jagannath temple

  • ଶ୍ରୀମନ୍ଦିର ଚାରିଦ୍ୱାରରେ ପ୍ରବେଶ ଅନୁମତି ପାଇଁ ଓକିଲ ସଂଘର ସମର୍ଥନ

    ପୁରୀ : ସ୍ଥାନୀୟ ଭକ୍ତମାନଙ୍କୁ ଶ୍ରୀମନ୍ଦିର ଚାରିଦ୍ୱାରରେ ପ୍ରବେଶ ଅନୁମତି ଦେବାପାଇଁ ବିଭିନ୍ନ ସଂଗଠନ ପକ୍ଷରୁ ଚାଲିଥିବା ଦସ୍ତଖତ ଅଭିଯାନରେ ପୁରୀ ଓକିଲ ସଂଘ ସାମିଲ ହୋଇଛି । ଏ ସମ୍ପର୍କରେ ବାର ଆସୋସିଏସନ ଠାରେ ସାଧାରଣ ପରିଷଦ ବୈଠକ ବସି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କ ଜରିଆରେ ଏକ ଦାବିପତ୍ର ପ୍ରଦାନ କରିବା ପାଇଁ ଏକ କମିଟି ଆସନ୍ତାକାଲି ଜିଲ୍ଲାପାଳଙ୍କୁ ଭେଟିବ । ଓକିଲ ସଂଘର ସଭାପତି ରାମ ପ୍ରସାଦ ମିଶ୍ର ଏଥିରେ ଅଧ୍ୟକ୍ଷତା କରିଥିଲେ । ସମ୍ପାଦକ ବିଭୂତି ଶଙ୍କର ତ୍ରିପାଠୀ ବୈଠକ ପରିଚାଳନା କରିଥିବା ବେଳେ ଉପସଭାପତି କାଳୀ ପ୍ରସାଦ ନାୟକ ଧନ୍ୟବାଦ ଅର୍ପଣ କରିଥିଲେ । ଏହି ଅବସରରେ ଯୁବ ଆଇନଜୀବୀ ଗୋପାଳକୃଷ୍ଣ ପଣ୍ଡା ଓ ବିଶ୍ୱଜିତ ପ୍ରଧାନଙ୍କୁ ଉତରୀୟ ପ୍ରଦାନ କରାଯାଇ ସମ୍ପାନିତ କରାଯାଇଥିଲା ।

  • ଭଙ୍ଗାଗଲା ନନ୍ଦିଘୋଷ ରଥ

    ପୁରୀ : ଗତକାଲି ନନ୍ଦିଘୋଷ ରଥ ଭଙ୍ଗା କାର୍ଯ୍ୟ ଶେଷ ହୋଇଛି । ପୂର୍ବରୁ ମା ସୁଭଦ୍ରାଙ୍କ ଦର୍ପଦଳନ ରଥ ଭଙ୍ଗା ଯାଇଥିଲା । କେବଳ ତାଳଧ୍ୱଜ ରଥ ଭଙ୍ଗା ଯିବା ବାକି ରହିଛି । ଏହି ଭଙ୍ଗା କାର୍ଯ୍ୟରେ ଭୋଇ ସେବାୟତ ଭଙ୍ଗା କାର୍ଯ୍ୟରେ ନିୟୋଜିତ ହୋଇଛନ୍ତି । ଭୋଇ ସର୍ଦ୍ଦାର ରବି ଭୋଇଙ୍କ ତତ୍ୱଅବଧାନରେ ଏହି ଭଙ୍ଗା କାର୍ଯ୍ୟ ହୋଇଥିଲା । ରଥ ଭଙ୍ଗା ସମୟରେ ଚାରିପଟେ ବ୍ୟାରିକେଡ଼ ହେବା ସହ ପୋଲିସ ନିୟୋଜିତ ହୋଇଥିଲେ ।

  • ପୁରୀ ରେ ପାଣ୍ଡିଆନ୍

    ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି.କେ ପାଣ୍ଡିଆନ୍ ଓ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ସୁପ୍ରିମକୋର୍ଟର ରାୟ ପରେ ମହାପ୍ରଭୁଙ୍କ ଦର୍ଶନ କରିଛନ୍ତି l ଭି. କେ ପାଣ୍ଡିଆନ୍ ଓ ପ୍ରଣବ ପ୍ରକାଶ ଦାସ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିବା ସହ ଆଶିଷ ଭିକ୍ଷା କରିଥିଲେ ।‌ଆଜି ସିଂହଦ୍ଵାର ଠାରେ ପହଞ୍ଚିବା ପରେ ତାଙ୍କୁ ଜିଲ୍ଲାପାଳ, ଏସପି ଓ ଶ୍ରୀମନ୍ଦିର ପରିଚାଳନା କମିଟିର ସଦସ୍ୟ ଓ ସେବାୟତ ପ୍ରତିନିଧି ମାନେ ସ୍ବାଗତ କରିଥିଲେ ।ସୁପ୍ରିମକୋର୍ଟଙ୍କ ରାୟ ସରକାରଙ୍କ ସପକ୍ଷରେ ଯାଇଥିବାରୁ ସମସ୍ତେ ଖୁସି ବ୍ୟକ୍ତ କରିଥିଲେ ।

    ମହାପ୍ରଭୁଙ୍କ ମାର୍ଗ ଦର୍ଶକରେ ହିଁ ସମସ୍ତ କାର୍ଯ୍ୟ ହେଉଛି। ଭକ୍ତର ହେଉଛନ୍ତି ଭଗବାନ। ଭକ୍ତଙ୍କ ପାଇଁ ପରିକ୍ରମା ପ୍ରକଳ୍ପ ନିର୍ମାଣ କାର୍ଯ୍ୟ କରାଯାଉଛି ଓ ଖୁବଶୀଘ୍ର ଏହା ସମ୍ପୂର୍ଣ୍ଣ ହେବ ବୋଲି ବିଜେଡି ରାଜ୍ୟ ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମହାପ୍ରଭୁଙ୍କ ଦର୍ଶନ ପରେ କହିଛନ୍ତି ।

  • ସ୍ନାନମଣ୍ଡପରେ ୩ ଘଣ୍ଟା ଧରି ମହାପ୍ରଭୁଙ୍କୁ ଦର୍ଶନ କରିବେ ଭକ୍ତ

    ଭକ୍ତଙ୍କ ପାଇଁ ଖୁସିଖବର । ଛତିଶାନିଯୋଗ ବୈଠକରେ ନିଆଗଲା ବଡ ନିଷ୍ପତ୍ତି । ଉଭୟ ରଥଯାତ୍ରା ଓ ସ୍ନାନଯାତ୍ରା ପାଇଁ ବ୍ୟବସ୍ଥାବଳୀ ନିର୍ଦ୍ଧାରଣ କରାଗଲା । ସେବାୟତ ମାନଙ୍କୁ ଆଚରଣ ଓ ଉତ୍ତାରଣ ଧ୍ୟାନ ଦେବାକୁ ଆଲୋଚନା ହୋଇଛି । ଆସନ୍ତା ୧୪ରେ ଶ୍ରୀଜିଉଙ୍କ ସ୍ନାନଯାତ୍ରା ଅନୁଷ୍ଠତ ହେବ । ମଙ୍ଗଳାର୍ପଣ, ଡୋର ଲାଗି ଓ ପୁଷ୍ପାଞ୍ଜଳି ପରେ ପହଣ୍ଡି କରାଯିବ । ଭୋର ୪ଟାରୁ ପହଣ୍ଡି ଆରମ୍ଭ ହେବ ଏବଂ ୬ଟାରେ ଶେଷ ହେବ । ସକାଳ ୯ଟା ୩୦ ରୁ ୧୧ଟା ୩୦ ମଧ୍ୟରେ ଜଳ ବିଜେ ଓ ପୂଜା କରାଯିବ ।

    ସେହିପରି ୧୨ଟା ୧୫ରେ ଛେରା ପହଁରା ଏବଂ ୧୨ଟା ୩୦ରୁ ୨ଟା ୩୦ ମଧ୍ୟରେ ହାତୀ ବେଶ ସରିବ । ସକାଳେ ପରମାଣିକ ଟିକେଟ ଦର୍ଶନ ହେବ । ସ୍ନାନମଣ୍ଡପରେ ୩ ଘଣ୍ଟା ଧରି ମହାପ୍ରଭୁଙ୍କୁ ଦର୍ଶନ ସୁଯୋଗ ମିଳିବ । ଶ୍ରୀଜିଉଙ୍କୁ ସ୍ପର୍ଶ କରିପାରିବେନି ଭକ୍ତ । ସନ୍ଧ୍ୟା ୬ଟାରୁ ରାତି ୯ଟା ୩୦ ଯାଏ ସର୍ବସାଧାରଣ ଦର୍ଶନ କରିପାରିବେ । ରାତି ୧୦ଟାରେ ବାହୁଡା ପହଣ୍ଡି ଅନୁଷ୍ଠିତ ହେବ ଏବଂ ରାତି ୧ଟା ୩୦ରେ ସୁନା ଚିତା ଓ ରାହୁରେଖା ମଇଲମ ନୀତି ଅନୁଷ୍ଠିତ ହେବ । ହାତୀବେଶରେ ମହାପ୍ରଭୁଙ୍କୁ ଦର୍ଶନ କରିବେ ଭକ୍ତ, କିନ୍ତୁ ଏହି ସମୟରେ କେହି ସ୍ପର୍ଶ କରିପାରିବେ ନାହିଁ ବୋଲି ନିଷ୍ପତି ନିଆଯାଇଛି ଏବଂ ନୀତିକାନ୍ତି କିଭଳି ଶୃଙ୍ଖଳିତ ରହିବ ତାହା ଉପରେ ଗୁରୁତ୍ୱ ଦିଆଯାଇଛି ।

  • ଶ୍ରୀମନ୍ଦିର ସୁରକ୍ଷା ଚିନ୍ତା! ସରଗରମ ରାଜ୍ୟ ରାଜନୀତି

    ଶ୍ରୀମନ୍ଦିର ସୁରକ୍ଷାକୁ ନେଇ ଏବେ ସରଗରମ ରାଜ୍ୟ ରାଜନୀତି । ଆନ୍ଦୋଳନ କି ପ୍ରତିବାଦର ରାସ୍ତାରେ ନାହିଁ ବିଜେପି। ଏ କଥା ସ୍ପଷ୍ଟ କରିସାରିଥିଲା, ଆଉ ଆଜି ବି ଆଉ ଥରେ କରିଛି ଦଳ। ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ତେଜୁଥିବା ଶ୍ରୀମନ୍ଦିର ବଞ୍ଚାଅ ଆନ୍ଦୋଳନ ଉପଲକ୍ଷେ ପଦଯାତ୍ରା ବାବଦରେ ଏଭଳି ସ୍ପଷ୍ଟ ଆଭିମୁଖ୍ୟକୁ ଦୋହରାଇଛି ପଦ୍ମ ଶିବିର। ହେଲେ ଦଳୀୟ ସାଂସଦ ତଥା ଦଳର ରାଷ୍ଟ୍ରୀୟ ମୁଖପାତ୍ର ଅପରାଜିତା ଷଡ଼ଙ୍ଗୀ ଯେଉଁ ରାସ୍ତା ଧରିଲେ, ସେଥିରେ ଦଳର ଲେନଦେନ ନାହିଁ ବୋଲି ଦଳ ହାତ ଛାଡ଼ିଦେଇଥିଲା ବେଳେ ଏହାକୁ ନେଇ ବିରୋଧୀ ଶିବିରକୁ ମଉକା ମିଳିଛି।
    ପୁରୀରେ ଅପରାଜିତାଙ୍କ ଏଣ୍ଟ୍ରି କୌଣସି ଆଇନଶୃଙ୍ଖଳା ପରିସ୍ଥିତି ଉପୁଜାଇବ ବୋଲି କାହିଁକି ଓ କେଉଁ ଅଜଣା ଭୟ ପ୍ରଶାସନକୁ ଘାରିଛି। ଗଜପତି ମହାରାଜାଙ୍କ କାହିଁକି ଆଶ୍ରୟ ନେବାକୁ ପଡ଼ିଲା। ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ଗଠିତ ଗୃହ କମିଟି କୁଆଡ଼େ ଗଲା। ଏଭଳି ଶବ୍ଦରେ ପୁଲିସ, ପ୍ରଶାସନର ସମରସଜ୍ଜା ସହ ସ୍ଥାନୀୟ ସାଂସଦ ଓ ସର୍ବୋପରି ରାଜ୍ୟ ସରକାରଙ୍କୁ କଟାକ୍ଷ କରି ପଦଯାତ୍ରା କରିଥିବା ଅପରାଜିତାଙ୍କୁ କିନ୍ତୁ ସମର୍ଥନ କରୁନି ନିଜ ଦଳ। ଏଭଳି ପଦଯାତ୍ରା କି ଆନ୍ଦୋଳନର ତରିକା ସହ ଦଳ ନାହିଁ କି ସମର୍ଥନ କରୁନି ବୋଲି ବୟାନ ଦେଇଛନ୍ତି ଗଣମାଧ୍ୟମରେ ଜଣକ ପରେ ଜଣେ ନେତା।
    ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ମନ୍ଦିର ସୁରକ୍ଷାକୁ ନେଇ ସନ୍ଦେହ ଉଠିବା ପରେ ପୁରୀରେ ମହାପ୍ରଭୂଙ୍କୁ ଦର୍ଶନ ଆଳରେ ଶକ୍ତି ପ୍ରଦର୍ଶନ କରି ପଦଯାତ୍ରା ପତିଆରା ଦେଖାଇଲେ ଅପରାଜିତା। ସେପଟେ ଶ୍ରୀମନ୍ଦିର ସୁରକ୍ଷା ନେଇ ସରକାରଙ୍କୁ ବି ଟାର୍ଗେଟ କରିଛନ୍ତି ନରସିଂହ ମିଶ୍ର। ଗଜପତି ଓ ସରକାରଙ୍କ ପକ୍ଷରୁ ଦେଉଥିବା ବ୍ୟକ୍ତିଙ୍କ ମନ୍ତବ୍ୟକୁ ନେଇ ବି ଚକିତ ଥିବା କହିଛନ୍ତି ନରସିଂହ। ବିଶେଷଜ୍ଞ ଟିମ୍ ର ମତ ନେବା ଦରକାର। ଗୃହ କମିଟିର ଆଭିମୁଖ୍ୟକୁ ନେଇ ସନ୍ଦେହ କରିଛନ୍ତି ନରସିଂହ। କିନ୍ତୁ ବିଜେଡିର କହିବା କଥା, କୌଣସି ବେଆଇନ କାମ ହୋଇନଥିଲା ବେଳେ ପ୍ରକଳ୍ପ କାମରେ ବାଧା ଦେଇ ତୁଛା ରାଜନୀତିରେ ବ୍ୟସ୍ତ ଅପରାଜିତା। ପୁରୀ ବିଧାୟକ ବି ପ୍ରକଳ୍ପ କାମରେ ପ୍ରତିବନ୍ଧକ ନ ହେବାକୁ କହିସାରିଲେଣି। ଏଭଳି ବାଗରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ଏବେ ଥମୁନି ଆରୋପ ପ୍ରତ୍ୟୋରାପ କି ଥମୁନି ରାଜନୀତି।

Back to top button