ରାସ୍ତା ପାଇଁ ନାହିଁ ନଥିବା ଅସୁବିଧା ସମ୍ମୁଖୀନ ହେଉଛନ୍ତି ଝାଞ୍ଜିରୀବେରେଣା ଗ୍ରାମବାସୀ

() ଗାଁକୁ କାମ, ମାକୁ ସମ୍ମାନର କଥା କହି ଡିଣ୍ଡିମ ପିଟୁଛନ୍ତି ରାଜ୍ୟସରକାର, କିନ୍ତୁ ବାସ୍ତବସ୍ଥିତି କିଛି ଭିନ୍ନ । ରାସ୍ତା ପାଇଁ ନାହିଁ ନଥିବା ଅସୁବିଧା ସମ୍ମୁଖୀନ ହେଉଛନ୍ତି ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ ଝାଞ୍ଜିରୀବେରେଣା ଗ୍ରାମବାସୀ।

କଙ୍କଡାହାଡ଼ ବ୍ଲକ କେରଜୁଳି ପଂଚାୟତର ଆଦିବାସୀ ସାହି ଝାଞ୍ଜିରୀ ବେରେଣା ଗାଁ । ଏହି ଗାଁରେ ୫୦ ରୁ ଉର୍ଦ୍ଧ୍ବ ପରିବାର ବସବାସ କରୁଥିବା ବେଳେ, ବଜାରକୁ ଯିବା ପାଇଁ ହେଲେ ଡୋଲିଆ ଛକକୁ ଯାଇ ବସ ଯୋଗେ ବଜାରକୁ ଯିବା ପାଇଁ ପଡ଼ିବ । ତେବେ ଏହି ଡୋଲିଆ ଛକ ଗାଁ ଠାରୁ ୪କିମି ଦୂର ହୋଇଥିବା ବେଳେ, ଆଜି ପର୍ଯ୍ୟନ୍ତ ମାଟି ରାସ୍ତାଟିଏ ମଧ୍ୟ ନିର୍ମାଣ ହୋଇପାରିଲା ନାହିଁ। ଏହା ସହ ଯିବା ରାସ୍ତାରେ ପଡେ ଡୋଲିଆ ନାଳ । ଏହି ନାଳ ପାର ହୋଇ ଲୋକମାନେ ଖରା ଦିନେ ବହୁ କଷ୍ଟରେ ଯାଉଥିବା ବେଳେ, ବର୍ଷା ଦିନେ ବିପଦ ସଂକୁଳ ଭାବେ ଯାତାୟାତ କରିଥାନ୍ତି । ସରପଞ୍ଚଙ୍କ ଠାରୁ ଆରମ୍ଭ କରି ଜିଲ୍ଲାପ୍ରଶାସ, ସ୍ଥାନୀୟ ବିଧାୟକ ଓ ସାଂସଦଙ୍କୁ ଜଣେ ଥିଲେ ମଧ୍ୟ କେହି ଶୁଣୁ ନଥିବା ଅଭିଯୋଗ କରିଛନ୍ତି ଗ୍ରାମବାସୀ।

ତେବେ ଏହି ଗାଁକୁ କେରଜୁଳି ପଂଚାୟତ ଠାରୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ରାସ୍ତା ସଂଯୋଗ ହୋଇଥିବା ବେଳେ, ଏହା ବ୍ଲକ କାର୍ଯ୍ୟାଳୟ ଓ ସହରକୁ ଯାତାୟାତ ପାଇଁ ଦୂରତା କାରଣରୁ ବହୁ ଅସୁବିଧା ହେବାକୁ ପଡୁଛି । ତେଣୁ ସେମାନେ ୪ କିମି ଦୂର ଖାଲଖମା ଭରା ପାଦଚଲା ମାଟି ରାସ୍ତା ଦେଇ ବିପଦ ସଂକୁଳ ଭାବେ ଡୋଲିଆ ନାଳ ପାର ହୋଇ ଡୋଲିଆ ଛକକୁ ଯାଇଥାନ୍ତି । ସେଠାରୁ ସେମାନେ ବସ ଯୋଗେ ବିଭିନ୍ନ ଜାଗାକୁ ଯାତାୟାତ କରିଥାନ୍ତି ବୋଲି କହିଛନ୍ତି ଗ୍ରାମବାସୀ ।

ତେବେ ଏହି ରାସ୍ତା କେବେ ନିମ୍ମାଣ ହେବ ତାହା ଦେଖିବାକୁ ବାକି ରହିଲା।

ସୈାମେନ୍ଦ୍ର କୁମାର ସାହୁ