ଅଫିସର ମାନୁନାହାନ୍ତି

() ଅଫିସର ମାନୁନାହାନ୍ତି। କିଏ ଦୀର୍ଘ ବର୍ଷ ଧରି ଗୋଟିଏ ପଦରେ ବସିଛି ତ କିଏ ଏକାଧିକ ବିଭାଗ ଯାବୁଡ଼ି ଧରିଛି। ନିର୍ବାଚିତ ପ୍ରତିନିଧିଙ୍କୁ ସମ୍ମାନ ଦେଉନାହାନ୍ତି। ପୁଣି ଫାଇଭ-ଟି ଓ ମୋ ସରକାରର ଉପକ୍ରମ ଉଠାଇ ଆଜି ଶୂନ୍ୟକାଳରେ ବିରୋଧୀ ଦଳ ଏଭଳି ତେରେଛା ତୀର ମାରିଛି ସରକାରଙ୍କୁ। କାହା ସ୍ୱାର୍ଥରେ କାମ କରୁଛନ୍ତି ପ୍ରଶାସନିକ ଅଧିକାରୀ ବୋଲି ପ୍ରଶ୍ନ ପଚାରିଛନ୍ତି। ବାଚସ୍ପତି ସୁରକ୍ଷା ଦିଅନ୍ତୁ ବୋଲି ଅଳି କରିଛି। ସେପଟେ ଶାସକ ଦଳ ଏହାର ଜବାବ ରଖିଛି।

ଆଇଏଏସ ଜି.ମାଥିଭାଥନ। ନଗର ଉନ୍ନୟନ ବିଭାଗର ସଚିବ ଭାବେ ୨୦୧୪ରୁ ରହିଲେଣି। ତାଙ୍କର ବଦଳି ହେଉନି। ବିଧାୟକ ଫୋନ୍ କଲେ ମାଥିଭାଥନ ଫୋନ୍ ଧରନ୍ତିନି। ବୁକ୍ ସର୍କୁଲାର ୪୭ ଚୁଲିକି ଗଲାଣି। ସ୍ୱେଛାଚାରିତା ସାଙ୍ଗକୁ ଏତେ ଗର୍ବୀ ଯେ, ମାଥିଭାଥନ କାହା କଥା ଶୁଣନ୍ତିନି। ଆଇଏଏସ ବୀରବିକ୍ରମ ଯାଦବ। ଯୋଗାଣ ସଚିବ ରହିଲେଣି ୨୦୧୭ରୁ। ତାଙ୍କର ବି ବଦଳି ହେଉନି। ବଡ଼ କଥା ହେଲା, ସୁପ୍ରିମକୋର୍ଟଙ୍କ ନିର୍ଦେଶକୁ ବେଖାତିର କରି ସରକାର ବୀରବିକ୍ରମ ଯାଦବଙ୍କୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ନିୟୋଜିତ କରିଛନ୍ତି। କାରଣ ସର୍ବୋଚ୍ଚ ଅଦାଲତ କହିଛନ୍ତି, ଯିଏ ଶ୍ରୀମନ୍ଦିର ମୁଖ୍ୟ ପ୍ରଶାସକ ହେବେ, ତାଙ୍କୁ ଅନ୍ୟ କୌଣସି ବିଭାଗର ଦାୟିତ୍ୱ ଦିଆଯିବନି।

ବିଧାନସଭାର ଶୂନ୍ୟକାଳରେ ଫାଇଭ-ଟି ଓ ମୋ ସରକାର ଉପକ୍ରମ ଆଳରେ ଆଜି ବିରୋଧୀ ଦଳର ମିଳିତ ସ୍ୱର ଓ ପ୍ରତିବାଦ ଦେଖିବାକୁ ମିଳିଥିଲା। କିଭଳି ନିର୍ଦ୍ଦିଷ୍ଟ ଆଇଏଏସ ନିଜର ବ୍ୟକ୍ତିଗତ ସ୍ୱାର୍ଥ ସକାଶେ ଓ ସମ୍ପର୍କର ସୁଯୋଗ ନେଇ ଅହଙ୍କାରରେ ମାତିଛନ୍ତି।  ଏଇଟା କଅଣ ଫାଇଭ-ଟି କି ବୋଲି ପୁଣି ଉଖାରିଥିଲେ କଥା। ଏ ତ ଗଲା ସଚିବସ୍ତରର କଥା। କେନ୍ଦୁଝର ଓ ମୟୁରଭଞ୍ଜ ଜିଲ୍ଲାପାଳଙ୍କ କଥା ନ କହିବା ଭଲ। ଏମାନଙ୍କର ବି ଦୀର୍ଘ ଦିନ ଧରି ବଦଳି ହେଉନି। କେନ୍ଦୁଝର ଜିଲ୍ଲାପାଳ ପ୍ରଶାସନିକ କାମ ଛାଡ଼ି ବେପାରରେ ବ୍ୟସ୍ତ। ଖଣି ଅଛି, ମାଲ୍ ଅଛି। ଖଣି ପଇସାରେ ଏ ସରକାର ଚାଲିଛି। କୋଇଡ଼ା ବିଡ଼ିଓ ୩ ବର୍ଷ ହେଲାଣି ରହିଲେଣି। ତାଙ୍କର ବଦଳି ବାରମ୍ୱାର ବାତିଲ୍ କାହା ସ୍ୱାର୍ଥରେ ବୋଲି ପଚାରିଛନ୍ତି ବିରୋଧୀ। ଘରେ ଅଫିସ ଚଳାଉଛନ୍ତି କୋଇଡା ବିଡ଼ିଓ। ଏପରିକି ସଂପୃକ୍ତ ବିଡିଓ ଦୁର୍ବ୍ୟବହାର ପ୍ରସଙ୍ଗରେ ବିଧାୟକ ଲକ୍ଷ୍ମଣ ମୁଣ୍ଡା ବିଧାନସଭାର ଏଥିକ୍ସ କମିଟିକୁ ଯାଆନ୍ତୁ ବୋଲି ପରାମର୍ଶ ଦେଇଛନ୍ତି ନରସିଂହ ମିଶ୍ର।

ସେପଟେ ସରକାର କହିଛନ୍ତି, ବିରୋଧୀଙ୍କ ଅଭିଯୋଗ ଭିତ୍ତିହୀନ। ସରକାର ବଦଳି ଓ ପୋଷ୍ଟିଂରେ ସବୁବେଳେ ସ୍ୱଛତା ଅବଲମ୍ୱନ କରିଛନ୍ତି। କୌଣସି ଅଧିକାରୀ ନିର୍ବାଚିତ ପ୍ରତିନିଧିଙ୍କୁ ଦୁର୍ବ୍ୟବହାର କରୁଥିଲେ, ଅଭିଯୋଗ ଆସିଲେ ତା ଉପରେ ନିଶ୍ଚିତ କାର୍ଯ୍ୟାନୁଷ୍ଠାନ ହେବ। ମୋ ସରକାର ଓ ଫାଇଭ-ଟିକୁ ନେଇ ଗଲା ତିନି ଦିନ ହେଲା ଶୂନ୍ୟକାଳରେ ବିରୋଧୀ ଦଳ ନେତା ଜୟନାରାୟଣ ମିଶ୍ର କ୍ରମାଗତ ବିଭିନ୍ନ ଉପକ୍ରମ ଆଳରେ ଟାର୍ଗେଟ କରିଆସୁଛନ୍ତି ସରକାରଙ୍କୁ। ଆଜି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ବି ଅଫିସର ରାଜ୍ ଓ ବଦଳି, ପୋଷ୍ଟିଂରେ ନିୟମ ଉଲ୍ଲଂଘନ ହେଉଥିବା କଥାକୁ ସମର୍ଥନ କରି ବର୍ଷିଛନ୍ତି।

ନବକିଶୋର ସାହୁ ଓ ପ୍ରଦୀପ ନାୟକଙ୍କ ରିପୋର୍ଟ

Naxatra News is now on Whatsapp

Join and get latest news update delivered to you via whatsapp

Join Now