NAVEEN PATNAIK

  • ଗଂଜାମ ଗସ୍ତରେ ଯିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

    BMP_CM VISIT PREPARATION_PKG

    ଆସନ୍ତାକାଲି ଦିନିକିଆ ଗଂଜାମ ଗସ୍ତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଜିଲ୍ଲାର ୧୩ଟି ନିର୍ବାଚନ ମଣ୍ଡଳୀର ବିଭିନ୍ନ ଉନ୍ନୟନ ମୂଳକ ଯୋଜନାର ଶୁଭ ଉଦଘାଟନ ସହ କିଛି ନୂତନ ଯୋଜନାର ଶୁଭାରମ୍ଭ କରିବାର କାର୍ଯ୍ୟକ୍ରମ ରହିଛି। ତେବେ ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି କଡାକଡି ସୁରକ୍ଷା ବ୍ୟବସ୍ଥା କରାଯାଇଛି।

    ଆସନ୍ତାକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦିନିକିଆ ଗଂଜାମ ଗସ୍ତ। ଗଂଜାମ ଜିଲ୍ଲାର  କବିସୂର୍ଯ୍ୟନଗର, ହିଂଜିଳିକାଟୁ ଓ ଛତ୍ରପୁର ନିର୍ବାଚନ ମଣ୍ଡଳୀ ଗସ୍ତ କରି ବିଭିନ୍ନ ଉନ୍ନୟନ ମୂଳକ କାର୍ଯ୍ୟକ୍ରମର ଶୁଭ ଉଦଘାଟିନୀ ସହ ବହୁ ନୂତନ ଯୋଜନାର ଭିତ୍ତି ପ୍ରସ୍ତର ସ୍ଥାପନ କରିବାର କାର୍ଯ୍ୟକ୍ରମ ରହିଛି। କୋଭିଡ ପରେ ମୁଖ୍ୟମନ୍ତ୍ରୀ ଗଂଜାମ ପ୍ରସିଦ୍ଧ ଶକ୍ତି ପୀଠ ମା  ତାରାତାରିଣୀଙ୍କ ନବକଳେବରରେ ଯୋଗ ଦେଇଥିବାବେଳେ, ପୁଣି ଥରେ ଆଉ ଏକ ବିରାଟ କାର୍ଯ୍ୟକ୍ରମରେ ଯୋଗ ଦେବେ। 

    ସେପଟେ ନିଜ ନିର୍ବାଚନ ମଣ୍ଡଳୀ ହିଂଜିଳିକାଟୁକୁ ମୁଖ୍ୟମନ୍ତ୍ରୀଙ୍କ ଦୀର୍ଘ ୧୯ ମାସ ପରେ ଗସ୍ତକୁ ନେଇ ସ୍ଥାନୀୟ ନେତା ଓ କର୍ମୀଙ୍କ ଭିତରେ ନାହିଁ ନ ଥିବା ଉତ୍ସାହ ଦେଖିବାକୁ ମିଳିଛି। ତେବେ ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି  ଆଇଜିଙ୍କ ସହ ୪୮ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ହିଂଜିଳିରେ ୨୦ ପ୍ଲାଟୁନ କବିସୂର୍ଯ୍ୟନଗର ଓ ଛତ୍ରପୁରରେ 28 ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିବା ଜଣାପଡିଛି।

    ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ବିଜେଡି ନେତା ଓ କର୍ମୀଙ୍କ ଭିତରେ ଉତ୍ସାହ  ଦେଖିବାକୁ ମିଳିଛି ।

    ଇତିଶ୍ରୀ ସମାପିକା ମହାନ୍ତିଙ୍କ ରିପୋର୍ଟ

  • ନବୀନଙ୍କୁ ଭେଟି ଫେରିଗଲେ ମମତା

    () ନବୀନ ନିବାସରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଫେରିଯାଇଛନ୍ତି ଗୃହରାଜ୍ୟକୁ। ପୁରୀରେ ପଶ୍ଚିମବଙ୍ଗ ଭବନ ପାଇଁ ପ୍ରସ୍ତାବିତ ଜାଗା ସମ୍ପର୍କରେ ଆଲୋଚନା ସହ ବିଭିନ୍ନ ପ୍ରସଙ୍ଗରେ ହୋଇଛି ଆଲୋଚନା। ପୁରୀରେ ପଶ୍ଚିମବଙ୍ଗ ଭବନ ପାଇଁ ଜାଗା ଦେଇଥିବାରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ମମତା।

    ତିନି ଦିନିଆ ଓଡିଶା ଗସ୍ତରେ ଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଆଜି ଶେଷ ଦିନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି। ମମତାଙ୍କୁ ଶ୍ରୀଜିଉଙ୍କୁ ଅଙ୍ଗବସ୍ତ୍ର ଦେଇ ସ୍ୱାଗତ କରିଛନ୍ତି ମୁଖ୍ୟମନ୍ତ୍ରୀ  । ଏହା ସହ ମମତାଙ୍କୁ ତିନି ରଥର ରୂପାର ତିନୋଟି ପ୍ରତିକୃତି ଓ ଛେନାପୋଡ଼ ଉପହାର ଦେଲେ ନବୀନ । ହକି ବିଶ୍ବକପ୍ ସମୟରେ ନବୀନ ନିମନ୍ତ୍ରଣ କରିଥିଲେ । କିନ୍ତୁ ସମୟ ଅଭାବରୁ ସେ ଆସିପାରିନଥିଲେ । ତେଣୁ ଏବେ ପୁରୀ ଆସିଥିବା ବେଳେ ନବୀନ ପଟ୍ଟନାୟକଙ୍କୁ ଦେଖାକରିଥିଲେ ବୋଲି ମମତା କହିଥିଲେ । ଏହି ଭେଟଘାଟ ସମୟରେ ପୁରୀରେ ପଶ୍ଚିମବଙ୍ଗ ଭବନ ପାଇଁ ପ୍ରସ୍ତାବିତ ଜାଗା ସମ୍ପର୍କରେ ମଧ୍ୟ ଆଲୋଚନା ହୋଇଛି । ପୁରୀରେ ଜାଗା ଦେଇଥିବାରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ମମତା । ଏଥିସହ ଅଫିସରଙ୍କ ବ୍ୟବହାର ଓ ଆତିଥେୟତାକୁ ମଧ୍ୟ କରିଛନ୍ତି ପ୍ରଶଂସା ।

    ସେପଟେ ନବୀନ-ମମତାଙ୍କ ଭେଟଘାଟ କୁ ନେଇ ରାଜନୈତିକ ମହଲରେ ଚର୍ଚା ବେଶ ରହିଥିଲା । ହେଲେ ସାକ୍ଷାତ ପରେ ପୂର୍ଣ୍ଣଚ୍ଛେଦ ପଡିଛି । ୨୦୨୪ ସାଧାରଣ ନିର୍ବାଚନ ପୂର୍ବରୁ ମମତା ତୃତୀୟ ସାମୁଖ୍ୟ ଗଠନ କରିବେ ବୋଲି ବିଶେଷଜ୍ଞ ମତବାଢୁଥିବା ବେଳେ । ଗଣମାଧ୍ୟମର ଏହି ପ୍ରଶ୍ନରେ ଦିଦି ଉତ୍ତର ରଖିଥିଲେ କହିଲେ ନିର୍ବାଚନକୁ ଆହୁରି ବର୍ଷେ ଅଛି । ଏବେଠାରୁ ଆଲୋଚନା କରିବାର କୌଣସି ଆବଶ୍ୟକତା ନାହିଁ । କିନ୍ତୁ ସଂଘୀୟ ବ୍ୟବସ୍ଥା ଓ ଗଣତନ୍ତ୍ରର ସୁରକ୍ଷା ବିଷୟ ଉଠାଇ ପରୋକ୍ଷାରେ କେନ୍ଦ୍ରକୁ ଟାର୍ଗେଟ କରିଛନ୍ତି ମମତା ।

     ଜ୍ୟୋତିମଞ୍ଜରୀଙ୍କ  ରିପୋର୍ଟ

  • ଧର୍ମେନ୍ଦ୍ରଙ୍କ ଟାର୍ଗେଟରେ ମୁଖ୍ୟମନ୍ତ୍ରୀ

    () ଅବସର ଥିଲା ଶିଶୁ ଓ ମହିଳା ଅନୁକୂଳ ପଞ୍ଚାୟତ ଗଠନ ଉପରେ କର୍ମଶାଳା। ମୁଖ୍ୟ ଅତିଥି ଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ହେଲେ ଆସିନଥିଲେ। ଆଉ ବିଶିଷ୍ଟ ଅତିଥି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କ ଅନୁପସ୍ଥିତିରେ ରାଜ୍ୟ ସରକାରଙ୍କ ଅମଲା ଓ ବ୍ୟବସ୍ଥାକୁ ଯେଭଳି ଗଣି ଗଣି ଟାର୍ଗେଟ କଲେ, ଲାଗୁଥିଲା କଡ଼ାଗଣ୍ଡା ହିସାବ କରିଦେଲେ। ଦେଖନ୍ତୁ କେମିତି ଥିଲା ପରିବେଶ।

    ଶିଶୁ ଓ ମହିଳା ଅନୁକୂଳ ପଞ୍ଚାୟତ ଗଠନ ଉପରେ କର୍ମଶାଳା। ତିନି ଦିନିଆ କର୍ମଶାଳାକୁ ଉଦଘାଟନ କରିଥାଆନ୍ତେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ହେଲେ ଆସିନଥିଲେ। ଆଉ କର୍ମଶାଳାରେ ବିଶିଷ୍ଟ ଅତିଥି ଭାବେ ଯୋଗ ଦେଇଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କିନ୍ତୁ ପଖାଳ ଓ ମାଣ୍ଡିଆର ଆଦର ଆଳରେ ଯେଭଳି ଗଣି ଗଣି ରାଜ୍ୟ ସରକାରଙ୍କ ଅମଲା ଓ ବ୍ୟବସ୍ଥାକୁ ଟାର୍ଗେଟ କଲେ, ସମସ୍ତେ ତାଜୁବ୍ ହୋଇଯାଇଥିଲେ। ଅବଶ୍ୟ ମନ୍ତ୍ରୀ କହିଲା ବେଳେ ମଞ୍ଚ ଛାଡ଼ିସାରିଥିଲେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର। ଆଉ ମୁଖ୍ୟମନ୍ତ୍ରୀଙ୍କୁ ବି ମଞ୍ଚରେ ପାଇଥିଲେ କୁଆଡ଼େ ଅନେକ ଅନୁନୟ ସହ କେନ୍ଦ୍ରର ଅନେକ ଲୋକାଭିମୁଖୀ ଯୋଜନାକୁ କାର୍ଯ୍ୟକାରୀ କରାଇବାରେ ସହଯୋଗ ମାଗିଥାଆନ୍ତେ ବୋଲି ଆଗ କହିଦେଇ ଆରମ୍ଭ କରିଦେଲେ ଧର୍ମେନ୍ଦ୍ର ନିଜ ଅନ୍ଦାଜରେ କଟାକ୍ଷ କରିବାକୁ। ମଞ୍ଚରେ ଥିବା ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ଅମାତ ଓ ମହିଳା ଶିଶୁ ବିକାଶ ମନ୍ତ୍ରୀ ବାସନ୍ତୀ ହେମ୍ୱ୍ରମଙ୍କୁ ଦେଖାଇ ମହିଳା ସଶକ୍ତିକରଣ ବନାମ ମିଶନ ଶକ୍ତିକୁ ନେଇ ତୁଳନାତ୍ମକ ଚିତ୍ର ଦେଖାଇ ଛିଗୁଲେଇ ଥିଲେ। ନବୀନ ନିବାସରେ ମୁଖ୍ୟମନ୍ତ୍ରୀ ଏସଏଚଜି ମହିଳାଙ୍କୁ ଭେଟୁଛନ୍ତି ସତ। ନବଜାତକଙ୍କ କୁପୋଷଣ, ରକ୍ତହୀନତା, ଓଜନ କମିବା ଆଦି ଅଧ୍ୟାୟରୁ ଆରମ୍ଭ କରି ମହିଳାଙ୍କୁ ଆଉ କେତେଦିନ ବଡ଼ି, ପାମ୍ପଡ଼ ଓ ଆଚାରରେ ସୀମିତ ରଖିବେ ବୋଲି ରାଜ୍ୟ ସରକାରଙ୍କୁ ସମାଲୋଚନା କରିଥିଲେ। କାହିଁକି ଇ-କମର୍ସରେ ସେମାନେ ଯୋଡ଼ି ହେବେନି।

    ରାଷ୍ଟ୍ରୀୟ ଶିକ୍ଷା ନୀତିରେ ପ୍ରତି ବ୍ଲକରେ ଦୁଇଟି ଲେଖାଏଁ ପିଏମ ଶ୍ରୀ ସ୍କୁଲ ହେଲେ ରାଜ୍ୟ ୮ଶହ ସ୍କୁଲ ପାଆନ୍ତା। ୧୬ ଶହ କୋଟି ଟଙ୍କା ପାଇବ ରାଜ୍ୟ। ମୋ ସ୍କୁଲ ଭଲ। ଏହାକୁ ନେଇ ନାଁ ନିଅ ମନା ନାହିଁ। କିନ୍ତୁ ପିଲାଏ ଭଲ ସ୍କୁଲରେ ପଢ଼ିଲେ ସରକାରଙ୍କ ଦେହରେ ଯାଉନି କି ବୋଲି ପରୋକ୍ଷ କଟାକ୍ଷ ଫିଙ୍ଗିଛନ୍ତି। ଅର୍ଥର ଅଭାବ ନାହିଁ ବୋଲି କହିଥିଲେ ମୁଖ୍ୟ ଶାସନ ସଚିବ। ତା ହେଲେ କାହିଁକି ପଞ୍ଚାୟତକୁ ଆସୁଥିବା ପାଣ୍ଠିକୁ କନଭର୍ଜେନ୍ସ ନାଁରେ ଫେରିଯାଉଛି। ନାଚ ଗୀତରେ ୩ହଜାର କୋଟି ସାରିଦେଲ। ଅନ୍ତତଃ ପଞ୍ଚାୟତିରାଜ ପାଣ୍ଠିରେ ହାତ ନ ଲଗାଇବାକୁ ତାଗିଦ୍ କରିଥିଲେ ଧର୍ମେନ୍ଦ୍ର। ପଞ୍ଚାୟତିରାଜ ସଚିବ ଆଗକୁ କେନ୍ଦ୍ରକୁ ଯିବେ। ପଞ୍ଚାୟତ ପ୍ରତିନିଧିଙ୍କ ସାମ୍ୱିଧାନିକ ଅଧିକାରକୁ ଛଡ଼ାନ୍ତୁନି ବୋଲି ବି ଚେତେଇ ଦେଇଥିଲେ ଲୋହାନୀଙ୍କୁ।

    ଏତିକିରେ ଥମିନଥିଲା ଧର୍ମେନ୍ଦ୍ରଙ୍କ ରୋଷ। ପଖାଳ ଓ ମାଣ୍ଡିଆର ଉପକାରିତାକୁ ଦର୍ଶାଇ ଲୋହାନୀ ପଞ୍ଚାୟତିରାଜ ପ୍ରତିନିଧିଙ୍କୁ ଏହା ନିଶ୍ଚିତ ଖୁଆଇବେ ବୋଲି ପରାମର୍ଶ ଦେଇ ଶେଷରେ କହିଥିଲେ ଯେ, ଓଡ଼ିଶା ପାଇଁ ଆସନ୍ତା ୧୩ ବର୍ଷ ଓ ଭାରତ ପାଇଁ ୨୫ ବର୍ଷର ମହତ୍ତ୍ୱକୁ ପ୍ରତିପାଦିତ କରିବାକୁ ହେଲେ ସଠିକ୍ କାର୍ଯ୍ୟାନ୍ୱୟନ, ସହଯୋଗ ଓ ସମନ୍ୱୟ ନ ରହିଲେ ସବୁ ବୃଥା ହୋଇଯିବ।

    ଉଭୟ କେନ୍ଦ୍ର ଓ ରାଜ୍ୟର ସହଭାଗିତାରେ ଶିଶୁ ଓ ମହିଳା ଅନୁକୂଳ ପଞ୍ଚାୟତ ଗଠନରେ ଥିବା ୯ଟି ମଡ୍ୟୁଲକୁ କାର୍ଯ୍ୟକାରୀ କରିବାକୁ ହେବ। ହେଲେ କଥା ଛଳରେ ରାଜ୍ୟରୁ ସେଭଳି ସହଯୋଗ ମିଳିବ କି ନାଁ, ତାକୁ ନେଇ ଧର୍ମେନ୍ଦ୍ର ସନ୍ଦେହ କରୁଛନ୍ତି।

    ପ୍ରଦୀପ ନାୟକଙ୍କ ରିପୋର୍ଟ

  • ବାସ୍ତବରେ ନବୀନ ରୋଲ ମଡେଲ!

    () ବିଶ୍ୱକପ୍ ହକି ଲାଗି ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରାଯାଉଛି। ଏହି ପରିପ୍ରେକ୍ଷୀରେ ପୁଡୁଚେରୀ ମୁଖ୍ୟମନ୍ତ୍ରୀ ଏନ.ରଙ୍ଗାସ୍ୱାମୀଙ୍କୁ ବି ନିମନ୍ତ୍ରଣ ହୋଇଛି। ତେବେ ରଙ୍ଗାସ୍ୱାମୀ ଯେଉଁ ଗେଟଅପରେ ଥିଲେ, ତାକୁ ନେଇ ସବୁଠି ଚର୍ଚ୍ଚା। ରାଜ୍ୟର ମନ୍ତ୍ରୀ ଅତନୁ ସବ୍ୟସାଚୀ ନାୟକ ଯାହାକୁ ନିମନ୍ତ୍ରଣ କଲେ, ସେ ମୁଖ୍ୟମନ୍ତ୍ରୀ ଏତେ ସରଳ କେମିତି। ବେଶପୋଷାକ, ପରିପାଟିକୁ ଦେଖି ଯେ କେହି ଆଶ୍ଚର୍ଯ୍ୟ ହେବେ। ତେବେ କାହିଁକି ଏମିତି ଚର୍ଚ୍ଚା, ଆସନ୍ତୁ ଦେଖିବା ଏହି ରିପୋର୍ଟରେ। ଆଉ ରଙ୍ଗାସ୍ୱାମୀଙ୍କ ସହ ନବୀନ ଏ ସବୁ ଦିଗରୁ ତୁଳନୀୟ କି। ଏମିତି ଏକ ଚର୍ଚ୍ଚା ଜୋର ଧରିଛି ସୋସିଆଲ ମିଡ଼ିଆରେ।

    ଏନ.ରଙ୍ଗାସ୍ୱାମୀ। ପୁରା ନାଁ ନାତେସାନ କ୍ରିଷ୍ଣମୂର୍ତ୍ତି ରଙ୍ଗାସ୍ୱାମୀ। ପୁଡୁଚେରୀର ମୁଖ୍ୟମନ୍ତ୍ରୀ। ବୟସ ୭୨। ହେଲେ ଓଡ଼ିଶାରେ କାହିଁକି କେଜାଣି ଏହି ମୁଖ୍ୟମନ୍ତ୍ରୀଙ୍କୁ ନେଇ ଗଲା ତିନି ଦିନ ହେଲା ବେଶ୍ ଚର୍ଚ୍ଚା। ଆଉ ଏହାର ଉତ୍ତର ହେଉଛି ଏହି ଫଟୋ ଓ ଭିଡ଼ିଓ। ବିଶ୍ୱକପ୍ ହକି ପାଇଁ ଓଡ଼ିଶାକୁ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ ଅବସରରେ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଯାଇଥିଲେ ପୁଡୁଚେରୀ। ହେଲେ ମୁଖ୍ୟମନ୍ତ୍ରୀ ଖାଲି ଦେହରେ, ଲୁଙ୍ଗି ପିନ୍ଧି ଆସିଥିଲେ ନିମନ୍ତ୍ରଣ କାର୍ଡ ନେବାକୁ। ନିମନ୍ତ୍ରଣ କାର୍ଡ ଦେଖିବା ସମୟରେ ଅତିଥି ଅତନୁଙ୍କୁ ତାଙ୍କର କର୍ମଚାରୀ ଷ୍ଟିଲ୍ ଥାଳି ଉପରେ ଚା କପ୍‌ ରଖି ଦେବାକୁ ଆସିଥିଲେ। ତାଙ୍କ ବାସଭବନର ଆସବାବପତ୍ର ବି ସେମିତି ଆଖିଦୃଶିଆ ନଥିଲା। ପୁଡ୍ଡୁଚେରୀର ୪ ଥରର ମୁଖ୍ୟମନ୍ତ୍ରୀ ରଙ୍ଗାସ୍ୱାମୀ। ପୂର୍ବରୁ କଂଗ୍ରେସରେ ଥିଲେ। ୨୦୧୧ରେ ନିଜ ଦଳ ଗଢ଼ି ଏନଡିଏରେ ଅଛନ୍ତି। ମୁଖ୍ୟମନ୍ତ୍ରୀ ରଙ୍ଗାସ୍ୱାମୀ ସାଧାରଣ ଜୀବନଯାପନ କରନ୍ତି। ଅଫିସ ଗଲେ ବି କୌଣସି ପ୍ରୋଟୋକଲରେ ଯାଆନ୍ତିନି। ଆଶ୍ଚର୍ଯ୍ୟର କଥା ମଟର ସାଇକେଲରେ ଅଫିସ ଯିବା ଆସିବା କରନ୍ତି। ଯିଏ ଆସିଲେ ନିର୍ବିଘ୍ନରେ ଦେଖା କରିପାରନ୍ତି।

    ସେପଟେ ଏଭଳି ସରଳ ଜୀବନଯାପନର ଚିତ୍ର ଦୃଶ୍ୟପଟ୍ଟକୁ ଆସିବା ପରେ ସୋସିଆଲ ମିଡିଆରେ ଯେତିକି ବାହାବା। ସେତିକି ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରଳ ଜୀବନଶୈଳୀ ସାଙ୍ଗକୁ ବାସ୍ତବରେ ସମସ୍ତଙ୍କ ଲାଗି ନବୀନ ନିବାସ ଏମିତି ଖୋଲା କି ବୋଲି ଆଉ ଏକ ପୁରୁଣା ଚର୍ଚ୍ଚା ସମାନ୍ତରାଳ ଜୋର ଧରିଛି। ଧଳା ପାଇଜାମା, କୋହ୍ଲାପୁରୀ ଚପଲ ପିନ୍ଧି ସରଳ ଜୀବନଶୈଳୀକୁ ନେଇ ନବୀନ ବେଶ୍ ଚର୍ଚ୍ଚିତ। ଏପରିକି ବିରୋଧୀ ବି ତାଙ୍କ ଜୀବନ ଶୈଳୀ ଅନନ୍ୟ ଓ ଆଦର୍ଶ ବୋଲି କହିବାକୁ ପଛାଇନଥାଆନ୍ତି। ରାଜନେତାଙ୍କ ଲାଗି ନବୀନ ଏକ ରୋଲ ମଡେଲ୍ ବୋଲି କୁହନ୍ତି।

    ହେଲେ ମୋ ଦ୍ୱାର ସମସ୍ତଙ୍କ ଲାଗି ଖୋଲା ବୋଲି କହୁଥିବା ନବୀନ ନିବାସ କିନ୍ତୁ ୨୪ ଘଣ୍ଟିଆ କଡ଼ା ସୁରକ୍ଷା ବଳୟରେ। ବିନା ହେଲିକେପ୍ଚରରେ ଦୂରକୁ ଯିବା ମୁସ୍କିଲ। ସେଥିଲାଗି ତ ନବୀନ ନିବାସରୁ କଟକ ରେଭେନ୍ସା ୟୁନିଭରସିଟିକୁ ଚୋପରରେ ଯାଇଥିଲା ବେଳେ ବିରୋଧୀଙ୍କ କଡ଼ା ସମାଲୋଚନାର ଶୀକାର ହୋଇଥିଲେ। କିଭଳି ରାଜ୍ୟ ରାଜକୋଷରୁ ଅର୍ଥ ଅପବ୍ୟୟ ହେଉଛି କହି ବିରୋଧୀ ତୀର ମାରିଥିଲେ। ସେତେବେଳେ ଘଣ୍ଟାକୁ ଚୋପର ଭଡ଼ା ୬୦ହଜାରରୁ ୯୦ହଜାର ଲାଗୁଥିଲା।

    ଗୋଟିଏ ପଟେ ନାତେସାନ। ଅନ୍ୟପଟେ ନବୀନ। ଉଭୟ ରାଜ୍ୟର ଶାସନ ମଙ୍ଗ ଧରିଛନ୍ତି ଦୀର୍ଘ ବର୍ଷରୁ। ଉଭୟଙ୍କ ଜୀବନ ଶୈଳୀ ବି ସରଳ। କିନ୍ତୁ ନାତେସାନ ଯେଭଳି ଲୋକଙ୍କୁ ଭେଟିବାକୁ ଆଗଭର। ସେମିତି ନବୀନ କି। ବୋଧହୁଏ ନୁହନ୍ତି। ଅବଶ୍ୟ ନବୀନ ନିବାସକୁ ସମୟେ ସମୟେ ଆସୁଥିବା ଦଳୀୟ କର୍ମୀଙ୍କ ସହ ଭେଟଘାଟ, ତା ପୁଣି ଫଟୋ ସେସନ ଲାଗି କୁଆଡ଼େ ଉଦ୍ଦିଷ୍ଟ ବୋଲି ସମାଲୋଚକ ଓ ନିନ୍ଦୁକ କୁହନ୍ତି। କିନ୍ତୁ ନବୀନ ବି ସ୍ପଷ୍ଟ କରିଛନ୍ତି, ଓଡ଼ିଶା ବିକାଶ ଲାଗି ନିରନ୍ତର ଓ ଅକ୍ଳାନ୍ତ ପରିଶ୍ରମରୁ ସେ ଜନତାର ଅକୁଣ୍ଠ ସମର୍ଥନ ପାଇଆସୁଛନ୍ତି। କଥା କମ୍ , କାମ ବେଶୀ ଫଣ୍ଡାରେ ବିଶ୍ୱାସ କରନ୍ତି ନବୀନ।

    ସରଳ ଜୀବନଶୈଳୀ ଯେମିତି ଉଭୟ ନବୀନ ଓ ନାତେସାନଙ୍କ ହାତରେ କ୍ଷମତାର ଡୋରି ଧରାଇବାରେ ଜନତାଙ୍କ ଭରସା ବଢୁଛି। କିନ୍ତୁ ଜନତା-ସରକାର ଭିତରେ କିଏ ଦୂରତା ବଢାଇଛି ଆଉ କିଏ କମାଇଛି, ଜଳଜଳ କରି ଦିଶୁଛି।

    ପ୍ରଦୀପ ନାୟକ

  • ନବୀନଙ୍କ ଉପରେ ବିରୋଧୀ ମେଣ୍ଟ ନଜର

    () ବିରୋଧୀ ଦଳକୁ ଏକଜୁଟ୍ କରି ମୋଦିଙ୍କ ବିରୁଦ୍ଧରେ ଲଢ଼ିବା ଓ ବିଜେପିକୁ ହଟାଇବାକୁ କେସିଆର, ନୀତିଶ, ମମତାଙ୍କ ଭଳି ଅନେକ ମୁଖ୍ୟମନ୍ତ୍ରୀ ଅଭିଯାନ ଆରମ୍ଭ କରିଛନ୍ତି। କିନ୍ତୁ ଅଣବିଜେପି ସରକାର ଭାବେ ଦୀର୍ଘ ବର୍ଷ ହେଲା ଓଡ଼ିଶାରେ ଶାସନ କରୁଥିବା ବିଜେଡି ଓ ଏହାର ସୁପ୍ରିମୋ ନବୀନଙ୍କ ମତିଗତିକୁ ନେଇ ସ୍ପଷ୍ଟ ଆଭାସ ପାଇପାରୁନାହାନ୍ତି ବିରୋଧୀ ଦଳ।

     ନବୀନ ସମଦୂରତା ଫଣ୍ଡା ଛାଡ଼ନ୍ତୁ। ନୀତିଶଙ୍କ ୨୦୨୪ ଫର୍ମୁଲାକୁ ଆପଣାନ୍ତୁ।  ଅଣବିଜେପି ଓ ଜନତା ପରିବାରକୁ ଏକାଠି କରିବାକୁ ପଣ ନେଇଥିବା ନୀତିଶଙ୍କ ସହ ହାତ ମିଳାନ୍ତୁ ନବୀନ। କାରଣ ଜନତା ଦଳରୁ ରାଜନୀତି ଆରମ୍ଭ କରିଥିଲେ ନବୀନ।  ବିହାର, ପଶ୍ଚିମବଙ୍ଗ, ଝାଡ଼ଖଣ୍ଡ ଓ ଓଡ଼ିଶା ଭଳି ଗରିବ ରାଜ୍ୟକୁ ସ୍ୱତନ୍ତ୍ର ପାହ୍ୟା ମାନ୍ୟତାର ଦ୍ୱାହି ଦେଇ ଭୁବନେଶ୍ୱରରେ ଆୟୋଜିତ ସାମ୍ୱାଦିକ ସମ୍ମିଳନୀରେ ଜେଡିୟୁର ରାଷ୍ଟ୍ରୀୟ ସାଧାରଣ ସମ୍ପାଦକ କେ.ସି.ତ୍ୟାଗୀ ନବୀନଙ୍କୁ ଏଭଳି ଅପିଲ୍ କରିଥିଲେ।

    ତେବେ ଆରମ୍ଭରୁ ନବୀନ ଉଭୟ ବିଜେପି ଓ କଂଗ୍ରେସ ସହ ସମଦୂରତ୍ୱ ରଖି ରାଜନୀତି କରି ଆସୁଛନ୍ତି। ପଦ୍ମପୁର ଉପନିର୍ବାଚନରେ ଜିତିବା ପରେ ବିଜେପିକୁ ଶାଣିତ ଆକ୍ରମଣ କରିଥିଲେ ନବୀନ। କେନ୍ଦ୍ରରେ ଥିବା ବିଜେପି ସହ ମିଶିକି ଲୋକଙ୍କ  ବିକାଶ କରିବୁ ବୋଲି କହିଥିଲେ ନବୀନ। କିନ୍ତୁ ତା ସହ ବି ଯୋଡ଼ିଥିଲେ, କେନ୍ଦ୍ରୀୟ ଅବହେଳାକୁ ଘଣ୍ଟ ଘୋଡ଼ାଇବାକୁ ଅପପ୍ରୟାସ ଚାଲିଛି। ସେପଟେ ଦଳ ବି କହିଛି, ରାଜ୍ୟର ବିକାଶ ଲାଗି ବିଜେଡି ଓ ନବୀନ ପୁରା ସମର୍ପିତ। ରାଜନୀତିକୁ ସେବା ଭାବେ ବ୍ରତ କରିଛି ଦଳ। ରାଜ୍ୟର ହିତକୁ ଦେଖି ନବୀନ ନିଷ୍ପତ୍ତି ନିଅନ୍ତି।

    ସେପଟେ ବିଜେଡି-ବିଜେପି କିଭଳି ଦିଲ୍ଲୀରେ କୋଳାକୋଳି ଓ ଏଠି କଳି କରି ସୁଆଙ୍ଗ ରଚୁଛନ୍ତି, ତାକୁ ନେଇ କଟାକ୍ଷ କରିଛି କଂଗ୍ରେସ। ନବୀନ ସମସ୍ତଙ୍କ ସହ ସମ୍ପର୍କ ଭଲ। ହୁଏତ ବାଧ୍ୟବାଧକତାରେ ଏ ସମ୍ପର୍କ ଥାଇପାରେ। କିନ୍ତୁ ନବୀନ ନୀତିଶଙ୍କ ପଟକୁ ଢଳିବା ସମ୍ଭାବନା କମି। ପ୍ରତିଟି କଥାରେ ମୋଦିଙ୍କ ସହ ଡିଲ୍ ହେଉଥିବାରୁ ବିଜେପିଠୁ ଦୂରେଇ ରହିଲେ ଅସୁବିଧାରେ ପଡ଼ିବେ ନବୀନ। ଆଉ ବିଜେପି କହିଛି, ନବୀନଙ୍କ ଜାତୀୟ ରାଜନୀତିରେ କୌଣସି ଭୂମିକା ନାହିଁ। ନବୀନ  ଓ ନୀତିଶ ଉଭୟ ବିଜେପି ଦୟାରୁ ମୁଖ୍ୟମନ୍ତ୍ରୀ। ବିହାରରେ ନୀତିଶ ଓ ଓଡ଼ିଶାର ନବୀନ ବିଜେପି ସହ ବିଶ୍ୱାସଘାତ କରିଛନ୍ତି। ଦୁଇ ବିଶ୍ୱାସଘାତକ ଏକାଠି ହେଲେ ବି କୌଣସି ପ୍ରଭାବ ପଡ଼ିବନି। ମୋଦିଙ୍କ ଲୋକପ୍ରିୟତା ଓ ଜନତାଙ୍କର ବିଶ୍ୱସନୀୟତା ଆଗରେ ଏଭଳି ଅନେକ ତୃତୀୟ ଫ୍ରଣ୍ଟ୍ ଓ ମେନ୍ ଫ୍ରଣ୍ଟ ଆସିଛି ଆଉ ଚାଲିଯାଇଛି।

    ମେନ୍ ଫ୍ରଣ୍ଟର ମଙ୍ଗ ଧରିଛନ୍ତି ନୀତିଶ। ଆଉ ଏହି ପରିପ୍ରେକ୍ଷୀରେ ନବୀନଙ୍କ ସମଦୂରତ୍ୱ ଫର୍ମୁଲା ଏ ସବୁ ଫ୍ରଣ୍ଟକୁ ନେଇ ବଦଳିବାର ସମ୍ଭାବନା କ୍ଷୀଣ ବୋଲି ଲାଗୁଛି।

    ନବକିଶୋର ସାହୁଙ୍କ ସହ ପ୍ରଦୀପ ନାୟକଙ୍କ ରିପୋର୍ଟ

  • ଜନ ସମ୍ପର୍କ ପଦଯାତ୍ରା

    ଭୁବନେଶ୍ୱର: ଆଜିଠୁ ବିଜେଡିର ଜନ ସମ୍ପର୍କ ପଦଯାତ୍ରା। ମାସେ ବ୍ୟାପୀ ଚାଲିବ ଏହି ପଦଯାତ୍ରା। ଏକାମ୍ର ନିର୍ବାଚନ ମଣ୍ଡଳୀର କାରଗିଲ ରୋଡ ସ୍ଥିତ ପଡିଆରୁ ଏହାର ଶୁଭରାମ୍ଭ କଲେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ମୁଖ୍ୟମନ୍ତ୍ରୀ ନିଜେ କାର୍ଗିଲ ବସ୍ତିରେ ପଦ ଯାତ୍ରା କରି ଏହାର ଆନୁଷ୍ଠାନିକ ଭାବେ ଶୁଭାରମ୍ଭ କରିଛନ୍ତି। ରାଜ୍ୟ ସରକାରଙ୍କ ସଫଳତା ଓ କେନ୍ଦ୍ର ସରକାରଙ୍କ ଅବହେଳାକୁ ନେଇ ଲୋକଙ୍କ ପାଖରେ ପହଂଚିବ ଦଳ।

  • ଲୋକଙ୍କ ପାଖକୁ ଯାଅ: ନବୀନ

    ଭୁବନେଶ୍ୱର: ବିଜେଡି କର୍ମଶାଳାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦବୋଧନ। ସବୁ ବର୍ଷ ପରି ଚଳିତ ବର୍ଷ ଗାନ୍ଧୀ ଜୟନ୍ତୀରୁ ପଦଯାତ୍ରା ଆରମ୍ଭ ହେଉଛି। ପଦଯାତ୍ରାକୁ ସଫଳ କରିବାକୁ ପ୍ରସ୍ତୁତି ବୈଠକରେ ସମସ୍ତ ନେତା ଓ କର୍ମକର୍ତ୍ତାଙ୍କୁ ଆହ୍ୱାନ କରିଛନ୍ତି ନବୀନ। ବିଜେଡି ଲୋକଙ୍କ ସହ ଅଛି ଓ ଲୋକଙ୍କ ପାଇଁ କାମ କରୁଛି। ସରକାରୀ ଯୋଜନା ଲୋକଙ୍କ ପାଖରେ ପହଞ୍ଚାଇବାକୁ କାମ କରିବାକୁ ମୁଖ୍ୟମନ୍ତ୍ରୀ କର୍ମକର୍ତ୍ତାଙ୍କୁ ଆହ୍ୱାନ କରିଛନ୍ତି।  ଚଳିତ ବର୍ଷ ସ୍ୱାଧୀନତାର 75 ବର୍ଷ ପୂର୍ତ୍ତି ପାଳନ କରୁଛି ଦେଶ। ସ୍ୱାଧୀନତାରେ ଓଡ଼ିଶାର ଗୁରୁତ୍ୱପୂର୍ଣ୍ଣ ଭୂମିକା ଥିଲା। ପଦଯାତ୍ରା ସମୟରେ ଏ ପ୍ରତି ଉପଯୁକ୍ତ ଫୋକଶ କରାଯିବ ଆବଶ୍ୟକ ବୋଲି କହିଛନ୍ତି ମୁଖ୍ୟମନ୍ତ୍ରୀ।  ସେପଟେ ବିଜେଡି ଉପସଭାପତି ଦେବୀ ମିଶ୍ର କହିଛନ୍ତି ବିଜୁ ଜନତା ଦଳ ତିଆରି ସମୟରେ ଶୂନ୍ୟତା ଥିଲା। ନବୀନଙ୍କ ନେତୃତ୍ୱରେ ଦଳ ଆଗକୁ ବଢ଼ିଛି ପଛକୁ ଫେରିନି। ଆର୍ଥିକ ସମସ୍ୟା, ସାଧନ ଭିତରେ ଦଳ ଆଗକୁ ବଢ଼ିଛି। ମିଶନଶକ୍ତି ଆନ୍ଦୋଳନର ପରି କଳ୍ପନା କରାଯାଇଛି। ବିଭିନ୍ନ ସମୟରେ ସ୍ଵତନ୍ତ୍ର ଫୋକାସ ପାଇଁ ଦାବି ଉଠିଛି। ସଂଘୀୟ ବ୍ୟବସ୍ଥାରେ ଆବଶ୍ୟକତା ଠିକ୍ ସମୟରେ ଉପଲବ୍ଧ ହେବା ଆବଶ୍ୟକ। ଚାଷୀର ଆୟ ୩ ଗୁଣା ପାଇଁ ଆହ୍ୱାନ କରିଛନ୍ତି। 5T  ଷ୍ଟାର୍ଟ ଆପ, ସ୍ୱାସ୍ଥ୍ୟ ଯୋଜନା, ପ୍ରାକୃତିକ ବିପର୍ଯ୍ୟୟ, ଶିଳ୍ପ ପ୍ରତିଷ୍ଠା  ଆଦି କ୍ଷେତ୍ରରେ ସରକାର ସଫଳ ହୋଇଛନ୍ତି। ବିଭିନ୍ନ କେନ୍ଦ୍ରୀୟ ଯୋଜନା ବନ୍ଦ ହେବା ଯୋଗୁଁ ରାଜ୍ୟ କ୍ଷତି ସହୁଛି। କେନ୍ଦ୍ରୀୟ ଅନୁଦାନ କମିଛି। ରାଜ୍ୟ ସରକାର ବିକାଶ ପାଇ ଆଗକୁ ବଢୁଥିବା ବେଳେ ସଠିକ୍ ସମୟରେ କେନ୍ଦ୍ରୀୟ ସହଯୋଗ ମିଳୁନି।  45 ପ୍ରତିଶତ ଭୋଟରୁ ବର୍ତ୍ତମାନ 52 ପ୍ରତିଶତ ଭୋଟର  ପହଞ୍ଚିଛି। ଏହାକୁ  କାୟମ ରଖିବାକୁ ଆହ୍ବାନ କରିଛନ୍ତି ଦେବୀ ମିଶ୍ର। ବିଜୁ ଜନତା ଦଳ କିପରି ସାମାଜିକ ଆନ୍ଦୋଳନରେ ପରିଣତ ହୋଇଛି ତାହାର ତଥ୍ୟ ରଖିଛନ୍ତି ମନ୍ତ୍ରୀ ଅତନୁ ସବ୍ୟସାଚୀ ନାୟକ। ରାଜନୈତିକ କ୍ଷେତରେ ମହିଳାଙ୍କୁ ଅଗ୍ରାଧିକାର ଦିଆଯାଇଛି। 55 ପ୍ରତିଶତରୁ ଅଧିକ ମହିଳା ନିର୍ବାଚିତ ହୋଇଛନ୍ତି। ସେପଟେ ଗାନ୍ଧୀ ଜୟନ୍ତୀରୁ ମାସେ ବ୍ୟାପି ଚାଲିବ ବିଜେଡିର ଜନ ସମ୍ପର୍କ ପଦଯାତ୍ରା। ଏଥିପାଇଁ ଭୁବନେଶ୍ୱର ସ୍ଥିତ ବରମୁଣ୍ଡା ପଡିଆରେ ରଣନୀତି ପ୍ରସ୍ତୁତ କରିବ ଦଳ। ଏଥିପାଇଁ ଆଜି ଓ 30 ତାରିଖ ରେ ବରମୁଣ୍ଡା ପଡିଆରେ ସମ୍ମିଳନୀ ବିଜେଡିର ସମ୍ମିଳନୀ ଚାଲିବ। ସକାଳ 9 ରୁ କାର୍ଯ୍ୟକ୍ରମ ଆରମ୍ଭ ହେବ।

  • ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ

    ଭୁବନେଶ୍ୱର: ମେକ୍ ଇନ୍ ଓଡିଶାର ତୃତୀୟ ସଂସ୍କରଣକୁ ସଫଳ କରିବା ସହ ରାଜ୍ୟକୁ କିପରି ଅଧିକ ପୁଞ୍ଜି ଆସିବ ସେନେଇ ଅଣ୍ଟା ଭିଡିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏନେଇ ଆଜି ଦିଲ୍ଲୀ ଗସ୍ତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବିଭିନ୍ନ ଦେଶର ରାଷ୍ଟ୍ରଦୂତ ଓ ଶିଳ୍ପପତି ମାନଙ୍କ ସହ କଥା ହେବେ ନବୀନ। ଏଥିପାଇଁ ୧୬ ରାଷ୍ଟ୍ରର ରାଷ୍ଟ୍ରଦୂତଙ୍କୁ ନିମନ୍ତ୍ରଣ କରାଯାଇଛି। ମେକ୍ ଇନ୍ ଓଡିଶାର ତୃତୀୟ ସଂସ୍କରଣ ପୂର୍ବରୁ ଅଗଷ୍ଟ ୩୧ରେ ବିଭିନ୍ନ ଦେଶର ରାଷ୍ଟ୍ରଦୂତ ଓ ଶିଳ୍ପପତିମାନଙ୍କ ସହ ଦିଲ୍ଲୀରେ କଥା ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏଥିପାଇଁ ଦିଲ୍ଲୀରେ ସ୍ୱତନ୍ତ୍ର କାର୍ଯ୍ୟକ୍ରମ ଆୟୋଜନ ହୋଇଛି। କାର୍ଯ୍ୟକ୍ରମକୁ ଆମେରିକା, ବ୍ରିଟେନ, ଜର୍ମାନୀ, ଫ୍ରାନ୍ସ, ଇଟାଲି, ବେଲିଜିୟମ, ସିଙ୍ଗାପୁର, ଜାପାନ ଭଳି ୧୬ ଦେଶରରାଷ୍ଟ୍ରଦୂତଙ୍କୁ ନିମନ୍ତ୍ରଣ କରାଯାଇଛି। ଓଡିଶାରେ ଶିଳ୍ପ ପ୍ରତିଷ୍ଠାର ସୁଯୋଗ ଓ ରାଜ୍ୟ ସରକାରଙ୍କ ଶିଳ୍ପନୀତି ଏବଂ ଇଜ ଅଫ ଡୁଇଙ୍ଗ ବିଜିନେସ ସଂପର୍କରେ କଥା ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟରେ କିପରି ଷ୍ଟିଲ, କେମିକାଲ, ପେଟ୍ରୋକେମିକାଲ, ଟେକ୍ସଟାଇଲ, ସି ଫୁଡ ପ୍ରୋସେସିଙ୍ଗ ଭଳି ସେକ୍ଟରରେ ଅଧିକ ବିଦେଶୀ ନିବେଶ ହେବ ତାହାରି ଉପରେ ଫୋକସ କରାଯାଉଥିବା ଶିଳ୍ପ ମନ୍ତ୍ରୀ କହିଛନ୍ତି।

  • ତ୍ରୀରଙ୍ଗା ଉଡାଇଲେ ନବୀନ

    ଭୁବନେଶ୍ୱର: ରାଜ୍ୟସ୍ତରୀୟ ସ୍ୱାଧୀନତା ଦିବସ ପ୍ରଦର୍ଶନୀ ପଡ଼ିଆରେ ଅନୁଷ୍ଠିତ ହୋଇଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବରେ ଯୋଗ ଦେଇ ଜାତୀୟ ପତାକା ଉତ୍ତୋଳନ କରିବା ସହ ସମ୍ମିଳିତ ପ୍ୟାରେଡରେ ଅଭିବାଦନ ଗ୍ରହଣ କରିଥିଲେ। ଦେଶର ବିକାଶ ସହ ତାଳ ଦେଇ ଓଡ଼ିଶା ଆଗେଇଚାଲିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ। ୭୫ ବର୍ଷରେ ଓଡ଼ିଶା ଅନେକ ଲ୍ୟାଣ୍ଡମାର୍କ ହାସଲ କରି ଦେଶକୁ ରାସ୍ତା ଦେଖାଇଛି। କର୍ମନିଯୁକ୍ତିକୁ ବିଶେଷ ଗୁରୁତ୍ୱ ଦିଆଯାଉଛି ବୋଲି କହିଛନ୍ତି ମୁଖ୍ୟମନ୍ତ୍ରୀ।

    ଓଡ଼ିଶାର ସଫଳତା ଅନ୍ୟମାନଙ୍କ ପାଇଁ ମାର୍ଗଦର୍ଶକ ସାଜିଛି। ଖାଦ୍ୟ ଅଭାବୀ ରାଜ୍ୟରୁ ବଳକା ଖାଦ୍ୟର ରାଜ୍ୟ ହେବା, ବିପର୍ଯ୍ୟୟ ପରିଚାଳନାରେ ବିଶ୍ୱ ପାଇଁ ଆଦର୍ଶ, କ୍ରୀଡ଼ା ହବ୍ ଭାବରେ ସ୍ୱତନ୍ତ୍ର ପରିଚୟ ସୃଷ୍ଟି, ୭୦ ଲକ୍ଷ ମାଆଙ୍କୁ ସଶକ୍ତ କରିବା ଆଦି ଲ୍ୟାଣ୍ଡମାର୍କ ଓଡ଼ିଶା ଜୟଯାତ୍ରାର ପ୍ରତୀକ। ରାଜ୍ୟସ୍ତରୀୟ ସ୍ୱାଧୀନତା ଦିବସରେ ମୁଖ୍ୟ ଅତିଥି ଭାବେ ଯୋଗ ଦେଇ ଜାତୀୟ ପତାକା ଉତ୍ତୋଳନ କରିବା ସହ ରାଜ୍ୟବାସୀଙ୍କୁ ଏଭଳି ମର୍ମରେ ସମ୍ୱୋଧିତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

    ଓଡ଼ିଶାରେ ଆଜି ଟ୍ରାନ୍ସଫରମେସନର ନୂଆ ଯୁଗ ଆରମ୍ଭ ହୋଇଛି। ବିଭିନ୍ନ କ୍ଷେତ୍ରରେ ଭାରତ ଆଜି ଆଗୁଆ ଦେଶ ସହ ପ୍ରତିଯୋଗିତା କରୁଥିଲା ବେଳେ ଓଡ଼ିଶା ଏହି ବିକାଶ ସହ ତାଳ ଦେଇ ଆଗେଇଚାଲିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ। ଶିକ୍ଷାକୁ ଫୋକସ କରାଯାଇଛି। ଗୁଣାତ୍ମକ ଶିକ୍ଷା ପାଇଁ ସରକାର ଦୃଢ଼ ପ୍ରତିଶୃତିବଦ୍ଧ। କୋଟିଆରୁ ନେଇ ଭୁବନେଶ୍ୱରର ଆଦର୍ଶ ବିଦ୍ୟାଳୟରେ ୧ ଲକ୍ଷ ପିଲା ପାଠ ପଢିବା, ୫ହଜାର ଝିଅଙ୍କ ପାଇଁ ହଷ୍ଟେଲ, ଯୁବବର୍ଗଙ୍କ ପାଇଁ କର୍ମନିଯୁକ୍ତି, ଜନଜାତିଙ୍କ ବିକାଶ ଓ ସେମାନଙ୍କ ସଶକ୍ତିକରଣ ଦିଗରେ ଓଡ଼ିଶା ବହୁତ ଭଲ କାମ କରୁଥିବା କହିଛନ୍ତି ନବୀନ। ଜଗନ୍ନାଥଙ୍କ ପବିତ୍ର ଭୂମିରେ ଓଡ଼ିଆ ସର୍ବଦା ଆଞ୍ଚଳିକ ମନୋଭାବରୁ ଉଠି ନାସନାଲ ସ୍ପିରିଟ୍ ରେ କାମ କରନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ।

    ସଂଗ୍ରାମୀଙ୍କ ଅବଦାନକୁ ଶତତ ପ୍ରଣାମ ଓ ତାଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି ମୁଖ୍ୟମନ୍ତ୍ରୀ। କୋଭିଡ୍ ମହାମାରୀ ବେଳେ ମାନବଜାତିର ସେବାରେ ଶହୀଦ ହୋଇଥିବା କୋଭିଡ୍ ଯୋଦ୍ଧାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ମୁଖ୍ୟମନ୍ତ୍ରୀ। ଦୈନିକ କିଛି ସମୟ ଦେଶ ପାଇଁ ଦେଲେ ବଡ଼ ପରିବର୍ତ୍ତନ ଆଣିପାରିବା ବୋଲି ଅପିଲ୍ କରିଛନ୍ତି ନବୀନ। ସମ୍ମିଳିତ ପ୍ୟାରେଡରେ ଅଭିବାଦନ ଗ୍ରହଣ କରିଛନ୍ତି ମୁଖ୍ୟମନ୍ତ୍ରୀ।

    • ପ୍ରଦୀପ ନାୟକଙ୍କ ରିପୋର୍ଟ
  • ନୀତିଶ କ’ଣ ନବୀନଙ୍କ ସହ ତୁଳନୀୟ କି ?

    ବିହାର ରାଜନୀତିକୁ ନେଇ ଚାରିଆଡ଼େ ହଇଚଇ। ନୀତିଶଙ୍କ ନେତୃତ୍ୱାଧୀନ ନୂଆ ସରକାର ଓ ଅଷ୍ଟମ ଥର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ନୀତିଶଙ୍କ ରେକର୍ଡକୁ ନେଇ ବି ସେତିକି ଚର୍ଚ୍ଚା। ହେଲେ ନୀତିଶ କଅଣ ନବୀନଙ୍କ ସହ ତୁଳନୀୟ କି। ବିହାର ଭଳି ଓଡ଼ିଶାରେ ରାଜନୈତିକ ଅସ୍ଥିରତା ଅଛି କି। ଏହାର ଉତ୍ତର ଗୋଟିଏ ଶବ୍ଦରେ ହେଉଛି ବିଲକୁଲ ନୁହେଁ। କାରଣ ପଟ୍ଟ ପରିବର୍ତ୍ତନ, ସୁବିଧାବାଦୀ ରାଜନୀତିର ବିଶ୍ୱାସରେ ବ୍ରତୀ ନୀତିଶ। କ୍ଷମତା ଚୌକି ତାଙ୍କ ପାଇଁ ସବୁ କିଛି। ସେଠି ଆଦର୍ଶ ଓ ବିଚାରାଧାରାର କିଛି ମାଏନା ରଖୁନି। ସେଥିଲାଗି ତ ସିଏମ ଚୌକି ପାଇଁ ସର୍ବାଧିକ ଅଷ୍ଟମ ଥର ଶପଥ ନେଇଥିଲେ ବି ନୀତିଶଙ୍କ ପତିଆରା ଓ ପ୍ରଭାବକୁ ଭିନ୍ନ ଦୃଷ୍ଟିରେ ଦେଖନ୍ତି ରାଜନୀତିକ ମହଲ।

    ପ୍ରଧାନମନ୍ତ୍ରୀ ପଦ ପାଇଁ ଲାଳାୟିତ ନୁହେଁ ବୋଲି କେତେବେଳେ କୁହନ୍ତି ତ ସମାନ୍ତରାଳ ଭାବେ ପୁଣି କୁହନ୍ତି ସବୁ ବିରୋଧୀ ଦଳ ଏକାଠି ହୁଅନ୍ତୁ ବୋଲି ସେ ଚାହାଁନ୍ତି। ହେଲେ ଓଡ଼ିଶାରେ ସ୍ଥିର ଶାସନ ଓ ସ୍ଥିର ନେତୃତ୍ୱ ଦେବାରେ ରେକର୍ଡ କରିଛନ୍ତି ନବୀନ ପଟ୍ଟନାୟକ। ତା ପୁଣି କ୍ରମାଗତ ଆସ୍ଥା ବଢ଼ିଚାଲିଛି ଜନମତର। ୨୦୧୨ ମିଡନାଇଟ ଅପରେସନ ଭଳି ଅତୀତକୁ ଛାଡ଼ିଦେଲେ ଏଭଳି କୌଣସି ରାଜନୈତିକ ବିପଦ ମାଡ଼ିଆସିନି ନବୀନଙ୍କୁ। ସେଥିଲାଗି ତ ସେ ଅବିଚଳିତ। କଂଗ୍ରେସ ଓ ଏନଡିଏରୁ ସମଦୂରତ୍ୱ ବଜାୟ ରଖିବାରେ ସିଦ୍ଧହସ୍ତ। ପ୍ରସଙ୍ଗଭିତ୍ତିକ ସମର୍ଥନ ଦିଅନ୍ତି ସତ। କିନ୍ତୁ ସେଥିରେ ରାଜ୍ୟସ୍ୱାର୍ଥର ଛିଟା ଛାଟିଦେଇଥାଆନ୍ତି। ଇଣ୍ଡିଆ ଟୁଡେ ମୁଡ୍ ଅଫ ନେସନ ପୋଲରେ ତାଙ୍କ ଶାସନକୁ ନେଇ ୭୮ ପ୍ରତିଶତ ସନ୍ତୁଷ୍ଟ ଥିବା ଜଣାପଡ଼ିଛି। ଅର୍ଥାତ୍ ନିଜ ମୁଖ୍ୟମନ୍ତ୍ରୀଙ୍କୁ ନେଇ ସନ୍ତୁଷ୍ଟ ବର୍ଗରେ ନବୀନ ଶୀର୍ଷରେ। ସେଥିଲାଗି ତ ଜାତୀୟ ରାଜନୀତିରେ ତାଙ୍କର ଭୂମିକାକୁ ଗୁରୁତ୍ୱ ଦିଆଯାଏ।

    କିନ୍ତୁ ସେ ଓଡ଼ିଶା ରାଜନୀତି ଛାଡ଼ିବେନି ବୋଲି ଏକରକମ ପକ୍କା। ନବୀନ ଷଷ୍ଠ ଥର ମୁଖ୍ୟମନ୍ତ୍ରୀ ହେବା ପକ୍କା ବୋଲି କହିଲେଣି ଦଳୀୟ ନେତା। ପରିବର୍ତ୍ତନର ସୂତ୍ରଧର ବୋଲି ନୀତିଶଙ୍କ ମନ୍ତବ୍ୟକୁ ଉଦ୍ଧୃତ କରି ତୁଳନା କଲେଣି। ଅଷ୍ଟମ ଥର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ନୀତିଶ। କିନ୍ତୁ କ୍ଷମତା ଲାଗି ସବୁସ୍ତରକୁ ଯାଇପାରିବେ ବୋଲି ଅପବାଦ ବି ତାଙ୍କ ପଛେ ପଛେ ଲାଗିରହିଛି। ଜନାଦେଶକୁ ଅପମାନ ଓ ବିହାରବାସିନ୍ଦାଙ୍କୁ ବିଶ୍ୱାସଘାତ କରିଥିବାର ଆରୋପ ଲଦାଯାଇଛି। ହେଲେ ଏ ସବୁ ଅପବାଦ ଛୁଇଁପାରିନି ନବୀନଙ୍କୁ। ନବୀନଙ୍କ ନିର୍ମଳ ଭାବମୂର୍ତ୍ତି ଆଗରେ ନୀତିଶଙ୍କ ଧଳା ପୋଷାକ ତଳେ କ୍ଷମତା ଆଗରେ ସବୁ ତୁଛ ଭାବମୂର୍ତ୍ତି ଯେମିତି ମଳିନ।

    • ପ୍ରଦୀପ ନାୟକଙ୍କ ରିପୋର୍ଟ
Back to top button