() ଫାଇଭ- ଟି କୁ ନେଇ ବିଧାନସଭାରେ ଝଡ଼। ଶୂନ୍ୟକାଳରେ ଫାଇଭ-ଟି ଏକ ବିଭାଗ ନା ଆଉ କଅଣ ବୋଲି ପଚାରି ସରକାରଙ୍କଠୁ ସ୍ପଷ୍ଟିକରଣ ମାଗିଥିଲେ ବିରୋଧୀ ଦଳ ନେତା। ସେପଟେ ଏହାର ଉତ୍ତରରେ ଶାସକ ଦଳ କହିଛି, ଏହା ଏକ ବିଭାଗ ନୁହେଁ। କିନ୍ତୁ ଶାସନ ବ୍ୟବସ୍ଥାରେ ସ୍ଥିରତା ଆଣିବାକୁ ଫାଇଭ-ଟି ଏକ ମହାମନ୍ତ୍ର।
ଫାଇଭ-ଟି। ଏହା ଏକ ବିଭାଗ କି। ଯଦି ବିଭାଗ, ଏହାର ଅଫିସ କେଉଁଠି। ଏଥିରେ ଆଉ କିଏ କର୍ମଚାରୀ ଅଛନ୍ତି। ବିଭାଗ ହୋଇଥିଲେ, ଏ ବିଭାଗ ସମ୍ପର୍କିତ ପ୍ରଶ୍ନୋତ୍ତର କରିବାକୁ ସୁଯୋଗ ଦିଆଯାଉ। ଯଦି ବିଭାଗ ନୁହେଁ, ତେବେ ଏଭଳି ପଦବୀ ସୃଷ୍ଟି କରି ମୁଖ୍ୟ ଶାସନ ସଚିବ ଓ ଉନ୍ନୟନ କମିଶନରଙ୍କୁ ଗୌଣ କରିବା ଉଦ୍ଦେଶ୍ୟ ରହିଛି କି। କାରଣ ଶାସନକୁ କ୍ରିୟାଶୀଳ କରିବା ଓ ଉତ୍ତରଦାୟିତ୍ୱ ନ୍ୟସ୍ତ କରିବାକୁ ମୁଖ୍ୟ ସଚିବ ଥାଉଁ ଥାଉଁ ଏଭଳି ଫାଇଭ-ଟି କାହିଁକି। ଶୂନ୍ୟକାଳରେ ବିରୋଧୀ ଦଳ ନେତା ଫାଇଭ-ଟି କୁ ନେଇ ଏଭଳି ପ୍ରଶ୍ନ ପଚାରି ବାଚସ୍ପତିଙ୍କ ହସ୍ତକ୍ଷେପ ଓ ସରକାରଙ୍କଠୁ ସ୍ପଷ୍ଟୀକରଣ ଲୋଡ଼ିଥିଲେ। ଆଉ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ଫାଇଭ-ଟି ଉପରେ ସେ ବି ତଥ୍ୟ ଲୋଡ଼ିଛନ୍ତି। ନା ଏଭଳି କୌଣସି ବିଭାଗ ଅଛି ନା ଏହାର କୌଣସି ମନ୍ତ୍ରୀ। ଫାଇଭ-ଟି ହୁଏତ ଏକ ସରକାରୀ ଅର୍ଡର । ମୁଖ୍ୟ ଶାସନ ସଚିବଙ୍କ ଉପରେ କେହି ନାହିଁ।
ସେପଟେ ସରକାରୀ ଦଳ ମୁଖ୍ୟ ସଚେତକ ଏହାର ଜବାବ ରଖିଛନ୍ତି। ଫାଇଭ-ଟି ଏକ ବିଭାଗ ହୋଇନପାରେ। କିନ୍ତୁ ମୁଖ୍ୟମନ୍ତ୍ରୀଙ୍କ ଏହା ଏକ ଚିନ୍ତାଧାରା। ଫାଇଭ-ଟି ଏକ ମନ୍ତ୍ର। ଏହା ଆଉ ପ୍ରଶ୍ନ ହୋଇରହିନି। ସାଢ଼େ ୪ କୋଟି ଲୋକଙ୍କ ମନକୁ ଛୁଇଁପାରିଛି। ଦୁର୍ନୀତି କମିଛି। ଶାସନର ଏକ ଗୁରୁତ୍ୱପୂର୍ଣ୍ଣ ଅଙ୍ଗ ସାଜିଛି ଫାଇଭ-ଟି।
ଫାଇଭ-ଟି କୁ ନେଇ ବିଧାନସଭାରେ ବିରୋଧୀ ଦଳର ପ୍ରଶ୍ନକୁ ନେଇ ସରଗରମ ରହିଥିଲା ଗୃହ।
ନବକିଶୋର ସାହୁ ଓ ପ୍ରଦୀପ ନାୟକଙ୍କ ରିପୋର୍ଟ
Naxatra News is now on Whatsapp
Join and get latest news update delivered to you via whatsapp
Join Now
