କେନ୍ଦୁଝର: କେନ୍ଦୁଝର ବନ ଖଣ୍ଡରେ ନିଆଁ ଲେଭେଇବାକୁ ନିୟୋଜିତ ହେଲେ ୧୫୦ ନିଆଁ ଲିଭା ସ୍କ୍ବାର୍ଡ। ଦୁଇଶହ ସ୍ୱୟଂ ସହାୟକ ଗ୍ରୁପ ଓ ୧୬୦ ଟି ପାଲା, ଦାଶକାଠିଆ ଓ ସଂକିର୍ତନ ଦଳ ନିଆଁ ଲିଭା କାର୍ଯ୍ୟରେ ହୋଇଛନ୍ତି ସାମିଲ।
ବିଭିନ୍ନ କାରଣରୁ ଜଙ୍ଗଲରେ ଲାଗୁଛି ନିଆଁ । କେତେବେଳେ ପୋଡୁ ଚାଷ ପାଇଁ ତ ଆଉ କେତେବେଳେ ମହୁଲ ଓ କେନ୍ଦୁ ଗୋଟେଇବା ପାଇଁ ଜଙ୍ଗଲରେ ନିଆଁ ଲଗା ଯାଉଛି । ଫଳରେ ଅନେକ ସମୟରେ ନିରୀହ ପ୍ରାଣୀଙ୍କ ଜୀବନ ନଷ୍ଟ ହେଉଛି । ବହୁ ମୂଲ୍ୟବାନ ଔଷଧୀୟ ଗଛ ସବୁ ପୋଡି ଯାଉଛି । ଏବେ ଏସବୁ ଉପରେ ରୋକ ଲଗେଇବା ପାଇଁ ବନ ବିଭାଗ ଅଣ୍ଟା ଭିଡ଼ିଛି । କେନ୍ଦୁଝର ବନଖଣ୍ଡ ଅଧୀନରେ ଥିବା ୭ଟି ରେଞ୍ଜରେ ୨୦୦ ସ୍ୱୟଂ ସହାୟକ ଗ୍ରୁପକୁ ନିଆଁ ଲିଭା କାର୍ଯ୍ୟରେ ନିୟୋଜିତ କରିବା ସହ ସେମାନଙ୍କୁ ସ୍ୱାବଲମ୍ବୀ କରାଯାଇ ପାରିଛି ।
ନିଆଁକୁ ଆୟତ୍ତ କରିବା ପାଇଁ ୧୫୦ ଜଣ ବନ କର୍ମଚାରୀଙ୍କ ସହ ୧୫୭ ଟି ନିଆଁ ଲିଭେଇବା ଯନ୍ତ୍ର, ୧୨୦୦ ରୁ ଅଧିକ କିଲୋମିଟର ନିଆଁ ନ ଲାଗିବା ରାସ୍ତା ପ୍ରସ୍ତୁତ କରାଯାଇଛି l ବିଭିନ୍ନ ଗାଁରେ ଲୋକଙ୍କୁ ସଚେତନ କରିବା ପାଇଁ ୧୬୦ ଟି ଦାସକାଠିଆ, ଝୁମର, ପାଲା ଭଳି ସାଂସ୍କୃତିକ ଦଳକୁ ନିୟୋଜନ କରାଯାଇଛି। ସ୍ୱୟଂ ସହାୟକ ମହିଳା ମାନେ ନିଆଁ ଲିଭା କାମରେ ସାମିଲ ହେବା ପରେ ନିଆଁକୁ ଖୁବଶୀଘ୍ର ଆୟତ୍ତ କରାଯାଇ ପାରୁଥିବା ଦେଖିବାକୁ ମିଳୁଛି ।
ଜଙ୍ଗଲରେ ନିଆଁ ନ ଲଗେଇବାକୁ ଜନସାଧାରଣଙ୍କୁ ଡିଏଫଓ ଅନୁରୋଧ କରିବା ସହ ଏକ ଟୋଲ ଫ୍ରି ନମ୍ୱର 6370592099 ଓ ନିଜର ଅଫିସ ମୋବାଇଲ ନମ୍ୱର 9437055315 ନମ୍ବରରେ ନିଆଁ ସମ୍ପର୍କୀୟ ତଥ୍ୟ ଦେବାକୁ ଅନୁରୋଧ କରିଛନ୍ତି l ତେବେ କେନ୍ଦୁଝର ଜିଲ୍ଲାରେ ନିଆଁ ଲିଭେଇବା ପାଇଁ DFOଙ୍କ ପଦକ୍ଷେପ ନିଶ୍ଚିତ ଭାବରେ ଅନ୍ୟ ଜିଲ୍ଲା ପାଇଁ ଉଦାହରଣ ସୃଷ୍ଟି କରୁଥିବାବେଳେ ସ୍ୱୟଂ ସହାୟକ ଗୋଷ୍ଠିର ମହିଳାଙ୍କ ପଦକ୍ଷେପ ଶତପ୍ରତିଶତ ଜଙ୍ଗଲ ନିଆଁ କୁ କାବୁ କରିବାରେ ସମର୍ଥ ହୋଇ ପାରିଛି ।
ପାର୍ଥ ମିଶ୍ରଙ୍କ ରିପୋର୍ଟ
Naxatra News is now on Whatsapp
Join and get latest news update delivered to you via whatsapp
Join Now