କୁଜଙ୍ଗ: ବାଟବଣା ହେଉଛି ଖାଦ୍ୟ ସୁରକ୍ଷା ଯୋଜନା । ଚାଉଳ ଓ ଗହମ ନ ପାଇ ହିତାଧିକାରୀ ହନ୍ତସନ୍ତ ହେଉଥିବା ଅଭିଯୋଗ ହୋଇଛି । ବିଭାଗୀୟ ଅଧିକାରୀଙ୍କ ଅବହେଳା ଯୋଗୁଁ ଜଗତସିଂହପୁର କୁଜଙ୍ଗ ବ୍ଲକରେ ଡିସେମ୍ବରରେ ଏକ ହଜାର ୩୩ କୁଇଣ୍ଟାଲ ଗହମ ଯୋଗାଣ ହୋଇପାରିନାହିଁ । ଯାହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ବାଟବଣା ହେଉଛି ଖାଦ୍ୟ ସୁରକ୍ଷା ଯୋଜନା । ହିତାଧିକାରୀଙ୍କ ନିକଟରେ ପହଂଚିପାରୁନି ରାସନ ସାମଗ୍ରୀ । ବିଭାଗୀୟଙ୍କ ଅବହେଳା ଯୋଗୁଁ ମାସକୁ ମାସ ଏହି ଚାଉଳ ,ଗହମ ଗରିବ ଜନସାଧାରଣଙ୍କ ନିକଟରେ ପହଞ୍ଚୁନି । ରାସନ କାର୍ଡ ଜରିଆରେ ଟଙ୍କିକିଆ ଚାଉଳ, ଗହମ ସମେତ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ଲୋକଙ୍କୁ ମାଗଣା ଚାଉଳ ଗହମ ପ୍ରଦାନ କରାଯାଉଛି । ହେଲେ ଏହି କାର୍ଯ୍ୟରେ ବ୍ୟତିକ୍ରମ ଦେଖାଦେଇଛି । ଜଗତସିଂହପୁର କୁଜଙ୍ଗ ବ୍ଲକରେ ଡିସେମ୍ବର ମାସରେ ଏକ ହଜାର ୩୩ କୁଇଣ୍ଟାଲ ଗହମ ଯୋଗାଣ ହୋଇପାରିନି । ଯେଉଁଥିପାଇଁ କୁଜଙ୍ଗ ବ୍ଲକ ଓ ପାରାଦୀପ ମୁନିସିପାଳିଟିକୁ ମିଶାଇ ମୋଟ ଲକ୍ଷେ ତେତିଶ ହଜାର ହିତାଧିକାରୀ ଗହମ ପାଇବାରୁ ବଞ୍ଚିତ ହୋଇଛନ୍ତି । ଯାହାକୁ ନେଇ ଅସନ୍ତୋଷ ଦେଖାଦେଇଛି ।
କୁଜଙ୍ଗ ବ୍ଲକ ଓ ପାରାଦୀପ ମୁନିସିପାଳିଟିରେ ମୋଟ ତେତିଶ ହଜାର ରାସନକାର୍ଡଧାରୀ ଖାଦ୍ୟ ସୁରକ୍ଷା ଯୋଜନାରେ ସାମିଲ ହୋଇଥିବା ବେଳେ ମୋଟ ଏକ ଲକ୍ଷ ତେତିଶ ହଜାର ହିତାଧିକାରୀ ରହିଛନ୍ତି । ବଣ୍ଟନ ନିମନ୍ତେ ମାସିକ ପ୍ରାୟ ଚାରି ହଜାର କୁଇଣ୍ଟାଲ ଚାଉଳ ଓ ଦୁଇ ହଜାର କୁଇଣ୍ଟାଲ ଗହମ ଡିଲରଙ୍କ ମାଧ୍ୟମରେ ରାସନ କାର୍ଡ ଜରିଆରେ ବଣ୍ଟନ ହୋଇଥାଏ । ସେହିପରି ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ମଧ୍ୟ ଚାଉଳ ଓ ଗହମ ହିତାଧିକାରୀଙ୍କୁ ଯୋଗାଇ ଦିଆଯାଇଥାଏ । ମାତ୍ର ଗତ ଡିସେମ୍ବର ମାସରେ ବଣ୍ଟନ ସମ୍ଭବ ହୋଇନି ।
ସେପଟେ ଡିସେମ୍ବର ମାସରେ ଗହମ ଯୋଗାଣ ବନ୍ଦ ରହିଥିବା ଘଟଣାକୁ ସ୍ୱୀକାର କରିଛନ୍ତି ସ୍ଥାନୀୟ ବିଡ଼ିଓ। ଏନେଇ ଜିଲ୍ଲା ଯୋଗାଣ ଅଧିକାରୀଙ୍କୁ ଅବଗତ କରାଯାଇଥିବା ସେ କହିଛନ୍ତି । ଅନ୍ୟପକ୍ଷରେ ଏଫସିଆଇ (ଫୁଡ଼ କର୍ପୋରେସନ ଅଫ ଇଣ୍ଡିଆ) ମାଧ୍ୟମରେ ଆସୁଥିବା ଗହମ ଯୋଗାଣ ବନ୍ଦ ଥିବା ଯୋଗୁ ହିତାଧିକାରୀ ମାନେ ଗହମ ପାଇପାରୁ ନଥିବା ଜିଲ୍ଲା ଯୋଗାଣ ଅଧିକାରୀ କହିଛନ୍ତି ।
ତେବେ କାରଣ ଯାହା ହେଉନା କାହିଁକି ଖାଦ୍ୟ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ ଗରିବ ଜନସାଧାରଣଙ୍କୁ ରାସନ ଯୋଗାଣକୁ ତ୍ୱରାନ୍ୱିତ କରିବା ସହ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ନେବା ଆବଶ୍ୟକ ହୋଇପଡିଛି।
ରଶ୍ମୀରଞ୍ଜନ ମହାପାତ୍ରଙ୍କ ରିପୋର୍ଟ
Naxatra News is now on Whatsapp
Join and get latest news update delivered to you via whatsapp
Join Now
