cyclone update: ଓଡ଼ିଶାରେ ବାତ୍ୟା ହେବ କି ନାହିଁ? କାଲି ସନ୍ଧ୍ୟାରେ ମିଳିବ ସ୍ପଷ୍ଟ ଚିତ୍ର- ମନ୍ତ୍ରୀ

ଭୁବନେଶ୍ୱର: ଓଡ଼ିଶାରେ ସମ୍ଭାବ୍ୟ ବାତ୍ୟାକୁ ନେଇ ଏବେଠାରୁ କୌଣସି ନିଶ୍ଚିତ ଆକଳନ କରାଯାଇପାରିବ ନାହିଁ। ଆସନ୍ତାକାଲି ସନ୍ଧ୍ୟା ପରେ ପାଣିପାଗ ପ୍ରଣାଳୀର ଗତିପଥ ନେଇ ଅଧିକ ସ୍ପଷ୍ଟ ଚିତ୍ର ମିଳିବ ବୋଲି କହିଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ। ସମ୍ଭାବ୍ୟ ପାଣିପାଗ ପରିସ୍ଥିତିକୁ ନେଇ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଏକ ସମୀକ୍ଷା ବୈଠକ ହୋଇଛି। ବୈଠକରେ ମନ୍ତ୍ରୀଙ୍କ ସମେତ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ। ମନ୍ତ୍ରୀଙ୍କ କହିବା ଅନୁସାରେ, ଏହି ପାଣିପାଗ ପ୍ରଣାଳୀ ନେଇ ସରକାର ଭାରତୀୟ ପାଣିପାଗ ବିଭାଗ (IMD) ସହ ନିରନ୍ତର ଯୋଗାଯୋଗରେ ରହିଛନ୍ତି। ବର୍ତ୍ତମାନ ଚର୍ଚ୍ଚାରେ ଥିବା ସାଇକ୍ଲୋନିକ୍ ସର୍କ୍ୟୁଲେସନ୍ ଥାଇଲାଣ୍ଡ ଅଞ୍ଚଳରେ ରହିଥିବା ବେଳେ ଏହା ଆସନ୍ତାକାଲି ଆଣ୍ଡାମାନ ଅଞ୍ଚଳରେ ପହଞ୍ଚିବାର ସମ୍ଭାବନା ରହିଛି। ପରବର୍ତ୍ତୀ ଏକରୁ ଦୁଇ ଦିନ ମଧ୍ୟରେ ଏହା ଅଧିକ ସଂଗଠିତ ହୋଇପାରେ। ତେଣୁ ଏବେଠାରୁ ଏହାର ଗତିପଥ କିମ୍ବା ପ୍ରଭାବ ନେଇ ସମ୍ପୂର୍ଣ୍ଣ ଆକଳନ କରିବା ସମ୍ଭବ ନୁହେଁ। ଆସନ୍ତାକାଲି ସନ୍ଧ୍ୟା ପରେ ପରିସ୍ଥିତି ନେଇ ଅଧିକ ସ୍ପଷ୍ଟତା ଆସିବ ବୋଲି ମନ୍ତ୍ରୀ କହିଛନ୍ତି।

୨୦ ଜିଲ୍ଲାରେ ବର୍ଷାର ପ୍ରଭାବ

ସମ୍ଭାବ୍ୟ ପାଣିପାଗ ପରିସ୍ଥିତିକୁ ଦୃଷ୍ଟିରେ ରଖି ରାଜ୍ୟର ୨୦ଟି ଜିଲ୍ଲାର ଜିଲ୍ଲାପାଳଙ୍କୁ ସଜାଗ ରଖାଯାଇଛି। ଏହା ସହ ଅନ୍ୟ ଜିଲ୍ଲାଗୁଡ଼ିକୁ ମଧ୍ୟ ସତର୍କ ରହିବାକୁ କୁହାଯାଇଛି। ବର୍ତ୍ତମାନର IMD ସୂଚନା ଅନୁସାରେ ଓଡ଼ିଶାରେ ଆଗାମୀ କିଛି ଦିନ ବର୍ଷା, ବଜ୍ରପାତ ଓ ଝଡ଼ ପବନ ସମ୍ପର୍କିତ ସତର୍କତା ଜାରି ରହିଛି।

୨୩ ତାରିଖ ବେଳକୁ ରୂପ ନେଇପାରେ ଲଘୁଚାପ

ମନ୍ତ୍ରୀ ସୁରେଶ ପୂଜାରୀଙ୍କ ସୂଚନା ଅନୁସାରେ, ସେପ୍ଟେମ୍ବର ୨୩ ବେଳକୁ ଏହି ସିଷ୍ଟମ୍ ଲଘୁଚାପରେ ପରିଣତ ହୋଇପାରେ। ତେବେ ଏହାର ପରବର୍ତ୍ତୀ ଗତି ଓ ତୀବ୍ରତା ନେଇ ଏବେଠାରୁ ନିଶ୍ଚିତ ଭାବେ କିଛି କୁହାଯାଇପାରିବ ନାହିଁ। ଲୋକଙ୍କୁ ବିଚଳିତ ନହେବାକୁ ପରାମର୍ଶ ଦେବା ସହ ସରକାର ପରିସ୍ଥିତି ଉପରେ ନଜର ରଖିଥିବା କହିଛନ୍ତି ମନ୍ତ୍ରୀ ।