BJD

  • рмЕрмкрм░рм╛рмЬрм┐рмдрм╛рмЩрнНрмХрнБ рммрм┐рмЬрнЗрмбрм┐рм░ рмкрнНрм░рмдрм┐рмХрнНрм░рм┐рнЯрм╛; рмирммрнАрми рмУрмбрм┐рм╢рм╛,рммрм┐рмХрм╛рм╢рм░ рмЧрнЛрмЯрнЗ рморм╣рм╛рмормирнНрмдрнНрм░

    рмЕрмкрм░рм╛рмЬрм┐рмдрм╛ рм╖рмбрм╝рмЩрнНрмЧрнАрмЩрнНрмХ рмЯрнБрмЗрмЯрмХрнБ рммрм┐рмЬрнЗрмбрм┐рм░ рмЬрнЛрм░рмжрм╛рм░ рмХрм╛рмЙрмгрнНрмЯрм░ рмХрм░рм┐рмЫрмирнНрмдрм┐ рммрм┐рмЬрнЗрмбрм┐ рморнБрмЦрнНрнЯ рм╕рмЪрнЗрмдрмХ рмкрнНрм░рм╢рм╛рмирнНрмд рморнБрмжрнБрм▓рм┐ ред рмУрмбрм┐рм╢рм╛ рмирммрнАрми рмУрмбрм┐рм╢рм╛ рммрм┐рмХрм╛рм╢рм░ рмЧрнЛрмЯрнЗ рморм╣рм╛рмормирнНрмдрнНрм░ ред рмЖрмЧрм╛рморнА рмжрм┐рмирм░рнЗ рмУрмбрм╝рм┐рм╢рм╛рм░ рммрм┐рмХрм╛рм╢рмХрнБ рмПрм╣рм╛ рмЖрм╣рнБрм░рм┐ рмдрнНрн▒рм░рм╛рмирнНрн▒рм┐рмд рмХрм░рм┐рмм ред рмЦрммрм░ рмкрм╛рмЗрммрм╛ рмкрм░рнЗ рмУрмбрм┐рм╢рм╛рммрм╛рм╕рнА рмЙрмдрнНрм╕рм╛рм╣рм┐рмд рмЕрмЫрмирнНрмдрм┐ ред рмЕрмдрнАрмдрм░ рмЖрмо рмЧрм╛рмБ рмЖрмо рммрм┐рмХрм╛рм╢ рмкрнНрм░рмдрм┐ рмкрмВрмЪрм╛рнЯрмд рмкрнНрм░рмдрм┐ рмЧрм╛рмБ рм░ рмдрнГрмг рморнВрм│ рм╕рнНрмдрм░рм░ рм╕рморм╕рнНрнЯрм╛рмХрнБ рм╕рморм╛рмзрм╛рми рмХрм░рм┐рммрм╛ рм▓рм╛рмЧрм┐ рмпрнЛрмЬрмирм╛ рмХрм░рм╛рмпрм╛рмЗрмерм┐рм▓рм╛ ред рмдрм╛ рмарнБ рмЕрмзрм┐рмХ рмЯрмЩрнНрмХрм╛рм░ рммрнНрнЯрнЯ рммрм░рм╛рмж рмХрм░рм╛рмпрм╛рмЗрмЫрм┐ рмПрм╣рм┐ рмпрнЛрмЬрмирм╛ рм░рнЗ ред рмкрнНрм░рмдрнНрнЯрнЗрмХ рмЧрм╛рмБ рмкрнНрм░рмдрнНрнЯрнЗрмХ рмЕрмЮрнНрмЪрм│рм░ рм╕рм╛рморм╛рмЬрм┐рмХ рмУ рм╕рмВрм╕рнНрмХрнГрмдрм┐рмХрнБ рм╕рнБрм░рмХрнНрм╖рм╛ рмжрнЗрммрм╛ рм▓рм╛рмЧрм┐ рммрм┐ рммрнНрнЯрммрм╕рнНрмерм╛ рм╣рнЛрмЗрмЫрм┐ ред рмЬрмЧрмирнНрмирм╛рме рм╕рмВрм╕рнНрмХрнГрмдрм┐рмХрнБ рмПрмерм┐рм░рнЗ рм╕рнНрмерм╛рмирм┐рмд рмХрм░рм╛рмпрм╛рмЗрмЫрм┐ ред рмирм┐рм░рнНрммрм╛рмЪрми рм╕рм╣рм┐рмд рмПрм╣рм┐ рмпрнЛрмЬрмирм╛рм░ рмХрнМрмгрм╕рм┐ рм╕рморнНрмкрм░рнНрмХ рмирм╛рм╣рм┐рмБ ред рмУрмбрм╝рм┐рм╢рм╛рм░ рммрм┐рмХрм╛рм╢ рмкрм╛рмЗрмБ рмЖрмо рмУрнЬрм┐рм╢рм╛ рмирммрнАрми рмУрмбрм┐рм╢рм╛ рмЧрнЛрмЯрнЗ рмирнВрмдрми рмлрм░рнНрмжрнНрмз ред

    рмЖрмо рмЧрм╛рмБ рмЖрмо рммрм┐рмХрм╛рм╢ рмХрнЗрмЙрмБрмарм┐ рмЕрмзрм╛ рм░рм╣рм┐рмирм┐ ред рмпрм┐рмП рмЧрм╛рмБ рмХрнБ рмпрм┐рмм рмЧрм╛рмБрм░ рмЪрм┐рмдрнНрм░ рмХрнБ рмжрнЗрмЦрм┐рмм рмЬрм╛рмгрм┐ рмкрм╛рм░рм┐рмм ред рмпрнЗрмЙрмБрморм╛рмирнЗ рмПрм╣рм╛ рмХрм╣рнБрмЫрмирнНрмдрм┐ рм╕рнЗрморм╛рмирнЗ рмЧрм╛рмБ рмХрнБ рмпрм╛рмЗ рмирм╛рм╣рм╛рмирнНрмдрм┐ рмнрнБрммрмирнЗрм╢рнНрн▒рм░рм░рнЗ рммрм╕рм┐ рмХрм┐ рмЯрм┐рмкрмгрм┐ рмжрнЗрмЙрмЫрмирнНрмдрм┐ ред рмЬрмЧрмирнНрмирм╛рме рм╕рмВрм╕рнНрмХрнГрмдрм┐рмХрнБ рмирм┐рм░рнНрммрм╛рмЪрми рм╕рм╣ рмпрнЛрмбрм╝рм┐рммрм╛рм░ рмХрм┐рмЫрм┐ рморм╛рмирнЗ рмирм╛рм╣рм┐рмБ ред рмпрнЛрмЬрмирм╛рмХрнБ рмпрнЗрмЙрмБрморм╛рмирнЗ рмирм┐рм░рнНрммрм╛рмЪрми рм╕рм╣ рмпрнЛрмбрнБрмЫрмирнНрмдрм┐ рм╕рнЗрморм╛рмирнЗ рмнрнЯрммрм┐рмд рммрнЛрм▓рм┐ рмкрнНрм░рморм╛рмгрм┐рмд рмХрм░рнБрмЫрмирнНрмдрм┐ ред
    рмПрм╕ рмПрмЪ рмЬрм┐ рморм╛рмзрморм░рнЗ рм╕рморм╛рмЬрм░рнЗ рмЕрммрм╣рнЗрм│рм┐рмд рм╣рнЛрмЗ рм░рм╣рм┐рмерм┐рммрм╛ рморм╛ рморм╛рмирмЩрнНрмХрм░ рмЙрмерм╛рми рм╣рнЛрмЗрмЫрм┐ ред рм╕рморм╛рмЬрм┐рмХ, рмЕрм░рнНрмермирнИрмдрм┐рмХ рмУ рморм╛рмирм╕рм┐рмХ рм╕рнНрмдрм░рм░рнЗ рм╣рнЛрмЗрмерм┐рммрм╛ рммрм┐рмХрм╛рм╢ рмХрнБ рмЕрмирнНрнЯ рморм╛рмирнЗ рм╕рм╣рм┐ рмкрм╛рм░рнБ рмирм╛рм╣рм╛рмБрмирнНрмдрм┐ ред рмХрм╛рм╣рм╛рм░ рмЯрм┐рмкрмгрм┐рм░рнЗ рмХрм┐рмЫрм┐ рмпрм╛рмП рмЖрм╕рнЗ рмирм╛рм╣рм┐рмБ ред рмЧрм╛рмБ рм░ рморм╣рм┐рм│рм╛ рморм╛рмирмЩрнНрмХ рмжрнНрн▒рм╛рм░рм╛ рмпрнЗрмЙрмБ рм╕рморнАрмХрм░рмг рм╣рнЛрмЗрмЫрм┐ рм░рм╛рмЬрмирнИрмдрм┐рмХ рмУ рм╕рм╛рморм╛рмЬрм┐рмХ рмЪрм┐рмдрнНрм░ рмкрм░рм┐рммрм░рнНрмдрнНрмдрми рм╣рнЛрмЗрмЫрм┐ рмдрм╛рм╣рм╛ рмжрнНрн▒рм╛рм░рм╛ рм╕рморм╛рмЬрм░ рммрм┐рмХрм╛рм╢ рм╣рнЛрмЗрмЫрм┐ ред

  • рнйрнж рмЬрм┐рм▓рнНрм▓рм╛ рм▓рм╛рмЧрм┐ рммрм┐рмЬрнЗрмбрм┐рм░ рммрнНрм░рм┐рмЧрнЗрмб

    () рнирнк рмкрм╛рмЗрмБ рмкрм╛рмЮрнНрмЪ рмерм░ рм░рм╛рмЬрнНрнЯрм░ рм╢рм╛рм╕рми рмХрнНрм╖рмормдрм╛рм░рнЗ рмерм┐рммрм╛ рмжрм│рм░ рм╕рморм░ рм╕рмЬрнНрмЬрм╛ред рммрм┐рмЬрнЗрмбрм┐рм░ рмирнВрмЖ рмкрм░рнНрмпрнНрнЯрммрнЗрмХрнНрм╖рмХ рмдрм╛рм▓рм┐рмХрм╛рм░рнЗ рмХрнЗрмЙрмБ рмХрнЗрмЙрмБ рмЬрм┐рм▓рнНрм▓рм╛рмХрнБ рмЕрмзрм┐рмХ рмлрнЛрмХрм╕ рмХрм░рм╛рмпрм╛рмЗрмЫрм┐ рмЖрмЙ рмПрмХрм╛рмзрм┐рмХ рмЬрм┐рм▓рнНрм▓рм╛ рмХрнЗрмЙрмБ рмирнЗрмдрм╛рмЩрнНрмХрнБ рмХрм╛рм╣рм┐рмБрмХрм┐ рмжрм┐рмЖрмпрм╛рмЗрмЫрм┐ред рмПрм╣рм╛рмХрнБ рмирнЗрмЗ рм░рм╛рмЬрмирнАрмдрм┐рмХ рмЪрм░рнНрмЪрнНрмЪрм╛ рмЬрнЛрм░ рмзрм░рм┐рмЫрм┐ред рм╕рнЗрмкрмЯрнЗ рммрм┐рмЬрнЗрмкрм┐рм░ рмирнВрмЖ рмормЩрнНрмЧрнБрмЖрм│ рнирнкрм░рнЗ рммрм┐рмЬрнЗрмбрм┐рмХрнБ рм╣рмЯрм╛рмЗрммрм╛рмХрнБ рм╕рмВрмХрм│рнНрмк рмирнЗрмЗ рмЖрмЧрнЗрмЗрммрм╛рмХрнБ рм╕рмЩрнНрмХрнЗрмд рмжрнЗрмЗрмерм┐рм▓рм╛ рммрнЗрм│рнЗ рнпрм░рнБ рнпрнж рмЖрм╕рми рм╣рм╛рм╕рм▓ рм▓рмХрнНрм╖рнНрнЯрм░рнЗ рмХрмВрмЧрнНрм░рнЗрм╕ред

    рнирнк рмирм┐рм░рнНрммрм╛рмЪрми рмкрм╛рмЗрмБ рмкрнНрм░рм╕рнНрмдрнБрмд рнйрнж рмЬрм┐рм▓рнНрм▓рм╛ рм▓рм╛рмЧрм┐ рммрм┐рмЬрнЗрмбрм┐рм░ рммрнНрм░рм┐рмЧрнЗрмбред рм╕рмВрмЧрмарми рм╕рморнНрмкрм╛рмжрмХ рмкрнНрм░рмгрмм рмкрнНрм░рмХрм╛рм╢ рмжрм╛рм╕рмЩрнНрмХрнБ рмПрмХрмХрм╛рм│рнАрми рнк рмЬрм┐рм▓рнНрм▓рм╛рм░ рмкрм░рнНрмпрнНрнЯрммрнЗрмХрнНрм╖рмХ рмжрм╛рнЯрм┐рмдрнНрн▒ рмжрнЗрмЗрмЫрмирнНрмдрм┐ рморнБрмЦрнНрнЯрмормирнНрмдрнНрм░рнАред рмЕрмирнБрмЧрнБрм│, рмврнЗрмЩрнНрмХрм╛рмирм╛рм│, рмХрнЗрмирнНрмжрнБрмЭрм░ рмУ рм╕рморнНрн▒рм▓рмкрнБрм░ рмкрм░рнНрмпрнНрнЯрммрнЗрмХрнНрм╖рмХ рмжрм╛рнЯрм┐рмдрнНрн▒рм░рнЗ рмкрнНрм░рмгрммред рмПрморм┐рмдрм┐рм░рнЗ рмХрм┐рмЫрм┐ рмжрм┐рми рм╣рнЗрм▓рм╛ рмХрнЗрмирнНрмжрнНрм░рмормирнНрмдрнНрм░рнА рмзрм░рнНрморнЗрмирнНрмжрнНрм░ рмкрнНрм░рмзрм╛рми рмЕрмирнБрмЧрнБрм│ рмУ рмврнЗрмЩрнНрмХрм╛рмирм╛рм│рмХрнБ рмШрми рмШрми рмЧрм╕рнНрмд рм╕рм╛рмЩрнНрмЧрмХрнБ рм╕рм╛рмВрмЧрмармирм┐рмХ рмХрм╛рмо рмдрмжрм╛рм░рмЦ рмХрм░рнБрмерм┐рммрм╛рм░рнБ рмдрм╛рмЩрнНрмХрнБ рмЪрнЗрмХрморнЗрмЯрнН рмжрнЗрммрм╛рмХрнБ рмкрнНрм░рмгрммрмЩрнНрмХрнБ рмжрм╛рнЯрм┐рмдрнНрн▒ рмирнНрнЯрм╕рнНрмд рмХрм░рм╛рмпрм╛рмЗрмЫрм┐ рммрнЛрм▓рм┐ рмЪрм░рнНрмЪрнНрмЪрм╛ рм╣рнЗрмЙрмЫрм┐ред рм╕рморнНрн▒рм▓рмкрнБрм░рм░рнЗ рмЬрнЯрмирм╛рм░рм╛рнЯрмгрмЩрнНрмХ рмжрммрмжрммрм╛рмХрнБ рмжрммрнЗрмЗрммрм╛ рм╣рнЗрмЙ рмЕрммрм╛ рмХрнЗрмирнНрмжрнБрмЭрм░рм░рнЗ рморнЛрм╣рми рморм╛рмЭрнА, рмирм┐рм░рмЮрнНрмЬрми-рмЬрнЯрмжрнЗрммрмЩрнНрмХ рмнрм│рм┐ рм╣рнЗрмнрм┐рмУрнНрн▒рнЗрмЯрмЩрнНрмХрнБ рмарм┐рмХрмгрм╛ рмЬрммрм╛рмм рмжрнЗрммрм╛ рм╕рмХрм╛рм╢рнЗ рмкрнНрм░рмгрммрмЩрнНрмХрнБ рмирм┐рнЯрнЛрмЬрм┐рмд рмХрм░рм╛рмпрм╛рмЗрмерм┐рммрм╛ рмХрнБрм╣рм╛рмпрм╛рмЙрмЫрм┐ред рмкрнВрм░рнНрммрмнрм│рм┐ рмормирнНрмдрнНрм░рнА рмЕрмдрмирнБ рм╕рммрнНрнЯрм╕рм╛рмЪрнАрмЩрнНрмХрнБ рмЧрмЬрмкрмдрм┐ рмУ рм░рм╛рнЯрмЧрмбрм╝рм╛ рмЬрм┐рм▓рнНрм▓рм╛ рмжрм╛рнЯрм┐рмдрнНрн▒ рморм┐рм│рм┐рмЫрм┐ред рм╕рнЗрм╣рм┐рмнрм│рм┐ рмжрм┐рммрнНрнЯрм╢рмЩрнНрмХрм░ рморм┐рм╢рнНрм░рмЩрнНрмХрнБ рмХрнЛрм░рм╛рмкрнБрмЯ рмУ рморм╛рм▓рмХрм╛рмирмЧрм┐рм░рм┐ рмЬрм┐рм▓рнНрм▓рм╛ рмжрм╛рнЯрм┐рмдрнНрн▒ рмжрм┐рмЖрмпрм╛рмЗрмЫрм┐ред  рммрмбрм╝ рмЬрм┐рм▓рнНрм▓рм╛ рморнЯрнБрм░рмнрмЮрнНрмЬрм░рнЗ рмкрмЮрнНрмЪрм╛рнЯрмд рмирм┐рм░рнНрммрм╛рмЪрмирм░рнЗ рммрм┐рмЬрнЗрмкрм┐рмХрнБ рмзрнВрм│рм┐рм╕рм╛рмдрнН рмкрм░рнЗ рмПрммрнЗ рмПрм╣рм┐ рмЬрм┐рм▓рнНрм▓рм╛рм░ рмжрм╛рнЯрм┐рмдрнНрн▒ рмкрмбрм╝рм┐рмЫрм┐ рмкрнНрм░рм╢рм╛рмирнНрмд рморнБрмжрнБрм▓рм┐рмЩрнНрмХ рмХрм╛рмирнНрмзрм░рнЗред рмирнВрмЖ рмЬрм┐рм▓рнНрм▓рм╛ рмкрм░рнНрмпрнНрнЯрммрнЗрмХрнНрм╖рмХ рмдрм╛рм▓рм┐рмХрм╛рм░рнБ рммрм╛рмжрнН рмкрмбрм╝рм┐рмЫрмирнНрмдрм┐ рмормирнНрмдрнНрм░рнА рмЙрм╖рм╛ рмжрнЗрммрнА, рмЯрнБрмХрнБрмирм┐ рм╕рм╛рм╣рнБ рмУ рм░рнЛрм╣рм┐рмдрнН рмкрнВрмЬрм╛рм░рнАред

    рм╕рнЗрмкрмЯрнЗ рммрм┐рмЬрнЗрмкрм┐ рнирнк рм░рмгрмирнАрмдрм┐ рм▓рм╛рмЧрм┐ рмкрнНрм░рм╕рнНрмдрнБрмд рм╣рнЗрм▓рм╛рмгрм┐ред рмирнВрмЖ рмормЩрнНрмЧрнБрмЖрм│ рмормирморнЛрм╣рми рм╕рм╛рморм▓ рммрм┐рмЬрнЗрмбрм┐ рм╕рм░рмХрм╛рм░рмХрнБ рм╣рмЯрм╛рмЗрммрм╛рмХрнБ рм╢рмкрме рмирнЗрмЗрмЫрмирнНрмдрм┐ред рмПрмерм░ рм▓рнЛрмХрмЩрнНрмХ рмЕрм╕рмирнНрмдрнЛрм╖рм░ рммрм┐рм╕рнНрмлрнЛрм░рмгрм░рнЗ рммрм┐рмЬрнЗрмбрм┐ рмжрнЛрм╣рм▓рм┐рмм рммрнЛрм▓рм┐ рмХрм╣рм┐рмЫрмирнНрмдрм┐ред рм╕рм╛рмВрмЧрмармирм┐рмХ рм╕рнНрмерм┐рмдрм┐рмХрнБ рм╕рнБрмжрнГрмврм╝ рмХрм░рм┐рммрм╛рмХрнБ рм░рнЛрмбрморнНрнЯрм╛рмкрнН рм╣рнЛрмЗрмЫрм┐ред рммрм┐рм░рнЛрмзрнА рмжрм│ рмирнЗрмдрм╛ рмХрм╣рм┐рмЫрмирнНрмдрм┐, рммрм┐рмЬрнЗрмбрм┐ рмкрм╛рмЦрм░рнЗ рм▓рнЛрмХрммрм│ рмирм╛рм╣рм┐рмБред рмХрнЗрммрм│ рмЕрм░рнНрме, рммрм╛рм╣рнБ рмУ рм╕рм░рмХрм╛рм░рнА рммрм│рм░рнЗ рмЬрм┐рмдрнБрмЫрм┐ред рмПрм╣рм┐ рмдрм┐рмирнЛрмЯрм┐рмХрнБ рмкрнНрм░рмдрм┐рм╣рмд рмХрм░рм┐рмм рммрм┐рмЬрнЗрмкрм┐ред

    рмЖрмЙ рмХрмВрмЧрнНрм░рнЗрм╕ рнпрм░рнБ рнпрнж рмЖрм╕рмирм░ рм╕рнНрн▒рмкрнНрмирмХрнБ рм╕рм╛рмХрм╛рм░ рмХрм░рм┐рммрм╛рмХрнБ рмдрнГрмгрморнВрм│рм╕рнНрмдрм░рм░рнЗ рм╕рмВрмЧрмармирмХрнБ рм╕рнБрмжрнГрмв рмЙрмкрм░рнЗ рмзрнНрнЯрм╛рми рмХрнЗрмирнНрмжрнНрм░рнАрмнрнВрмд рмХрм░рнБрмерм┐рммрм╛ рмХрмерм╛ рмХрм╣рнБрмЫрм┐ред рмПрмХрмдрм╛рм░ рморнВрм│рмормирнНрмдрнНрм░рмХрнБ рмкрм╛рмернЗрнЯ рмХрм░рм┐ рмЬрмирмдрм╛рм░ рмЖрм╕рнНрмерм╛рмнрм╛рмЬрми рм╣рнЗрммрм╛ рм▓рм╛рмЧрм┐ рмжрм┐рмирм░рм╛рмдрм┐ рмПрмХ рмХрм░рнБрмЫрм┐ рммрнЛрм▓рм┐ рмжрм│ рмХрм╣рнБрмЫрм┐ред

    рм▓рнЛрмХрмкрнНрм░рм┐рнЯрмдрм╛рм░рнЗ рмХрм┐рмП рм╢рнАрм░рнНрм╖рм░рнЗ рмПрм╣рм╛ рмХрм╛рм╣рм╛рмХрнБ рмЕрмЫрмкрм╛ рмирм╛рм╣рм┐рмБред рмЬрмирмормдрмХрнБ рмнрнЛрмЯрм░рнЗ рммрмжрм│рм╛рмЗрммрм╛ рмжрмХрнНрм╖рмдрм╛рм░рнЗ рммрм┐рмЬрнЗрмбрм┐ рм╢рнАрм░рнНрм╖рм░рнЗред рммрм┐рмЬрнЗрмкрм┐ рмЖрмЬрм┐ рмкрнНрм░рмдрм┐ рморнВрм╣рнВрм░рнНрмдрнНрмдрм░рнЗ рмХрмбрм╛ рмЯрмХрнНрмХрм░ рмжрнЗрмЙрмЫрм┐ рммрм┐рмЬрнЗрмбрм┐ рм╕рм╣ред рмХрмВрмЧрнНрм░рнЗрм╕ рмирм┐рмЬрм░ рмЕрм╕рнНрмдрм┐рмдрнНрн▒ рм░рмХрнНрм╖рм╛ рм╕рм╣ рмЬрмирмдрм╛рм░ рмЖрм╕рнНрмерм╛рмнрм╛рмЬрми рм╣рнЗрммрм╛ рм▓рм╛рмЧрм┐ рмирм┐рм░рмирнНрмдрм░ рм▓рнЛрмХрмЩрнНрмХ рмкрм╛рмЦрмХрнБ рмпрм╛рмЙрмЫрм┐ред рмПрмнрм│рм┐ рм╕рнНрмерм┐рмдрм┐рм░рнЗ рнирнк рморм╣рм╛рм╕рморм░ рмХрнЗрморм┐рмдрм┐ рмХрм╛рм╣рм╛рмХрнБ рмХрнЗрмЙрмБ рмнрнВрморм┐рмХрм╛рм░рнЗ рм░рмЦрм┐рмм, рмдрм╛рм╣рм╛ рмУрмбрм╝рм┐рм╢рм╛рммрм╛рм╕рнА рмирм┐рм░рнНрмжрнНрмзрм╛рм░рмг рмХрм░рм┐рммрнЗред

    рмирммрмХрм┐рм╢рнЛрм░ рм╕рм╛рм╣рнБ, рм╕рнНрн▒рм░рнВрмкрм╛ рморм╣рм╛рмкрм╛рмдрнНрм░ рмУ рмкрнНрм░рмжрнАрмк рмирм╛рнЯрмХрмЩрнНрмХ рм░рм┐рмкрнЛрм░рнНрмЯ

  • рмХрм┐рмП рмЙрмдрнНрмХрм│рмормгрм┐рмЩрнНрмХ рмЙрмдрнНрмдрм░рм╛рмзрм┐рмХрм╛рм░рнА?

    () рмЙрмдрнНрмХрм│рмормгрм┐рмЩрнНрмХ рмЙрмдрнНрмдрм░рм╛рмзрм┐рмХрм╛рм░рнА рмХрм┐рмПред рмПрм╣рм╛рмХрнБ рмирнЗрмЗ рмерм╛рмирм╛рм░рнЗ рмкрм╣рмЮрнНрмЪрм┐рмЫрм┐ рморм╛рморм▓рм╛ред рмпрм╛рм╣рм╛рмХрнБ рмирнЗрмЗ рм╕рммрнБрмарм┐ рмЖрм▓рнЛрмбрм╝рмиред рмлрнЗрммрнГрмЖрм░рнА рнирнйрм░рнЗ рмЙрмдрнНрмХрм│рмормгрм┐рмЩрнНрмХ рмЬрмирнНрмормкрнАрмарм░ рмХрм╛рнЯрм╛рмХрм│рнНрмк рмЙрмдрнНрм╕рмм рмормЮрнНрмЪрм░рнЗ рм░рм╛рмЬрнНрнЯ рм╕рм░рмХрм╛рм░рмЩрнНрмХ рмкрмХрнНрм╖рм░рнБ рмЧрнЛрмкрммрмирнНрмзрнБрмЩрнНрмХ рмжрм╛рнЯрм╛рмжрмЩрнНрмХрнБ рм╕рморнНрморм╛рмирм┐рмд рмХрм░рм╛рмпрм╛рмЗрмерм┐рм▓рм╛ред рмХрм┐рмирнНрмдрнБ рмпрм╛рм╣рм╛рмЩрнНрмХрнБ рм╕рморнНрморм╛рмирм┐рмд рмХрм░рм╛рмпрм╛рмЗрмерм┐рм▓рм╛, рм╕рнЗрморм╛рмирнЗ рмкрнНрм░рмХрнГрмд рмжрм╛рнЯрм╛рмж рмирнБрм╣рмБрмирнНрмдрм┐ рмХрм╣рм┐ рммрм┐рммрм╛рмж рмкрм╣рмЮрнНрмЪрм┐рмЫрм┐ рмерм╛рмирм╛рм░рнЗред

    рмЙрмдрнНрмХрм│рмормгрм┐рмЩрнНрмХ рмЙрмдрнНрмдрм░рм╛рмзрм┐рмХрм╛рм░рнА рмХрм┐рмПред рмПрм╣рм┐ рммрм┐рммрм╛рмж рмПрммрнЗ рмерм╛рмирм╛рм░рнЗред рмлрнЗрммрнГрмЖрм░рнА рнирнйрм░рнЗ рмЙрмдрнНрмХрм│рмормгрм┐рмЩрнНрмХ рмЬрмирнНрмормкрнАрмарм░ рмХрм╛рнЯрм╛рмХрм│рнНрмк рм╣рнЛрмЗрмерм┐рм▓рм╛ред рм╕рнБрмЖрмгрнНрмбрнЛрм░рнЗ рмЧрнЛрмкрммрмирнНрмзрнБрмЩрнНрмХ рм░рнВрмкрм╛рмирнНрмдрм░рм┐рмд рмЬрмирнНрмормкрнАрмармХрнБ рм▓рнЛрмХрм╛рм░рнНрмкрм┐рмд рмХрм░рм┐рмерм┐рм▓рнЗ рморнБрмЦрнНрнЯрмормирнНрмдрнНрм░рнАред рмЙрмдрнНрмХрм│рмормгрм┐рмЩрнНрмХ рм╕рнНрморнГрмдрм┐ рм░рмХрнНрм╖рм╛ рм▓рм╛рмЧрм┐ рмпрнЗрмдрнЗ рмпрм╛рм╣рм╛ рмХрм▓рнЗ рммрм┐ рмХрморнН рм╣рнЗрмм рммрнЛрм▓рм┐ рмХрм╣рм┐рмерм┐рм▓рнЗ рмирммрнАрмиред рмЖрмЙ рмормЮрнНрмЪрм░рнЗ рм░рм╛рмЬрнНрнЯ рм╕рм░рмХрм╛рм░рмЩрнНрмХ рмкрмХрнНрм╖рм░рнБ рмЧрнЛрмкрммрмирнНрмзрнБрмЩрнНрмХ рмжрм╛рнЯрм╛рмжрмЩрнНрмХрнБ рммрм┐ рм╕рморнНрморм╛рмирм┐рмд рмХрм░рм╛рмпрм╛рмЗрмерм┐рм▓рм╛ред рмормЮрнНрмЪрм░рнЗ рмЧрнЛрмкрммрмирнНрмзрнБрмЩрнНрмХ рмЙрмдрнНрмдрм░рм╛рмзрм┐рмХрм╛рм░рнА рмзрнАрм░рнЗрмирнНрмжрнНрм░рмирм╛рме рмжрм╛рм╕рмЩрнНрмХ рмХрнНрм░рморм╛рмЧрмд рмЙрмжрнНрнЯрмормХрнБ рммрм┐ рмнрнВрм░рм┐ рмнрнВрм░рм┐ рмкрнНрм░рм╢рмВрм╕рм╛ рмХрм░рм┐рмерм┐рм▓рнЗ рмормЮрнНрмЪрм╛рм╕рнАрми рмЕрмдрм┐рмерм┐ред рм╣рнЗрм▓рнЗ рмзрнАрм░рнЗрмирнНрмжрнНрм░рмирм╛рме рмЧрнЛрмкрммрмирнНрмзрнБрмЩрнНрмХ рмкрнНрм░рмХрнГрмд рмжрм╛рнЯрм╛рмж рмирнБрм╣рмБрмирнНрмдрм┐ рмХрм╣рм┐ рморм╛рморм▓рм╛ рмПрммрнЗ рмкрм╣рмЮрнНрмЪрм┐рмЫрм┐ рмерм╛рмирм╛рм░рнЗред рм╕рмдрнНрнЯрммрм╛рмжрнА рмерм╛рмирм╛рм░рнЗ рмЙрмдрнНрмХрм│рмормгрм┐рмЩрнНрмХ рмЕрмгрмирм╛рмдрм┐ рмХрм╛рм│рнАрмкрнНрм░рм╕рмирнНрми рморм┐рм╢рнНрм░ рмУ рмкрмгрмирм╛рмдрм┐ рмЖрмжрнНрнЯрм╕рм┐рмжрнНрмзрм┐ рморм┐рм╢рнНрм░ рмЕрмнрм┐рмпрнЛрмЧ рмХрм░рм┐рмЫрмирнНрмдрм┐ред

    рм╕рнЗрмкрмЯрнЗ рмзрнАрм░рнЗрмирнНрмжрнНрм░рмирм╛рме рмжрм╛рм╕ рмПрмнрм│рм┐ рмЕрмнрм┐рмпрнЛрмЧрмХрнБ рмкрнНрм░рм╣рм╕рми рммрнЛрм▓рм┐ рмХрм╣рм┐рмЫрмирнНрмдрм┐ред рмЙрмдрнНрмХрм│рмормгрм┐рмЩрнНрмХ рмЙрмдрнНрмдрм░рм╛рмзрм┐рмХрм╛рм░рнА рмХрм┐рмП, рмдрм╛рмХрнБ рмирнЗрмЗ рмЙрмЪрнНрмЪ рмирнНрнЯрм╛рнЯрм╛рм│рнЯрм░рнБ рм╕рнНрмкрм╖рнНрмЯ рм░рм╛рнЯ рмЖрм╕рм┐рм╕рм╛рм░рм┐рмЫрм┐ред рмЖрмЙ рмерм╛рмирм╛ рмЕрмзрм┐рмХрм╛рм░рнА рмХрм╣рм┐рмЫрмирнНрмдрм┐, рммрм┐рммрм╛рмж рмирнЗрмЗ рм╣рнЛрмЗрмерм┐рммрм╛ рмЕрмнрм┐рмпрнЛрмЧрм░ рмдрмжрмирнНрмд рмкрм░рнЗ рмЖрмХрнНрм╕рми рм╣рнЗрммред

    рм╕рнБрмЖрмгрнНрмбрнЛ рмкрнНрм░рмХрм│рнНрмк рм▓рнЛрмХрм╛рм░рнНрмкрмгрм░рнЗ рмирм╛рмдрнБрмгрнА рммрнЛрм╣рнВ рм▓рнАрм│рм╛рммрмдрнА рморм┐рм╢рнНрм░рмЩрнНрмХрнБ рмЕрм╕рморнНрморм╛рми рмХрм░рм╛рмпрм╛рмЗрмерм┐рммрм╛ рмЕрмнрм┐рмпрнЛрмЧ рм╣рнЛрмЗрмЫрм┐ред рнорнл рммрм░рнНрм╖рнАрнЯрм╛ рмирм╛рмдрнБрмгрнА рммрнЛрм╣рнВ рм▓рнАрм│рммрмдрнА рм╕рнЗ рмжрм┐рми рм╕рнБрмЖрмгрнНрмбрнЛрм░рнЗ рмкрм╣рмЮрнНрмЪрм┐рмерм┐рм▓рнЗ рммрм┐ рмкрнБрм▓рм┐рм╕ рм╕рнЗрмарм╛рмХрнБ рмпрм┐рммрм╛рмХрнБ рмЕрмирнБрмормдрм┐ рмжрнЗрмЗрмирмерм┐рммрм╛ рмЕрмнрм┐рмпрнЛрмЧ рмЖрм╕рм┐рмЫрм┐ред

    рмкрм┐рмкрм┐рм▓рм┐рм░рнБ рм╕рмирнНрмдрнЛрм╖ рмкрнНрм░рмзрм╛рмирмЩрнНрмХ рм╕рм╣ рмнрнБрммрмирнЗрм╢рнНрн▒рм░рм░рнБ рмкрнНрм░рмжрнАрмк рмирм╛рнЯрмХрмЩрнНрмХ рм░рм┐рмкрнЛрм░рнНрмЯ

  • рм░рм╛рмЬрнНрнЯ рмжрнЗрмЦрм┐рмм рнй рмжрм┐рмирм┐рмЖ рмкрм▓рм┐рмЯрм┐рмХрм╛рм▓ рмбрнНрм░рм╛рморм╛

    () рммрм┐рмЬрнЗрмбрм┐ рмУ рммрм┐рмЬрнЗрмкрм┐ рмормзрнНрнЯрм░рнЗ рмЖрм░рморнНрмн рм╣рнЛрмЗ рмпрм╛рмЗрмЫрм┐ рмкрм▓рм┐рмЯрм┐рмХрм╛рм▓ рн▒рм╛рм░ред рмЙрмнрнЯ рммрм╛рмЫрм┐ рм╕рм╛рм░рм┐рмЫрмирнНрмдрм┐ рмкрнНрм░рм╕рмЩрнНрмЧ ред рммрм┐рмЬрнЗрмбрм┐ рмЪрм╛рмЙрм│ рмУ рммрм┐рмЬрнЗрмкрм┐ рмЖрмЗрми рм╢рнГрмЩрнНрмЦрм│рм╛ рмкрм░рм┐рм╕рнНрмерм┐рмдрм┐рмХрнБ рмирнЗрмЗ рмЖрмирнНрмжрнЛрм│рми рмХрм░рм┐рммрнЗред рмЖрм╕рмирнНрмдрм╛ рнзрнк,рнзрнл рмУ рнзрнм рмдрм╛рм░рм┐рмЦрм░рнЗ рмдрм┐рмирм┐ рмжрм┐рми рмзрм░рм┐ рм░рм╛рмЬрмзрм╛рмирнАрм░рнБ рмЖрм░рморнНрмн рмХрм░рм┐ рмЧрм╛рмБ рмкрм░рнНрмпрнНрнЯрмирнНрмд рмкрнНрм░рмдрм┐рммрм╛рмж рмЙрмнрнЯрмЩрнНрмХ рмкрмХрнНрм╖рм░рнБ рмЖрм░рморнНрмн рм╣рнЛрмЗрмЫрм┐ ред рмПрмкрнЗрмЯрнЗ рмЖрмирнНрмжрнЛрм│рмирмХрнБ рм░рм╛рмЬрмирнИрмдрм┐рмХ рмбрнНрм░рм╛рморм╛ рмХрм╣рм┐рмЫрм┐ рмХрмВрмЧрнНрм░рнЗрм╕ ред

    рммрм┐рмЬрнЗрмбрм╝рм┐ рммрмирм╛рмо рммрм┐рмЬрнЗрмкрм┐ ред рмЪрм╛рмЙрм│ рммрмирм╛рмо рмЖрмЗрми рм╢рнГрмЩрнНрмЦрм│рм╛ ред рм░рм╛рмЬрнНрнЯ рмжрнЗрмЦрм┐рмм рнй рмжрм┐рмирм┐рмЖ рмкрм▓рм┐рмЯрм┐рмХрм╛рм▓ рмбрнНрм░рм╛рморм╛ ред рм░рм╛рмЬрмзрм╛рмирнАрм░рнБ рмЧрм╛рмБ рмкрм░рнНрмпрнНрнЯрмирнНрмд рмЧрм░рнНрмЬрм┐рммрнЗ рмЙрмнрнЯ рмжрм│ ред рмХрмВрмЧрнНрм░рнЗрм╕ рмХрм╣рм┐рм▓рм╛ рмирм┐рм░рнНрммрм╛рмЪрмирнА рмбрнНрм░рм╛рморм╛ ред рморнБрмгрнНрмб рмЙрмкрм░рнЗ рм╕рм╛рмзрм╛рм░рмг рмирм┐рм░рнНрммрм╛рмЪрми рмерм┐рммрм╛рм░рнБ рмирм┐рмЬ рмирм┐рмЬрм░ рм░рм╛рмЬрмирнИрмдрм┐рмХ рморнБрмжрнНрмжрм╛ рмзрм░рм┐ рмЖрмирнНрмжрнЛрм│рми рморнБрм╣рм╛рмБ рм╣рнЗрм▓рнЗрмгрм┐ рмжрм│ред рмЪрм╛рмЙрм│ рмкрнНрм░рм╕рмЩрнНрмЧрмХрнБ рмзрм░рм┐ рмХрнЗрмирнНрмжрнНрм░ рм╕рм░рмХрм╛рм░рмЩрнНрмХрнБ рммрм┐рмЬрнЗрмбрм┐ рмШрнЗрм░рм┐рммрм╛рмХрнБ рмерм┐рммрм╛ рммрнЗрм│рнЗ рмормирнНрмдрнНрм░рнА рмирмм рмжрм╛рм╕ рм╣рмдрнНрнЯрм╛рмХрм╛рмгрнНрмб рмУ рмЖрмЗрмирм╢рнГрмЩрнНрмЦрм│рм╛рмХрнБ рмирнЗрмЗ рм░рм╛рмЬрнНрнЯ рм╕рм░рмХрм╛рм░рмЩрнНрмХрнБ рмШрнЗрм░рм┐рмм рммрм┐рмЬрнЗрмкрм┐ ред рмПрм╣рм╛рм░рм┐ рмнрм┐рмдрм░рнЗ рмЖрм╕рмирнНрмдрм╛ рнзрнк,рнзрнл,рнзрнм рмдрм╛рм░рм┐рмЦрм░рнЗ рмкрнНрм░рмзрм╛рмирмормирнНрмдрнНрм░рнА рмЧрм░рм┐рмм рмХрм▓рнНрнЯрм╛рмг рмЕрмирнНрми рмпрнЛрмЬрмирм╛рм░рнЗ рнл рмХрнЗрмЬрм┐ рмЪрм╛рмЙрм│ рмХрм╛рмЯрм┐рммрм╛рмХрнБ рм░рм╛рмЬрмирнИрмдрм┐рмХ рмЕрм╕рнНрмдрнНрм░ рмХрм░рм┐ рнзрнк рмдрм╛рм░рм┐рмЦрм░рнЗ рм░рм╛рмЬрмнрммрми рм╕рм╛рморнНрмирм╛рм░рнЗ рмзрм╛рм░рмгрм╛ рмжрнЗрмм рм╢рмЩрнНрмЦ рмжрм│ред рмдрм╛рм╣ рм╕рм╣ рнзрнл рм░рнЗ рмкрмЮрнНрмЪрм╛рнЯрмд рмУ рнзрнмрм░рнЗ рммрнНрм▓рмХ рмУ рмЬрм┐рм▓рнНрм▓рм╛рмкрм╛рм│ рмЕрмлрм┐рм╕ рм╕рм╛рморнНрмирм╛рм░рнЗ рммрм╕рм┐рмм рмжрм│ред рм╕рнЗрм╣рм┐рмкрм░рм┐ рммрм┐рмЬрнЗрмкрм┐ рмормзрнНрнЯ рм░рм╛рмЬрнНрнЯрм░рнЗ рмЖрмЗрми рм╢рнГрмЩрнНрмЦрм│рм╛ рмкрм░рм┐рм╕рнНрмерм┐рмдрм┐ рмУ рмирмм рмжрм╛рм╕ рм╣рмдрнНрнЯрм╛рмХрм╛рмгрнНрмбрмХрнБ рмирнЗрмЗ рмкрнНрм░рмдрнНрнЯрнЗрмХ рмжрм┐рми рмирнВрмЖ рмирнВрмЖ рмЧрмк рмХрм╣рм┐ рмдрмжрмирнНрмдрмХрнБ рммрм╛рмЯрммрмгрм╛ рмХрм░рм╛рмпрм╛рмЙрмерм┐рммрм╛ рмЕрмнрм┐рмпрнЛрмЧрм░рнЗ рнй рмжрм┐рмирм┐рмЖ рмзрм╛рм░рмгрм╛ рмжрнЗрммред рм╕рнЗрм╣рм┐рмХрнНрм░рморм░рнЗ рнзрнк рмдрм╛рм░рм┐рмЦрм░рнЗ рмнрнБрммрмирнЗрм╢рнНрн▒рм░рм░рнЗ рм╣рм░рмдрм╛рм│ рмХрм░рм┐рмм ред рм╕рнЗрм╣рм┐рмкрм░рм┐ рнзрнл рмдрм╛рм░рм┐рмЦрм░рнЗ рмЬрм┐рм▓рнНрм▓рм╛рмкрм╛рм│ рмЕрмлрм┐рм╕ рмУ рнзрнм рмдрм╛рм░рм┐рмЦрм░рнЗ рм░рм╛рмЬрмнрммрми рм╕рм╛рморнНрмирм╛рм░рнЗ рмзрм╛рм░рмгрм╛ рмжрнЗрмм рммрм┐рмЬрнЗрмкрм┐ ред

    рмЬрм╛рмдрнАрнЯ рмЦрм╛рмжрнНрнЯ рм╕рнБрм░рмХрнНрм╖рм╛ рмЖрмЗрми рмЖрмзрм╛рм░рм░рнЗ рм╕рморм╕рнНрмдрмЩрнНрмХрнБ рмЪрм╛рмЙрм│ рмжрнЗрммрм╛ рммрм╛рмзрнНрнЯрмдрм╛ рморнВрм│рмХред рмпрм┐рмП рм╢рм╛рм╕рми рмжрм╛рнЯрм┐рмдрнНрн▒рм░рнЗ рм░рм╣рм┐рммрнЗ рм╕рнЗ рмП рмХрм╛рмо рмХрм░рм┐рммрнЗ ред рмХрм┐рмирнНрмдрнБ рмЙрмнрнЯ рмХрнЗрмирнНрмжрнНрм░ рмУ рм░рм╛рмЬрнНрнЯ рмЪрм╛рмЙрм│рмХрнБ рмирнЗрмЗ рмбрнНрм░рм╛рморм╛ рмХрм░рнБрмерм┐рммрм╛ рмХрмВрмЧрнНрм░рнЗрм╕ рмХрм╣рм┐рмЫрм┐ ред рмдрм╛ рм╕рм╣ рмЖрмЗрмирм╢рнГрмЩрнНрмЦрм│рм╛ рмжрнГрм╖рнНрмЯрм┐рм░рнБ  рм░рм╛рмЬрнНрнЯрм░ рм╕рнНрмерм┐рмдрм┐ рмЪрм┐рмирнНрмдрм╛рмЬрмирмХ рммрнЛрм▓рм┐ рмжрм│ рмХрм╣рм┐рмЫрм┐ ред

    рмдрнЗрммрнЗ рм╕рм╛рмзрм╛рм░рмг рмирм┐рм░рнНрммрм╛рмЪрми рмкрнВрм░рнНрммрм░рнБ рммрм┐рмнрм┐рмирнНрми рммрм┐рмзрм╛рмирм╕рмнрм╛ рмУ рм╕рмВрм╕рмжрнАрнЯ рмХрнНрм╖рнЗрмдрнНрм░рмХрнБ рмирнЗрмдрм╛ рмормирнНрмдрнНрм░рнАрмЩрнНрмХ рморм╛рм░рм╛рмерми рмЧрм╕рнНрмд рмЖрм░рморнНрмн рм╣рнЛрмЗрмпрм╛рмЗрмЫрм┐ред рмПрм╣рм┐ рмХрнНрм░рморм░рнЗ рморнБрмЦрнНрнЯрмормирнНрмдрнНрм░рнАрмЩрнНрмХрм░ рм╕рнЛрморммрм╛рм░ рмХрнЗрмирнНрмжрнБрмЭрм░ рмЬрм┐рм▓рнНрм▓рм╛ рмЧрм╕рнНрмд рм╕рм░рм┐рмЫрм┐ рмЖрмЙ рмЖрм╕рмирнНрмдрм╛ рнзрнпрм░рнЗ рмкрмжрнНрмормкрнБрм░ рмЧрм╕рнНрмд рмХрм╛рм░рнНрмпрнНрнЯрмХрнНрм░рмо рм░рм╣рм┐рмЫрм┐ ред рм╕рнЗрм╣рм┐рмкрм░рм┐ рморм╛рм░рнНрмЪрнНрмЪ рмкрнНрм░рмермо рм╕рмкрнНрмдрм╛рм╣рм░рнЗ рммрм┐рмЬрнЗрмкрм┐рм░ рмЪрм╛рмгрмХрнНрнЯ рмдрмерм╛ рмХрнЗрмирнНрмжрнНрм░рмЧрнГрм╣ рмормирнНрмдрнНрм░рнА рмЕрморм┐рмд рм╢рм╛рм╣рм╛ рмврнЗрмЩрнНрмХрм╛рмирм╛рм│ рмУ рмнрмжрнНрм░рмХ рм╕рмВрм╕рмжрнАрнЯ рмХрнНрм╖рнЗрмдрнНрм░ рмЧрм╕рнНрмд рмирнЗрмЗ рмжрм│ рм╕рнВрмЪрмирм╛ рмжрнЗрмЗрмЫрм┐ редрм╕рнЗрмкрмЯрнЗ рмХрмВрмЧрнНрм░рнЗрм╕ рмкрнВрм░рнНрммрм░рнБ рмкрнНрм░рм┐рнЯрмЩрнНрмХрм╛рмЩрнНрмХ рмУрмбрм╝рм┐рм╢рм╛ рмЧрм╕рнНрмд рмХрмерм╛ рмХрм╣рм┐рмерм┐рм▓рнЗ рммрм┐ рмЖрмЬрм┐ рмжрм┐рмирм░рнЗ рмХрм┐рмЫрм┐ рмирм┐рм░рнНрмжрнНрмзрм┐рм╖рнНрмЯ рм╕рморнЯ рмХрмерм╛ рмХрм╣рм┐рмкрм╛рмирм┐ редрмХрм┐рмирнНрмдрнБ рмкрнНрм░рмдрм┐ рмжрм│ рмЪрм│рмЪрмЮрнНрмЪрм│ рмПрмХрмерм╛ рм╕рнНрмкрм╖рнНрмЯ рмжрнЗрмЦрм┐ рм╣рнЗрмЙрмЫрм┐ ред

    рмирмм рмХрм┐рм╢рнЛрм░ рм╕рм╛рм╣рнБрмЩрнНрмХ рм░рм┐рмкрнЛрм░рнНрмЯ

  • рм░рнМрмкрнНрнЯ рмЬрнЯрмирнНрмдрнАрм░рнБ рнирнк рмкрм╛рмЗрмБ рммрм┐рмЬрнЗрмбрм┐рм░ рм░рмгрмирнАрмдрм┐

    () рм░рнМрмкрнНрнЯ рмЬрнЯрмирнНрмдрнАрм░рнБ рнирнк рмкрм╛рмЗрмБ рм░рмгрмирнАрмдрм┐ рмХрм▓рм╛ рммрм┐рмЬрнЗрмбрм┐ред рнирнл рммрм░рнНрм╖рм░рнБ рнирни рммрм░рнНрм╖ рмирм┐рм░рмирнНрмдрм░ рм╢рм╛рм╕рми рмХрнНрм╖рмормдрм╛рм░рнЗ рмерм┐рммрм╛ рмжрм│ рнирнкрм░рнЗ рммрм┐ рмирм┐рмЬрм░ рм╕рнЗрммрм╛ рмормирнНрмдрнНрм░ рм▓рм╛рмЧрм┐ рмкрнБрмгрм┐ рмЬрмирмдрм╛рмЩрнНрмХ рмЖрм╢рнАрм░рнНрммрм╛рмжрм░рнБ рмХрнНрм╖рмормдрм╛рм░рнЗ рммрм╕рм┐рмм рммрнЛрм▓рм┐ рмЖрм╢рм╛ рм░рмЦрм┐рмЫрм┐ред рмУрмбрм╝рм┐рм╢рм╛рм░ рммрм┐рмХрм╛рм╢рм░ рм╕рмВрмХрм│рнНрмк рмирнЗрмЗ рмкрнБрм░рнА рмдрм╛рм│рммрмгрм┐рмЖ рмкрмбрм╝рм┐рмЖрм░рнБ рмлрнЗрм░рм┐рмЫрмирнНрмдрм┐ рмирнЗрмдрм╛ рмУ рмХрм░рнНрморнАред рмЖрмЙ рмжрм│рм░ рм╕рнБрмкрнНрм░рм┐рморнЛ рмд рмХрм╣рм┐рмЫрмирнНрмдрм┐, рморм╛ рморм╛рмирнЗ рмЪрм╛рм╣рм┐рмБрм▓рнЗ рммрм┐рмЬрнЗрмбрм┐ рнзрнжрнж рммрм░рнНрм╖ рмкрм░рнНрмпрнНрнЯрмирнНрмд рмХрм╛рмо рмХрм░рм┐рммред

    рнзрнпрнпрннрм░рнЗ рмЬрмирнНрмо рм╣рнЗрммрм╛ рмкрм░рнЗ рммрм┐рмЬрнЗрмбрм┐рм░ рмЕрм╕рнНрмдрм┐рмдрнНрн▒рмХрнБ рмирнЗрмЗ рмЙрмарм┐рмерм┐рммрм╛ рмЕрмирнЗрмХ рмЖрмХрм│рми, рмЖрм╢рмЩрнНрмХрм╛, рмЙрмкрм╣рм╛рм╕ рмУ рмкрм░рм┐рм╣рм╛рм╕рмХрнБ рмкрмЫрмХрнБ рмарнЗрм▓рм┐рмжрнЗрмЗ рмЖрмЧрнЗрмЗ рмЪрм╛рм▓рм┐рмЫрм┐ рмжрм│ред рморм╣рм┐рм│рм╛ рм╕рм╢рмХрнНрмдрм┐рмХрм░рмг рмЙрмкрм░рнЗ рмЕрмзрм┐рмХ рмЧрнБрм░рнБрмдрнНрн▒ рмжрнЗрмЗ рмирм┐рмЬрм░ рмнрнЛрмЯ рммрнНрнЯрм╛рмЩрнНрмХрмХрнБ рм╕рнБрмжрнГрмврм╝ рмХрм░рм┐рмкрм╛рм░рм┐рмерм┐рммрм╛ рмжрм│ рмУ рмПрм╣рм╛рм░ рм╕рнБрмкрнНрм░рм┐рморнЛрмЩрнНрмХ рмнрм╛рммрморнВрм░рнНрмдрнНрмдрм┐ рм╣рм┐рмБ рмжрм│рмХрнБ рмХрнНрм░рморм╛рмЧрмд рм╕рмлрм│рмдрм╛ рмжрнЗрмЗрмЪрм╛рм▓рм┐рмЫрм┐ред рмкрнБрм░рнА рмдрм╛рм│рммрмгрм┐рмЖ рмкрмбрм╝рм┐рмЖрм░рнЗ рмжрм│рм░ рм░рнМрмкрнНрнЯрмЬрнЯрмирнНрмдрнАрм░рнЗ рморнБрмЦрнНрнЯрмормирнНрмдрнНрм░рнА рмХрм╣рм┐рмЫрмирнНрмдрм┐ рмпрнЗ, рморм╛ рморм╛рмирнЗ рмЪрм╛рм╣рм┐рмБрм▓рнЗ рммрм┐рмЬрнЗрмбрм┐ рмЖрм╣рнБрм░рм┐ рм╢рм╣рнЗ рммрм░рнНрм╖ рм░рм╣рм┐рммред рмУрмбрм╝рм┐рм╢рм╛ рм▓рм╛рмЧрм┐ рмХрм╛рмо рмХрм░рм┐рммрм╛рмХрнБ рмЪрм╛рм╣рнБрмБрмерм┐рммрм╛ рммрм░рнНрмЧ рммрм┐рмЬрнЗрмбрм┐рм░рнЗ рморм┐рм╢рмирнНрмдрнБ рммрнЛрм▓рм┐ рмЕрмкрм┐рм▓рнН рмХрм░рм┐рмЫрмирнНрмдрм┐ рмирммрнАрмиред

    рм╕рнЗрмкрмЯрнЗ рм╕рнЗрммрм╛ рм╣рм┐рмБ рмкрнНрм░рмдрм┐рм╖рнНрмарм╛ рмжрм┐рммрм╕рм░ рмкрнНрм░рмдрнАрмХ рммрнЛрм▓рм┐ рмХрм╣рм┐рмЫрмирнНрмдрм┐ рмжрм│рм░ рм╕рмВрмЧрмарми рм╕рморнНрмкрм╛рмжрмХ рмкрнНрм░рмгрмм рмкрнНрм░рмХрм╛рм╢ рмжрм╛рм╕ред рмирммрнАрмирмЩрнНрмХ рмирморнНрм░рмдрм╛, рм╢рм╛рм│рнАрмирмдрм╛ рмУ рмЕрморм╛рнЯрм┐рмХ рммрнНрнЯрммрм╣рм╛рм░рм░рнБ рммрм┐рм░рнЛрмзрнА рмХрм┐рмЫрм┐ рм╢рм┐рмЦрмирнНрмдрнБ рммрнЛрм▓рм┐ рмкрм░рм╛рморм░рнНрм╢ рмжрнЗрмЗрмЫрмирнНрмдрм┐ рмЕрм░рнБрмгред рммрм┐рмЬрнБ рмЖрмжрм░рнНрм╢ рмУ рмирммрнАрмирм┐рмЬрм┐рморнН рмПрм╣рм┐ рмжрнБрмЗрмЯрм┐ рмормирнНрмдрнНрм░рм░рнЗ рмжрм│рмХрнБ рмЖрмЧрнЗрмЗрмирнЗрммрм╛рмХрнБ рмкрмбрм╝рм┐рмм рммрнЛрм▓рм┐ рмХрм╣рм┐рмЫрмирнНрмдрм┐ рмЕрмдрмирнБред рмЖрмЙ рмкрм╛рмжрнЗ рмЖрмЧрнЗрмЗрмпрм╛рмЗ рм╕рнМрморнНрнЯ рмХрм╣рм┐рмЫрмирнНрмдрм┐, рммрм┐рм╢рнНрн▒рмЧрнБрм░рнБ рм╣рнЗрммрм╛рмХрнБ рморми рммрм│рм╛рмЙрмерм┐рммрм╛рм░рнБ рммрм┐рм╢рнНрн▒рмЧрнБрм░рнБ рм╣рнЗрммрм╛рмХрнБ рм╣рнЗрм▓рнЗ рморнЛрмжрм┐ рмЧрнБрм░рнБрмормирнНрмдрнНрм░ рмУрмбрм╝рм┐рм╢рм╛рм░рнБ рмирм┐рмЕрмирнНрмдрнБред

    рм╕рнЗрмкрмЯрнЗ рмкрнНрм░рмдрм┐рм╖рнНрмарм╛ рмжрм┐рммрм╕ рмормЮрнНрмЪрм░рнБ рмкрнНрм░рморм┐рм│рм╛ рмХрм╣рм┐рмерм┐рм▓рнЗ, рмжрм│рнЗ рмнрм╛рм░рмд рмЧрмврм╝рм┐рммрм╛ рмУ рмжрм│рнЗ рмнрм╛рм░рмд рмпрнЛрмбрм╝рм┐рммрм╛рм░рнЗ рм▓рм╛рмЧрм┐рмЫрмирнНрмдрм┐ред рмХрм┐рмирнНрмдрнБ рммрм┐рмЬрнЗрмбрм┐ рм▓рм╛рмЧрм┐ рмУрмбрм╝рм┐рм╢рм╛ рммрм┐рмХрм╛рм╢ рморнБрмЦрнНрнЯ рмПрмЬрнЗрмгрнНрмбрм╛ рмУ рнирнкрм░рнЗ рмкрнБрмгрм┐ рмерм░рнЗ рмирммрнАрмирмЩрнНрмХрнБ рм╖рм╖рнНрма рмерм░ рморнБрмЦрнНрнЯрмормирнНрмдрнНрм░рнА рмХрм░рм┐рммрм╛рмХрнБ рмкрм░рм┐рм╢рнНрм░рмо рмХрм░рм┐рммрм╛рмХрнБ рм╣рнЗрмм рммрнЛрм▓рм┐ рмЖрм╣рнНрн▒рм╛рми рмжрнЗрмЗрмЫрмирнНрмдрм┐ред рмЖрмЙ рммрм┐рмЬрнБ рмЖрмжрм░рнНрм╢рм░рнЗ рмжрм│ рмЪрм╛рм▓рнБрмЫрм┐ рмХрм┐ рмирм╛рм╣рм┐рмБ, рмкрнНрм░рмдрм┐рм╖рнНрмарм╛ рмжрм┐рммрм╕рм░рнЗ рмЖрмдрнНрморм╕рморнАрмХрнНрм╖рм╛ рмЬрм░рнБрм░рнА рммрнЛрм▓рм┐ рмормирнЗ рмкрмХрм╛рмЗрмжрнЗрмЗрмерм┐рм▓рнЗ рмкрнНрм░рм╕рмирнНрмиред

    рнирнл рммрм░рнНрм╖ рмдрм│рнЗ рмПрмХ рмЖрмЮрнНрмЪрм│рм┐рмХ рмжрм│ рмнрм╛рммрнЗ рморнБрмгрнНрмб рмЯрнЗрмХрм┐рмерм┐рммрм╛ рммрм┐рмЬрнЗрмбрм┐ рмЖрмЬрм┐ рмЬрми рмЖрмирнНрмжрнЛрм│рмирм░рнЗ рмкрм░рм┐рмгрмд рм╣рнЛрмЗрмЫрм┐ред рмирммрнАрмирмЩрнНрмХ рммрнНрнЯрмХрнНрмдрм┐рмдрнНрн▒, рмирнЗрмдрнГрмдрнНрн▒ рм╕рмлрм│рмдрм╛рм░ рммрмбрм╝ рмЪрм╛рммрм┐рмХрм╛рмарм┐ рм╣рнЛрмЗрмкрм╛рм░рнЗред рмХрм┐рмирнНрмдрнБ рмПрм╣рм╛ рм╕рм╣ рмжрм│рм░ рм╕рмарм┐рмХрнН рм░рмгрмирнАрмдрм┐ рмУ рм╢рнГрмЩрнНрмЦрм│рм╛ рммрм┐ рм╕рморм╛рмирнНрмдрм░рм╛рм│ рмнрм╛рммрнЗ рммрмбрм╝ рморм╛рмкрмХрм╛рмарм┐ рмнрм╛рммрнЗ рмкрнНрм░рмдрнАрнЯрморм╛рми рм╣рнЛрмЗрмЖрм╕рнБрмЫрм┐ред

    рмХрнЗрмжрм╛рм░рмирм╛рме рмжрм╛рм╕ рмУ рмкрнНрм░рмжрнАрмк рмирм╛рнЯрмХрмЩрнНрмХ рм░рм┐рмкрнЛрм░рнНрмЯ

  • рмкрнБрм░рнАрм░рнЗ рммрм┐рмЬрнЗрмбрм┐ рмкрм╛рм│рм┐рмм рмкрнНрм░рмдрм┐рм╖рнНрмарм╛ рмжрм┐рммрм╕

    рмкрнБрм░рнА:  рмкрнБрм░рнАрм░рнЗ рмЖрм╕рмирнНрмдрм╛ рнирнмрм░рнЗ рммрм┐рмЬрнЗрмбрм┐рм░ рмкрнНрм░рмдрм┐рм╖рнНрмарм╛ рмжрм┐рммрм╕ рмкрм╛рм│рми рмХрм░рм╛рмпрм┐рммред рмжрм│рм░ рм╕рнБрмкрнНрм░рм┐рморнЛ рморнБрмЦрнНрнЯрмормирнНрмдрнНрм░рнА рмирммрнАрми рмкрмЯрнНрмЯрмирм╛рнЯрмХ рмПрм╣рм┐ рмХрм╛рм░рнНрмпрнНрнЯрмХрнНрм░рморм░рнЗ рмпрнЛрмЧрмжрнЗрмЗ рмжрм│рм░ рмирнЗрмдрм╛ рмУ рмХрм░рнНрморнАрмЩрнНрмХрнБ рм╕рморнНрммрнЛрмзрм┐рмд рмХрм░рм┐рммрнЗред рмкрмЮрнНрмЪрм╛рнЯрмд, рммрнНрм▓рмХрнН рмУ рмЬрм┐рм▓рнНрм▓рм╛ рм╕рнНрмдрм░рм░ рмХрм╛рм░рнНрмпрнНрнЯрмХрм░рнНрмдрнНрмдрм╛ рмкрнНрм░рмдрм┐рм╖рнНрмарм╛ рмжрм┐рммрм╕рм░рнЗ рмпрнЛрмЧрмжрнЗрммрнЗред рмПрмерм┐рмкрм╛рмЗрмБ рммрм┐рмЬрнЗрмбрм╝рм┐ рмжрм│ рмкрмХрнНрм╖рм░рнБ рмЖрнЯрнЛрмЬрм┐рмд рмПрмХ рм╕рм╛рморнНрммрм╛рмжрм┐рмХ рм╕рморнНрморм┐рм│рмирнАрм░рнЗ рмкрнНрм░рмдрм┐рм╖рнНрмарм╛ рмжрм┐рммрм╕ рмЖрнЯрнЛрмЬрми рм╕рморнНрмкрм░рнНрмХрм░рнЗ рм╕рнВрмЪрмирм╛ рмжрм┐рмЖрмпрм╛рмЗрмЫрм┐ред рморм╣рм╛рмкрнНрм░рмнрнБ рм╢рнНрм░рнАрмЬрмЧрмирнНрмирм╛рмермЩрнНрмХ рмЖрм╢рнАрм░рнНрммрм╛рмж рмирнЗрмЗ рмжрм│ рмЖрмЧрмХрнБ рммрмврм╝рм┐рмм рммрнЛрм▓рм┐ рмжрм│рм░ рммрм░рм┐рм╖рнНрма рмирнЗрмдрм╛рморм╛рмирнЗ рмХрм╣рм┐рмЫрмирнНрмдрм┐ред

    рмкрнБрм░рнА рмдрм╛рм│рммрмгрм┐рмЖ рмкрмбрм╝рм┐рмЖрм░рнЗ рмЖрм╕рмирнНрмдрм╛ рнирнм рмдрм╛рм░рм┐рмЦрм░рнЗ рммрм┐рмЬрнЗрмбрм┐ рмкрм╛рм│рм┐рмм рнирнлрмдрмо рмкрнНрм░рмдрм┐рм╖рнНрмарм╛ рмжрм┐рммрм╕ред рмжрм│рм░ рнирнл рмдрмо рмкрнНрм░рмдрм┐рм╖рнНрмарм╛ рмжрм┐рммрм╕ рмкрм╛рм│рми рмирнЗрмЗ рмдрм╛рм│рммрмгрм┐рмЖ рмкрмбрм╝рм┐рмЖ рмарм╛рм░рнЗ рмкрнНрм░рм╕рнНрмдрнБрмдрм┐ рмХрм╛рм░рнНрмпрнНрнЯ рмЬрнЛрм░рм╕рнЛрм░рм░рнЗ рмЖрмЧрнЗрмЗ рмЪрм╛рм▓рм┐рмЫрм┐ред рммрм┐рмЬрнЗрмбрм╝рм┐ рмжрм│рм░ рм╕рм╛рмЩрнНрмЧрмармирм┐рмХ рм╕рморнНрмкрм╛рмжрмХ рмкрнНрм░рмгрмм рмкрнНрм░рмХрм╛рм╢ рмжрм╛рм╕, рммрм░рм┐рм╖рнНрма рмжрнЗрммрнАрмкрнНрм░рм╕рм╛рмж рморм┐рм╢рнНрм░, рмЕрм░рнБрмг рм╕рм╛рм╣рнБ, рмЙрморм╛рмХрм╛рмирнНрмд рм╕рм╛рмормирнНрмдрм░рм╛рнЯ, рмЕрмдрнБрми рм╕рммрнНрнЯрм╕рм╛рмЪрнА рмирм╛рнЯрмХ рмУ рмдрнБрм╖рм╛рм░рмХрм╛рмирнНрмдрм┐ рммрнЗрм╣рнЗрм░рм╛ рмкрнНрм░рморнБрмЦ рмдрм╛рм│рммрмгрм┐рмЖ рмкрмбрм╝рм┐рмЖ рмпрм╛рмЗ рмкрнНрм░рм╕рнНрмдрнБрмдрм┐ рмХрм╛рм░рнНрмпрнНрнЯрм░ рмЕрмирнБрмзрнНрнЯрм╛рми рмХрм░рм┐рмЫрмирнНрмдрм┐ред

    рнирнм рмдрм╛рм░рм┐рмЦ рм╕рмХрм╛рм│ рнпрмЯрм╛ рм░рнЗ рмжрм│ рмХрм░рнНрмормХрм░рнНрмдрнНрмдрм╛рморм╛рмирнЗ рмкрмЮрнНрмЬрм┐рмХрм░рмг рмХрм░рм┐рммрм╛ рмкрм░рнЗ рнзрнжрмЯрм╛ рм░рнБ рм╕рмнрм╛ рмХрм╛рм░рнНрмпрнНрнЯ рмЖрм░рморнНрмн рм╣рнЗрммред рмПрмерм┐рм░рнЗ рммрм┐рмЬрнЗрмбрм┐рм░ рм╕рм╛рмВрм╕рмж, рммрм┐рмзрм╛рнЯрмХ, рмЬрм┐рм▓рнНрм▓рм╛рмкрм░рм┐рм╖рмж, рм╕рм░рмкрмЮрнНрмЪрмЩрнНрмХ рм╕рм╣ рммрм┐рмЬрнЗрмбрм┐ рм╢рм╛рм╕рмирм░рнЗ рмерм┐рммрм╛ рморнНрнЯрнБрмирм┐рм╕рм┐рмкрм╛рм▓рм┐рмЯрм┐ рмПрммрмВ рмПрми рмП рм╕рм┐ рм░рм┐ рмирнЗрмдрм╛ рмУ рмХрм░рнНрмормХрм░рнНрмдрнНрмдрм╛, рммрм┐рмЬрнЗрмбрм┐рм░ рмЫрм╛рморнБрмЖ рм╕рмВрмЧрмарми, рмпрнБрмм рмУ рморм╣рм┐рм│рм╛ рм╕рмВрмЧрмарми, рмПрмПрм╕рм┐рмПрм╕рмЯрм┐, рмХрнГрм╖рмХ, рм╕рморммрм╛рнЯ рм╕рмЩрнНрмЧрмармирм░ рмХрм░рнНрмормХрм░рнНрмдрнНрмдрм╛ рмЙрмкрм╕рнНрмерм┐рмд рм░рм╣рм┐рммрнЗред рмкрнНрм░рмдрм┐рм╖рнНрмарм╛ рмжрм┐рммрм╕ рмЕрммрм╕рм░рм░рнЗ рмжрм│рм░ рм╕рнБрмкрнНрм░рм┐рморнЛ рмирммрнАрми рмкрмЯрнНрмЯрмирм╛рнЯрмХ рмХрм░рнНрмормХрм░рнНрмдрнНрмдрм╛рмЩрнНрмХрнБ рмЧрнБрм░рнБрмормирнНрмдрнНрм░ рмжрнЗрммрм╛рм░ рмХрм╛рм░рнНрмпрнНрнЯрмХрнНрм░рмо рм░рм╣рм┐рмЫрм┐ред

    рм╢рнНрм░рнАрмХрнНрм╖рнЗрмдрнНрм░рм░рнЗ рнирнж рммрм░рнНрм╖ рмкрнВрм░рнНрмдрнНрмдрм┐ рмЙрмдрнНрм╕рмм рмкрм╛рм│рми рмХрм░рм┐рмерм┐рм▓рм╛ рмжрм│ред рмЪрм│рм┐рмд рморм╛рм╕ рнирнмрм░рнЗ рмкрнБрм░рнАрм░рнЗ рмкрнБрмирм░рнНрммрм╛рм░ рмжрм│ рмкрм╛рм│рм┐рмм рнирнл рмдрмо рмкрнНрм░рмдрм┐рм╖рнНрмарм╛ рмжрм┐рммрм╕ред рмжрм│рм░ рм░рнМрмкрнНрнЯ рмЬрнЯрмирнНрмдрнАрмХрнБ рмЖрмирмирнНрмж рмЙрм▓рнНрм▓рм╛рм╕рм░рнЗ рмкрнБрм░рнАрм░рнЗ рмкрм╛рм│рми рмХрм░рм╛рмпрм┐рммред рморм╣рм╛рмкрнНрм░рмнрнБ рм╢рнНрм░рнАрмЬрмЧрмирнНрмирм╛рмермЩрнНрмХ рмЖрм╢рнАрм░рнНрммрм╛рмж рмирнЗрмЗ рмЖрм╕рмирнНрмдрм╛ рнирнжрнирнк рм╕рм╛рмзрм╛рм░рмг рмирм┐рм░рнНрммрм╛рмЪрми рмкрм╛рмЗрмБ рмжрм│ рмкрнБрм░рнАрм░рнБ рм╢рмЩрнНрмЦ рмирм╛рмж рмХрм░рм┐рмм рммрнЛрм▓рм┐ рммрм░рм┐рм╖рнНрма рмирнЗрмдрм╛ рморм╛рмирнЗ рмХрм╣рм┐рмЫрмирнНрмдрм┐ред

    рмЧрнЛрмЯрм┐рмП рмкрмЯрнЗ рм░рм╛рмЬрнНрнЯрм░рнЗ рмХрнЛрмнрм┐рмбрм░ рмнрнЯ рм╕рнГрм╖рнНрмЯрм┐ рм╣рнЛрмЗрмерм┐рммрм╛ рммрнЗрм│рнЗ рмХрм╛рм░рнНрмпрнНрнЯрмХрнНрм░рмормХрнБ рмирнЗрмЗ рмормзрнНрнЯ рмЖрм╢рм╛ рмЖрм╢рмЩрнНрмХрм╛ рм╕рнГрм╖рнНрмЯрм┐ рм╣рнЛрмЗрмЫрм┐ ред

    рм╕рморнНрммрм┐рмд рморм┐рм╢рнНрм░

  • рмкрмжрнНрмормкрнБрм░: рм╕рм░рнБрмирм┐ рммрм┐рмЬрнЗрмбрм┐рм░ рмЕрмЩрнНрмХрмХрм╕рм╛

    рмкрмжрнНрмормкрнБрм░:  рмкрм╛рмЦрнЗрмЗ рмЖрм╕рнБрмЫрм┐ рмкрмжрнНрмормкрнБрм░ рмЙрмкрмирм┐рм░рнНрммрм╛рмЪрми l рмЬрнЛрм░рмжрм╛рм░ рмкрнНрм░рм╕рнНрмдрнБрмд рм╣рнЗрмЙрмЫрмирнНрмдрм┐ рнй рмкрнНрм░рморнБрмЦ рм░рм╛рмЬрмирнИрмдрм┐рмХ рмжрм│ l рмЖрм╕рмирнНрмдрм╛ рмХрм╛рм▓рм┐ рммрм┐рмЬрнЗрмкрм┐ рмкрнНрм░рм╛рм░рнНрмернА рмирм╛рморм╛рмЩрнНрмХрми рмнрм░рм┐рммрм╛ рмХрм╛рм░рнНрмпрнНрнЯрмХрнНрм░рмо рмерм┐рммрм╛ рммрнЗрм│рнЗ рмЖрм╕рмирнНрмдрм╛ рнзрнн рмдрм╛рм░рм┐рмЦ рмжрм┐рми рмирм╛рморм╛рмЩрнНрмХрми рмнрм░рм┐рмм рмХрмВрмЧрнНрм░рнЗрм╕ l рм╕рнЗрмкрмЯрнЗ рммрм┐рмЬрнЗрмбрм┐ рмХрм╛рм╣рм╛рмХрнБ рмкрнНрм░рм╛рм░рнНрмернА рмХрм░рм┐рмм рм╕рнЗ рмирнЗрмЗ рмПрмкрм░рнНрмпрнНрнЯрмирнНрмд рмЕрмЩрнНрмХрмХрм╕рм╛ рм╕рм░рм┐рмирм╛рм╣рм┐рмБ l рмХрм┐рмирнНрмдрнБ рм╕рнЗрмкрмЯрнЗ рммрм┐рмЬрнЯ рм░рмЮрнНрмЬрми рм╕рм┐рмВ рммрм░рм┐рм╣рм╛рмЩрнНрмХ рмкрмдрнНрмирнА рмдрм┐рм│рнЛрмдрнНрмдрморм╛ рммрм╛рм░рм┐рм╣рм╛рмЩрнНрмХрнБ рмХрм┐рморнНрммрм╛ рмдрм╛рмЩрнНрмХ рмкрм░рм┐рммрм╛рм░рм░рнЗ рмХрм╛рм╣рм╛рмХрнБ рмкрм╛рм░рнНрмернА рмХрм░рм┐рммрм╛рмХрнБ рмирммрнАрми рмирм┐рммрм╛рм╕ рмЖрм╕рм┐ рмжрм╛рммрм┐ рмХрм░рм┐рмЫрм┐ рммрм┐рмВрмЭрм╛рм▓ рм╕рморм╛рмЬ l

    рм╕рм░рмЧрм░рмо рм╣рнЗрмЙрмЫрм┐ рмкрмжрнНрмормкрнБрм░ рмЙрмкрмирм┐рм░рнНрммрм╛рмЪрмирнА рморм╛рм╣рнЛрм▓ l рмЖрм░рморнНрмн рм╣рнЛрмЗрмЫрм┐ рмирм╛рморм╛рмЩрнНрмХрми рмкрнНрм░рмХрнНрм░рм┐рнЯрм╛ l рмЖрм╕рмирнНрмдрм╛ рмХрм╛рм▓рм┐ рммрм┐рмЬрнЗрмкрм┐ рмкрнНрм░рм╛рм░рнНрмернА рмкрнНрм░рмжрнАрмк рмкрнБрм░рнЛрм╣рм┐рмд рмнрм░рм┐рммрнЗ рмирм╛рморм╛рмЩрнНрмХрми l  рм╕рм╛рмВрм╕рмж,рммрм┐рмзрм╛рнЯрмХ рмУ рмХрнЗрмирнНрмжрнНрм░рмормирнНрмдрнНрм░рнАрмЩрнНрмХ рмЙрмкрм╕рнНрмерм┐рмд рм░рнЗ рмирм╛рморм╛рмЩрнНрмХрми рмнрм░рм┐рммрнЗ рммрм┐рмЬрнЗрмкрм┐ рмкрнНрм░рм╛рм░рнНрмернА рмкрнНрм░рмжрнАрмк рмкрнБрм░рнЛрм╣рм┐рмд l рмнрм╛рм░рмдрнАрнЯ рмЬрмирмдрм╛ рмкрм╛рм░рнНрмЯрм┐ рм╕рм╛рмВрмЧрмармирм┐рмХ рмжрнГрм╖рнНрмЯрм┐ рм░рнБ рмкрнВрм░рм╛ рмкрнНрм░рм╕рнНрмдрнБрмд рмерм┐рммрм╛ рммрнЗрм│рнЗ рмжрм│рм░ рмкрнНрм░рм╛рм░рнНрмернА рмормзрнНрнЯ рмирм┐рмЬ рм╕рнНрмдрм░рм░рнБ рмкрнНрм░рмЪрм╛рм░ рмПрмХрмкрнНрм░рмХрм╛рм░ рмЖрм░рморнНрмн рмХрм░рм┐ рм╕рм╛рм░рм┐рмЫрмирнНрмдрм┐ ред рмкрнНрм░рмдрм┐рмкрмХрнНрм╖рмЩрнНрмХ рмкрнНрм░рм╛рм░рнНрмернА рмЪрнЯрмирм░ рм╕рнНрмкрм╖рнНрмЯрмдрм╛ рмирм╛рм╣рм┐рмБ рмХрм╣рм┐ рммрм┐рмЬрнЗрмбрм┐ рмХрнБ рмХрм╛рмЙрмгрнНрмЯрм░ рмХрм░рм┐рмЫрм┐ рммрм┐рмЬрнЗрмкрм┐ l рм╕рнЗрмкрмЯрнЗ рмкрмжрнНрмормкрнБрм░ рм▓рморнНрммрм╛ рм╕рморнЯ рмзрм░рм┐ рмЕрмгрмжрнЗрмЦрм╛ рмУ рмЕрммрм╣рнЗрм│рм╛ рм░ рм╢рм┐рмХрм╛рм░ рм╣рнЛрмЗрмЫрм┐ l рм▓рнЛрмХрмЩрнНрмХ рмормзрнНрнЯрм░рнЗ рмЖрмХрнНрм░рнЛрм╢ рм░рм╣рм┐рмЫрм┐ l

    рмдрнЗрмгрнБ рмдрм╛рм░ рмкрм░рм┐рмгрм╛рмо рммрм┐рмЬрнЗрмкрм┐ рм╕рмкрмХрнНрм╖рм░рнЗ рмпрм┐рмм рммрнЛрм▓рм┐ рмжрм│ рмЖрм╢рм╛рммрм╛рмжрнА l рмЕрмирнНрнЯрмкрмЯрнЗ рмХрмВрмЧрнНрм░рнЗрм╕ рмЖрм╕рмирнНрмдрм╛ рнзрнн рмдрм╛рм░рм┐рмЦ рмжрм┐рми рмирм╛рморм╛рмЩрнНрмХрми рмнрм░рм┐рммрм╛рмХрнБ рмкрнНрм░рм╕рнНрмдрнБрмд рм╣рнЛрмЗрмЫрм┐ l рм╕рмнрм╛рмкрмдрм┐ рм╢рм░рмд рмкрмЯрнНрмЯрмирм╛рнЯрмХ, рмирм┐рм░рмЮрнНрмЬрми рмкрмЯрнНрмЯрмирм╛рнЯрмХ рмЩрнНрмХ рм╕рморнЗрмд рм╕рнБрм░ рм░рм╛рмЙрмдрм░рм╛рнЯ рмУ рммрм░рм┐рм╖рнНрма рмХрмВрмЧрнНрм░рнЗрм╕ рмирнЗрмдрм╛ рмирм╛рморм╛рмЩрнНрмХрми рмжрм┐рми рмЙрмкрм╕рнНрмерм┐рмд рм░рм╣рм┐рммрм╛рм░ рмХрм╛рм░рнНрмпрнНрнЯрмХрнНрм░рмо рм░рм╣рм┐рмЫрм┐ l рмпрнБрмм рмХрмВрмЧрнНрм░рнЗрм╕ рм╕рмнрм╛рмкрмдрм┐, рмЫрм╛рмдрнНрм░ рмХрмВрмЧрнНрм░рнЗрм╕ рм╕рмнрм╛рмкрмдрм┐ рмормзрнНрнЯ рмЙрмкрм╕рнНрмерм┐рмд рм░рм╣рм┐рммрнЗ l рмпрнЗрм╣рнЗрмдрнБ рм╕рмдрнНрнЯрмнрнВрм╖рмг рм╕рм╛рм╣рнБрмЩрнНрмХ рмХрнНрм░рнЗрмЬ рм░рм╣рм┐рмЫрм┐ рмУ рм╕рм╛рмВрмЧрмармирм┐рмХ рмжрмХрнНрм╖рмдрм╛ рмжрнГрм╖рнНрмЯрм┐рм░рнБ рм╕рнНрмерм┐рмдрм┐ рмнрм▓ l рмдрнЗрмгрнБ рмХрмВрмЧрнНрм░рнЗрм╕ рмнрм▓ рмХрм░рм┐рмм рммрнЛрм▓рм┐ рмЖрм╢рм╛ рм░рмЦрм┐рмЫрм┐ рмжрм│ред

    рм╕рнЗрмкрмЯрнЗ рмХрм┐рмП рм╣рнЗрмм рммрм┐рмЬрнЗрмбрм╝рм┐ рмкрнНрм░рм╛рм░рнНрмернА рмЪрм╛рмк рммрмврнБрмЫрм┐ ред рморнБрмЦрнНрнЯрмормирнНрмдрнНрм░рнА рмирммрнАрми рмкрмЯрнНрмЯрмирм╛рнЯрмХрмЩрнНрмХрнБ рмнрнЗрмЯрм┐рмЫрмирнНрмдрм┐ рмкрмжрнНрмормкрнБрм░ рммрм┐рмВрмЭрм╛рм▓ рм╕рморм╛рмЬред рмирммрнАрми рмирм┐рммрм╛рм╕рм░рнЗ рмкрм╣рмЮрнНрмЪрм┐, рмкрмжрнНрмормкрнБрм░ рмЙрмкрмирм┐рм░рнНрммрм╛рмЪрмирм░рнЗ рммрм┐рмЬрнЯ рм░рмЮрнНрмЬрми рм╕рм┐рмВ рммрм░рм┐рм╣рм╛рмЩрнНрмХ рмкрмдрнНрмирнА рмдрм┐рм│рнЛрмдрнНрмдрморм╛ рммрм╛рм░рм┐рм╣рм╛рмЩрнНрмХрнБ рмХрм┐рморнНрммрм╛ рмдрм╛рмЩрнНрмХ рмкрм░рм┐рммрм╛рм░рм░рнБ рмЖрмЙ рмХрм╛рм╣рм╛рмХрнБ рмкрнНрм░рм╛рм░рнНрмернА рмХрм░рм┐рммрм╛рмХрнБ рмжрм╛рммрм┐ рмХрм░рм┐рмЫрм┐ рммрм┐рмВрмЭрм╛рм▓ рм╕рморм╛рмЬ l рм╕рнЗрморм╛рмирмЩрнНрмХрнБ рморнБрмЦрнНрнЯрмормирнНрмдрнНрм░рнА рмкрнНрм░рмдрм┐рм╢рнНрм░рнБрмдрм┐ рмжрнЗрмЗрмерм┐рммрм╛ рмормзрнНрнЯ рмЬрмгрм╛рмкрмбрм┐рмЫрм┐ ред  рмдрнЗрммрнЗ рм╕рммрнБ рмжрнГрм╖рнНрмЯрм┐ рмХрнЛрмгрм░рнБ рмЪрм┐рмирнНрмдрм╛ рмХрм░рм┐ рм╕рмарм┐рмХ рм╕рморнЯрм░рнЗ рмжрм│ рм╕рнБрмкрнНрм░рм┐рморнЛ рмирммрнАрми рмкрмЯрнНрмЯрмирм╛рнЯрмХ рмЦрнБрмм рм╢рм┐рмШрнНрм░ рмкрнНрм░рм╛рм░рнНрмернА рмШрнЛрм╖рмгрм╛ рмХрм░рм┐рммрнЗ рммрнЛрм▓рм┐ рмХрм╣рм┐рмЫрмирнНрмдрм┐ рммрм┐рмЬрнЗрмбрм┐ рммрм┐рмзрм╛рнЯрмХ рмкрнНрм░рмдрм╛рмк рмЬрнЗрмирм╛ ред

    рмирм┐рмЬ рмирм┐рмЬ рмжрм│рм░ рм╖рнНрмЯрнНрм░рм╛рмЯрнЗрмЬрм┐рмХрнБ рмирнЗрмЗ рмЙрмкрмирм┐рм░рнНрммрм╛рмЪрми рмормЗрмжрм╛рмирм░рнЗ рмкрнНрм░рм╕рнНрмдрнБрмд рм╣рнЗрмЙрмЫрмирнНрмдрм┐ рнй рмкрнНрм░рморнБрмЦ рм░рм╛рмЬрмирнИрмдрм┐рмХ рмжрм│ l рмдрмерм╛рмкрм┐ рмХрм╛рм╣рм╛рм░ рмХрнНрм░рнЗрмЬ рмХрнЗрморм┐рмдрм┐ рмУ рмкрмжрнНрмормкрнБрм░ рммрм╛рм╕рнА рмХрм╛рм╣рм╛рмХрнБ рммрм┐рм╢рнНрн▒рм╛рм╕ рмХрм░рнБрмЫрмирнНрмдрм┐ рмдрм╛рм╣рм╛ рмжрнЗрмЦрм┐рммрм╛рм░ рмХрмерм╛….

    рм╕рм┐рморнНрмкрнБрм▓ рмирм╛рнЯрмХрмЩрнНрмХ рм░рм┐рмкрнЛрм░рнНрмЯ

  • рмЬрми рм╕рморнНрмкрм░рнНрмХ рмкрмжрмпрм╛рмдрнНрм░рм╛

    рмнрнБрммрмирнЗрм╢рнНрн▒рм░: рмЖрмЬрм┐рмарнБ рммрм┐рмЬрнЗрмбрм┐рм░ рмЬрми рм╕рморнНрмкрм░рнНрмХ рмкрмжрмпрм╛рмдрнНрм░рм╛ред рморм╛рм╕рнЗ рммрнНрнЯрм╛рмкрнА рмЪрм╛рм▓рм┐рмм рмПрм╣рм┐ рмкрмжрмпрм╛рмдрнНрм░рм╛ред рмПрмХрм╛рморнНрм░ рмирм┐рм░рнНрммрм╛рмЪрми рмормгрнНрмбрм│рнАрм░ рмХрм╛рм░рмЧрм┐рм▓ рм░рнЛрмб рм╕рнНрмерм┐рмд рмкрмбрм┐рмЖрм░рнБ рмПрм╣рм╛рм░ рм╢рнБрмнрм░рм╛рморнНрмн рмХрм▓рнЗ рморм╛рмирнНрнЯрммрм░ рморнБрмЦрнНрнЯрмормирнНрмдрнНрм░рнА рмирммрнАрми рмкрмЯрнНрмЯрмирм╛рнЯрмХред рморнБрмЦрнНрнЯрмормирнНрмдрнНрм░рнА рмирм┐рмЬрнЗ рмХрм╛рм░рнНрмЧрм┐рм▓ рммрм╕рнНрмдрм┐рм░рнЗ рмкрмж рмпрм╛рмдрнНрм░рм╛ рмХрм░рм┐ рмПрм╣рм╛рм░ рмЖрмирнБрм╖рнНрмарм╛рмирм┐рмХ рмнрм╛рммрнЗ рм╢рнБрмнрм╛рм░рморнНрмн рмХрм░рм┐рмЫрмирнНрмдрм┐ред рм░рм╛рмЬрнНрнЯ рм╕рм░рмХрм╛рм░рмЩрнНрмХ рм╕рмлрм│рмдрм╛ рмУ рмХрнЗрмирнНрмжрнНрм░ рм╕рм░рмХрм╛рм░рмЩрнНрмХ рмЕрммрм╣рнЗрм│рм╛рмХрнБ рмирнЗрмЗ рм▓рнЛрмХрмЩрнНрмХ рмкрм╛рмЦрм░рнЗ рмкрм╣рмВрмЪрм┐рмм рмжрм│ред

  • рм▓рнЛрмХрмЩрнНрмХ рмкрм╛рмЦрмХрнБ рмпрм╛рмЕ: рмирммрнАрми

    рмнрнБрммрмирнЗрм╢рнНрн▒рм░: рммрм┐рмЬрнЗрмбрм┐ рмХрм░рнНрморм╢рм╛рм│рм╛рм░рнЗ рморнБрмЦрнНрнЯрмормирнНрмдрнНрм░рнА рмирммрнАрми рмкрмЯрнНрмЯрмирм╛рнЯрмХрмЩрнНрмХ рмЙрмжрммрнЛрмзрмиред рм╕рммрнБ рммрм░рнНрм╖ рмкрм░рм┐ рмЪрм│рм┐рмд рммрм░рнНрм╖ рмЧрм╛рмирнНрмзрнА рмЬрнЯрмирнНрмдрнАрм░рнБ рмкрмжрмпрм╛рмдрнНрм░рм╛ рмЖрм░рморнНрмн рм╣рнЗрмЙрмЫрм┐ред рмкрмжрмпрм╛рмдрнНрм░рм╛рмХрнБ рм╕рмлрм│ рмХрм░рм┐рммрм╛рмХрнБ рмкрнНрм░рм╕рнНрмдрнБрмдрм┐ рммрнИрмармХрм░рнЗ рм╕рморм╕рнНрмд рмирнЗрмдрм╛ рмУ рмХрм░рнНрмормХрм░рнНрмдрнНрмдрм╛рмЩрнНрмХрнБ рмЖрм╣рнНрн▒рм╛рми рмХрм░рм┐рмЫрмирнНрмдрм┐ рмирммрнАрмиред рммрм┐рмЬрнЗрмбрм┐ рм▓рнЛрмХрмЩрнНрмХ рм╕рм╣ рмЕрмЫрм┐ рмУ рм▓рнЛрмХрмЩрнНрмХ рмкрм╛рмЗрмБ рмХрм╛рмо рмХрм░рнБрмЫрм┐ред рм╕рм░рмХрм╛рм░рнА рмпрнЛрмЬрмирм╛ рм▓рнЛрмХрмЩрнНрмХ рмкрм╛рмЦрм░рнЗ рмкрм╣рмЮрнНрмЪрм╛рмЗрммрм╛рмХрнБ рмХрм╛рмо рмХрм░рм┐рммрм╛рмХрнБ рморнБрмЦрнНрнЯрмормирнНрмдрнНрм░рнА рмХрм░рнНрмормХрм░рнНрмдрнНрмдрм╛рмЩрнНрмХрнБ рмЖрм╣рнНрн▒рм╛рми рмХрм░рм┐рмЫрмирнНрмдрм┐ред  рмЪрм│рм┐рмд рммрм░рнНрм╖ рм╕рнНрн▒рм╛рмзрнАрмирмдрм╛рм░ 75 рммрм░рнНрм╖ рмкрнВрм░рнНрмдрнНрмдрм┐ рмкрм╛рм│рми рмХрм░рнБрмЫрм┐ рмжрнЗрм╢ред рм╕рнНрн▒рм╛рмзрнАрмирмдрм╛рм░рнЗ рмУрмбрм╝рм┐рм╢рм╛рм░ рмЧрнБрм░рнБрмдрнНрн▒рмкрнВрм░рнНрмгрнНрмг рмнрнВрморм┐рмХрм╛ рмерм┐рм▓рм╛ред рмкрмжрмпрм╛рмдрнНрм░рм╛ рм╕рморнЯрм░рнЗ рмП рмкрнНрм░рмдрм┐ рмЙрмкрмпрнБрмХрнНрмд рмлрнЛрмХрм╢ рмХрм░рм╛рмпрм┐рмм рмЖрммрм╢рнНрнЯрмХ рммрнЛрм▓рм┐ рмХрм╣рм┐рмЫрмирнНрмдрм┐ рморнБрмЦрнНрнЯрмормирнНрмдрнНрм░рнАред  рм╕рнЗрмкрмЯрнЗ рммрм┐рмЬрнЗрмбрм┐ рмЙрмкрм╕рмнрм╛рмкрмдрм┐ рмжрнЗрммрнА рморм┐рм╢рнНрм░ рмХрм╣рм┐рмЫрмирнНрмдрм┐ рммрм┐рмЬрнБ рмЬрмирмдрм╛ рмжрм│ рмдрм┐рмЖрм░рм┐ рм╕рморнЯрм░рнЗ рм╢рнВрмирнНрнЯрмдрм╛ рмерм┐рм▓рм╛ред рмирммрнАрмирмЩрнНрмХ рмирнЗрмдрнГрмдрнНрн▒рм░рнЗ рмжрм│ рмЖрмЧрмХрнБ рммрмврм╝рм┐рмЫрм┐ рмкрмЫрмХрнБ рмлрнЗрм░рм┐рмирм┐ред рмЖрм░рнНрмерм┐рмХ рм╕рморм╕рнНрнЯрм╛, рм╕рм╛рмзрми рмнрм┐рмдрм░рнЗ рмжрм│ рмЖрмЧрмХрнБ рммрмврм╝рм┐рмЫрм┐ред рморм┐рм╢рмирм╢рмХрнНрмдрм┐ рмЖрмирнНрмжрнЛрм│рмирм░ рмкрм░рм┐ рмХрм│рнНрмкрмирм╛ рмХрм░рм╛рмпрм╛рмЗрмЫрм┐ред рммрм┐рмнрм┐рмирнНрми рм╕рморнЯрм░рнЗ рм╕рнНрм╡рмдрмирнНрмдрнНрм░ рмлрнЛрмХрм╛рм╕ рмкрм╛рмЗрмБ рмжрм╛рммрм┐ рмЙрмарм┐рмЫрм┐ред рм╕рмВрмШрнАрнЯ рммрнНрнЯрммрм╕рнНрмерм╛рм░рнЗ рмЖрммрм╢рнНрнЯрмХрмдрм╛ рмарм┐рмХрнН рм╕рморнЯрм░рнЗ рмЙрмкрм▓рммрнНрмз рм╣рнЗрммрм╛ рмЖрммрм╢рнНрнЯрмХред рмЪрм╛рм╖рнАрм░ рмЖрнЯ рнй рмЧрнБрмгрм╛ рмкрм╛рмЗрмБ рмЖрм╣рнНрн▒рм╛рми рмХрм░рм┐рмЫрмирнНрмдрм┐ред 5T  рм╖рнНрмЯрм╛рм░рнНрмЯ рмЖрмк, рм╕рнНрн▒рм╛рм╕рнНрмернНрнЯ рмпрнЛрмЬрмирм╛, рмкрнНрм░рм╛рмХрнГрмдрм┐рмХ рммрм┐рмкрм░рнНрмпрнНрнЯрнЯ, рм╢рм┐рм│рнНрмк рмкрнНрм░рмдрм┐рм╖рнНрмарм╛  рмЖрмжрм┐ рмХрнНрм╖рнЗрмдрнНрм░рм░рнЗ рм╕рм░рмХрм╛рм░ рм╕рмлрм│ рм╣рнЛрмЗрмЫрмирнНрмдрм┐ред рммрм┐рмнрм┐рмирнНрми рмХрнЗрмирнНрмжрнНрм░рнАрнЯ рмпрнЛрмЬрмирм╛ рммрмирнНрмж рм╣рнЗрммрм╛ рмпрнЛрмЧрнБрмБ рм░рм╛рмЬрнНрнЯ рмХрнНрм╖рмдрм┐ рм╕рм╣рнБрмЫрм┐ред рмХрнЗрмирнНрмжрнНрм░рнАрнЯ рмЕрмирнБрмжрм╛рми рмХрморм┐рмЫрм┐ред рм░рм╛рмЬрнНрнЯ рм╕рм░рмХрм╛рм░ рммрм┐рмХрм╛рм╢ рмкрм╛рмЗ рмЖрмЧрмХрнБ рммрмврнБрмерм┐рммрм╛ рммрнЗрм│рнЗ рм╕рмарм┐рмХрнН рм╕рморнЯрм░рнЗ рмХрнЗрмирнНрмжрнНрм░рнАрнЯ рм╕рм╣рмпрнЛрмЧ рморм┐рм│рнБрмирм┐ред  45 рмкрнНрм░рмдрм┐рм╢рмд рмнрнЛрмЯрм░рнБ рммрм░рнНрмдрнНрмдрморм╛рми 52 рмкрнНрм░рмдрм┐рм╢рмд рмнрнЛрмЯрм░  рмкрм╣рмЮрнНрмЪрм┐рмЫрм┐ред рмПрм╣рм╛рмХрнБ  рмХрм╛рнЯрмо рм░рмЦрм┐рммрм╛рмХрнБ рмЖрм╣рнНрммрм╛рми рмХрм░рм┐рмЫрмирнНрмдрм┐ рмжрнЗрммрнА рморм┐рм╢рнНрм░ред рммрм┐рмЬрнБ рмЬрмирмдрм╛ рмжрм│ рмХрм┐рмкрм░рм┐ рм╕рм╛рморм╛рмЬрм┐рмХ рмЖрмирнНрмжрнЛрм│рмирм░рнЗ рмкрм░рм┐рмгрмд рм╣рнЛрмЗрмЫрм┐ рмдрм╛рм╣рм╛рм░ рмдрмернНрнЯ рм░рмЦрм┐рмЫрмирнНрмдрм┐ рмормирнНрмдрнНрм░рнА рмЕрмдрмирнБ рм╕рммрнНрнЯрм╕рм╛рмЪрнА рмирм╛рнЯрмХред рм░рм╛рмЬрмирнИрмдрм┐рмХ рмХрнНрм╖рнЗрмдрм░рнЗ рморм╣рм┐рм│рм╛рмЩрнНрмХрнБ рмЕрмЧрнНрм░рм╛рмзрм┐рмХрм╛рм░ рмжрм┐рмЖрмпрм╛рмЗрмЫрм┐ред 55 рмкрнНрм░рмдрм┐рм╢рмдрм░рнБ рмЕрмзрм┐рмХ рморм╣рм┐рм│рм╛ рмирм┐рм░рнНрммрм╛рмЪрм┐рмд рм╣рнЛрмЗрмЫрмирнНрмдрм┐ред рм╕рнЗрмкрмЯрнЗ рмЧрм╛рмирнНрмзрнА рмЬрнЯрмирнНрмдрнАрм░рнБ рморм╛рм╕рнЗ рммрнНрнЯрм╛рмкрм┐ рмЪрм╛рм▓рм┐рмм рммрм┐рмЬрнЗрмбрм┐рм░ рмЬрми рм╕рморнНрмкрм░рнНрмХ рмкрмжрмпрм╛рмдрнНрм░рм╛ред рмПрмерм┐рмкрм╛рмЗрмБ рмнрнБрммрмирнЗрм╢рнНрн▒рм░ рм╕рнНрмерм┐рмд рммрм░рморнБрмгрнНрмбрм╛ рмкрмбрм┐рмЖрм░рнЗ рм░рмгрмирнАрмдрм┐ рмкрнНрм░рм╕рнНрмдрнБрмд рмХрм░рм┐рмм рмжрм│ред рмПрмерм┐рмкрм╛рмЗрмБ рмЖрмЬрм┐ рмУ 30 рмдрм╛рм░рм┐рмЦ рм░рнЗ рммрм░рморнБрмгрнНрмбрм╛ рмкрмбрм┐рмЖрм░рнЗ рм╕рморнНрморм┐рм│рмирнА рммрм┐рмЬрнЗрмбрм┐рм░ рм╕рморнНрморм┐рм│рмирнА рмЪрм╛рм▓рм┐рммред рм╕рмХрм╛рм│ 9 рм░рнБ рмХрм╛рм░рнНрмпрнНрнЯрмХрнНрм░рмо рмЖрм░рморнНрмн рм╣рнЗрммред

  • рммрм┐рмЬрнЗрмбрм┐ рмХрм░рм┐рмм рм╢рмХрнНрмдрм┐ рмкрнНрм░рмжрм░рнНрм╢рми

    рмнрнБрммрмирнЗрм╢рнНрн▒рм░ : рмкрмжрмпрм╛рмдрнНрм░рм╛ рмкрнНрм░рм╕рнНрмдрнБрмдрм┐ рмЖрм│рм░рнЗ рммрм┐рмЬрнЗрмбрм┐ рмХрм░рм┐рмм рм╢рмХрнНрмдрм┐ рмкрнНрм░рмжрм░рнНрм╢рмиред рммрм┐рмЬрнЗрмкрм┐рм░ рмирмбрнНрмбрм╛рмЩрнНрмХ рмЧрм╕рнНрмд рмХрм╛рм░рнНрмпрнНрнЯрмХрнНрм░рмормХрнБ рмХрм╛рмЙрмгрнНрмЯрм░ рмХрм░рм┐рммрм╛рмХрнБ рммрм┐рмЬрнЗрмбрм┐ рнирнп рмУ рнйрнжрм░рнЗ рмкрнНрм░рмдрм┐рмирм┐рмзрм┐ рм╕рморнНрморм┐рм│рмирнА рмХрм░рм┐рммред рммрм░рморнБрмгрнНрмбрм╛ рмкрмбрм┐рмЖрм░рнЗ рмЖрнЯрнЛрмЬрми рм╣рнЗрмм рмПрм╣рм┐ рм╕рморнНрморм┐рм│рмирнАред рнирнп рм░рнЗ рмпрнБрмм, рмЫрм╛рмдрнНрм░, рморм╣рм┐рм│рм╛рм░ рм░рм╛рмЬрнНрнЯ рм╕рнНрмдрм░рнАрнЯ рмУ рмЬрм┐рм▓рнНрм▓рм╛ рм╕рнНрмдрм░рнАрнЯ рм╕рмЩрнНрмЧрмармирм░ рмкрнНрм░рмдрм┐рмирм┐рмзрм┐ рмУ рмЧрмарм┐рмд рм╣рнЛрмЗрмерм┐рммрм╛ рмХрнНрнЯрм╛рморнНрмкрм╕ рмХрморм┐рмЯрм┐ рм░ рмкрнНрм░рмдрм┐рмирм┐рмзрм┐рмЩрнНрмХрнБ рмирнЗрмЗ рммрнИрмармХ рм╣рнЗрммред рмпрнЗрмЙрмБрмерм┐рм░рнЗ рни рм╣рмЬрм╛рм░ рм░рнБ рмЙрм░рнНрмжрнНрмзрнНрмм рмкрнНрм░рмдрм┐рмирм┐рмзрм┐ рмпрнЛрмЧ рмжрнЗрммрнЗред рнйрнж рмдрм╛рм░рм┐рмЦрм░рнЗ рммрм┐рмзрм╛рнЯрмХ, рм╕рм╛рмВрм╕рмж рмУ рмЬрм┐рм▓рнНрм▓рм╛ рм╕рмнрм╛рмкрмдрм┐, рмЬрм┐рм▓рнНрм▓рм╛ рмкрм░рм┐рм╖рмж рм╕рмжрм╕рнНрнЯ, рммрнНрм▓рмХ рмЪрнЗрнЯрм╛рм░рморнНрнЯрм╛рми, рмнрм╛рмЗрм╕ рмЪрнЗрнЯрм╛рм░рморнНрнЯрм╛рми, рмПрм╣рм╛ рммрнНрм░рм╣рнНрмормкрнБрм░, рмХрмЯрмХ рмУ рмнрнБрммрмирнЗрм╢рнНрн▒рм░ рм░ рморнЗрнЯрм░ рмУ рмХрм░рнНрмкрнЛрм░рнЗрмЯрм░ рморм╛рмирнЗ рмЙрмкрм╕рнНрмерм┐рмд рм░рм╣рм┐рммрнЗред рмкрмжрмпрм╛рмдрнНрм░рм╛ рм░ рмкрнНрм░рм╕рнНрмдрнБрмдрм┐ рмПрммрмВ рмкрмжрмпрм╛рмдрнНрм░рм╛ рм╕рморнЯрм░рнЗ рмХрнЗрмЙрмБ рмХрнЗрмЙрмБ рмкрнНрм░рм╕рмЩрнНрмЧ рм▓рнЛрмХрмЩрнНрмХ рмирм┐рмХрмЯрм░рнЗ рмкрм╣рмВрмЪрм╛рмпрм┐рмм рм╕рнЗ рмирнЗрмЗ рмжрнБрмЗ рмжрм┐рми рмЖрм▓рнЛрмЪрмирм╛ рм╣рнЗрммред рм╕рнЗрм╣рм┐рмкрм░рм┐ рмЧрм╛рмирнНрмзрнА рмЬрнЯрмирнНрмдрнАрм░рнБ рморм╛рм╕рнЗ рммрнНрнЯрм╛рмкрнА рмкрмжрмпрм╛рмдрнНрм░рм╛ рм╣рнЗрммред

Back to top button