ସ୍ଵରା ଭାସ୍କରଙ୍କ ‘ଜୋହର’ ଟିପ୍ପଣୀକୁ ନେଇ ପୁଣି ଝଡ଼; ବଲିଉଡର ପ୍ରତିକ୍ରିୟା, ସୋସିଆଲ ମିଡିଆରେ ମହାଯୁଦ୍ଧ

ନୂଆଦିଲ୍ଲୀ: ଦୀର୍ଘ ସମୟ ଧରି କୌଣସି ଚଳଚ୍ଚିତ୍ରରେ ନଜର ନ ଆସିଥିଲେ ମଧ୍ୟ ଅଭିନେତ୍ରୀ ସ୍ଵରା ଭାସ୍କର ନିଜର ବିବାଦୀୟ ମନ୍ତବ୍ୟକୁ ନେଇ ପୁଣି ଥରେ ଦେଶବ୍ୟାପୀ ଚର୍ଚ୍ଚାରେ ଆସିଛନ୍ତି। ସଞ୍ଜୟ ଲୀଲା ଭଂସାଲୀଙ୍କ ଚର୍ଚ୍ଚିତ ଫିଲ୍ମ ‘ପଦ୍ମାବତ’ରେ ଦେଖାଯାଇଥିବା ‘ଜୋହର’ ଦୃଶ୍ୟକୁ ନେଇ ତାଙ୍କର ଏକ ଖୋଲା ଚିଠି ପୁଣିଥରେ ବିବାଦ ସୃଷ୍ଟି କରିଛି। ଫିଲ୍ମରେ ଜୋହର ପ୍ରଥାକୁ କଳାତ୍ମକ ଓ ଭବ୍ୟ ଢଙ୍ଗରେ ଉପସ୍ଥାପନ କରାଯାଇଥିବାକୁ ନେଇ ସ୍ଵରା ପ୍ରଶ୍ନ ଉଠାଇଥିଲେ। ବିଶେଷକରି ନାରୀଙ୍କ ସୁରକ୍ଷା, ସମ୍ମାନ ଏବଂ ଜୀବନ ବଞ୍ଚିବାର ଅଧିକାର ସହ ଜଡ଼ିତ ଏକ ସମ୍ବେଦନଶୀଳ ବିଷୟକୁ ପରଦାରେ କିଭଳି ଦର୍ଶାଯିବା ଉଚିତ, ସେନେଇ ସେ ପ୍ରଶ୍ନ କରିଥିଲେ। ସ୍ଵରାଙ୍କ ମତରେ, ୨୧ତମ ଶତାବ୍ଦୀର ସମାଜରେ ନାରୀଙ୍କ ଜୀବନ ଓ ସମ୍ମାନକୁ ଶରୀର ସହ ଯୋଡ଼ି ଦେଖିବା ଏକ ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗ। ଫିଲ୍ମରେ ଜୋହର ଦୃଶ୍ୟକୁ ଅତ୍ୟନ୍ତ ଭବ୍ୟ ଓ ସୁନ୍ଦର ଢଙ୍ଗରେ ଉପସ୍ଥାପନ କରିବା ସମାଜକୁ ଭୁଲ ସନ୍ଦେଶ ଦେଇପାରେ ବୋଲି ସେ ଦାବି କରିଥିଲେ। ତେବେ ସ୍ଵରାଙ୍କ ଏହି ଟିପ୍ପଣୀକୁ ନେଇ ତୀବ୍ର ସମାଲୋଚନା ଆରମ୍ଭ ହୋଇଥିଲା।

ଅନେକେ ତାଙ୍କ ମନ୍ତବ୍ୟକୁ ରାଣୀ ପଦ୍ମାବତୀ ଏବଂ ରାଜପୁତ ମହିଳାମାନଙ୍କ ପ୍ରତି ଅପମାନ ବୋଲି ଅଭିଯୋଗ କରିଥିଲେ। ଏହାପରେ ସ୍ଵରା ସଫେଇ ଦେଇ କହିଥିଲେ ଯେ, ତାଙ୍କ କଥାର ଭୁଲ ଅର୍ଥ ବାହାର କରାଯାଇଛି। ଏହି ବିବାଦକୁ ନେଇ ବଲିଉଡ୍ ଜଗତରେ ମଧ୍ୟ ବିଭିନ୍ନ ମତ ପ୍ରକାଶ ପାଇଛି। କେତେକ କଳାକାର ଏହାକୁ ନିର୍ଦ୍ଦେଶକଙ୍କ କଳାତ୍ମକ ଦୃଷ୍ଟିକୋଣ ସହ ଯୋଡ଼ି ଦେଖିବାକୁ କହିଥିବାବେଳେ, ଆଉ କେତେକ ଐତିହାସିକ ପ୍ରସଙ୍ଗକୁ ଆଧୁନିକ ନାରୀବାଦର ମାପକାଠିରେ ବିଚାର କରିବା ଠିକ୍ ନୁହେଁ ବୋଲି ମତ ରଖିଛନ୍ତି। ସୋସିଆଲ ମିଡିଆରେ ମଧ୍ୟ ଏହି ପ୍ରସଙ୍ଗକୁ ନେଇ ଜୋରଦାର ତର୍କବିତର୍କ ଚାଲିଛି। ଗୋଟିଏ ପକ୍ଷ ସ୍ଵରାଙ୍କ ପ୍ରଶ୍ନକୁ ନାରୀଙ୍କ ଜୀବନ ଓ ଅଧିକାର ସହ ଜଡ଼ିତ ଯୁକ୍ତିସଙ୍ଗତ ପ୍ରଶ୍ନ ବୋଲି କହୁଥିବାବେଳେ, ଅନ୍ୟପକ୍ଷ ଏହାକୁ ଐତିହାସିକ ପରିପ୍ରେକ୍ଷିତକୁ ଅଣଦେଖା କରି କରାଯାଇଥିବା ମନ୍ତବ୍ୟ ବୋଲି ଦାବି କରୁଛନ୍ତି। ସ୍ଵରାଙ୍କ ‘ଜୋହର’ ଟିପ୍ପଣୀକୁ ନେଇ ଏବେ ଚର୍ଚ୍ଚା କେବଳ ଏକ ଫିଲ୍ମ କିମ୍ବା ଏକ ଦୃଶ୍ୟ ମଧ୍ୟରେ ସୀମିତ ରହିନାହିଁ। ଏହା କଳାତ୍ମକ ସ୍ୱାଧୀନତା, ଐତିହାସିକ ଉପସ୍ଥାପନା, ନାରୀଙ୍କ ଅଧିକାର ଓ ଆଧୁନିକ ନାରୀବାଦ ମଧ୍ୟରେ ଏକ ବଡ଼ ବିତର୍କର ରୂପ ନେଇଛି।