elephant attack

  • ହାତୀ ଆକ୍ରମଣରେ ମହିଳା ମୃତ

    ଅନୁଗୁଳ: ଅନୁଗୋଳ ଜିଲ୍ଲାରେ  ହାତୀ ଆତଙ୍କ । ହାତୀ ଆକ୍ରମଣରେ ଦୁଇ ଜଣ ମହିଳାଙ୍କର ମୃତ୍ୟୁ ଘଟିଛି । ମୃତକ ମହିଳା ଦୁଇ ହେଲେ ମୂଳି ପ୍ରଧାନ ଓ ଗୌରୀ ରାଉଳ ।

    ସୂଚନା ଅନୁସାରେ ବଡ଼କନ୍ତକୁଳ ଗାଁର ଦୁଇଜଣ  ମହିଳା ମୁନି ପ୍ରଧାନ ଓ ଗୌରୀ ରାଉଳ ଆଜି ଭୋରରୁ ଗାଁ ମୁଣ୍ଡ ଆମ୍ବତୋଟା କୁ ଆମ୍ବ ଗୋଟାଇବାକୁ ଯାଇଥିଲେ । ଆମ୍ବ ଗୋଟାଉଥିବା ବେଳେ ହଠାତ ହାତୀଟି ସେମାନଙ୍କୁ ଆକ୍ରମଣ କରିଥିଲା । ଫଳରେ ମୁନି ଙ୍କର ଘଟଣା ସ୍ଥଳରେ ମୃତ୍ୟୁ ଘଟିଥିବାବେଳେ ଗୁରୁତର ଅବସ୍ଥାରେ  ଗୌରୀଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି ।   ଘଟଣାକୁ ନେଇ ଗ୍ରାମବାସୀଙ୍କ  ମଧ୍ୟରେ ଅସନ୍ତୋଷ ଦେଖାଦେଇଥିଲା । ଲୋକେ ମୃତକଙ୍କ ପରିବାରକୁ କ୍ଷତି ପୂରଣ ସହ ଦନ୍ତାଙ୍କୁ ସେହି ଅଞ୍ଚଳରୁ ଘେଉଡାଇବାକୁ ଦାବି କରିଥିଲେ । ଦୁର୍ଘଟଣା ପାଇଁ ଲୋକେ ସିଧାସଳଖ ବନ ବିଭାଗକୁ ଦାୟୀ କରିଥିଲେ । ସୂଚନା ପାଇ ବନ ବିଭାଗ ସେଠାରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ । ଓ ସରକାରଙ୍କ ନିୟମ ଅନୁସାରେ ମୃତକଙ୍କ ପରିବାରକୁ କ୍ଷତି ପୂରଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି  ।

  • ହାତୀ ଆକ୍ରମଣରେ ମହିଳା ମୃତ

    ଖୋର୍ଦ୍ଧା: ମର୍ଣ୍ଣିଂୱାର୍କ କରିବା ବେଳେ ହାତୀ ଆକ୍ରମଣ । ଆକ୍ରମଣରେ ଜଣେ ମହିଳା ଗୁରୁତର ଥିବାବେଳେ ଅନ୍ୟ ଜଣଙ୍କର ମୃତ୍ୟୁ ଘଟିଛି । ଏପରି ଦୃଶ୍ୟ ଦେଖିବାକୁ ମିଳିଛି ଖୋର୍ଦ୍ଧା ଟାଉନ ଥାନା ଅଧୀନ ପାନବରଜ ଗ୍ରାମରେ । ମୃତକ ମହିଳା ଜଣକ ହେଲେ କିରଣବାଳା ମଙ୍ଗରାଜ

    ସୂଚନା ଅନୁଯାୟୀ ସୋମବାର ସକାଳେ କିରଣବାଳା ଅନ୍ୟଜଣେ ମହିଳାଙ୍କ ସହ ମର୍ଣ୍ଣିଂୱାର୍କ କରିବାକୁ ଯାଇଥିଲେ । ସେମାନେ ପାନବରଜ ଖେଳପଡିଆ ନିକଟରେ ଯାଉଥିବାବେଳେ ହଠାତ ସେମାନଙ୍କ ସାମ୍ନାକୁ ଏକ ହାତୀ ଚାଲିଆସିଥିଲା । ସେମାନେ କୌଣସି ମତେ ସେଠାରୁ ପଳେଇ ଯିବାକୁ ଚେଷ୍ଟା କରୁଥିବା ସମୟରେ କିରଣବାଳାକୁ ହାତୀ ଟେକି କଚାଡିଦେଇ ଚକଟି ଦେଇଥିଲା । ଫଳରେ ଘଟଣାସ୍ଥଳରେ କିରଣବାଳାଙ୍କର ମୃତ ହୋଇଯାଇଥିଲା ।

    ଅନ୍ୟ ମହିଳାଜଣକ ହାତୀ ଆକ୍ରମଣରେ ଗୁରୁତର ଆହତ ହୋଇଥିଲେ ପରେ ସେଠାରୁ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ଉକ୍ତ ଘଟଣା ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି କରିଛି ।

  • ଜଙ୍ଗଲ ଛାଡି ଗାଁ ମୁହାଁ ହାତୀପଲ

    TAL-ELEPHANT IN VILLEGE_PKG.. WP

    ()ତାଳଚେର ବ୍ଲକର କଙ୍କିଳି , ଧରମପୁର ଓ ଆଖପାଖ ପାଞ୍ଚଖଣ୍ଡ  ଗାଁରେ ଉତ୍ପାତ କରୁଛନ୍ତି ହାତୀପଲ। ସନ୍ଧ୍ୟା ହେଲେ ଘରୁ ବାହାରିବା ମୁସ୍କିଲ ହେଉଛି । ବିଭିନ୍ନ ଫସଲ ନଷ୍ଟ କରିବା ସହିତ ଅଞ୍ଚଳରେ ଆତଙ୍କ ଖେଳାଉଛନ୍ତି ୫୦ ଟିକିଆ ହାତୀ ପଲ୍ଲ। ସେପଟେ ହାତୀ ଘଉଡାଇବାକୁ ସଠିକ ପଦକ୍ଷେପ ବନବିଭାଗ ନେଉନଥିବା ଅଭିଯୋଗ ହୋଇଛି ।

    ଜଙ୍ଗଲ ଛାଡି ଗାଁ ମୁହାଁ ହାତୀପଲ। ସଂନ୍ଧ୍ୟା ହେଲେ ଘରୁ ବାହାରୁ ନାହାଁନ୍ତି ଲୋକେ । ଏଭଳି ଦୃଶ୍ୟ ଦେଖିବାକୁ ମିଳିଛି ତାଳଚେର ଅଞ୍ଚଳରେ । କେଉଁଠି ହାତୀପଲ ଘର ଭାଙ୍ଗି ଚାଉଳ ଖାଉଛନ୍ତି ତ ଆଉ କେଉଁଠି ଦୋକାନ ଘର ଭାଙ୍ଗି କଦଳୀ ଓ ଟମାଟୋ ଖାଉଛନ୍ତି । ଖାଲି ସେତିକି ନୁହେଁ ଗ୍ରାମର ଅନେକ ଲୋକଙ୍କ ପାଚେରୀ ଭାଙ୍ଗି କଦଳୀ ଗଛରୁ କଦଳୀ ଖାଇବା ସହ ପନିପରିବା ଚାଷକୁ ବି ନଷ୍ଟ କରୁଛନ୍ତି । ଧାନ ବିଲରେ ଫସଲ ନଷ୍ଟ କରୁଥିବାବେଳେ ସଞ୍ଚିତ ଧାନକୁ ଘରେ ପଶି ନଷ୍ଟ କରୁଛନ୍ତି । 

    ସେପଟେ ହାତୀ ଘଉଡାଇବାକୁ ସଠିକ ପଦକ୍ଷେପ ନେଉ ନଥିବା ଅଭିଯୋଗ ଆଣିଛନ୍ତି ଗ୍ରାମବାସୀ । ବନଅଧିକାରିଙ୍କୁ ଫୋନ କଲେ କୋଣସି ସୁଫଳ ମିଳୁନି । ଯାହାକୁ ନେଇ ଗ୍ରାମବାସୀଙ୍କ ଭିତରେ ଅସନ୍ତୋଷ ବଢିବା ସହ ଆଗାମୀ ଦିନରେ ବନ ବିଭାଗର କାର୍ଯ୍ୟାଳୟକୁ ଘେରାଉ କରିବାକୁ ସଜବାଜ ହେଉଛନ୍ତି ଗ୍ରାମବାସୀ। ଅନ୍ୟପଟେ ହାତୀ ପଲଉପରେ ନଜର ରଖାଯିବା ସହ ଖୁବଶୀଘ୍ର ହାତୀ ଗୁଡିକୁ ଘଉଡାଇବାକୁ ଉଦ୍ୟମ ଜାରି ରହିଥିବା ବନଅଧିକାରି କହିଛନ୍ତି । ସରକାରଙ୍କ ନିୟମ ଅନୁଯାୟୀ କ୍ଷୟକ୍ଷତିର ଆକଳନ କରି କ୍ଷତିପୂରଣ ଦେବା ସହ ହାତୀ ଆସୁଥିବା ସ୍ଥାନ ଗୁଡିକରେ ସୋଲାର ସିଷ୍ଟମର ପ୍ରସ୍ଥାବ ଦିଆଯାଇଥିବା କହିଛନ୍ତି ବନବିଭାଗ ।

    ତେବେ ଜଙ୍ଗଲ ବିଭାଗର ସଠିକ ହାତୀ ପରିଚାଳନାରେ ବୁଝାବଣାର ଅଭାବ ଯୋଗୁଁ ଗାଁ ମୁହାଁ ହେଉଛନ୍ତି ହାତୀପଲ।

    ପ୍ରଭାତ କୁମାର ପାଣିଙ୍କ ରିପୋର୍ଟ

  • ହାତୀପଲଙ୍କ ଉପଦ୍ରବ

    ଗଞ୍ଜାମ: ବୁଗୁଡ଼ା ବନାଞ୍ଚଳରେ ୭ ଟିକିଆ ହାତୀପଲଙ୍କ ଉପଦ୍ରବ। ହାତୀପଲ ଜଙ୍ଗଲରୁ ବାହାରି ପାଖରେ ଥିବା ଗାଁ ରେ ପଶି ବ୍ୟାପକ ଫସଲ ନଷ୍ଟ କରିବା ସହ ଘର ଦ୍ୱାର ମଧ୍ୟ ଭାଙ୍ଗି ଦେଇଛନ୍ତି। ଫଳରେ ବ୍ୟାପକ ଫସଲ କ୍ଷୟକ୍ଷତିକୁ ନେଇ ଚିନ୍ତାରେ ଚାଷୀ। ବୁଗୁଡା ବନାଞ୍ଚଳ ଅଧିନସ୍ଥ ପଞ୍ଚଭୂତି ସେକ୍ସନର ସମଲେଇ ବିଟରେ ୩ ଦିନ ତଳେ ପାଞ୍ଚଟି ହାତୀ ଥିବା ବେଳେ ଗତକାଲି ଓଡ଼ଗାଁ ବନାଞ୍ଚଳରୁ ଦୁଇଟି ହାତୀ ଆସି ଏହି ପାଞ୍ଚ ଟିକିଆ ହାତୀପଲରେ ମିଶି ଥିବା ବୁଗୁଡା ବନ ବିଭାଗ ସୂଚନା ଦେଇଛି। ସେପଟେ ଲୋକଙ୍କୁ ସଚେତନ କରାଯିବା ସହ ବନ ବିଭାଗ ହାତୀପଲଙ୍କ ଗତି ବିଧି ଉପରେ ନଜର ରଖିଛି।

  • ହାତୀ ଆକ୍ରମଣରେ ଗଲା ତିନି ଜୀବନ

    ଝାରସୁଗୁଡା: ଦଳିଦେଲା ହାତୀ। ଝାରସୁଗୁଡ଼ାରେ ଦୁଇ ଭାଇଙ୍କୁ ଦଳିଦେଲା ତ ଅନୁଗୁଳରେ ବନ କର୍ମଚାରୀଙ୍କୁ କଚାଡ଼ି ମାରିଦେଲା। ଆଉ ହାତୀ ଆକ୍ରମଣର ଶୀକାର ହୋଇଥିବା ବନ କର୍ମଚାରୀଙ୍କ ପରିବାର ଓ ସାଥୀ କର୍ମଚାରୀ କ୍ଷତିପୂରଣ ଦାବିରେ ଡିଏଫଓ ଅଫିସ ଘେରାଓ କରିଥିଲେ। ସେପଟେ ଦୁଇ ପିଲାଙ୍କୁ ହରାଇ ବାକଶୂନ୍ୟ ହୋଇଯାଇଛନ୍ତି ବାପା ମାଆ।

    ହାତୀ ଆକ୍ରମଣରେ ଚାଲିଗଲା ତିନି ଜୀବନ। ଜଣେ ବନ ବିଭାଗ କର୍ମଚାରୀ ତ ଆଉ ଦୁଇ ଜଣ ହେଲେ ନାବାଳକ ଭାଇ। ଗୋଟିଏ ଘଟଣା ତାଳଚେର ବନଖଣ୍ଡ କୁଲାଡ଼ରେ ତ ଅନ୍ୟଟି ଝାରସୁଗୁଡ଼ାର ଭଅଁରା ଗାଁର। ଅନୁଗୁଳ ଜିଲ୍ଲା କୁଲାଡ଼ରେ ହାତୀ ପଲ ଘଉଡ଼ାଇବା ବେଳେ ତାଳଚେର ବନଖଣ୍ଡର ବନବିଭାଗ କର୍ମଚାରୀ ଶରତ ଘଡ଼େଇଙ୍କୁ ହାତୀ କଚାଡ଼ି ମାରିଦେଇଛି। ଏହାକୁ ନେଇ ସାଥୀ କର୍ମଚାରୀ ଓ ମୃତକଙ୍କ ପରିବାର ଭିତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ମୃତକଙ୍କ ପରିବାରକୁ ୨୦ ଲକ୍ଷ ଟଙ୍କା କ୍ଷତିପୂରଣ ଓ ପରିବାରର ଜଣଙ୍କୁ ସ୍ଥାୟୀ ଚାକିରୀ ଦାବିରେ ଡିଏଫଓ ଅଫିସ ଘେରାଓ କରିଥିଲେ। ସାଥୀ କର୍ମଚାରୀଙ୍କ କହିବା କଥା, ଯେଉଁ ସ୍ଥାନ ବାବଦରେ ସେମାନଙ୍କର ଧାରଣା ନାହିଁ, ସେଠାରେ ଡ୍ୟୁଟି କରିବାକୁ ବାଧ୍ୟ କରାଯାଉଛି। ୮ ଘଣ୍ଟା ବଦଳରେ ୨୪ ଘଣ୍ଟା ଖଟାଯାଉଛି। ଏ ସବୁ ବନ୍ଦ ନ ହେଲେ ଆଗକୁ  ଆନ୍ଦୋଳନ ତୀବ୍ର ହେବ ବୋଲି କୁହାଯାଉଛି।

    ସେପଟେ ଝାରସୁଗୁଡାରେ ହୃଦୟ ବିଦାରକ ଘଟଣା ଘଟିଛି। ମାତ୍ର ଚାରି ଦିନ ତଳେ ଛତିଶଗଡରୁ ଇଟାଭାଟିରେ କାମ କରିବାକୁ ଆସିଥିବା ଏକ ପରିବାରକୁ ଉଜାଡ଼ି ଦେଇଛି ହାତୀ। କିରିମିରା ବ୍ଲକ୍ ଭଉଁରା ନିକଟରେ ରାତିରେ ପଲିଥିନ ତଳେ ଶୋଇଥିବା ସମୟରେ ଦୁଇ ପିଲାଙ୍କୁ ଦଳି ମାରିଦେଇଛି ହାତୀ। ଆଉ ଦୁଇ ପିଲାଙ୍କ ଜୀବନ ବଞ୍ଚାଇବାକୁ ଯାଇ ବାପା ମାଆ ଅଳ୍ପକେ ବର୍ତ୍ତିଯାଇଛନ୍ତି। ମାଆ ଲେହେରବାଇ ସତନମୀଙ୍କ ହାତ ଭାଙ୍ଗିଯାଇଥିଲା ବେଳେ ବାପା ରମେଶ ସାମାନ୍ୟ ଆହତ ହୋଇଛନ୍ତି। ଉଭୟଙ୍କୁ ବନବିଭାଗ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି।

    ହାତୀ-ମଣିଷ ଲଢ଼େଇ ବଢ଼ୁଛି। କେଉଁଠି ଜନବସତି ମୁହାଁ ହାତୀ ମଣିଷର ଜୀବନ ନେଲାଣି ତ କେଉଁଠି ଜଙ୍ଗଲ ମୁହାଁ ମଣିଷ ହାତୀର ଆବାସ ପ୍ରତି ବିପଦ ସୃଷ୍ଟି କରିବାରେ ଲାଗିଛି।

  • ହାତୀ ଆକ୍ରମଣରେ ଯୁବକ ଗୁରୁତର

    ଭବାନୀପାଟନା: ହାତୀ ଆକ୍ରମଣରେ ଯୁବକ ଗୁରୁତର । ଏଭଳି ଅଘଟଣା ଘଟିଛି ବିଶ୍ୱନାଥପୁର ରେଞ୍ଜ ଅଧିନରେ ଥିବା କୁମଖାଲ ପଞ୍ଚାୟତର ପିଡେଲବାଜୁ ଗାଁରେ । ବିଳମ୍ବିତ ରାତିରେ ୨୦ରୁ ଊର୍ଦ୍ଧ୍ୱ ଜଙ୍ଗଲି ହାତୀ ଗାଁକୁ ପଶି ଆସିଥିବାବେଳେ ହାତୀ ଭୟରେ ଗାଁର ସବୁ ଲୋକ ଘରୁ ବାହାରକୁ ବାହାରି ଆସିଥିଲେ ।

    ହେଲେ ଗାଁର ମୋହନ ନାଗ ତାଙ୍କ ପରିବାର ସହ  ବାହାରକୁ ଆସିପାରି ନଥିଲା । ଫଳରେ ହାତୀ ଘରର ଅସବାପତ୍ର ଭଙ୍ଗା ରୁଜା କରିବା ସହ ମୋହନ ନାଗଙ୍କୁ ଶୁଣ୍ଢରେ କଚାଡି ଦେଇଥିଲା। ଫଳରେ ତାଙ୍କ ଅବସ୍ଥା ଗୁରୁତର ହୋଇଯାଇଥିଲା । ସ୍ଥାନୀୟ ଲୋକେ ତାଙ୍କୁ ପ୍ରଥମେ ବିଶ୍ୱନାଥପୁର ଡାକ୍ତରଖାନାରେ ଭର୍ତ୍ତି କରିଥିଲେ।

    କିନ୍ତୁ ତାଙ୍କ ସ୍ଥିତି ଗୁରୁତର ଥିବାରୁ ତାଙ୍କୁ  ଭବାନୀପାଟଣା ମୁଖ୍ୟ ଡାକ୍ତରଖାନକୁ ସ୍ଥାନାନ୍ତର କରାଯାଇଥିଲା । ଖବର ପାଇ ବନବିଭାଗ ତଦନ୍ତ ଜାରି ରଖିବା ସହ କ୍ଷୟକ୍ଷତିର ମଧ୍ୟ ଆକଳନ କରିଛି ।

Back to top button