ଇଲାୟାରାଜଙ୍କ ୮୩ତମ ଜନ୍ମଦିନ- କାହାପାଇଁ ଦିନକ ଆଗରୁ ପାଳୁଛନ୍ତି

କାହା ପାଇଁ ଜନ୍ମଦିନ ଘୁଞ୍ଚାଇଲେ ଇଲାୟାରାଜା- ୩ ବଦଳରେ ୨ରେ ପାଳୁଛନ୍ତି ବାର୍ଥଡେ

ସଙ୍ଗୀତପ୍ରେମୀଙ୍କ ହୃଦୟରେ ରାଜ କରୁଥିବା ପ୍ରଖ୍ୟାତ ସଙ୍ଗୀତ ନିର୍ଦ୍ଦେଶକ ଇଲୟରାଜା ଆଜି ତାଙ୍କ ୮୩ତମ ଜନ୍ମଦିନ ପାଳନ କରିଛନ୍ତି। ଏହି ଅବସରରେ ଦେଶ ତଥା ବିଦେଶରୁ ଅଗଣିତ ପ୍ରଶଂସକ, ଚଳଚ୍ଚିତ୍ର ଜଗତର ବିଶିଷ୍ଟ ବ୍ୟକ୍ତିତ୍ୱ ଓ ରାଜନେତାମାନେ ତାଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି। ଚେନ୍ନାଇରେ ଥିବା ଇଲୟରାଜାଙ୍କ ଷ୍ଟୁଡିଓ ବାହାରେ ସକାଳୁ ଶତାଧିକ ଭକ୍ତଙ୍କ ଭିଡ଼ ଦେଖିବାକୁ ମିଳିଥିଲା। ନିଜ ପ୍ରିୟ ସଙ୍ଗୀତକାରଙ୍କୁ ଜନ୍ମଦିନର ଶୁଭେଚ୍ଛା ଜଣାଇବା ପାଇଁ ଭକ୍ତମାନେ ଫୁଲ, ଉପହାର ଏବଂ ବ୍ୟାନର ନେଇ ଆସିଥିଲେ। ପରେ ଇଲୟରାଜା ସ୍ୱୟଂ ଷ୍ଟୁଡିଓରୁ ବାହାରକୁ ଆସି ପ୍ରଶଂସକମାନଙ୍କୁ ଅଭିବାଦନ ଜଣାଇଥିଲେ ଓ ସେମାନଙ୍କ ଭଲପାଇବା ପାଇଁ କୃତଜ୍ଞତା ପ୍ରକାଶ କରିଥିଲେ। ତାମିଲନାଡୁ ମୁଖ୍ୟମନ୍ତ୍ରୀ ଏମ୍. କେ. ଷ୍ଟାଲିନ, ଅଭିନେତା ବିଜୟ, କମଲ ହାସନ, ରଜନୀକାନ୍ତ ସହ ଅନେକ ବିଶିଷ୍ଟ ବ୍ୟକ୍ତି ତାଙ୍କୁ ସୋସିଆଲ ମିଡିଆ ମାଧ୍ୟମରେ ଶୁଭେଚ୍ଛା ଜଣାଇଥିଲେ। ସମସ୍ତେ ଭାରତୀୟ ସଙ୍ଗୀତ କ୍ଷେତ୍ରରେ ଇଲୟରାଜାଙ୍କ ଅତୁଳନୀୟ ଅବଦାନକୁ ସ୍ମରଣ କରିଥିଲେ।‘ଇସୈଞ୍ଜାନୀ’ ବା ‘ସଙ୍ଗୀତ ଜ୍ଞାନୀ’ ଭାବେ ପରିଚିତ ଇଲୟରାଜା ୧୯୭୬ ମସିହାରେ ତାମିଲ ଚଳଚ୍ଚିତ୍ର ‘ଆନ୍ନାକିଲି’ ମାଧ୍ୟମରେ ସଙ୍ଗୀତ ଜଗତରେ ପଦାର୍ପଣ କରିଥିଲେ। ଏହାପରେ ସେ ତାମିଲ, ତେଲୁଗୁ, ମଲୟାଳମ, କନ୍ନଡ ଏବଂ ହିନ୍ଦୀ ସହ ବିଭିନ୍ନ ଭାଷାର ଏକ ହଜାରରୁ ଅଧିକ ଚଳଚ୍ଚିତ୍ରରେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି। ତାଙ୍କ ଦ୍ୱାରା ସୃଷ୍ଟ ହଜାର ହଜାର ଗୀତ ଆଜି ମଧ୍ୟ ସଙ୍ଗୀତପ୍ରେମୀଙ୍କ ମନରେ ସମାନ ଭାବେ ଲୋକପ୍ରିୟ ରହିଛି। ପାଶ୍ଚାତ୍ୟ ସିମ୍ଫୋନି ସହ ଭାରତୀୟ ଲୋକସଙ୍ଗୀତ ଓ ଶାସ୍ତ୍ରୀୟ ସଙ୍ଗୀତର ଅନନ୍ୟ ମିଶ୍ରଣ ଇଲୟରାଜାଙ୍କ ସୃଜନଶୀଳତାର ଏକ ପ୍ରମୁଖ ବିଶେଷତା। ଏହି କାରଣରୁ ସେ କେବଳ ଦକ୍ଷିଣ ଭାରତରେ ନୁହେଁ, ସମଗ୍ର ଦେଶରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଦୀର୍ଘ ପାଞ୍ଚ ଦଶକର ସଙ୍ଗୀତ ଯାତ୍ରା ମଧ୍ୟରେ ଇଲୟରାଜା ଅନେକ ଜାତୀୟ ଓ ଆନ୍ତର୍ଜାତୀୟ ସମ୍ମାନରେ ସମ୍ମାନିତ ହୋଇଛନ୍ତି। ପଦ୍ମ ଭୂଷଣ ଏବଂ ପଦ୍ମ ବିଭୂଷଣ ଭଳି ଦେଶର ସର୍ବୋଚ୍ଚ ନାଗରିକ ସମ୍ମାନ ମଧ୍ୟ ସେ ପାଇଛନ୍ତି। ବୟସ ୮୩ ବର୍ଷ ହୋଇଥିଲେ ମଧ୍ୟ ସେ ଆଜି ମଧ୍ୟ ସଙ୍ଗୀତ ସୃଷ୍ଟିରେ ସକ୍ରିୟ ରହିଛନ୍ତି ଏବଂ ନୂଆ ପ୍ରକଳ୍ପରେ କାମ କରୁଛନ୍ତି।ଇଲୟରାଜାଙ୍କ ଜନ୍ମଦିନ ଅବସରରେ ସୋସିଆଲ ମିଡିଆରେ #HappyBirthdayIlaiyaraaja ଟ୍ରେଣ୍ଡ କରିଥିଲା। ତାଙ୍କ ଅମର ସୃଷ୍ଟି ଓ ସଙ୍ଗୀତ ପ୍ରତି ଅବଦାନକୁ ସ୍ମରଣ କରି ପ୍ରଶଂସକମାନେ ବିଭିନ୍ନ ପୋଷ୍ଟ ଓ ଭିଡିଓ ଶେୟାର କରିଥିଲେ। ଭାରତୀୟ ସଙ୍ଗୀତର ଏହି ଜୀବନ୍ତ କିମ୍ୱଦନ୍ତୀଙ୍କ ୮୩ତମ ଜନ୍ମଦିନ ଅବସରରେ ସମଗ୍ର ଦେଶରୁ ଶୁଭେଚ୍ଛାର ସୁଅ ଛୁଟିଥିବା ବେଳେ, ତାଙ୍କ ସଙ୍ଗୀତ ଆଗାମୀ ପିଢ଼ିକୁ ମଧ୍ୟ ପ୍ରେରଣା ଦେଇଚାଲିବ ବୋଲି ସଙ୍ଗୀତପ୍ରେମୀମାନେ ମତ ପ୍ରକାଶ କରିଛନ୍ତି। ଇଲୟାରାଜା ପ୍ରକୃତରେ ଜୁନ୍ ୩, ୧୯୪୩ରେ ଜନ୍ମଗ୍ରହଣ କରିଥିଲେ। ହେଲେ ସେ ତାଙ୍କ ଜନ୍ମଦିନକୁ ଜୁନ୍ ୨କୁ ସିଫ୍ଟ କରିଦେଇଛନ୍ତି। ସ୍ୱର୍ଗତ ଡିଏମକେ ନେତା ତଥା ତାମିଲନାଡ଼ୁର ପୂର୍ବତନ ମୁଖ୍ୟମନ୍ତ୍ରୀ କରୁଣାନିଧିଙ୍କ ସମ୍ମାନାର୍ଥେ ସେ ଏହି ତାରିଖକୁ ବଦଳାଇଛନ୍ତି। ଯିଏ ତାଙ୍କୁ ଇସାଇଞ୍ଜାନି ଟାଇଟଲ ଦେଇଥିଲ।