ଭୁବନେଶ୍ବର: ରାଜ୍ୟ ବ୍ୟାପୀ ଜାରି ରହିଛି ବନ୍ୟା ବିତ୍ପାତ। ଖାଲି ଗାଁ ଗହଳି ନୁହେଁ ଚଳିତ ବନ୍ୟାରେ ରାଜଧାନୀ ଭୁବନେଶ୍ବର ମଧ୍ୟ ବନ୍ୟା ପ୍ରଭାବରୁ ବର୍ତ୍ତି ଭୁବନେଶ୍ବରର ଏକାମ୍ର ନିର୍ବାଚନ ମଣ୍ଡଳୀ ଅଧୀନରେ ଯାଉଥିବା ଟିକରପଡା ଗ୍ରାମପଞ୍ଚାୟତର କଲ୍ୟାଣପୁର ଗାଁରେ ବନ୍ୟାକୁ ନେଇ ନାନା ସମସ୍ୟାରେ ହନ୍ତସନ୍ତ ହେଉଛନ୍ତି ଗ୍ରାମବାସୀ l ପାଣି କିଛିକାଂଶରେ ଛାଡ଼ିଯାଇଛି । ହେଲେ ରାସ୍ତା ଉପରେ ୬-୭ ଦିନ ହେଲାଣି ଦୁର୍ଦଶା ଭୋଗୁଛନ୍ତି ଲୋକେ l ସେପଟେ ଗାଁରେ ପହଂଚି ରିଲିଫ ବାଣ୍ଟିଛନ୍ତି ସ୍ଥାନୀୟ ବିଧାୟକ ଅଶୋକ ପଣ୍ଡା। ଭୁବନେଶ୍ୱର ସାଂସଦ ମଧ୍ୟ ବନ୍ୟା ପ୍ରଭାବିତ ଏହି ଅଞ୍ଚଳରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି l
ସ୍ବପ୍ନର ଘରକୁ ଉଜାଡି ଦେଇଛି ବନ୍ୟା l ସରକାର ତ ପକ୍କା ଘର ଦେଇନାହାନ୍ତି କିନ୍ତୁ ଚାଳ, ଝୁମ୍ପୁଡି ଘର ହେଲେବି ସେଥିରେ ମୁଣ୍ଡ ଗୁଂଜୁଥିଲେ କଲ୍ୟାଣପୁର ତଳସାହିର ଲୋକେ l ହେଲେ ବନ୍ୟା ପାଣି ଗାଁରେ କମିବାକୁ ଲାଗିଥିବା ବେଳେ କିନ୍ତୁ ସମ୍ପୂର୍ଣ୍ଣ ଛାଡିନାହିଁ। ତେଣୁ ରାସ୍ତା ଉପରେ ପଡିରହିଛନ୍ତି ଗ୍ରାମବାସୀ। ଶୁଖିଲା ଖାଦ୍ୟ ଖାଇ ୬-୭ ଦିନ ହେବ ଦିନ କାଟିଛନ୍ତି ଏହି ଅଞ୍ଚଳର ଲୋକେ l ହେଲେ ରନ୍ଧା ଖାଦ୍ୟ ମିଳୁନାହିଁ l ସେପଟେ ସ୍ୱାସ୍ଥ୍ୟ କଥା ନ କହିବା ଭଲ। ଏବେ ମଧ୍ୟ ଘର ସବୁ ପାଣି ଘେରରେ ରହିଛି। ବନ୍ଧରୁ ଘରକୁ ହେଉ ବା ଅନ୍ୟ କୌଣସି କାମରେ ଯିବାକୁ ହେଲେ ପାଣିରେ ଯାଅଆସ କରୁଛନ୍ତି। ଫଳରେ ଜଳ ଜନିତ ରୋଗରେ ବହୁ ଲୋକ ପଡିଲେଣି। ଯାହା କିଛି ଚାଷ କରିଥିଲେ ସସବୁ ମଧ୍ୟ ଧୋଇ ନେଇଛି ବନ୍ୟା। ତେଣୁ ବର୍ଷ ତମାମର ରୋଜଗାର ହରାଇ ଚିନ୍ତାରେ ସ୍ଥାନୀୟ ଜନସାଧାରଣ l
ବନ୍ୟାର ୭ ଦିନ ପରେ ସ୍ଥାନୀୟ ବିଧାୟକ ଅଶୋକ ପଣ୍ଡା ଲୋକଙ୍କୁ ରିଲିଫ ବାଣ୍ଟିବା ସହ ବନ୍ୟା ପାଣି ଯେପରି ଆଗାମୀଦିନରେ କଲ୍ୟାଣପୁର ଗାଁକୁ ପ୍ରଭାବିତ ନ କରେ ସେଥିପାଇଁ ଉଚ୍ଚସ୍ତରୀୟ ବୈଠକ କରି ସମାଧାନ କରାଯିବ ବୋଲି କହିଛନ୍ତି l ସେହିପରି ଖୁବଶୀଘ୍ର ଚାଷ ଜମି ନଷ୍ଟ ବା କ୍ଷୟକ୍ଷତିର ଆକଳନ କରାଯାଇ ଯେଉଁ ସୁବିଧା ରହିଛି ତାହା ଜନସାଧାରଣଙ୍କୁ ଯୋଗାଇ ଦିଆଯିବ ବୋଲି କହିଛନ୍ତି ବିଧାୟକ l ଅନ୍ୟପଟେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଓ ବିଜେପି ଭୁବନେଶ୍ୱର ଜିଲ୍ଲା ସଭାପତି ବାବୁ ସିଂ ପ୍ରଭାବିତ ଅଞ୍ଚଳର ସ୍ଥିତି ସମୀକ୍ଷା କରି ଜନସାଧାରଣଙ୍କ ଭଲ ମନ୍ଦ ବୁଝିଛନ୍ତି।
ସିମ୍ପୁଲ ନାୟକଙ୍କ ରିପୋର୍ଟ
Naxatra News is now on Whatsapp
Join and get latest news update delivered to you via whatsapp
Join Now
