ଣ କହିବେ ଓ ନିଶାର ପ୍ରଭାବ ଅନେକ ସମୟରେ ଆତ୍ମହତ୍ୟା ଭଳି ଚରମ ରାସ୍ତା ବାଛିବାକୁ ପ୍ରରୋଚିତ କରୁଛି ।

    () ଅନେକ ସମୟରେ ପରିବାରର ସଦସ୍ୟ ଯଦି କୌଣସି ମାନସିକ ଚାପ ଭିତରେ ରହୁଛି କି ତାର ବ୍ୟବହାରରେ କୌଣସି ପରିବର୍ତ୍ତନ ଦେଖା ଦେଉଛି ସେଠି ତୁରନ୍ତ ଅନ୍ୟମାନେ ଯେଉଁ ପଦକ୍ଷେପ ନେବା କଥା ତାହା କରାଯାଉନି । ଆଲୋଚନା କରି ମନ କଥା ଜାଣିବା । ଆବଶ୍ୟକସ୍ଥଳେ ମନସ୍ତତ୍ତ୍ୱବିତ୍ କିମ୍ୱା ମାନସିକ ରୋଗ ବିଶେଷଜ୍ଞଙ୍କ ସାହାଯ୍ୟ ନେବାରେ କୁଣ୍ଠା ହିଁ ପରିସ୍ଥିତିକୁ ବେଶୀ ଉଦବେଗଜନକ କରିଛି । ତା ସହ ସରକାରୀ ସ୍ତରରେ ମଧ୍ୟ ଆତ୍ମହତ୍ୟା ପ୍ରବଣତାର ହାର ବୃଦ୍ଧିକୁ ଗୁରୁତ୍ୱ ଦେଇ ବିଶେଷ ଉଦ୍ୟମ କରିବା ଆବଶ୍ୟକ । ବିଦେଶରେ ଯେଉଁ ଭଳି ହଟଲାଇନ୍ ନମ୍ୱର ମାନସିକ ଅସୁସ୍ଥତା ପାଇଁ ଅଛି ସେଭଳି ଜାରି ହେବା ଆବଶ୍ୟକ । ଯେହେତୁ ମନସ୍ତତ୍ତ୍ୱବିତ୍, କ୍ଲିନିକାଲ ସାଇକୋଲୋଜିଷ୍ଟ ଓ ମାନସିକ ରୋଗ ବିଶେଷଜ୍ଞଙ୍କ ସଂଖ୍ୟା ଆମ ଦେଶରେ ପର୍ଯ୍ୟାପ୍ତ ନୁହେଁ ତେଣୁ ପ୍ରତ୍ୟେକ ଲୋକଙ୍କୁ ସଚେତନ କରି ଆତ୍ମହତ୍ୟା ପ୍ରବଣତାର କାରଣ,ଲକ୍ଷଣ ଓ ନୀରାକରଣ ସମ୍ପର୍କରେ ସୂଚନା ଦେବା ଆବଶ୍ୟକ । ଦିନକୁ ଦିନ ଏ ଆହ୍ୱାନ ବଢୁଥିବା ବେଳେ ସବୁ ବୟସ ଓ ବର୍ଗ ମାନସିକ ଅସୁସ୍ଥତା ଭିତରେ ରହୁଛନ୍ତି । ନିଜ ନିଜ ସ୍ତରରେ ସଫଳ ବା ବିଫଳ ଲୋକ ସମସ୍ତେ ଏ ଚରମ ନିଷ୍ପତ୍ତି ନେଉଛନ୍ତି । ତେଣୁ ପରିବାର,ଗୋଷ୍ଠୀ, ସମାଜ ସମସ୍ତେ ଏଭଳି ଅପମୃତ୍ୟୁକୁ ରୋକିବା ଦିଗରେ ନିଜ ଦାୟିତ୍ୱ ତୁଲାଇବା ଉଚିତ ।

Back to top button