ଓଡ଼ିଶା

ବମ୍ବେ ହାଇକୋର୍ଟରୁ ଉଦ୍ଧବଙ୍କୁ ବଡ ଆଶ୍ବସ୍ତି

ମୁମ୍ବାଇ: ଶିବାଜୀ ପାର୍କ ଦଶହରା ରାଲି ମାମଲାରେ ଉଦ୍ଧବଙ୍କ ବିଜୟ। ଉଦ୍ଧବଙ୍କ ଶିବସେନାକୁ ରାଲି କରିବାକୁ ବମ୍ବେ ହାଇକୋର୍ଟ ଶୁକ୍ରବାରଅନୁମତି ଦେଇଛନ୍ତି। ଫଳରେ ସିନ୍ଦେ ଗୋଷ୍ଠୀ ଅନ୍ୟ ସ୍ଥାନରେ ରାଲି କରିବାକୁ ପଡିବ। କୋର୍ଟ କହିଛନ୍ତି ଯେ ସରକାର ଦେଇଥିବା ୨୦୧୬ ଆଦେଶ ଅନୁଯାୟୀ ଏହି ଅନୁମତି ଦିଆଯାଇଛି। କେବଳ ଏତିକି ନୁହେଁ, ସମଗ୍ର ରାଲିର ଭିଡିଓଗ୍ରାଫି କରାଯିବ ଏବଂ ଯଦି କୌଣସି ତ୍ରୁଟି ଦେଖାଦିଏ କିମ୍ବା ଆଇନ ଶୃଙ୍ଖଳା ପରିସ୍ଥିତି ଉପୁଜେ, ତେବେ ଭବିଷ୍ୟତରେ ଅନୁମତି ଦେବା ଉପରେ ବିଚାର କରାଯିବ ବୋଲି କୋର୍ଟ କହିଛନ୍ତି।

ପୂର୍ବରୁ ବିଏମସି ଉଭୟ ଗୋଷ୍ଠୀଙ୍କୁ ଶିବାଜୀ ପାର୍କରେ ରାଲି କରିବାକୁ ମନା କରିଦେଇଥିଲା। ଏହା ପରେ ଉଭୟ ହାଇକୋର୍ଟରେ ପହଞ୍ଚିଥିଲେ। ଆଜି ଶୁଣାଣି ସମୟରେ ଉଭୟ ଗୋଷ୍ଠୀ ପକ୍ଷରୁ   ସାଢେ ତିନି ଘଣ୍ଟା ଧରି ହାଇକୋର୍ଟରେ ଏନେଇ ତର୍କବିତର୍କ ଜାରି ରହିଥିଲା। ସବୁ ତର୍କ ଶୁଣିବା ପରେ ଉଦ୍ଧବଙ୍କ ସପକ୍ଷରେ ରାୟ ଦେଇଛନ୍ତି କୋର୍ଟ।  ସମସ୍ତଙ୍କ ଯୁକ୍ତି ଶୁଣିବା ପରେ କୋର୍ଟ କହିଛନ୍ତି ଯେ ଶିବସେନାର ଆବେଦନକୁ ପ୍ରତ୍ୟାଖ୍ୟାନ କରିବା ଠିକ୍ ନୁହେଁ। ହାଇକୋର୍ଟ କହିଛନ୍ତି ଯେ ବିଏମସିର ନିଷ୍ପତ୍ତି ଉଚିତ ନୁହେଁ।

ଏହି ସମୟରେ, କୋର୍ଟଙ୍କ ସର୍ତ୍ତ ଅନୁଯାୟୀ, ଠାକୁରଙ୍କ ଓକିଲମାନେ ଆଇନ ଶୃଙ୍ଖଳା ରକ୍ଷା କରିବେ ବୋଲି ଆଶ୍ୱାସନା ଦେଇଥିଲେ। ବମ୍ବେ ହାଇକୋର୍ଟ କହିଛନ୍ତି ଯେ ସମଗ୍ର ଘଟଣାର ଭିଡିଓ ରେକର୍ଡିଂ ବାଧ୍ୟତାମୂଳକ ରହିବ ଏବଂ ଯଦି ଆବେଦନକାରୀ ଆଇନ ଶୃଙ୍ଖଳା ପରିସ୍ଥିତି ପାଇଁ ଦାୟୀ ବୋଲି ଜଣାପଡେ ତେବେ ଭବିଷ୍ୟତରେ ସେମାନଙ୍କ ଅନୁମତି ଦିଆଯିବ ନାହିଁ।

ସୂଚନା ଯୋଗ୍ୟ କି, ୧୯୬୬ ମସିହାରେ ସ୍ବର୍ଗତଃ ବାଲ ଠାକରେ ଶିବସେନା ଗଠନ କରିଥିଲେ। ତା’ପରେ ପ୍ରଥମ ଥର ପାଇଁ ଦଶହରା ଅବସରରେ ଶିବାଜୀ ପାର୍କରେ ଏକ ରାଲିର ଆୟୋଜନ କରାଯାଇଥିଲା। ଏହି କାରଣରୁ ଏହା ସେନାର ଏକ ପ୍ରମୁଖ ଘଟଣା ପାଲଟିଛି | ଦୁଇ ବର୍ଷ ହେବ କରୋନା ମହାମାରୀ ପାଇଁ ରାଲି ଆୟୋଜନ ହୋଇ ପାରି ନ ଥିଲା। ଚଳିତ ରାଲିକୁ ଧୁମଧାମରେ କରିବାକୁ ଲକ୍ଷ୍ୟ ରଖିଛନ୍ତି ସେନା କର୍ମକର୍ତ୍ତା।

Leave a Reply

Your email address will not be published.

Back to top button