ଭୁବନେଶ୍ବର: ଆଜି ପବିତ୍ର ଜନ୍ମାଷ୍ଟମୀ । ଏ ନେଇ ଉତ୍ସବ ମୁଖର ହୋଇଉଠିଛି ଗାଁଠୁ ସହର । ଏହି ଅବସରରେ ରାଜଧାନୀର ବିଭିନ୍ନ ମନ୍ଦିରରେ ବଡ ଧୂମଧାମରେ ଜନ୍ମାଷ୍ଟମୀ ପାଳନ କରାଯାଇଛି ।
ଭାଦ୍ରବ କୃଷ୍ଣପକ୍ଷ ଅଷ୍ଟମୀ ତିଥିରେ ମଥୁରାରେ ଦେବକୀ ବାସୁଦେବଙ୍କ କୋଳ ମଣ୍ଡନ କରିଥିଲେ ଭଗବାନ ଶ୍ରୀକୃଷ୍ଣ । ତେଣୁ ଆଜିର ଦିନକୁ ପବିତ୍ର ଜନ୍ମାଷ୍ଟମୀ ଭାବେ ପାଳନ କରାଯାଏ । ବିଶ୍ୱାସ ରହିଛି ଆଜିର ଦିନରେ ଭଗବାନ ଶ୍ରୀକୃଷ୍ଣଙ୍କ ନାମ ଜପ କଲେ , କୋଟି ଜନ୍ମର ପୂଣ୍ୟ ମିଳିଥାଏ । କୋଭିଡ୍ କଟକଣା ଯୋଗୁଁ ଦୀର୍ଘ ଦୁଇ ବର୍ଷ ହେବ ପର୍ବ ପାଳନ ଫିକା ପଡିଥିଲା । ହେଲେ ଚଳିତ ବର୍ଷ କୋଭିଡ଼ କଟକଣା କୋହଳ ଥିବାରୁ ରାଜଧାନୀ ଇସ୍କନ ମନ୍ଦିରରେ ଭିଡ ଦେଖିବାକୁ ମିଳିଛି। ଝୁଲଣରେ ଝୁଲୁଛନ୍ତି ନନ୍ଦଲାଲ । ଆଉ ଅତି ଶ୍ରଦ୍ଧାର ସହ ଝୁଲାଇ ଦେଉଛନ୍ତି ନିଜ କୁନି ଠାକୁରଙ୍କୁ l
ଜନ୍ମାଷ୍ଟମୀ ପାଇଁ ଯେ କେବଳ ଶ୍ରଦ୍ଧାଳୁଙ୍କ ଭିଡ଼ ଲାଗିଛି ତାହା ନୁହଁ , ଛୋଟ ଛୋଟ ଛୁଆ ମାନେ ପ୍ରଭୁଙ୍କ ଲୀଳା ବିଷୟରେ ଜାଣିବା ପାଇଁ କୃଷ୍ଣଙ୍କ ବେଶରେ ଆସି ମନ୍ଦିରରେ କହଂଚିଛନ୍ତି । ପୁଅ ମାନେ କୃଷ୍ଣ ଓ ଝିଅ ମାନେ ରାଧା ବେଶରେ ସଜେଇ ହୋଇଛନ୍ତି l ଏହା ସହ ପିଲାମାନଙ୍କ ପାଇଁ ବିଭିନ୍ନ ପ୍ରତିଯୋଗିତାର ଆୟୋଜନ କରାଯାଇଛି । ଯାହା ଦ୍ୱାରା ଆଜିର ଆଧୁନିକ ଯୁଗରେ ପିଲାମାନଙ୍କ ମନରେ ଆଧ୍ୟାତ୍ମିକ ଚେତନା ଜାଗ୍ରତ ହୋଇ ପାରିବ l ସେପଟେ ଭକ୍ତଙ୍କ ଭିଡକୁ ଦୃଷ୍ଟି ରେ ରଖି ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।
ସ୍ୱରୂପା ମହାପାତ୍ରଙ୍କ ରିପୋର୍ଟ
Naxatra News is now on Whatsapp
Join and get latest news update delivered to you via whatsapp
Join Now
