କାମାକ୍ଷାନଗର: ବେଶ ଧୂମଧାମରେ ପାଳନ ହୋଇ ଯାଇଛି ଭୁବନ ଦଶହରା ଓ ଐତିହାସିକ ବଳଦଯାତ୍ରା। ଆଜି ହେଉଛି ଭସାଣି ଉତ୍ସବ ବା ରାବଣ ପୁଡି। ପାଗ ଅନୁକୂଳ ଯୋଗୁ ବହୁ ସଂଖ୍ୟାରେ ଭକ୍ତଙ୍କ ସମାଗମ ହେବ । ଭିଡକୁ ଦୃଷ୍ଟିରେ ରଖି ବ୍ୟାପକ ପୋଲିସ ମୁତୟନ ହୋଇଛନ୍ତି ।
ଏ ହେଉଛି ଢେଙ୍କାନାଳ ଜିଲ୍ଲା ଭୁବନର ଗଣ ପର୍ବ ଦଶହରା ଓ ଐତିହ୍ୟ ବଳଦ ଯାତ୍ରାର ଦୃଶ୍ୟ । ୧୩ଟି ମଣ୍ଡପରେ ମାଙ୍କ ବିଜୟା ଦଶମୀ ପୂଜା ସହ ଶୁଭ ଅନୁକୂଳ ହୋଇଥିଲା ଐତିହ୍ୟ ବଳଦ ଯାତ୍ରାର । ପ୍ରଥମେ ଥୋରିଆ ସମାଜ ତରଫରୁ ଥୁଡିଆ ବଳଦକୁ ସୁସଜିତ କରିବା ପରେ ଗଡିଶା ମାଛକୁ ଥୋରିଆ ସାହିର ମହିଳା ମାନେ ପୂଜାର୍ଚ୍ଚନା ବା ବନ୍ଦାପନା କରି ଏହି ବଳଦ ଯାତ୍ରାର ଶୁଭ ଅନୁକୂଳ କରିଥିଲେ । ପରେ ଅନ୍ୟ ସମ୍ପ୍ରଦାୟର ବଳଦ ଏହି ଯାତ୍ରାରେ ସାମିଲ ହୋଇଥିଲେ ।
କରୋନା ପରେ ଚଳିତ ବର୍ଷ ଜାକଜମକରେ ଶୋଭାଯାତ୍ରା ବାହାରିଛି । ଏଥିପାଇଁ ମେଢ଼ ଗୁଡିକ ବେଶ ସାଜସଜା ସହ ବଳଦକୁ ମହଣ କରାଯାଇଛି । ଚଳିତ ବର୍ଷ ପ୍ରଥମ ଥର ପାଇଁ ଦୁର୍ଗା ମେଢ଼ ଭସାଣି ପୂର୍ବରୁ ମେଳଣ ହୋଇ ଯାତ୍ରାରେ ସାମିଲ ହୋଇଛି । ଆଗରୁ ସମସ୍ତ ପ୍ରତିଷ୍ଠାନ ପାଇଁ ଗୋଟିଏ ଅନୁମତି ଅଣାଯାଉଥିଲା। ଚଳିତ ବର୍ଷ ପ୍ରତି ପ୍ରତିଷ୍ଠାନ ସ୍ୱତନ୍ତ୍ର ଭାବେ ଅନୁମତି ପାଇଁ ପ୍ରଶାସନର ଅନୁମତି ମିଳିଛି । ଯାତ୍ରାକୁ ଶୃଙ୍ଖଳିତ ଢଙ୍ଗରେ ପରିଚାଳନା ପାଇଁ ଏଗାର ଜଣିଆ ଶାନ୍ତି କମିଟି ସ୍ଥିର କରାଯାଇଛି |
ଏହି ଦୁର୍ଗାପୂଜାରେ ସବୁ ଭକ୍ତ ଶାନ୍ତି ଶୃଙ୍ଖଳାରେ ମାଙ୍କ ଦର୍ଶନ କରି ମାଙ୍କ ସାନିଧ୍ୟ ଲାଭ କରିଛନ୍ତି ।
ସୌମେନ୍ଦ୍ର କୁମାର ସାହୁଙ୍କ ରିପୋର୍ଟ
