ନାବାଳିକାଙ୍କ ନରକଙ୍କାଳ ଠାବ ପରେ ସବୁଠି ହଇଚଇ

ଗଣଦୁଷ୍କର୍ମ ପରେ ଛୁରୀ ଭୂଷି ହତ୍ୟା କଲେ। ବୀଭତ୍ସ ହତ୍ୟା ପରେ ପ୍ରମାଣ ନଷ୍ଟ କରିବାକୁ ପେଟ୍ରୋଲ ଢାଳି ନିଆଁ ଲଗାଇଦେଇଥିଲେ। ନାବାଳିକାଙ୍କ ନରକଙ୍କାଳ ଠାବ ପରେ ସବୁଠି ହଇଚଇ ଖେଳିଛି। ଅପହରଣ, ଗଣଦୁଷ୍କର୍ମ ଓ ହତ୍ୟା ଅଭିଯୋଗରେ ପୁଲିସ ମୁଖ୍ୟ ଅଭିଯୁକ୍ତ ବିଜୟ ନାୟକ ସମେତ ତାହାର ୩ ସହଯୋଗୀ ସଞ୍ଜୀବ ସାହୁ, ଦୀପକ ସାହୁ ଓ ଚନ୍ଦନ ସେଠୀକୁ ଗିରଫ କରିଛି। ଏ ଘଟଣାରେ ସମସ୍ତ ଅଭିଯୁକ୍ତ ଗିରଫ ସତ୍ତ୍ୱେ ଲୋକଙ୍କ ଆକ୍ରୋଶ ଥମିନି। ଏଭଳି ବୀଭତ୍ସ ହତ୍ୟାକାଣ୍ଡ ଭିଆଇଥିବା ଅଭିଯୁକ୍ତଙ୍କୁ ଫାଶୀ ଖୁଣ୍ଟରେ ଅବିଳମ୍ୱେ ଝୁଲାଇଦିଆଯାଉ ବୋଲି ସବୁଠି ଦାବି ହୋଇଛି। ପୀଡ଼ିତା ପରିବାରକୁ ନ୍ୟାୟ ସହ ଦୋଷୀଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ ଆକ୍ସନ ଦାବିରେ ଟିକାବାଲିରେ ୧୨ ଘଣ୍ଟିଆ ବନ୍ଦ ପାଳନ ହୋଇଛି। ବଣିକ ସଂଘ, ଅଟୋ ସଂଘ, ଟ୍ରାକ୍ଟର ଚାଳକ ମହାସଂଘ, ନାରୀ ସୁରକ୍ଷା ମହିଳା ମହାସଂଘ, କନ୍ଧମାଳ ପ୍ରଗତି ମିଳିତ ମହାସଂଘ ଆଦି ବନ୍ଦ ପାଳନ କରିଥିଲେ। ବନ୍ଦକୁ ଅଭୂତପୂର୍ବ ସମର୍ଥନ ଚାରିଆଡ଼ୁ ମିଳିଥିଲା।

ଗଲା ମାସ ୨୭ ତାରିଖରେ ଯୁକ୍ତ ଦୁଇ ପ୍ରଥମ ବର୍ଷର ଛାତ୍ରୀ ଜଣକ ଟିଉସନକୁ ଯାଇ ଆଉ ଘରକୁ ଫେରିନଥିଲେ। ସଂଧ୍ୟାରେ ତାଙ୍କ ପ୍ରେମିକ ବିଜୟ ଶଙ୍କରାଖୋଲକୁ ଡାକି ଆଉ ଦୁଇ ସାଙ୍ଗ ସଞ୍ଜୀବ ଓ ଦୀପକ ସହ ପହଞ୍ଚିଥିଲା। ସୋରଡ଼ା ଥାନା ସାନକବାଡ଼ି ଜଙ୍ଗଲକୁ ଯାଇ ସମସ୍ତଙ୍କ ସହ ଶାରୀରିକ ସମ୍ପର୍କ ରଖିବାକୁ ବାଧ୍ୟ କରିଥିଲେ ଛାତ୍ରୀ ଜଣକୁ। ଆଉ ଦୁଷ୍କର୍ମ ପରେ ହତ୍ୟା କରି ପ୍ରମାଣ ନଷ୍ଟ କରିବାକୁ ପେଟ୍ରୋଲ ଢାଳି ନିଆଁ ଲଗାଇଦେଇଥିଲେ। ଛାତ୍ରୀ ଜଣକର ଖୋଜଖବର ନ ପାଇବାରୁ ପରିବାର ଲୋକେ ଟିକାବାଲି ଥାନାରେ ଚଳିତ ମାସ ୩ ତାରିଖରେ ନିଖୋଜ ମାମଲା ରୁଜୁ କରିଥିଲେ। ଗଲା ଶନିବାର ସୋରଡ଼ା ଥାନା କେଟାମଣି ପାହାଡ଼ ତଳୁ ନରକଙ୍କାଳ ମିଳିବା ପରେ ଛାନଭିନ୍ ହୋଇଥିଲା। ଏହି ଘଟଣାରେ ୪ ଅଭିଯୁକ୍ତଙ୍କୁ ପୁଲିସ ଗିରଫ କରିଛି। ସେପଟେ ଏଭଳି ଜଘନ୍ୟ ହତ୍ୟାକାଣ୍ଡକୁ ନେଇ ତିନି ପ୍ରମୁଖ ଦଳ ସମସ୍ୱର ଉଠାଇଛି। ଜି.ଉଦୟଗିରି ବିଧାୟକ କହିଛନ୍ତି, ଏଭଳି ଦୋଷୀଙ୍କୁ ତୁରନ୍ତ ଫାଶୀ ଦେବା ଦରକାର। ବିଜେଡି କହିଛି, ଏଭଳି ବୀଭତ୍ସ କାଣ୍ଡ ଭିଆଇଥିବା ଅଭିଯୁକ୍ତମାନଙ୍କୁ ଫାଷ୍ଟଟ୍ରାକ୍ କୋର୍ଟରେ ତୁରନ୍ତ ଫୈସଲା କରି ଦୃଷ୍ଟାନ୍ତମୂଳକ ଦଣ୍ଡ ଦେବା ଜରୁରୀ। ଆଉ କେହି ଏମିତି କରିବା ପୂର୍ବରୁ ଶହେ ଥର ଭାବିବେ ଯେମିତି। ଶାସକ ଦଳ କହିଛି, ସମସ୍ତ ଅଭିଯୁକ୍ତ ଗିରଫ ହୋଇଛନ୍ତି। ପୀଡ଼ିତା ପରିବାରକୁ ନ୍ୟାୟ ଦେବା ଲାଗି ସରକାର ସଂକଳ୍ପବଦ୍ଧ। ଦୋଷୀଙ୍କୁ କଡ଼ା ଦଣ୍ଡ ମିଳିବ।

ଏଭଳି ସ୍ପର୍ଶକାତର ପ୍ରସଙ୍ଗକୁ ନେଇ ପୁରା ଟିକାବାଲି ସ୍ତବ୍ଧ ହୋଇଯାଇଛି। ନାରୀ ସୁରକ୍ଷା ପ୍ରସଙ୍ଗକୁ ନେଇ ଗଲା ୧୧ ଦିନ ଧରି ବିଧାନସଭାରେ ହଙ୍ଗାମା କରି ଆସୁଥିବା କଂଗ୍ରେସ ଏହି ମାମଲାକୁ ବି ଗଣ୍ଠି କରିଛି।

Naxatra News is now on Whatsapp

Join and get latest news update delivered to you via whatsapp

Join Now