jajpur

ଯାଜପୁର ଧର୍ମଶାଳା ଥାନା କୋତପୁର ପଞ୍ଚାୟତ ସାନରାଏପଡା ଗ୍ରାମରେ ବିବାହର ଦେଢ଼ ମାସ ପରେ ନବବଧୂଙ୍କ ସନ୍ଦେହଜନକ ମୃତ୍ୟୁ ଘଟଣା। ହତ୍ୟା ଅଭିଯୋଗ ପରେ ପୋଲିସ ଏହି ଘଟଣାରେ ସମ୍ପୃକ୍ତ ସ୍ୱାମୀକୁ ଗିରଫ କରି ଆଜି କୋର୍ଟ ଚାଲାଣ କରିଛି। ସୂଚନା ମୁତାବକ, କୋତପୁର ପଞ୍ଚାୟତ ସାନରାଏପଡା ଗ୍ରାମର ବେହେରା ସାହିର ନଟ ବେହେରାଙ୍କ ପୁଅ ବାବନ ବେହେରା ଗତ ମେ ମାସରେ ଢେଙ୍କାନାଳ ଜିଲ୍ଲା ଗନ୍ଦିଆ ପଂଚାୟତ ଗୋଡା ଗ୍ରାମର ମମତା ବେହେରାକୁ ବୈଦିକ ରୀତିରେ ବିବାହ କରିଥିଲେ। ବିବାହ ସମୟରେ ଦାବି ମୁତାବକ ଯୌତୁକ ଦିଆଯାଇଥିଲା। ଗତକାଲି ଘରେ ଶୋଇଥିବା ଅବସ୍ଥାରେ ମମତାର ମୃତ୍ୟୁ ହୋଇଥିବା ଦେଖିବାକୁ ମିଳିଥିଲା। ମମତା ଆତ୍ମହତ୍ୟା କରିଛି ବୋଲି ଶାଶୁ ଘର ଲୋକେ କହିଥିବା ବେଳେ ମୃତ ମମତାର ପରିବାର ଲୋକେ ଯୌତୁକ ପାଇଁ ଶାଶୁ ଘର ଲୋକେ ହତ୍ୟା କରିଥିବା ଗତକାଲି ଧର୍ମଶାଳା ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ପୋଲିସ ସ୍ୱାମୀ ବାବନ ବେହେରାଙ୍କୁ ଗତକାଲି ଥାନାରେ ଅଟକ ରଖି ପଚରା ଉଚରା କରିଥିବା ବେଳେ ଆଜି ଗିରଫ କରି କୋର୍ଟ ଚାଲାଣ କରିଛି। ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ପ୍ରକୃତ ସତ୍ୟାସତ୍ୟ ଜଣାପଡିବ ବୋଲି ପୋଲିସ ସୂଚନା ଦେଇଛି।

JAJ_ASHOKASTAMI_PKG

ଯାଜପୁରର ସିଦ୍ଧେଶ୍ୱର ପୀଠରେ ବଡ ଧୁମଧାମରେ ପାଳିତ ହୋଇଯାଇଛି ଅଶୋକାଷ୍ଟମୀ । ବିଶ୍ୱାସ ରହିଛି ପବିତ୍ର ଅଶୋକାଷ୍ଟମୀରେ ବାବାଙ୍କୁ ଦର୍ଶନ କଲେ କୋଟି ଜନ୍ମର ପାପ କ୍ଷୟ ହୋଇଥାଏ । ଏହି ଅବସରରେ ଆଖପାଖ ଅଂଚଳର ଶହ ଶହ ଶ୍ରଦ୍ଧାଳୁ ବାବା ସିଦ୍ଧେଶ୍ୱରଙ୍କୁ ଦର୍ଶନ କରି ଆର୍ଶିବାଦ ଭିକ୍ଷା କରିଥିଲେ । ଅଶୋକାଷ୍ଟମି ଦିନ ଠାରୁ ସାତ ଦିନ ଧରି ଏଠାରେ ଏକ ମେଳା ଆୟୋଜନ କରାଯାଇଥାଏ । ପ୍ରବଳ ଭିଡକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ଓ ବ୍ଲକ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।

ପବିତ୍ର ଅଶୋକାଷ୍ଟମୀ ଅବସରରେ ଚଳଚଞ୍ଚଳ ଯାଜପୁରର ସିଦ୍ଧେଶ୍ୱରପୀଠ । ବିଶ୍ୱାସ ରହିଛି ଅଶୋକାଷ୍ଟମୀ ଦିନ ପ୍ରଭୁ ସିଦ୍ଧେଶ୍ୱରଙ୍କୁ ଦର୍ଶନ କଲେ କୋଟି ଜନ୍ମର ପାପ କ୍ଷୟ ହୋଇଥାଏ । ଏହା ସହିତ ଏଠାରେ ପିତୃପୁରୁଷଙ୍କୁ ପିଣ୍ଡଦାନ କରି ପବିତ୍ର ବୈତରଣୀ ନଦୀରେ ବୁଡ ପକାଇଲେ ମୋକ୍ଷ ପ୍ରାପ୍ତି ହେବାର ବିଶ୍ୱାସ ରହିଛି । ଏଥିପାଇଁ ଆଖପାଖ ଅଂଚଳରୁ ବହୁ ଶ୍ରଦ୍ଧାଳୁ ଛୁଟିଆସିଛନ୍ତି ଏହି ସିଦ୍ଧେଶ୍ୱର ପୀଠକୁ । ଏଠାରେ ସାତ ଦିନ ଧରି ମେଳାର ଆୟୋଜନ ହୋଇଥାଏ । ଯେଉଁଠାରେ ବିଭିନ୍ନ ଘରକରଣା ସାମଗ୍ରୀ ଠାରୁ ଆରମ୍ଭ କରି ବିଭିନ୍ନ ସାମଗ୍ରୀ ର ପସରା ମେଲିଥାଏ ।  ମେଳରେ ଶ୍ରଦ୍ଧାଳୁ ମାନଙ୍କର ଭିଡକୁ ଦୃଷ୍ଟିରେ ରଖି ମନ୍ଦୀର ପ୍ରଶାସନ ଏବଂ ବ୍ଲକ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।

ବର୍ଷକୁ ଥରେ ପଡୁଥିବା ଏହି ମେଳା ଦେଖିବାକୁ । ରାଜ୍ୟର ବିଭିନ୍ନ କୋଣ ଅନୁକୋଣରୁ ଶ୍ରଦ୍ଧାଳୁଙ୍କ ଭିଡ ଲାଗିରହିଛି ।

ହିମାଂଶୁ କୁମାର ପାଢ଼ୀ ଙ୍କ ରିପୋର୍ଟ

ଯାଜପୁର: ପ୍ରେମ ବିବାହ କରିବା ପରେ ଆଠ ଦିନ ବି ତିଷ୍ଠି ପାରିଲାନି ସମ୍ପର୍କ । ପ୍ରେମିକା ଚାଲିଗଲେ ନିଜ ରାଜ୍ୟକୁ । ବର୍ତ୍ତମାନ ସମୟରେ ସୋସିଆଲ ମିଡିଆରେ ନୂଆ ବନ୍ଧୁତା ଗଢିବା ଓ ବନ୍ଧୁତାକୁ ପ୍ରେମର ପରିଚୟ ଦେବା  ଯୁବପିଢି ପାଇଁ ସାଧାରଣ କଥା ହେଇଗଲାଣି । ଏପରି ଜଣେ ଯୁବକ ମିଛ ପ୍ରେମ ସମ୍ପର୍କରେ ଫସାଇ ଜଣେ ଯୁବତୀଙ୍କୁ ବିବାହ କରିଥିଲେ । କିନ୍ତୁ ବାସ୍ତବ ଘଟଣା ଜାଣିବା ପରେ ଯୁବତୀ ଜଣକ ନିଜ ରାଜ୍ୟକୁ ଫେରି ଯାଇଛନ୍ତି ।

ମିଳିଥିବା ସୂଚନା ଅନୁଯାୟୀ ଯାଜପୁରର ଜଣେ ଯୁବକ ତ୍ରିପୁରାର ଜଣେ ଝିଅ ସହ ଫେସବୁକରେ କଥାବର୍ତ୍ତା ହେଉଥିଲେ । ଧିରେ ଧିରେ ସେମାନଙ୍କ ଭିତରେ ବନ୍ଧୁତା ବଢିବାରୁ ନମ୍ବର ଦିଆନିଆ ହେଲା ଓ  ଆରମ୍ଭ ହେଲା ପ୍ରେମ ସମ୍ପର୍କ ।  ଯୁବତୀ ଜଣକ ପେଶାରେ ଡାକ୍ତର ହୋଇଥିବା ବେଳେ, ଯୁବକ ଜଣକ ନିଜକୁ ଜଣେ ଇଞ୍ଜିନିୟର ଭାବେ ପରିଚୟ ଦେଇଥିଲେ ।

ସମୟକ୍ରମେ ପ୍ରେମ ସମ୍ପର୍କ ଏତେ ନିବିଡ ହୋଇଗଲା। ଯୁବକଙ୍କୁ ଛାଡି ଆଉ ଯୁବତୀ ରହିବାକୁ ଚାହିଁଲେ ନାହିଁ। ତେଣୁ 10 ଦିନ ପୂର୍ବରୁ ଯୁବତୀ ଜଣକ କାହାକୁ କିଛି ନକହି ନିଜ ପ୍ରେମକୁ ପାଇବା ପାଇଁ ଓଡିଶା ଆସିଥିଲେ । ଏବଂ  ଏଠାରେ ପହଞ୍ଚି ଯୁବକଙ୍କୁ କୋର୍ଟ ମ୍ୟାରେଜ ମଧ୍ୟ କରିଥିଲେ । ତେବେ ଆଠ ଦିନ ଭିତରେ ଯୁବକଙ୍କ ଅସଲ ଚେହେରା ଯୁବତୀଙ୍କ ସାମ୍ନାକୁ ଆସିଯାଇଥିଲା । ଯୁବକ ଜଣକ ନିଜକୁ ଜଣେ ଇଞ୍ଜିନିୟର କହିଥିବାବେଳେ , ସେ କିନ୍ତୁ ଥିଲେ ଜଣେ ଗ୍ୟାରେଜ ମେକାନିକ । ଉଭୟଙ୍କର ଧର୍ମବି ଅଲଗା ଥିଲା, ଯାହା ଯୁବକ ଜଣକ ଲୁଚାଇଥିଲେ ।

ତେବେ ସତ୍ୟତା ଜାଣିବା ପରେ ଯୁବତୀ ଜଣକ ତାଙ୍କ ଘରକୁ ଫୋନ କରି ସବୁ କଥା କହିଥିଲେ। ଏଥିରେ ଘର ଲୋକେ ତ୍ରିପୁରା ପୋଲିସଙ୍କ ନିକଟରେ ଏବିଷୟରେ ଜଣାଇଥିଲେ । ପରେ  ତ୍ରିପୁରା ପୋଲିସ ଯାଜପୁର ପୋଲିସ ସହ ଯୋଗାଯୋଗ କରି ଉକ୍ତ ଯୁବତୀଙ୍କୁ ଯୁବକଙ୍କ ଘରୁ ଉଦ୍ଧାର କରି କୋର୍ଟକୁ ନେଇଥିଲେ । ସେଠାରେ ଯୁବତୀ ଜଣକ ନିଜ ଇଚ୍ଛାରେ ତାଙ୍କ ଘରକୁ ଯିବାକୁ ଚାହୁଁଥିବା କଥା କହିଥିଲେ ।

ଗତକାଲି ତ୍ରିପୁରା ପୋଲିସ ଯାଜପୁରରେ ପହଞ୍ଚିବା ପରେ ଯାଜପୁର ପୋଲିସ ଯୁବତୀଙ୍କୁ ତାଙ୍କ ପରିବାରକୁ ହସ୍ତାନ୍ତର କରିଥିଲେ । ଏପଟେ ଅଭିଯୁକ୍ତ ଯୁବକ ଜଣକ ଫେରାର ହୋଇଥିବା କଥା ଜଣାପଡିଛି । ପୋଲିସ ଥାନାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।

ଯାଜପୁର: ଜମି ମାଲିକ ବିଦେଶରେ ଥିବା ବେଳେ ତାଙ୍କ ନାମରେ ଥିବା ଜମି ବିକ୍ରି ହୋଇଗଲା । ମାଲିକଙ୍କ ଅନୁପସ୍ଥିତିରେ ଏଭଳି ଏକ ଜମି ବିକ୍ରିବଟା କାର୍ଯ୍ୟ ବିନା କୌଣସି ଦ୍ବିଧାରେ ସବରେଜିଷ୍ଟର କାର୍ଯ୍ୟାଳୟରେ ହିଁ ହୋଇଛି । ଜମି ଖର୍ଦ୍ଦି ବିକ୍ରି କାର୍ଯ୍ୟ କ୍ରେତା ଏବଂ ବିକ୍ରେତାଙ୍କ ଉପସ୍ଥିତିରେ ହେବାର ବିଧିବ୍ୟବସ୍ଥା ଥିବା ବେଳେ ଯାଜପୁର ରୋଡ଼ ସବରେଜିଷ୍ଟର କାର୍ଯ୍ୟାଳୟରେ କିନ୍ତୁ ମାଲିକଙ୍କ ଅନୁପସ୍ଥିତିରେ ଏ କାରବାର ସମ୍ଭବ ହୋଇପାରିଛି । ଯାଜପୁର ରୋଡ଼ ଥାନାରେ ଏ ସଂକ୍ରାନ୍ତରେ ଅଭିଯୋଗ ହେବାପରେ ଏଭଳି ଘଟଣା ସାମ୍ନାକୁ ଆସିଛି ।

ବିଦେଶରେ ଜମି ମାଲିକ । ହେଲେ ମାଲିକଙ୍କ ସ୍ଥିତିବାନ ଜମି ବିକିଦେଲେ ଦଲାଲ । ଅସଲି ଫଟୋ ଓ ନକଲି ଦସ୍ତଖତରେ ହୋଇଗଲା ବିକ୍ରି କବଲା । ଯାଜପୁର ଜିଲ୍ଲା ବ୍ୟାସନଗର ତହସିଲ ଅଞ୍ଚଳରୁ ଦେଖିବାକୁ ମିଳିଛି ଏଭଳି ଏକ ଜମି ଦୁର୍ନୀତି ମାମଲା। ବିଦେଶରେ ରହୁଥିବା ଦୀପକ କୁମାର ଦାସ ଗତ ୨୦୧୨ ମସିହାରେ ବ୍ୟାସନଗର ତହସିଲ ଅଧିନ ଭିକିପୁର ମୌଜାରେ ୧୪ ଗୁଣ୍ଠ ୩ ଡିସିମିଲ ଜମି କିଣିଥିଲେ । ତେବେ ଦୀପକ ବିଦେଶରେ ଥିବା ବେଳେ ଏହି ମୌଜାରେ ଥିବା ଉକ୍ତ ଜମି ୨୦୨୨ ଜାନୁଆରୀ ୩ ତାରିଖରେ ବିକ୍ରି ହୋଇଯାଇଥିବା ସେ ଜାଣିବାକୁ ପାଇଥିଲେ । ତେବେ ତାଙ୍କ ଅନୁପସ୍ଥିତି ଓ ଅଜାଣତରେ ଜମି କିପରି ବିକ୍ରି ହେଲା, ସେ ନେଇ ଦୀପକ ଖୋଳତାଡ଼ ଆରମ୍ଭ କରିଥିଲେ । ପରେ ସେ ଏ ସଂକ୍ରାନ୍ତରେ କେନ୍ଦ୍ରାଞ୍ଚଳ ଆରଡିସି, ଯାଜପୁର ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳ ରାଜସ୍ବ ବିଭାଗଙ୍କ ନିକଟରେ ଲିଖିତ ଅଭିଯୋଗ କରିଥିଲେ । ହେଲେ ଏହାର କୌଣସି ସୁଫଳ ମିଳିଲା ନାହିଁ । ବିଦେଶରୁ ଫେରି ପ୍ରଶାସନ ଠାରୁ କୌଣସି ନ୍ୟାୟ ନପାଇବାରୁ ପରିଶେଷରେ ଯାଜପୁର ରୋଡ଼ ଥାନାର ଦ୍ବାରସ୍ଥ ହୋଇଛନ୍ତି ଦୀପକ। କ୍ରେତା, ବିକ୍ରେତା ଓ ଦଲାଲଙ୍କୁ ଚିହ୍ନଟ କରି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ସେ ନିବେଦନ କରିଛନ୍ତି ।

ଦୀପକ ସମସ୍ତ ଦସ୍ତାବିଜ ସହିତ ଏ ସଂକ୍ରାନ୍ତରେ ଏକ ସାମ୍ବାଦିକ ସମ୍ମିଳନୀ ମଧ୍ୟ କରିଥିଲେ । ସେ ବିଦେଶରେ ଥିବା ସମୟରେ ତାଙ୍କର ଜାଲ ଦସ୍ତଖତ କରାଯାଇ ୧୪ ଗୁଣ୍ଠ ୩ ଡିସିମିଲ ଜମିକୁ ଭିକିପୁର ଗ୍ରାମର ବଳରାମ ଜେନା ଓ ରମ୍ପାସ ଗ୍ରାମର ବିରଞ୍ଚିଶଙ୍କର ପତିଙ୍କୁ ବିକ୍ରି କରିଦିଆଯାଇଛି । ସବରେଜିଷ୍ଟର କାର୍ଯ୍ୟାଳୟର କିଛି ଅସାଧୁ ଅଧିକାରୀ ଓ ଦଲାଲଙ୍କ ଦ୍ବାରା ଜମିକୁ ଚଞ୍ଚକତା ପୂର୍ବକ ଏପରି ବିକ୍ରି କରାଯାଇଥିବା ଏବଂ ଏହାପଛରେ ବଡ଼ ରାକେଟ କାର୍ଯ୍ୟ କରୁଥିବା ଦୀପକ କହିଛନ୍ତି । ତେବେ ତୁରନ୍ତ ସେମାନଙ୍କୁ ଚିହ୍ନଟ କରାଯାଇ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି । ଏଥିସହିତ ତାଙ୍କ ଜମି ତାଙ୍କ ନାମକୁ ଫେରାଇବା ଦିଗରେ ପ୍ରଶାସନ ପଦକ୍ଷେପ ନେବାକୁ ମଧ୍ୟ ଦାବି କରିଛନ୍ତି । ସେପଟେ ଏ ସମ୍ପର୍କରେ ପୋଲିସ୍ କିମ୍ବା ସମ୍ପୃକ୍ତ ସବରେଜିଷ୍ଟର କୌଣସି ପ୍ରତିକ୍ରିୟା ଦେବାକୁ ମନା କରିଛି । ବରଂ ଏ ସଂକ୍ରାନ୍ତରେ ସବରେଜିଷ୍ଟରଙ୍କୁ ପ୍ରଶ୍ନ କରିବାରୁ ସେ ବିଚଳିତ ହୋଇ ଏଣେତେଣେ ଧାଇଁ ଥିଲେ । ଏବଂ ସବୁ କାର୍ଯ୍ୟ ଠିକରେ ହୋଇଥିବା ସେ କହିଥିଲେ ।

ସବରେଜିଷ୍ଟର କାର୍ଯ୍ୟାଳୟରେ ଜମିମାଲିକଙ୍କ ଅନୁପସ୍ଥିତିରେ ଜମି ବିକ୍ରି ହେବା ଘଟଣା କାର୍ଯ୍ୟାଳୟର ଜାଲିଆତି କାର୍ଯ୍ୟକୁ ପଦାରେ ପକାଇଛି । ତେବେ ଏହାର ଉପଯୁକ୍ତ ତଦନ୍ତ କରାଯାଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।

ହିମାଂଶୁ କୁମାର ପାଢ଼ୀଙ୍କ ରିପୋର୍ଟ

ଯାଜପୁର: ବର୍ଷେ କି ଦୁଇ ବର୍ଷ ନୁହେଁ । ଭିତ୍ତିପ୍ରସ୍ତରର ଦୀର୍ଘ ୩୨ ବର୍ଷ ପରେ ବି ସମ୍ପୂର୍ଣ୍ଣ ହୋଇପାରିଲା ନାହିଁ ରାସ୍ତା କାମ । ୧୯୯୦ ମସିହାରେ ଆରମ୍ଭ ହୋଇଥିବା ଯାଜପୁର ଛନ୍ଦାମୁଣ୍ଡ ବିସିଜେ ହାଇସ୍କୁଲଠାରୁ ବଡ କୁଆଁଲ ପ୍ରକଳ୍ପ କାମ ଶେଷ ହୋଇପାରିନାହିଁ । ଫଳରେ ଲୋକେ ନାହିଁନଥିବା ଅସୁବିଧା ଭୋଗୁଥିବା ଅଭିଯୋଗ ହୋଇଛି । ସେପଟେ ଗ୍ରାମ୍ୟ ଉନ୍ନୟନ ବିଭାଗ ପ୍ରଥମେ କାମ ଆରମ୍ଭ କରିଥିବା ବେଳେ ଏବେ ଜମି ଅଧିଗ୍ରହଣ ସମସ୍ୟା ଯୋଗୁଁ ପୂର୍ତ୍ତବିଭାଗକୁ ହସ୍ତାନ୍ତର କରାଯାଇଛି । ଏହାର କାମ ଆରମ୍ଭ ହେବ ବୋଲି କହିଛନ୍ତି ଜିଲ୍ଲାପାଳ ।

୯୦ ଦଶକରେ ଭିତ୍ତିପ୍ରସ୍ତର ସ୍ଥାପିତ ହୋଇଥିବା ପ୍ରକଳ୍ପ ଆଜି ବି ଅଧାପନ୍ତରିଆ ହୋଇପଡିରହିଛି। ଫଳରେ ଲୋକେ ନାହିଁ ନଥିବା ଅସୁବିଧା ଭୋଗ କରୁଛନ୍ତି । ଏ ହେଉଛି ଯାଜପୁର ବିଂଝାରପୁର ବ୍ଲକ ଛନ୍ଦାମୁଣ୍ଡ ବିସିଜେ ହାଇସ୍କୁଲ ଛକ ଠାରୁ ବଡ କୁଆଁଲ ପର୍ଯ୍ୟନ୍ତ ଯାଇଥିବା ରାସ୍ତାର ଦୃଶ୍ୟ । ମାତ୍ର ୧୨ କିଲୋମିଟର ରାସ୍ତା କାମ ବିଗତ ୩୨ ବର୍ଷ ଭିତରେ ଶେଷ ହୋଇପାରିନାହିଁ । ଫଳରେ ଲୋକେ ମାଟି ରାସ୍ତାରେ ଯାତାୟାତ କରୁଛନ୍ତି । ବର୍ଷା ଦିନେ ଏହି ରାସ୍ତା ସମ୍ପୂର୍ଣ୍ଣ ବନ୍ଦ ହୋଇଯାଏ । ବାରମ୍ବାର ଦାବି କଲେ ଏହି ରାସ୍ତା ନିର୍ମାଣ ହେଉନଥିବାରୁ ଏହାକୁ ନେଇ ସ୍ଥାନୀୟଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ମୋଟ ୧୨ କିମି ରାସ୍ତାକୁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ କରାଯିବା ପାଇଁ ସ୍ଥିର ହୋଇଥିଲା । ସେଥି ମଧ୍ୟରେ ପୋଲ ଏବଂ ରାସ୍ତା ମିଶାଇ ୮ କିଲୋମିଟର କାମ ସରିଛି । କିନ୍ତୁ ବାକି ୪ କିଲୋମିଟର ରାସ୍ତା ଜମି ଅଧିଗ୍ରହଣ ସମସ୍ୟା ପାଇଁ ଅଟକି ରହିଛି । ବିଜୁ ସେତୁ ଯୋଜନାରେ ପୋଲ ନିର୍ମାଣ କରି ଠିକାଦାର ପାର ହୋଇଯାଇଥିବା ବେଳେ ଏହି ପୋଲକୁ ସଂଯୋଗ କରୁଥିବା ରାସ୍ତା କାମ ସରିପାରିନି । ଏନେଇ ବାରମ୍ବାର ଗ୍ରାମବାସୀ ଅଭିଯୋଗ କରୁଥିଲେ ମଧ୍ୟ କୌଣସି ସୁପଂଳ ମିଳୁନାହିଁ । ସେପଟେ ପୂର୍ବରୁ ଏହି ରାସ୍ତାଟି ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ଥିଲା । ଜମି ଅଧିଗ୍ରହଣ ସମସ୍ୟା ଯୋଗୁଁ ଏହା ହୋଇପାରିନଥିଲା । ସେଥିପାଇଁ ଏହି ପ୍ରକଳ୍ପକୁ ପୂର୍ତ୍ତବିଭାଗକୁ ହସ୍ତାନ୍ତର କରାଯାଇଛି ଏବଂ ଏହାର କାମ ଶିଘ୍ର ଆରମ୍ଭ ହେବ ବୋଲି ଯାଜପୁର ଜିଲାପାଳ ସୂଚନା ଦେଇଛନ୍ତି ।

୧୨ କିଲୋମିଟର ରାସ୍ତାକୁ ସମ୍ପୂର୍ଣ୍ଣ କରିବା ପାଇଁ ଲାଗିଲାଣି ୩୨ ବର୍ଷ । ଆଗକୁ କେତେ ବର୍ଷ ଲାଗିବ ଏହି ରାସ୍ତା ସମ୍ପୂର୍ଣ୍ଣ ହେବା ପାଇଁ ତାହାକୁ ନେଇ ସାଧାରଣରେ ଚର୍ଚ୍ଚା ହେଉଛି ।

 ହିମାଂଶୁ କୁମାର ପାଢ଼ୀଙ୍କ ରିପୋର୍ଟ

ଯାଜପୁର:  ଯାଜପୁର ବଡ଼ଚଣା ଥାନା ଅଧୀନ ଧାନମଣ୍ଡଳ ଫାଣ୍ଡି ହାଜତରେ ଅଭିଯୁକ୍ତର ସନ୍ଦେହଜନକ ମୃତ୍ୟୁ  । ଘଟଣାକୁ ନେଇ ପରିବାର ଲୋକେ ଆଣିଲେ ହତ୍ୟା ଅଭିଯୋଗ ।  ଏହି ଘଟଣାର ତଦନ୍ତ ଆରମ୍ଭ ହୋଇଛି ଏବଂ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ଯାଜପୁର ରୋଡ଼ ଏସଡିପିଓ କହିଛନ୍ତି।  ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବା ଆଶଙ୍କା କରି ବଡ଼ଚଣା ଥାନା ସମ୍ମୁଖରେ ପୋଲିସ ମୁତୟନ ହୋଇଛନ୍ତି… । 

ଯୁବତୀଙ୍କ ଅଶ୍ଳୀଳ ଫଟୋ ଭାଇରାଲ କରିବା ଅଭିଯୋଗରେ ବନ୍ଧା ହୋଇଥିଲେ ସିନ୍ଧୁପୁର ଅଞ୍ଚଳର ଇଶ୍ଵର ସେଠୀ । ଧାନମଣ୍ଡଳ ଫାଣ୍ଡି ହାଜତରେ ରଖିଥିଲା ପୋଲିସ । ବୁଧବାର ସନ୍ଧ୍ୟାରେ ଯୁବକ ଜଣକ ଆତ୍ମହତ୍ୟା କରିବାକ ଉଦ୍ୟମ କରିଥିଲେ  । ଗୁରୁତର ଅବସ୍ଥାରେ ତାକୁ ପ୍ରଥମେ ବଡ଼ଚଣା ମେଡିକାଲରେ ଭର୍ତି କରାଯାଇଥିଲା। ସେଠାରେ କଟକ ମେଡିକାଲ ସ୍ଥାନାନ୍ତର କରାଯାଇଥିଲା। ତେବେ ବୁଧବାର ରାତିରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି । ଘଟଣାକୁ ନେଇ ପରିବାର ଲୋକେ ହତ୍ୟା କରାଯାଇଥିବା ଅଭିଯୋଗ ଆଣଇଛନ୍ତି  । 

ପରିବାର ଲୋକଙ୍କ ଅଭିଯୋଗ ପରେ ପୋଲିସ ଅଡୁଆରେ  । ପୋଲିସ ଅଭିଯୁକ୍ତ ଙ୍କୁ ଆଣିଥିବା ବେଳେ କାହିଁକି କୋର୍ଟ ଚାଲାଣ କରିନଥିଲା ବୋଲି ପ୍ରଶ୍ନ ଉଠିଛି। ବଡ଼ଚଣା ଥାନା ପୋଲିସ ଏନେଇ ଏକ ଅପମୃତ୍ୟୁ ମାମଲା ରୁଜୁ ହେବା ସହ ଜାତୀୟ ମାନବାଧିକାର କମିଶନଙ୍କ ନିୟମ ଅନୁଯାୟୀ ଜଣେ ସିନିୟର ଡିଏସପି ଘଟଣାର ତଦନ୍ତ କରୁଛନ୍ତି। ତେବେ ଅଭିଯୁକ୍ତ ଜଣକ ହାଜତ ଭିତରେ କାହିଁକି ଆତ୍ମହତ୍ୟା ଉଦ୍ୟମ କଲା ? କିପରି ତାର ମୃତ୍ୟୁ ଘଟିଲା ?  ସେ ନେଇ ଚର୍ଚ୍ଚା ଜୋର ଧରିଥିବା ବେଳେ ତଦନ୍ତ ପ୍ରକ୍ରିୟା ଜାରି ରହିଥିବା କହିଛନ୍ତି। ସେପଟେ ଶବ ବ୍ୟବଛେଦ ରିପୋର୍ଟ କୁ ଅପେକ୍ଷା କରିଛି ପୋଲିସ।

ପ୍ରକୃତ ଘଟଣାର ତଦନ୍ତ କରି ଦୋଷୀଙ୍କ ବିରୋଧ ରେ କାର୍ଯ୍ୟାନୁଷ୍ଠାନ ନ ହେଲେ ଆନ୍ଦୋଳନ କରାଯିବ ବୋଲି ପରିବାର ଲୋକେ ଚେତାବନୀ ଦେଇଛନ୍ତି…। 

 ହିମାଂଶୁ କୁମାର ପାଢ଼ୀ

ଯାଜପୁର: ଯାଜପୁର ବାଳାଶ୍ରମ ପଡିଆରେ ଆରମ୍ଭ ହୋଇଛି ରାଜ୍ୟସ୍ତରୀୟ ପୁସ୍ତକ ମେଳା। ଯାଜପୁର ଜିଲା ପ୍ରଶାସନ ପକ୍ଷରୁ ଆୟୋଜିତ ଏହି ପୁସ୍ତକ ମେଳାରେ ରାଜ୍ୟ ଓ ରାଜ୍ୟ ବାହାରୁ ଯୋଗ ଦେଇଛନ୍ତି ଅନେକ ପ୍ରକାଶକ ଓ ବିତରକ। ପ୍ରତ୍ୟେକ ସଂଧ୍ୟାରେ ଆଲୋଚନା ଚକ୍ର ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେଉଛି। ସଂଧ୍ୟାରେ ବିଭିନ୍ନ ବହି ଷ୍ଟଲରେ ବୁଲାବୁଲି କରିବା ସହିତ ଘର କରଣା ସାମଗ୍ରୀ କିଣୁଛନ୍ତି ଗ୍ରାହକ।

ଗତ ୨୩ ତାରିଖରୁ ବାଳାଶ୍ରମ ପଡିଆରେ ଉଦଘାଟିତ ହୋଇଛି ରାଜ୍ୟସ୍ତରୀୟ ପୁସ୍ତକ ମେଳା। ରାଜ୍ୟ ସାହିତ୍ୟ ଓ ସଂସ୍କୃତି ବିଭାଗର ନିର୍ଦେଶକ ରଂଜନ ଦାସ ଏହାର ଉଦ୍ଘାଟନ କରିଛନ୍ତି। ଏହି ପୁସ୍ତକ ମେଳାରେ ମିଳୁଛି ପାଠ୍ୟ ପୁସ୍ତକ ଠାରୁ ଆରମ୍ଭ କରି ଧାର୍ମିକ ପୁସ୍ତକ,ସ୍ୱାସ୍ଥ୍ୟ ସମ୍ବନ୍ଧୀୟ ପୁସ୍ତକ ଏବଂ ମହାପୁରୁଷଙ୍କ ଆତ୍ମ ଜୀବନୀ ପୁସ୍ତକ। ଯାହାକୁ କିଣିବା ପାଇଁ ପାଠକଙ୍କ ମଧ୍ୟରେ ଦେଖାଦେଇଛି ପ୍ରବଳ ଆଗ୍ରହ। ଅପରପକ୍ଷେ ଛାତ୍ରଛାତ୍ରୀଙ୍କ ମଧ୍ୟରେ ଆୟୋଜିତ ହେଉଛି କୁଇଜ ପ୍ରତିଯୋଗିତା ଯାହା ସବୁ ବର୍ଗର ଲୋକଙ୍କୁ ଆକୃଷ୍ଟ କରିପାରିଛି।

ତେବେ ପାଠକଙ୍କ ନିକଟରେ ବିଭିନ୍ନ ଲେଖକଙ୍କ ପୁସ୍ତକ ପହଁଚାଇବା ଏବଂ ଅଧିକ ପାଠକ ସୃଷ୍ଟି କରିବା ଲକ୍ଷ୍ୟରେ ଅନନ୍ୟା ସାହିତ୍ୟ ସଂସଦ ପକ୍ଷରୁ ପ୍ରତିବର୍ଷ ଏହି ପୁସ୍ତକ ମେଳା ଆୟୋଜନ ହୋଇଆସୁଛି। ଚଳିତବର୍ଷ ଏହି ପୁସ୍ତକ ମେଳା ଆୟୋଜନରେ ଜିଲା ପ୍ରଶାସନ ଓ ରାଜ୍ୟ ଭାଷା ଓ ସଂସ୍କୃତି ବିଭାଗ ପକ୍ଷରୁ ସହଯୋଗ କରାଯାଇଛି। ତେବେ ପ୍ରତ୍ୟେହ ସଂଧ୍ୟାରେ ଆଲୋଚନା ଚକ୍ର,ପୁସ୍ତକ ମେଳା ଓ ନାଟକ ପରିବେଷଣ ଆୟୋଜିତ କରାଯାଉଛି।

ତେବେ ପୁସ୍ତକ ମେଳା ଛୋଟ ଛୋଟ ପିଲାମାନଙ୍କ ମନୋରଂଜନ ପାଇଁ ବିଶେଷ ବ୍ୟବସ୍ଥା ମଧ୍ୟ କରାଯାଇଛି। ଏହା ସହିତ ଘରକରଣା ସାମଗ୍ରୀ କିଣାକିଣି କରିବା ପାଇଁ ଦର୍ଶକଙ୍କ ମଧ୍ୟ ବିଶେଷ ଆଗ୍ରହ ଦେଖିବାକୁ ମିଳିଛି।

 ହିମାଂଶୁ କୁମାର ପାଢ଼ୀ

ଯାଜପୁର: ପିତୃପୁରୁଷଙ୍କ ମୋକ୍ଷପ୍ରାପ୍ତି ପାଇଁ ପିଣ୍ଡଦାନର ପରମ୍ପରା ରହିଛି । ଏହି ପିଣ୍ଡଦାନ ପାଇଁ ଭାରତ ବର୍ଷର ୩ଟି କ୍ଷେତ୍ରକୁ ପବିତ୍ର ସ୍ଥଳ ଭାବେ ଗ୍ରହଣ କରାଯାଏ । ସେହି ୩ଟି ପବିତ୍ର ସ୍ଥଳ ହେଉଛି ଶୀର ଗୟା,ନାଭିଗୟା ଏବଂ ପାଦ ଗୟା । ଯାଜପୁରର ଅଧିଷ୍ଠାତ୍ରୀ ଦେବୀ ମା ବିରଜାଙ୍କ ପୀଠରେ ରହିଛି ଏହି ନାଭିଗୟା । ଆଶ୍ୱିନ ମାସର ଇନ୍ଦୁପୂର୍ଣ୍ଣିମା ଠାରୁ ମହାଳୟା ପର୍ଯ୍ୟନ୍ତ ଏହି ପୀଠରେ ପିଣ୍ଡଦାନ କଲେ ପିତୃପୁରୁଷଙ୍କ ମୋକ୍ଷ ଲାଭ କରିବାର ବିଶ୍ୱାସ ରହିଛି । ସେଥିପାଇଁ ଯାଜପୁରର ଏହି ନାଭିଗୟାରେ ପିଣ୍ଡଦାନ କରିବା ପାଇଁ କାହିଁ କେଉଁ ଆଡୁ ଶ୍ରଦ୍ଧାଳୁଙ୍କ ଭିଡ ଛୁଟିଥାଏ ।

ନାଭିଗୟାରେ ପିଣ୍ଡଦାନ ପବିତ୍ରତା ନେଇ ରହିଛି ଅନେକ କିମ୍ବଦନ୍ତୀ । ବାୟୁ ପୁରାଣ ଅନୁଯାୟୀ ଗୟାସୁରର ନାଭି ବିରଜା କ୍ଷେତ୍ରରେ ପଡିବାର ବିଶ୍ୱାସ ରହିଛି । ଗୟାସୁର ଅମର ବର ପାଇବା ପରେ ଦେବ ଲୋକରେ ଏହାକୁ ନେଇ ଚିନ୍ତା ବଢ଼ିଥିଲା । ବିଷ୍ଣୁ ବ୍ରହ୍ମାଣ୍ଡର ହିତ ପାଇଁ ଏକ ଯଜ୍ଞର ଆୟୋଜନ କରି ଗୟାସୁରଙ୍କୁ ତାଙ୍କ ଶରୀର ଦାନ ପାଇଁ ଭିକ୍ଷା କରିଥିଲେ । ଗୟାସୁର ଏଥିପାଇଁ ରାଜି ହୋଇ ୩ଟି ସର୍ତ୍ତ ରଖିଥିଲେ । ସେହି ୩ଟି ସର୍ତ୍ତ ଅନୁଯାୟୀ ଗୟାସୁରର ଶିର, ନାଭି ଓ ପାଦ ପଡିବା ସ୍ଥାନକୁ ତିର୍ଥସ୍ଥଳୀ ଭାବେ ଗ୍ରହଣ କରାଯିବ ଏବଂ ସେଠାରେ ପିତୃପୁରୁଷଙ୍କ ପିଣ୍ଡଦାନ କରାଯିବ । ସେହି ଅନୁଯାୟୀ ନାଭିଗୟାରେ ବର୍ଷ ତମାମ ଶ୍ରଦ୍ଧାଳୁ ମାନେ ପିତୃପୁରୁଷଙ୍କ ପିଣ୍ଡଦାନ ପାଇଁ ଆସିଥାନ୍ତି । ଖାସ କରି ପିତୃପକ୍ଷରେ ପିଣ୍ଡଦାନ ପାଇଁ ବିଶେଷ ଭିଡ ଦେଖିବାକୁ ମିଳେ ।

ରାଜ୍ୟ ଓ ରାଜ୍ୟ ବାହାରୁ ଆସୁଥିବା ଶ୍ରଦ୍ଧାଳୁ ମାନଙ୍କ ଶୃଙ୍ଖଳିତ ପିଣ୍ଡଦାନ ପାଇଁ ମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଚଳିତ ବର୍ଷ ମଧ୍ୟ ପିତୃପକ୍ଷରେ ପିଣ୍ଡଦାନ ପାଇଁ ରାଜ୍ୟ ଓ ରାଜ୍ୟ ବାହାରୁ ଅନେକ ଶ୍ରଦ୍ଧାଳୁଙ୍କ ସୁଅ ଛୁଟିବାରେ ଲାଗିଛି । ଏଠାରେ ରହିଥିବା ଅନ୍ୟ ଏକ ବିଶ୍ୱାସ ହେଉଛି ଏହି ନାଭି ଗୟାଟିର କୁଣ୍ଡ କେବେ ପୂର୍ଣ୍ଣ ହୁଏ ନାହିଁ । ବର୍ଷ ତମାମ ଏଠାରେ ପିଣ୍ଡଦାନ କାର୍ଯ୍ୟ ଚାଲୁ ରହିଥିଲେ ସୁଦ୍ଧା ଆଜି ପର୍ଯ୍ୟନ୍ତ କେବେ ଏହି କୁଣ୍ଡ ପୁରଣ ହୋଇଥିବା ଦେଖିବାକୁ ମିଳେ ନାହିଁ । ତେଣୁ ଏହି କୁଣ୍ଡକୁ ଗୁପ୍ତଗଂଗା ବୋଲି ବିଶ୍ୱାସ କରାଯାଏ । ଏଭଳି ଅନେକ ପୌରାଣିକ ବିଶ୍ୱାସ ରହିଥିବାରୁ ବର୍ଷ ତମାମ ଏଠାକୁ ଶ୍ରଦ୍ଧାଳୁ ମାନଙ୍କ ଆଗମନ ହୋଇଥାଏ ।

ନାଭିଗୟାରେ ପିଣ୍ଡଦାନ କରିବା ପରେ ମା ବିରଜାଙ୍କୁ ଦର୍ଶନ କଲେ କୋଟି ଜନ୍ମର ପାପ କ୍ଷୟ ହେବା ସହିତ ପିତୃପୁରୁଷଙ୍କ ମୋକ୍ଷପ୍ରାପ୍ତି ହେବାର ବିଶ୍ୱାସ ରହିଛି ।

ଯାଜପୁର: ଦଳିତ ପରିବାରକୁ ମୌଳିକ ସୁବିଧା ପ୍ରଦାନ ଦାବିରେ ପୌର କାର୍ଯ୍ୟାଳୟ ଆଗରେ ବିକ୍ଷୋଭ। ରାଜ୍ୟ ଦଳିତ ମୋର୍ଚ୍ଚା ପକ୍ଷରୁ ଯାଜପୁର ବ୍ୟାସନଗର ଅଂଚଳର ଦଳିତ ପରିବାରକୁ ମୌଳିକ ସୁବିଧା ପ୍ରଦାନ ଦାବିରେ ପୌର କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ  କରାଯାଇଛି l

ସୂଚନା ଅନୁଯାୟୀ, ବ୍ୟାସନଗର ପୌରପରିଷଦରେ ସତ୍ୟସାଇ ମନ୍ଦିର ନିକଟରେ ଥିବା ଜରି ସାହିରେ ଶତାଧିକ ଦଳିତ ପରିବାର ବସବାସ କରୁଛନ୍ତି l ଏମାନେ ଭୋଟ ଦେଉଛନ୍ତି। କିନ୍ତୁ  ଏମାନଙ୍କ ନିକଟରେ ନାଁ ଅଛି ଜମିପଟା, ନା ରାସନ କାର୍ଡ l ଗାଁକୁ ନା ଅଛି ରାସ୍ତା ମିଳୁଛି ପାନୀୟ ଜଳ। ବସ୍ତିବାସିନ୍ଦାଙ୍କ ନିକଟରେ ଜମିପଟା ନଥିବାରୁ ଏହି ଗରିବ ଦଳିତ ପରିବାର ସବୁ ନିଜର ମୌଳିକ ଅଧିକାରରୁ ବଞ୍ଚିତ ହେବା ସହ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନାରୁ ବାଦ ପଡିଛନ୍ତି। ବାରମ୍ବାର ଦାବି, ଅଭିଯୋଗ, ଅନୁରୋଧ ସତ୍ତ୍ବେ ସେମାନଙ୍କ ପ୍ରତି କାହାର ନିଘା ନାହିଁ। କିନ୍ତୁ ଭୋଟ ସମୟରେ ନେତାମାନେ ମାଳ ମାଳ ପ୍ରତିଶ୍ରୁତିରେ ପୋତି ଦେଉଛନ୍ତି ଏହି ନିରୀହ ଦଳିତମାନଙ୍କୁ।

ତେଣୁ ସରକାରୀ କଳର ଅଣଦେଖାରେ ଅତିଷ୍ଠ ଏହି ଦଳିତ ଗ୍ରାମବାସୀମାନେ ନିଜର ମୌଳିକ ସୁବିଧା ଦାବିରେ ଆଜି ରାଜ୍ୟ ଦଳିତ ମୋର୍ଚ୍ଚୋ ସମ୍ପାଦକ ଶାସ୍ତ୍ରୀବହାଦୂରଙ୍କ ନେତୃତ୍ୱରେ ବ୍ୟାସନଗର ପୌରକାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି।

ଯାଜପୁର:  ଯାଜପୁର ମଙ୍ଗଳପୁର ଥାନା ନନ୍ଦିପୁର ସରକାରୀ ଉଚ୍ଚ ବିଦ୍ୟାଳୟର ନବମ ଶ୍ରେଣୀ ଛାତ୍ରୀ ଅମ୍ରିତାଙ୍କ ମୃତ୍ୟୁ ଘଟଣା । ଆସିଲା ମୃତ ଛାତ୍ରୀଙ୍କ ଶବ ବ୍ୟବଛେଦ ରିପୋର୍ଟ। ଶ୍ୱାସରୁଦ୍ଧ ହୋଇ ଛାତ୍ରୀଙ୍କ ମୃତ୍ୟୁ ହୋଇଥିବା ରିପୋର୍ଟରେ ଦର୍ଶାଯାଇଛି ।

ଯାଜପୁର ମଙ୍ଗଳପୁର ଥାନା ନନ୍ଦିପୁର ସରକାରୀ ଉଚ୍ଚ ବିଦ୍ୟାଳୟର ଛାତ୍ରୀ ଅମ୍ରିତାଙ୍କ ମୃତ୍ୟୁର ଶବ ବ୍ୟବଚ୍ଛେଦ ରିପୋର୍ଟ ଆସିଲା। ରିପୋର୍ଟରେ ଦର୍ଶାଯାଇଛି କି, ତାଙ୍କର ଶ୍ବାସରୁଦ୍ଧ ହୋଇ ମୃତ୍ୟୁ ହୋଇଛି। କିନ୍ତୁ ଏହି ରିପୋର୍ଟକୁ ଗ୍ରହଣ କରିପାରୁ ନାହାନ୍ତି ଅମ୍ରିତାଙ୍କ ପରିବାରବର୍ଗ।  

ଝିଅଙ୍କୁ କେହି ହତ୍ୟା କରି ପୋଖରୀରେ ଫିଙ୍ଗି ଦେଇଥିବା ଅଭିଯୋଗ କରିଛନ୍ତି ପରିବାର ଲୋକେ।

ବିଂଝାରପୁର ବରୀକୁଳ ଗାଁର ଅମୂଲ୍ୟ ଦାସଙ୍କ ବଡ଼ ଝିଅ ଅମ୍ରିତା ଦାସ ଗତ ୩ ତାରିଖ ଦିନ ଟ୍ୟୁସନ ଯାଇଥିଲେ।  ଆଉ ଘରକୁ ଫେରିନଥିଲେ । ବହୁ ଖୋଜା ଖୋଜି ପରେ ନନ୍ଦୀପୁର ନିକଟସ୍ଥ ରାସ୍ତା କଡ଼ ପୋଖରୀରୁ ମିଳିଥିଲା ଅମ୍ରିତାଙ୍କ ମୃତଦେହ । ଯାହାକୁ ନେଇ ମଙ୍ଗଳପୁର ଥାନାରେ ଅମ୍ରିତାଙ୍କୁ କେହି ହତ୍ୟା କରି ଫିଙ୍ଗି ଦେଇଥିବା ଅଭିଯୋଗ କରିଥିଲେ ପରିବାର ଲୋକେ ।