ମୁଁ କମେଡି ଫିଲ୍ମକୁ ଘୃଣା କରେ”: ପ୍ରିୟଦର୍ଶନ

ମୁମ୍ବାଇ: କମେଡି ଫିଲ୍ମ ପାଇଁ ବେଶ୍‌ ଲୋକପ୍ରିୟ ନିର୍ଦ୍ଦେଶକ ପ୍ରିୟଦର୍ଶନଙ୍କ ଏକ ବୟାନ ଏବେ ଚର୍ଚ୍ଚାରେ। ‘ହେରା ଫେରି’, ‘ହଲଚଲ’ ଓ ‘ଭୁଲ ଭୁଲେୟା’ ଭଳି ସୁପରହିଟ୍ କମେଡି ଫିଲ୍ମ ଦେଇଥିବା ପ୍ରିୟଦର୍ଶନ କହିଛନ୍ତି ଯେ, ସେ କମେଡି ଫିଲ୍ମର ଶୁଟିଂ କରିବାକୁ ପସନ୍ଦ କରନ୍ତି ନାହିଁ। ତାଙ୍କ ଆଗାମୀ ଫିଲ୍ମ ‘ହେୱାନ’ର ପ୍ରେସ୍‌ ମିଟ୍‌ରେ ନିଜ କ୍ୟାରିୟର ଓ କମେଡି ଫିଲ୍ମ ସମ୍ପର୍କରେ ଖୋଲାଖୋଲି ମତ ରଖିଛନ୍ତି ପ୍ରିୟଦର୍ଶନ। ତାଙ୍କ କହିବା ଅନୁସାରେ, ‘ହେରା ଫେରି’ର ସଫଳତା ପରେ ଇଣ୍ଡଷ୍ଟ୍ରିରେ ତାଙ୍କୁ ଏକ କମେଡି ନିର୍ଦ୍ଦେଶକ ଭାବେ ଦେଖାଯିବା ଆରମ୍ଭ ହୋଇଥିଲା। ଏହା ପରେ ତାଙ୍କ କ୍ୟାରିୟରରେ କମେଡି ଫିଲ୍ମର ସଂଖ୍ୟା ବଢ଼ି ଚାଲିଥିଲା। ପ୍ରିୟଦର୍ଶନ କହିଛନ୍ତି ଯେ, ସେ ନିଜ କ୍ୟାରିୟର ଗମ୍ଭୀର ଫିଲ୍ମରୁ ଆରମ୍ଭ କରିଥିଲେ। ‘ଗର୍ଦିଶ’ ଓ ‘ବିରାସତ’ ଭଳି ଫିଲ୍ମ ତାଙ୍କୁ ପ୍ରଶଂସା ଦେଇଥିଲା। କିନ୍ତୁ ‘ହେରା ଫେରି’ ପରେ ତାଙ୍କ ପାଇଁ କମେଡି ଫିଲ୍ମ ହିଁ ମୁଖ୍ୟ ପରିଚୟ ପାଲଟିଗଲା। ନିର୍ଦ୍ଦେଶକଙ୍କ କହିବା କଥା ହେଉଛି, ତାଙ୍କୁ କୃତ୍ରିମ କିମ୍ବା ଜୋରଜବରଦସ୍ତି କରାଯାଇଥିବା କମେଡି ପସନ୍ଦ ନୁହେଁ। କାହାଣୀ ଓ ପରିସ୍ଥିତିରୁ ସ୍ୱାଭାବିକ ଭାବେ ହାସ୍ୟ ସୃଷ୍ଟି ହେଉ—ସେ ଏହାକୁ ଅଧିକ ପସନ୍ଦ କରନ୍ତି। ଅଲଗା ଗ୍ୟାଗ୍‌ କିମ୍ବା କମେଡି ଟ୍ରାକ୍‌ ଯୋଡ଼ିବା ତାଙ୍କ ଫିଲ୍ମ ନିର୍ମାଣ ଶୈଳୀ ନୁହେଁ ବୋଲି ସେ କହିଛନ୍ତି। ଏହା ସହିତ ଅଭିନେତାମାନଙ୍କ ମୁହଁକୁ ବିକୃତ କରି କିମ୍ବା ଅତିରଞ୍ଜିତ ଅଭିନୟ ମାଧ୍ୟମରେ କମେଡି ସୃଷ୍ଟି କରିବାକୁ ମଧ୍ୟ ସେ ପସନ୍ଦ କରନ୍ତି ନାହିଁ। ତାଙ୍କ ମତରେ, ଚରିତ୍ରମାନେ ନିଜ ଭୂମିକା ଅନୁସାରେ ସ୍ୱାଭାବିକ ଭାବେ ବ୍ୟବହାର କରିବେ ଏବଂ ପରିସ୍ଥିତି ହିଁ ଦର୍ଶକଙ୍କୁ ହସାଇବ। ଏବେ ଏହି କମେଡି ଇମେଜ୍‌ରୁ ବାହାରି ଗମ୍ଭୀର କାହାଣୀ ନେଇ ଆସୁଛନ୍ତି ପ୍ରିୟଦର୍ଶନ। ‘ହେୱାନ’ରେ ଅକ୍ଷୟ କୁମାର ଓ ସୈଫ୍‌ ଅଲ୍ଲୀ ଖାନ୍‌ଙ୍କ ସହ ବୋମାନ ଇରାନୀ, ଶ୍ରିୟା ପିଲଗାଓଁକର, ରାଜେଶ ଶର୍ମା, ମନୋଜ ଯୋଶୀ ଓ ଯୀଶୁ ସେନଗୁପ୍ତା ପ୍ରମୁଖ ଅଭିନୟ କରୁଛନ୍ତି।

ଗମ୍ଭୀର ଧରଣର କାହାଣୀକୁ ନେଇ ତିଆରି ଏହି ଫିଲ୍ମ ମାଧ୍ୟମରେ ପ୍ରିୟଦର୍ଶନ ପୁଣିଥରେ ନିଜର ଭିନ୍ନ ନିର୍ଦ୍ଦେଶନ ଶୈଳୀ ଦର୍ଶକଙ୍କ ସାମ୍ନାରେ ରଖିବାକୁ ପ୍ରସ୍ତୁତ। ଫିଲ୍ମଟି ସେପ୍ଟେମ୍ବର ୧୧ରେ ରିଲିଜ୍‌ ହେବାକୁ ଥିବା ଜଣାପଡ଼ିଛି।