koraput

ଶ୍ରେଣୀ ଗୃହରେ ପାଟି କରିବାରୁ ନିର୍ଦ୍ଧୁମ ପିଟିଲେ ଶିକ୍ଷକ । ସରକାରଙ୍କ ଦଣ୍ଡମୁକ୍ତ ବିଦ୍ୟାଳୟ ନିୟମ ଥାଇ ମଧ୍ୟ କୋରାପୁଟ ବୋରିଗୁମ୍ମା ବ୍ଲକର ଉପାନ୍ତ ବରଗାଁ ର ଜେଇଏଲସି ବିଦ୍ୟାଳୟର ଏ କରୁଣ ପରିଣତି ।
ଗତକାଲି ଉକ୍ତ ବିଦ୍ୟାଳୟର ଚତୁର୍ଥ ଓ ପଞ୍ଚମ ଶ୍ରେଣୀର ଛାତ୍ରଛାତ୍ରୀ ଶ୍ରେଣୀରେ ପାଟି ତୁଣ୍ଡ କରିବାରୁ ବିଦ୍ୟାଳୟର ଶିକ୍ଷକ ଜ୍ୟତିଚନ୍ଦ୍ର ମହାନ୍ତି ଏକ ବାଡିରେ ସେମାନଙ୍କୁ ମାରିଥିବା ଅଭିଯୋଗ କରିଛନ୍ତି ଅଭିଭାବକ ।
ଏହି ଘଟଣାରେ ଅଭିଭାବକମାନେ ତୀବ୍ର ଅସନ୍ତୋଷ ପ୍ରକାଶ କରି ସମ୍ପୃକ୍ତ ଶିକ୍ଷକଙ୍କ ବିରୋଧରେ ଗୋଷ୍ଠୀଶିକ୍ଷା ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି । ଅଭିଯୋଗ ପାଇ ଗୋଷ୍ଠୀଶିକ୍ଷା ଅଧିକାରୀ ବିଦ୍ୟାଳୟରେ ପହଞ୍ଚି ଅଧିକ ତଦନ୍ତ ଚଳାଇଛି ।
ସୂଚନା ଯୋଗ୍ୟ, ଏହି ବିଦ୍ୟାଳୟରେ ପ୍ରଥମ ରୁ ପଞ୍ଚମ ପର୍ଯ୍ୟନ୍ତ ମୋଟ ୯୪ ପିଲା ପଢୁଥିବା ବେଳେ ସେମାନଙ୍କୁ ପଢାଇବା ପାଇଁ ମାତ୍ର ଦୁଇ ଜଣ ଶିକ୍ଷକ ଥିବାରୁ ଶିକ୍ଷକଙ୍କ ଅଭାବ ପୂରଣ ପାଇଁ ଦାବି କରିଛନ୍ତି ଅଭିଭାବକ ।

କୋରାପୁଟ: ରାଜ୍ୟ ସରକାରଙ୍କ ଫୋକସରେ ଏବେ ଆଦିବାସୀ ଅଧ୍ୟୁଷିତ କୋରାପୁଟ ଜିଲ୍ଲା।  କୋରାପୁଟ ଗସ୍ତରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା 5T ସେକ୍ରେଟାରୀ ଭିକେ ପାଣ୍ଡିୟାନ । ଏହି ଗସ୍ତ କାଳରେ ସେ କୋରାପୁଟ ଜିଲାର ନକ୍ସଲ ଉପଦ୍ରୁତ ନାରାୟଣପାଟଣା ବ୍ଲକ ଗସ୍ତ କରିବେ। ପାଣ୍ଡିୟାନଙ୍କ ପ୍ରଥମ କୋରାପୁଟ ଗସ୍ତ ହୋଇଥିବାରୁ ଏହି ଗସ୍ତକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅନେକ ଆଶା ଓ ଉତ୍ସାହ ଦେଖିବାକୁ ମିଳିଛି ।

ପାଣ୍ଡିୟାନଙ୍କ ସହିତ ଆଇଏଏସ ଭିନିଲ କ୍ରିଷ୍ଣା ଓ ଜିଲ୍ଲାପାଳ ଅବଦଲ ମହମ୍ମଦ ଅଖତର ମଧ୍ୟ ସାମିଲ ରହିବେ । ସ୍ୱତନ୍ତ୍ର ହେଲିକପ୍ଟର ଯୋଗେ ପାଣ୍ଡିଆନ ହାଇସ୍କୁଲ ପଡ଼ିଆରେ ଅବତରଣ କରିବା ପରେ ନିକଟସ୍ଥ 5t ହାଇସ୍କୁଲ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି। ଏହି ପରିଦର୍ଶନରେ ସେ ପିଲାଙ୍କ ସହିତ ମଧ୍ୟ ଆଲୋଚନା କରିବେ ।

ଏହା ପରେ ସ୍ଥାନୀୟ ଐତିହାସିକ ପୁରାତନ ଜଗନ୍ନାଥ ମନ୍ଦିର ବୁଲି ଦେଖିବେ। ମନ୍ଦିରକୁ ୫ଟି ସଚିବଙ୍କ ଗସ୍ତ ଥିବାରୁ ମନ୍ଦିରକୁ କିଛି ଅନୁଦାନ ପ୍ରଦାନ କରିପାରନ୍ତି ବୋଲି ଆଶା କରାଯାଏ। ଏହି ଗସ୍ତ କାଳରେ ଚିନ୍ତାଗୁଡା ଜଳସେଚନ ପ୍ରକଳ୍ପର ଶିଳାନ୍ୟାସ କରିବାର ମଧ୍ୟ କାର୍ଯ୍ୟକ୍ରମ ରହିଛି।

ଭୂଷିତ ବିଡିକାଙ୍କ ରିପୋର୍ଟ

କୋରାପୁଟ: ଆଜିଠାରୁ ଆସନ୍ତା ୨୨ ତାରିଖ ପର୍ଯ୍ୟନ୍ତ ରାଜ୍ୟ ସ୍ତରୀୟ କୋରାପୁଟ ପରବ ମହୋତ୍ସବ।  ସ୍ଥାନୀୟ ସରକାରୀ ମହାବିଦ୍ୟାଳୟ ପଡ଼ିଆଠାରେ ଅନୁଷ୍ଠିତ ହୋଇଛି ଏହି ମହୋତ୍ସବ । କରୋନା କଟକଣା ମଧ୍ୟରେ ୨ ବର୍ଷ ହେବ ଏହି ମହୋତ୍ସବ ଫିକା ପଡିଥିବା ବେଳେ ଚଳିତ ବର୍ଷର ମହୋତ୍ସବ କୁ ନେଇ ବେଶ ଉତ୍ସାହିତ ଜିଲ୍ଲାବାସୀ ।

ଆରମ୍ଭ ହୋଇଯାଇଛି କୋରାପୁଟର ପ୍ରସିଦ୍ଧ ମହୋତ୍ସବ ‘ପରବ’ । ଗତ ୨ବର୍ଷ ହେବ କରୋନା କଟକଣା ପାଇଁ ମହୋତ୍ସବ ଫିକା ପଡିଥିବା ବେଳେ ଚଳିତ ବର୍ଷ ବେଶ ଆଡମ୍ୱରରେ ଆୟୋଜିତ ହୋଇଛି ପରବ । ଶନିବାରଠୁ  ବୁଧବାର ଯାଏଁ ମଞ୍ଚ ଉପରେ ଦୁଲୁକିବ ଜିଲା,ରାଜ୍ୟ ଓ ରାଜ୍ୟ ବାହାରର କଳା ଓ ନୃତ୍ୟ । ଉଦଘାଟନୀ ଉତ୍ସବରେ ଆଇନ ତଥା ଅନୁସୂଚିତ ଜାତି ଓ ଜନ ଜାତି ମନ୍ତ୍ରୀ ଜଗନ୍ନାଥ ସାରକା ମୁଖ୍ୟ ଅତିଥିଭାବେ ଯୋଗ ଦେଇ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି ।

ମଂଚରେ ଦର୍ଶକଙ୍କୁ ଆକୃଷ୍ଟ କରିଛି ଭାଙ୍ଗରା, ଡ଼ଙ୍ଗରିଆ କନ୍ଦ ନାଚ, ଆସାମର ବିହୁ ଓ ବିଭିନ୍ନ ବ୍ଲକର କୋରାପୁଟିଆ ଢେମସା ଓ ନାଚ । ଶୀତୁଆ ସନ୍ଧ୍ୟାରେ ରଙ୍ଗୀନ କାର୍ଯ୍ୟକ୍ରମକୁ ଦେଖିବାକୁ ବିଶେଷ କରି ଯୁବ ପିଢ଼ିଙ୍କି ଆଗ୍ରହ ଦେଖା ଦେଇଛି। ଅନ୍ୟପଟେ ଲୋକଙ୍କ ସମାବେଶ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ ବ୍ୟାପକ କଡାକଡି କରାଯାଇଛି । ଅପରାହ୍ନ 3ଟାରୁ ରାତ୍ର ପର୍ଯ୍ୟନ୍ତ ସମସ୍ତ ଭାରି ଯାନ ଓ ଯାତ୍ରୀ ବାହି ବସ ସହର ମଧ୍ୟକୁ ଚଳାଚଳ ବାରଣ କରାଯିବା ସହିତ ଜୟପୁରରୁ ରାୟଗଡା, ସୁନାବେଡା କୁ ଯିବା ଯାନ ଗୁଡିକୁ ଲିମିକା ଓ ବାସୁପୁଟ ରାସ୍ତା ଦେଇ ଯିବାକୁ ବ୍ୟବସ୍ଥା ହୋଇଛି । ସେହିଭଳି ପରବ ପଡିଆକୁ ଲୋକଙ୍କ ଯିବା ଆସିବା କରିବାକୁ ପାଞ୍ଚ ଟଙ୍କା ଟିକେଟରେ ୨୦ ମିନିଟ ବ୍ୟବଧାନରେ କୋରାପୁଟ ରୁ ସୁନାବେଡାକୁ 3ଟି ସରକାରୀ ବସ ଯୋଗାଇ ଦିଆଯାଇଛି ।

 ଅନ୍ୟପଟେ ପରବ ପଡିଆରେ ୩୫୦ରୁ ଉର୍ଧ୍ଵ ଷ୍ଟଲ ମଧ୍ୟ ବ୍ୟବସାୟୀଙ୍କ ପାଇଁ ଓରମାସ ତରଫରୁ ବ୍ୟବସ୍ଥା କରାଯାଇଛି । ଏଠାରେ ମଧ୍ୟ ରାଜ୍ୟର ବିଭିନ୍ନ ଜିଲା ଓ ରାଜ୍ୟ ବାହାରୁ ବ୍ୟବସାୟୀମାନେ ଅଂଶ ଗ୍ରହଣ କରିଛନ୍ତି । ମିଶନ ଶକ୍ତି ଦ୍ୱାରା କୋରାପୁଟ ଜିଲାର ମହିଳା ସ୍ୱୟଂ ସହାୟକ ଗୋଷ୍ଠିଙ୍କୁ ସେମାନଙ୍କ ଉତ୍ପାଦିତ ଦ୍ରବ୍ୟ ବିକ୍ରୟ କରିବାକୁ ମାଗଣାରେ ଷ୍ଟଲ ପ୍ରଦାନ କରାଯାଇଥିବା ଓରମାସ କତ୍ତୃପକ୍ଷ ସୂଚନା ଦେଇଛନ୍ତି । ତେବେ ନାରାୟଣ ପାଟଣାର ବାଉଁଶ ତିଆରି ଘର ଉପକରଣ,କୋଟିଆର ଝାଡୁକୁ ପ୍ରଦର୍ଶନରେ ସାମିଲ କରାଯାଇଥିବା ବେଳେ ମାଣ୍ଡିଆ ଦ୍ୱାରା ପ୍ରସ୍ତୁତ ବିଭିନ୍ନ ସୁଆଦିଆ ଖାଦ୍ୟ ଓ ମାଣ୍ଡିଆ ଚା ମଧ୍ୟ ସ୍ଥାନ ପାଇଛି ।

ଚଳିତ ବର୍ଷ ୨୫ ତମ ପରବ ଅନୁଷ୍ଠିତ ହୋଇଛି । ୫ ଦିନ ଧରି ଆୟୋଜିତ ଏହି ମହୋତ୍ସବକୁ  ଲୋକେ ବେଶ ଉପଭୋଗ କରିବେ ବୋଲି ଆଶାବାଦୀ ଅଛନ୍ତି ପ୍ରଶାସକ । ଅନ୍ୟପଟେ ପଡ଼ିଆ ପଥରେ ଇଣ୍ଡିଆ ଗେଟ ମଡେଲ ବେଶ ଆକର୍ଷିତ କରିଛି ଦର୍ଶକଙ୍କୁ।

ଭୂଷିତ ବିଡିକାଙ୍କ ରିପୋର୍ଟ

କୋରାପୁଟ: ଗ୍ରାମାଞ୍ଚଳର ବିକାଶ ପାଇଁ ରାଜ୍ୟ ଓ କେନ୍ଦ୍ର ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ତାହା ଲୋକଙ୍କ ହିତରେ ଆସୁନି । ଠିକାଦାର ଓ ସରକାରୀ ବାବୁଙ୍କ ମଧୁଚନ୍ଦ୍ରିକାରେ ହେଉଛି ବାଟମାରଣା। ଯାହାର ଏକ ଜ୍ବଳନ୍ତ ଉଦାହରଣ କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ।

ସ୍ବାଧୀନତାର ୭୫ ବର୍ଷ ପରେ ମଧ୍ୟ କୋରାପୁଟ ବନ୍ଧୁଗାଁ ପଂଚାୟତବାସୀଙ୍କ ପାଇଁ ଗମନାଗମନ ମୁଖ୍ୟସମସ୍ୟା ହୋଇ ଠିଆହୋଇଛି। ଦୀର୍ଘ ଦାବି ପରେ ଝଞ୍ଜାବତୀ ନଦୀ ଉପରେ ଦୁଇ କୋଟିରୁ ଅଧିକ ଟଙ୍କା ବ୍ୟୟରେ ରାଜ୍ୟ ସରକାର ପୋଲ ନିର୍ମାଣ କଲେ । ସେହିପରି କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ସଡ଼କ ଯୋଜନାରେ ପ୍ରାୟ ୫ କୋଟି ୯୦ ଲକ୍ଷ ଟଙ୍କା ବ୍ୟୟରେ ସରପୋଲି ଛକଠାରୁ କାବିରିବାଡି ପର୍ଯ୍ୟନ୍ତ ପ୍ରାୟ ଆଠ କିମି ରାସ୍ତା ନିର୍ମାଣ କରାଗଲା । ରାସ୍ତା କାମ ୨୦୧୫ରେ ଆରମ୍ଭ ହୋଇ ବର୍ଷକ ପରେ ଶେଷ ହେଲା। ହେଲେ କାମ ସରିବାର ଦୁଇବର୍ଷ ପରେ ରାସ୍ତାଟି ଲୋକଙ୍କ ଯାତାୟତ ଉପଯୋଗୀ ହୋଇ ରହିନି।

ରାସ୍ତାର ଦୁଇ ଗଡରେ ଡ୍ରେନେଜ ବ୍ୟବସ୍ଥା ହୋଇନଥିବାରୁ ବର୍ଷାପାଣିରେ ରାସ୍ତା ଧୋଇ ହୋଇଯିବା ସହିତ ଗାତ ହୋଇଛି । ଏହି ରାସ୍ତାରେ ଆମ୍ବୁଲାନ୍ସ ଯିବା ତ ଦୂରର କଥା ଦୁଇଚକିଆରେ ଯିବାବି ସମ୍ଭବ ନୁହଁ । ସେପଟେ ରାସ୍ତାର ଏଭଳି ଅବସ୍ଥା ଯୋଗୁଁ ଗାଁକୁ ସରକାରୀ ବାବୁ ଯିବାକୁ ଅମଙ୍ଗ ହେଉଛନ୍ତି। ଫଳରେ ଲୋକେ   ଟଙ୍କିକିଆ ଚାଉଳ ଓ ଭତ୍ତାରୁ ବଞ୍ଚିତ ହୋଇ ରହିଛନ୍ତି। ଏ ନେଇ ଗ୍ରାମବାସୀମାନେ ବହୁ ବାର ଜିଲ୍ଲା ପ୍ରଶାସନ ନିକଟରେ ଅଭିଯୋଗ କଲେ ବି କିଛି ସୁଫଳ ମିଳୁନଥିବା ପଞ୍ଚାୟତର ମେକ୍ବାଡା ଗ୍ରାମବାସୀ ଅଭିଯୋଗ କରିଛନ୍ତି।

ରାସ୍ତା ଘାଟର ଏଭଳି ଅବସ୍ଥା ଯୋଗୁଁ  ଲୋକେ ଖାଲି ସରକାରୀ ଯୋଜନାରୁ ବଞ୍ଚିତ ହେଉଛନ୍ତି ତା ନୁହେଁ ଅନେକ ସମୟରେ ଦୁର୍ଘଟଣା ଘଟୁଛି। ଛାତ୍ରଛାତ୍ରୀ ଏବଂ ଶିକ୍ଷକ ଶିକ୍ଷୟିତ୍ରୀ ନିର୍ଦ୍ଧିଷ୍ଟ ସମୟରେ ବିଦ୍ୟାଳୟରେ ପହଞ୍ଚିବା ସମ୍ଭବ ହେଉନି। ଅନ୍ୟପଟେ ଏହା ଉପରେ ତୁରନ୍ତ ପଦକ୍ଷେପ ନିଆଯିବ ବୋଲି କହିଛନ୍ତି ସୁନାବେଡା ଗ୍ରାମ୍ୟ ଉନ୍ନୟନ ଡିଭିଜନର କାର୍ଯ୍ୟନିର୍ବାହୀ ଯନ୍ତ୍ରୀ।

ଭୂଷିତ ବିଡିକାଙ୍କ ରିପୋର୍ଟ

କୋରାପୁଟ: ଗୋଟିଏ ପଦବୀ କିନ୍ତୁ ୨ ଦାବିଦାର। ଆଉ ଏହି ପଦବୀକୁ ନେଇ ୨ ମହିଳା ଅଧିକାରୀ ଏବେ ମୁହାଁମୁହିଁ। କଥା ରାଜଧାନୀ ପର୍ଯ୍ୟନ୍ତ ପହଞ୍ଚିଲାଣି। ସମନ୍ୱିତ ଶିଶୁ ବିକାଶ ଯୋଜନା ଅଧିନସ୍ଥ କୋଟପାଡର ICDS କାର୍ଯ୍ୟାଳୟରେ ଦେଖା ଦେଇଛି ଏପରି ସ୍ଥିତି। ଏଠାକାର CDPO ପଦବୀକୁ ନେଇ ଦେଖା ଦେଇଛି ବିବାଦ। ଗୋଟିଏ ପଦବୀ ପାଇଁ ୨ ଜଣ ଦାବିଦାର ଥିବାରୁ ଉଭୟେ ଅଲଗା ଅଲଗା ରୁମରେ ବସୁଛନ୍ତି। ଆଉ ଏହା  ୧୫ ଦିନ ହେବ ଏଠାରେ ଏମିତି ଚାଲିଛି। ଫଳରେ ଉନ୍ନୟନ କାର୍ଯ୍ୟ ଓ କ୍ଷେତ୍ର ପରିଦର୍ଶନ କାର୍ଯ୍ୟ ବାଧା ପ୍ରାପ୍ତ ହେଉଛି। ଅଙ୍ଗନବାଡି କର୍ମୀମାନେ ମଧ୍ୟ ଦ୍ଵନ୍ଦରେ ପଡୁଛନ୍ତି ଯେ ସେମାନେ କେଉଁ ଅଧିକାରୀଙ୍କ ନିର୍ଦ୍ଦେଶକୁ ମାନିବେ। ଏଭଳି ଦୃଶ୍ୟ ସାମ୍ନାକୁ ଆସିଛି କୋରାପୁଟ ଜିଲ୍ଲା କୋଟପାଡ଼ ବ୍ଲକ ଆଇସିଡିସି କାର୍ଯ୍ୟାଳୟରୁ। ସୂଚନା ଅନୁଯାୟୀ କୋଟପାଡ଼  ସିଡିପିଓ ସ୍ବର୍ଣ୍ଣଭା ଦାଶଙ୍କୁ  ନନ୍ଦାହଣ୍ଡି ସିଡିପିଓ ଭାବେ ବଦଳି ହୋଇଥିବା ତାଙ୍କ ସ୍ଥାନରେ  ନନ୍ଦାହାଣ୍ଡି ସିଡିପିଓ ସୁନିତା ଦେବୀଙ୍କୁ କୋଟପାଡ଼ ସିଡିପିଓ ଭାବେ ଦାୟୀତ୍ୱ ନେବା ପାଇଁ  ନିର୍ଦେଶ ହୋଇଛି। କିନ୍ତୁ ପୁରୁଣା ସିଡିପିଓ ନିଜ ପଦ ଛାଡି ରିଲିଭ ନ ହେବାରୁ ଏହି ସମସ୍ୟା ଦେଖା ଦେଇଛି।

କୋରାପୁଟ: କୋରାପୁଟ ଜିଲ୍ଲାରେ ଝାଡାବାନ୍ତି ଆତଙ୍କ। ଦସମନ୍ତ ପୁର ବ୍ଲକ ପରେ ଏବେ ବୋରିଗୁମ୍ମା ବ୍ଲକର ହରଡା ଗୁଡାରେ ବ୍ୟାପିଛି ଝାଡାବାନ୍ତି। ୧୦  ସପ୍ତାହ ମଧ୍ୟରେ ଡମ୍ୱ ତୁରୁଞ୍ଜି ଗାଁର ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ  ସେହି ଗ୍ରାମରେ ଅଂକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି। ଗତକାଲି ୧୦ ଆକ୍ରାନ୍ତ ବୋରିଗୁମ୍ମା ମେଡିକାଲରେ ଭର୍ତି ହୋଇଥିବା ବେଳେ ଆଜି ଜଣଙ୍କୁ ମେଡିକାଲରେ ଭର୍ତି କରାଯାଇଛି। କୁମୁଲି ମେଡିକାଲରେ ଏହି ଗ୍ରାମର ୪ ଜଣ ଆକ୍ରାନ୍ତ ଭର୍ତି ହୋଇଛନ୍ତି। ବ୍ଲକର ହରଡ଼ା ଗୁଡ଼ାରୁ ଆରମ୍ଭ ହୋଇଥିବା ଝାଡବାନ୍ତି ଏବେ ସହରାଞ୍ଚଳ ପର୍ଯ୍ୟନ୍ତ ବ୍ୟାପିବାରେ ଲାଗିଛି।

ସେପଟେ ବୋରିଗୁମ୍ମା ପଂଚାୟତର ଦୁଲାଗୁଡାରେ ମଧ୍ୟ ଝାଡାବାନ୍ତି ଆକ୍ରାନ୍ତ ହୋଇ ବୋରିଗୁମ୍ମା ମେଡିକାଲରେ ଭର୍ତି ହୋଇଛନ୍ତି। ଝାଡାବାନ୍ତିକୁ ନିୟନ୍ତ୍ରଣ କରିବା ପାଇଁ ସ୍ୱାସ୍ଥ୍ୟ ବିଭାଗର ଟିମ ୨୦ ଦିନ ହେବ ଗାଁରେ ଟେଣ୍ଟ ମାରିଛି। ହେଲେ ବି ନାକେଦମ ସ୍ୱାସ୍ଥ୍ୟ ବିଭାଗ। ଝାଡାବାନ୍ତିର କାରଣ ଦୂଷିତ ଜଳ ବୋଲି ଅଭିଯୋଗ କରିଥିଲେ ମଧ୍ୟ ପ୍ରଶାସନିକ ସ୍ତରରେ ପାଣିର ଟେଷ୍ଟ କରାଯାଉନାହିଁ। ଅନ୍ୟପଟେ ସ୍ୱାସ୍ଥ୍ୟ ବିଭାଗର ଟିମ ବଭିନ୍ନ ଅଞ୍ଚଳକୁ ଯାଇ ଔଷଧ ବଣ୍ଟନ କରିବା ସହ ଜନ ସଚେତନ ମଧ୍ୟ କରୁଛନ୍ତି।

କୋରାପୁଟ: ସରକାର ଆଦିବାସୀ ଅଧ୍ୟୁଷିତ ଜିଲାରେ ଶିକ୍ଷାର ବିକାଶ ପାଇଁ ହଜାର ହଜାର କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ କୋରାପୁଟ ଜିଲାରେ ସରକାରଙ୍କ ଏଭଳି ଯୋଜନା ଫେଲ ମାରିଥିବା ବେଳେ ଉନ୍ନତମାନର ଶିକ୍ଷାରୁ ବଞ୍ଚିତ ହେଉଛନ୍ତି ଛାତ୍ରଛାତ୍ରୀ । ଆଜିବି ଏମିତି ଅନେକ ସ୍କୁଲ ରହିଛି ଯେଉଁଠି ପୁରୁଣା ଆଜବେଷ୍ଟ  ଓ ଭଙ୍ଗା ଛାତ ଘରେ ବସି ପିଲାମା. ପାଠ ପଢୁଥିବା ଦେଖିବାକୁ ମିଳିଛି। ଚାରିଟି  ଶ୍ରେଣୀ ଗୃହରେ ଚାଲିଛି ୧୦ଟି କ୍ଲାସ। ବର୍ଷ ବର୍ଷ ଧରି ଏଭଳି ଶିକ୍ଷାଦାନ ଚାଲୁଥିବା ବେଳେ ଏଥିପ୍ରତି କାହାର ନଜର ପଡୁନି।

କୋରାପୁଟ  ବୋରିଗୁମ୍ମା ବ୍ଲକ  ବି.ଜାନୀଗୁଡା ଉଚ୍ଚ ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ରହିଛି। କିନ୍ତୁ ୧୦ଟି ଶ୍ରେଣୀର  ଶିକ୍ଷାଦାନ ୩୦ରୁ ୪୦ ବର୍ଷର ପୁରୁଣା  ଆଜବେଷ୍ଟ ସହ ଦୁଇ ବଖରାରେ ଚାଲିଛି। ସମସ୍ତ ଶ୍ରେଣୀ ଗୃହ କାନ୍ଥ ଫାଟି ଆଁ କରିଥିବା ବେଳେ ଆଜବେଷ୍ଟ  ବି ଫାଟି ଗଳି ପଡୁଛି। ବର୍ଷା ହେଲେ ସ୍କୁଲ କଥା ନ କହିବା ଭଲ। ପିଲାଙ୍କୁ  ସ୍କୁଲ ବାରଣ୍ଡାରେ ପାଠ ପଢ଼ାଇବାକୁ ବାଧ୍ୟ ହୁଅନ୍ତି ଶିକ୍ଷକ,ଶିକ୍ଷୟିତ୍ରୀ । ଶ୍ରେଣୀ ଗୃହ ନ ଥିବା ବେଳେ ମଧ୍ୟାହ୍ନ ଭୋଜନ ଘର ଆସିବ କେଉଁଠୁ। ତେଣୁ ବାହାରେ ଖାଇଥାନ୍ତି ଛାତ୍ରଛାତ୍ରୀ । ସେପଟେ ଗୋଟିଏ ଶୌଚାଳୟ ଥିବାରୁ ବିଭିନ୍ନ ଅସୁବିଧା ହେଉଥିବା ଅଭିଯୋଗ ଆଣିଛନ୍ତି ଛାତ୍ରଛାତ୍ରୀ ।

୧୯୫୪ ମସିହାରୁ ଏହା ଉଚ୍ଚ ପ୍ରାଥମିକ ବିଦ୍ୟାଳୟ ରହିଥିଲା। ୨୦୧୧ ମସିହାରେ ଏହା ଉନ୍ନିତ ଉଚ୍ଚ ବିଦ୍ୟାଳୟର ମାନ୍ୟତା ପାଇଲା। ପ୍ରାଥମିକ ଶ୍ରେଣୀରେ ୧୬୨ ଜଣ ଛାତ୍ରଛାତ୍ରୀ  ରହିଛନ୍ତି। ହାଇସ୍କୁଲ ରେ ୪୭ ଜଣ ଛାତ୍ରଛାତ୍ରୀ। ମୋର ୨୦୯  ଛାତ୍ର ଛାତ୍ରୀ ରହିଛନ୍ତି। ପ୍ରାଥମିକ ଶିକ୍ଷା ପାଇଁ ୬ ଜଣ  ଶିକ୍ଷକ  ଏବଂ ହାଇସ୍କୁଲ ପାଇଁ  ଦୁଇ ଜଣ ଶିକ୍ଷକ ଥିବା ବେଳେ  ୪ଦିନ ତଳେ  ହାଇସ୍କୁଲ ପାଇଁ ଆଉ ଦୁଇଜଣ ଶିକ୍ଷକ ନିଯୁକ୍ତି ହୋଇଛନ୍ତି। 

ପ୍ରଥମରୁ ତୃତୀୟ ଶ୍ରେଣୀ  ଛାତ୍ରଛାତ୍ରୀଙ୍କୁ ଗୋଟିଏ ରୁମରେ ପାଠପଢା ହେଉଥିବା ବେଳେ ଚତୁର୍ଥ ,ପଞ୍ଚମ ଓ ଷଷ୍ଠ ଶ୍ରେଣୀ ପିଲାଙ୍କୁ ଗୋଦାମ ଗୃହରେ ଏବଂ ସପ୍ତମ ଓ ଅଷ୍ଟମ ଶ୍ରେଣୀ  ଗୋଟେ ରୁମରେ ଏବଂ ନବମ ଦଶମ ଶ୍ରେଣୀଙ୍କୁ ଗୋଟେ ରୁମରେ ପାଠପଢା ହେଉଛି। ଛାତ୍ରଛାତ୍ରୀ ଙ୍କୁ  ସ୍ମାର୍ଟ ଶିକ୍ଷା ଯୋଗାଇବା ପାଇଁ  ଅନେକ ହାଇସ୍କୁଲଗୁଡିକୁ  ୫ଟି ମାଧ୍ୟମରେ  ରୂପାନ୍ତରିତ କରାଯାଉଥିବା ନେଇ ସଫେଇ ଦେଉଛନ୍ତି ସରକାର।

ହାଇସ୍କୁଲର ମାନ୍ୟତା ପାଇବାକୁ ୧୧ ବର୍ଷ ବିତି ଯାଇଥିଲେ ମଧ୍ୟ ହାଇସ୍କୁଲର ଭିତ୍ତିଭୂମି ନାହିଁ। ଫଳରେ ବିପଦ ସଂକୁଳ ଅବସ୍ଥାରେ ଚାଲୁଛି  ଶିକ୍ଷାଦାନ। ଗୃହ ନିର୍ମାଣ ପାଇଁ ସ୍ଥାନୀୟ ଲୋକଙ୍କ ପକ୍ଷରୁ ବାରମ୍ବାର ଦାବି ହୋଇ ଆସୁଛି।

ହେଲେ ବିଦ୍ୟାଳୟଟି  ବେସରକାରୀ ଜମିରେ ରହିଥିବାରୁ ନୂତନ ଗୃହ ନିର୍ମାଣ ହୋଇପାରିବ ନାହିଁ ବୋଲି ଜିଲ୍ଲା ପ୍ରଶାସନ ସୂଚନା ଦେଇଛି। ସେପଟେ ବିଦ୍ୟାଳୟର ଭିତ୍ତିଭୂମି ସଜଡ଼ା ଯାଉ ନଚେତ ଅନ୍ୟ ସ୍ଥାନରେ ବିଦ୍ୟାଳୟ ନିର୍ମାଣ କରାଯାଉ ବୋଲି  ଦାବି କରିଛନ୍ତି  ଅଭିଭାବକ ଓ ବିଦ୍ୟାଳୟ ପରିଚାଳନା କମିଟି ସଭାପତି।

ଜୟପୁରରୁ ରଞ୍ଜନ କୁମାର ମିଶ୍ରଙ୍କ ରିପୋର୍ଟ