ବରିଷ୍ଠ ନାଗରିକଙ୍କ ତୀର୍ଥଯାତ୍ରା ଆରମ୍ଭ, ବାରାଣସୀ-ଅଯୋଧ୍ୟା ଗଲେ ୭୭୫ ତୀର୍ଥଯାତ୍ରୀ

ଭୁବନେଶ୍ୱର: ଚଳିତ ୨୦୨୬-୨୭ ଆର୍ଥିକ ବର୍ଷର ପ୍ରଥମ ବରିଷ୍ଠ ନାଗରିକ ତୀର୍ଥଯାତ୍ରା ଆରମ୍ଭ ହୋଇଛି। ବୁଧବାର ଭୁବନେଶ୍ୱରର ପାଟିଆ ନ୍ୟୁ ରେଳ ଷ୍ଟେସନରୁ ୭୭୫ ଜଣ ବରିଷ୍ଠ ନାଗରିକଙ୍କୁ ନେଇ ସ୍ୱତନ୍ତ୍ର ଟ୍ରେନ୍‌ ବାରାଣସୀ ଓ ଅଯୋଧ୍ୟା ଅଭିମୁଖେ ଯାତ୍ରା କରିଛି। ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା ଏହି ତୀର୍ଥଯାତ୍ରାକୁ ପତାକା ଦେଖାଇ ଶୁଭାରମ୍ଭ କରିଥିଲେ। ଏହି ଅବସରରେ ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁଙ୍କ ସମେତ ପର୍ଯ୍ୟଟନ ବିଭାଗ ଓ IRCTCର ଅଧିକାରୀମାନେ ଉପସ୍ଥିତ ଥିଲେ।

ଏହି ପ୍ରଥମ ପର୍ଯ୍ୟାୟରେ ରାଜ୍ୟର ୬ଟି ଜିଲ୍ଲାର ବରିଷ୍ଠ ନାଗରିକ ସାମିଲ ହୋଇଛନ୍ତି। ଖୋର୍ଦ୍ଧାରୁ ୧୬୯, ଜଗତସିଂହପୁରରୁ ୮୫, କଟକରୁ ୧୯୭, ପୁରୀରୁ ୧୨୭, କେନ୍ଦ୍ରାପଡ଼ାରୁ ୧୦୮ ଓ ଢେଙ୍କାନାଳରୁ ୮୯ ଜଣ ଏହି ଯାତ୍ରାରେ ଯାଇଛନ୍ତି। ଏଥିରେ ୩୩୩ ଜଣ ମହିଳା ଓ ୪୪୨ ଜଣ ପୁରୁଷ ଅଛନ୍ତି।

ବରିଷ୍ଠ ତୀର୍ଥଯାତ୍ରୀଙ୍କ ସୁରକ୍ଷା, ସ୍ୱାସ୍ଥ୍ୟ ଓ ସୁବିଧା ପାଇଁ ୨୫ ଜଣ ସରକାରୀ ଅଧିକାରୀ ମଧ୍ୟ ସେମାନଙ୍କ ସହ ଯାତ୍ରା କରୁଛନ୍ତି। ତୀର୍ଥଯାତ୍ରୀମାନେ ବାରାଣସୀରେ କାଶୀ ବିଶ୍ୱନାଥ ଦର୍ଶନ ସହ ଗଙ୍ଗା ଆରତୀ ଏବଂ ଅଯୋଧ୍ୟାରେ ଶ୍ରୀରାମ ଲଲ୍ଲାଙ୍କ ଦର୍ଶନ କରିବାର ସୁଯୋଗ ପାଇବେ। ଏହି ତୀର୍ଥଯାତ୍ରା ରାଜ୍ୟ ସରକାରଙ୍କ ‘ମୁଖ୍ୟମନ୍ତ୍ରୀ ବରିଷ୍ଠ ନାଗରିକ ତୀର୍ଥଯାତ୍ରା ଯୋଜନା’ ଅଧୀନରେ ଆୟୋଜିତ ହେଉଛି। ଆର୍ଥିକ ଦୃଷ୍ଟିରୁ ଦୁର୍ବଳ ବରିଷ୍ଠ ନାଗରିକମାନେ ଯେପରି ଦେଶର ପ୍ରମୁଖ ତୀର୍ଥସ୍ଥାନ ପରିଦର୍ଶନ କରିପାରିବେ, ସେଥିପାଇଁ ସରକାରଙ୍କ ପକ୍ଷରୁ ଏହି ସୁବିଧା ଯୋଗାଇ ଦିଆଯାଉଛି। ୨୦୨୬-୨୭ ଆର୍ଥିକ ବର୍ଷରେ ଏହି ଯୋଜନା ଅଧୀନରେ ୧୦ଟି ପର୍ଯ୍ୟାୟରେ ମୋଟ ୮,୦୦୦ ବରିଷ୍ଠ ନାଗରିକଙ୍କୁ ତୀର୍ଥଯାତ୍ରାରେ ନିଆଯିବ। ବାରାଣସୀ-ଅଯୋଧ୍ୟା ସହ ହରିଦ୍ୱାର-ଋଷିକେଶ ଓ ରାମେଶ୍ୱରମ-ମଦୁରାଇ ଭଳି ତୀର୍ଥସ୍ଥାନ ମଧ୍ୟ ଏହି ଯୋଜନାରେ ସାମିଲ ରହିଛି। ଏହି ପ୍ରଥମ ପର୍ଯ୍ୟାୟର ଯାତ୍ରୀମାନେ ସେପ୍ଟେମ୍ବର ୭ ତାରିଖରେ ଭୁବନେଶ୍ୱର ଫେରିବାର କାର୍ଯ୍ୟକ୍ରମ ରହିଛି। ଆଗାମୀ ପର୍ଯ୍ୟାୟଗୁଡ଼ିକରେ ଅନ୍ୟ ଜିଲ୍ଲାର ବରିଷ୍ଠ ନାଗରିକମାନଙ୍କୁ ମଧ୍ୟ ତୀର୍ଥଯାତ୍ରାର ସୁଯୋଗ ମିଳିବ।